సూడాన్లో బంగారు గని కుప్పకూలి 67 మంది మృతి
సూ డాన్లోని వెస్ట్ కోర్డోఫ్యాన్ ప్రావిన్స్లో ఓ బంగారు గని మంగళవారం రాత్రి అకస్మాత్తుగా కుప్పకూలింది. ఈ ప్రమాదంలో ఇప్పటివరకు 67 మంది ప్రాణాలు కోల్పోయినట్లు స్థానిక అధికారులు వెల్లడించారు. ప్రమాద సమయంలో గనిలో పనిచేస్తున్న పలువురు కార్మికులు శిథిలాల కింద చిక్కుకున్నట్లు సమాచారం. వెస్ట్ కోర్డోఫ్యాన్ ప్రాంతంలో బంగారం తవ్వకాలు కొనసాగుతున్న ఓ గని ఒక్కసారిగా కూలిపోవడంతో అక్కడ పనిచేస్తున్న కార్మికులు ప్రమాదంలో చిక్కుకున్నారు. గని నిర్మాణం కూలిపోవడంతో భారీగా శిథిలాలు పేరుకుపోయాయి. దీంతో లోపల ఉన్న వారిని బయటకు తీసుకురావడం సహాయక బృందాలకు సవాలుగా మారింది. ప్రమాదంలో ఇప్పటివరకు 67 మంది మరణించినట్లు అధికారులు నిర్ధారించారు. అయితే గనిలో ఇంకా పలువురు చిక్కుకుని ఉండే అవకాశం ఉందని స్థానిక అధికారులు తెలిపారు. దీంతో మృతుల సంఖ్య మరింత పెరిగే అవకాశం ఉందని పేర్కొన్నారు. గనిలో ఎంతమంది ఉన్నారనే దానిపై పూర్తి సమాచారం ఇంకా అందాల్సి ఉంది. గని కూలిన విషయం తెలియగానే స్థానిక అధికారులు, సహాయక బృందాలు ఘటనాస్థలికి చేరుకున్నాయి. శిథిలాలను తొలగిస్తూ లోపల చిక్కుకున్న వారిని గుర్తించే ప్రయత్నాలు కొనసాగుతున్నాయి. ...