LATEST NEWS AP TO TG

తెలంగాణ లోని నిజామాబాద్‌లో నిర్వహించిన పాంచజన్య సంకల్ప సభలో కల్వకుంట్ల కవిత పాల్గొన్నారు. ఈ సందర్భంగా ఆమె మాట్లాడుతూ కేసీఆర్ పెద్ద కొడుకుగా ప్రశాంత్‌ రెడ్డి చెప్పుకుంటారని, కానీ, మహాభారతంలో శకుని వంటి వ్యక్తి ఆయనని మండిపడ్డారు. జీవితంలో హరీశ్‌ రావు, సంతోశ్ కుమార్‌నైనా క్షమిస్తా కానీ ప్రశాంత్‌ రెడ్డిని మాత్రం క్షమించనని కవిత అన్నారు. బీఆర్‌ఎస్‌ అధికారం కోల్పోయిన రెండో రోజే కాంగ్రెస్‌ నాయకులను ఆయన కలిశారని ఆరోపించారు. కేసీఆర్‌ పెట్టిన తిండి తిని తండ్రీ, బిడ్డలను విడదీశారని కవిత తీవ్ర వ్యాఖ్యలు చేశారు. తెలంగాణ రాజకీయాల్లో కొత్త శక్తి రావాల్సిందేనని అన్నారు. నిజామాబాద్ జిల్లాలో తనకు మరోసారి అవకాశం ఇవ్వాలని ప్రజలను కోరారు. 'నిజామాబాద్ కోడలిగా ఇక్కడ పని చేశా. నాకు మళ్లీ ఒక అవకాశం ఇవ్వండి. మీరే నా ధైర్యం' అని కవిత అన్నారు. రాజకీయాలు చేయాలనుకుంటే తాను ఎక్కడికైనా, ఏ పార్టీలోకైనా వెళ్లగలనని, కానీ ప్రజల కోసం పనిచేయాలనే ఉద్దేశంతోనే రాజకీయాల్లో ఉన్నానని చెప్పారు. ఈ సందర్భంగా తనపై నమోదైన కేసులను ప్రస్తావిస్తూ కవిత భావోద్వేగానికి గురయ్యారు. 'ఎన్ని కేసులు పెట్టినా నేను తప్పు చేయలేదనే చెప్పా. నన్ను తీహార్ జైలులో ఎందుకు పెట్టారు?' అని కవిత ప్రశ్నించారు. తాను కష్టాల్లో ఉన్నప్పుడు కనికరం చూపకుండా పార్టీ నుంచి వెళ్లగొట్టారని ఆవేదన వ్యక్తం చేశారు. నిజాయితీగా ఉన్నాను కాబట్టే బాధతో కన్నీళ్లు వస్తున్నాయని అన్నారు. తనను పిరికిదాన్ని అనుకోవద్దని హెచ్చరించారు. జైలులో ఉన్న సమయంలో తన అత్తగారు అండగా నిలిచారని కవిత గుర్తు చేసుకున్నారు. మరోవైపు, కాళేశ్వరం ప్రాజెక్టుపైనా తెలంగాణ రక్షణ సేన పార్టీ అధ్యక్షురాలు తీవ్ర విమర్శలు గుప్పించారు. ప్రాజెక్టుకు రూ.లక్ష కోట్లు ఖర్చు చేసినా నిజామాబాద్ జిల్లాలో ఒక్క ఎకరానికీ నీరు అందలేదని ఆరోపించారు. బీఆర్‌ఎస్‌ పాలనలో అవినీతి జరిగిందని, అప్పటి ఎమ్మెల్యేల ఆస్తులు పదేళ్లలో భారీగా పెరిగాయని విమర్శించారు.

కన్నడ హీరో యశ్ తల్లి పుష్ప తన కుమారుడిపై జరుగుతున్న దుష్ప్రచారంపై తీవ్రంగా స్పందిస్తూ ఆవేదన వ్యక్తం చేశారు. కొందరు కావాలనే యశ్ ఎదుగుదలను చూసి తట్టుకోలేక టార్గెట్ చేస్తున్నారని, అతడేమీ ఉగ్రవాది కాదని కన్నీళ్లు పెట్టుకున్నారు. ఒక సాధారణ ఆర్టీసీ బస్ డ్రైవర్ కొడుకుగా పుట్టిన యశ్, ఎలాంటి సినీ బ్యాక్‌గ్రౌండ్ లేకుండా కేవలం తన సొంత శ్రమ, కష్టం నమ్ముకుని ఈ స్థాయికి ఎదిగాడని ఆమె గుర్తు చేసుకున్నారు. ఇండస్ట్రీలోకి వచ్చిన ప్రారంభంలో ఎన్నో కష్టాలు అనుభవించాడని, 'కేజీఎఫ్' సినిమాకు ముందే కన్నడలో ఆయన నటించిన 5 సినిమాలు సూపర్‌హిట్‌లుగా నిలిచాయని తెలిపారు. ఎంతో క్రమశిక్షణతో, కష్టపడి దేశం గర్వించదగ్గ నటుడిగా ఎదిగిన ఒక కళాకారుడిపై అసత్య ప్రచారాలు చేస్తూ మానసికంగా కుంగదీసేందుకు కొందరు కుట్ర పన్నుతున్నారని ఆరోపించారు. ఒక తల్లిగా తన కొడుకును ఈ రీతిలో టార్గెట్ చేయడం ఎంతో బాధాకరమని, సమాజం నిజానిజాలు తెలుసుకోవాలని విజ్ఞప్తి చేశారు.

ఉత్తరప్రదేశ్‌లోని ప్రయాగ్‌రాజ్-కౌశంబి సరిహద్దులో బాణసంచా తయారీ కేంద్రంలో భారీ పేలుడు సంభవించి ఎనిమిది మంది మరణించారు. ఈ పేలుడు ధాటికి కేంద్రం నేలమట్టం కావడంతో శిథిలాల కింద మరికొంతమంది చిక్కుకున్నట్లు సమాచారం. ఈ దుర్ఘటనలో 15 మందికి పైగా గాయపడ్డారు. ప్రస్తుతం సహాయక చర్యలు కొనసాగుతున్నాయి. పేలుడు ధాటికి ఆ తయారీ కేంద్రం పూర్తిగా నేలమట్టమవడమే కాకుండా, సమీపంలోని భవనాలు కూడా దెబ్బతిన్నాయి. భారీ శబ్దంతో పేలుళ్లు సంభవించడంతో చుట్టుపక్కల ప్రాంత ప్రజలు తీవ్ర భయాందోళనలకు గురయ్యారు. ప్రమాద సమయంలో కేంద్రంలో పలువురు కార్మికులు పనిచేస్తున్నట్లు తెలుస్తోంది. శిథిలాల కింద పలువురు చిక్కుకుని ఉండటంతో మృతుల సంఖ్య మరింత పెరిగే అవకాశం ఉందని అధికారులు భావిస్తున్నారు. సమాచారం అందుకున్న వెంటనే పోలీసులు, అగ్నిమాపక సిబ్బంది, ఇతర రెస్క్యూ బృందాలు ఘటనా స్థలానికి చేరుకుని సహాయక చర్యలు చేపట్టాయి. బుల్డోజర్ల సహాయంతో శిథిలాలను తొలగిస్తూ చిక్కుకున్న వారిని బయటకు తీస్తున్నారు. గాయపడిన వారిని వెంటనే సమీపంలోని ఆసుపత్రులకు తరలించి వైద్యసేవలు అందిస్తున్నారు. ఘటనపై కేసు నమోదు చేసిన పోలీసులు పేలుడుకు గల కారణాలపై దర్యాప్తు చేస్తున్నారు.

నేపాల్ వరద బాధితులకు కొరియన్ పాప్‌స్టార్ లీ నో 100 మిలియన్ వాన్ ల (భారత కరెన్సీలో రూ.69 లక్షలు) విరాళమిచ్చి దాతృత్వం చాటుకున్నారు. వరద ప్రభావిత ప్రాంతాల్లో సహాయక చర్యల కోసం ఈ మొత్తాన్ని వరల్డ్ విజన్ అనే స్వచ్ఛంద సంస్థ ద్వారా పంపించారు. ''ఈ కష్ట సమయంలో నేపాల్‌ను ఆదుకునేందుకు నా వంతు ప్రయత్నం చేశా. వీలైనంత త్వరగా ఆ దేశ ప్రజలు ఈ విపత్తు నుంచి కోలుకోవాలని ఆకాంక్షిస్తున్నా'' అని లీ నో ఈ సందర్భంగా వెల్లడించారు. సామాజిక సేవలో లీ నో ఎప్పుడూ ముందుంటారు. 2014 నుంచి వరల్డ్ విజన్ సంస్థతో కలిసి ప్రపంచవ్యాప్తంగా చిన్నారుల సంరక్షణ కోసం తన వంతు సాయం అందిస్తున్నారు. 2024లో ఆహార సంక్షోభంతో ఇబ్బంది పడుతున్న దేశాలకు 100 మిలియన్ వన్‌ల విరాళం అందించారు. గతేడాది కూడా తన పుట్టినరోజు సందర్భంగా తీవ్రమైన అనారోగ్య సమస్యలతో బాధపడుతున్న వారి కోసం భారీ విరాళమిచ్చారు.

నీట్-యూజీ పేపర్ లీక్ వ్యవహారంలో దేశవ్యాప్తంగా నిరసనలు చేపట్టిన విద్యార్థులు, ఆందోళనకారులపై నమోదైన ఎఫ్‌ఐఆర్‌లను రద్దు చేయాలని కేంద్ర ప్రభుత్వం సుప్రీంకోర్టును కోరింది. ఢిల్లీతో సహా పలు రాష్ట్రాల్లో జరిగిన ఆందోళనల వేళ శాంతిభద్రతల సమస్యలు, హింసాత్మక ఘటనల నేపథ్యంలో ప్రొటెస్టర్లపై పోలీసులు వివిధ సెక్షన్ల కింద కేసులు నమోదు చేశారు. విద్యార్థుల భవిష్యత్తు, వారి కెరీర్‌ను దృష్టిలో ఉంచుకుని, పూర్తి న్యాయం చేకూర్చేందుకు భారత రాజ్యాంగంలోని ఆర్టికల్ 142 ప్రకారం సుప్రీంకోర్టుకు ఉన్న అసాధారణ (విచక్షణాధికార) అధికారాలను ఉపయోగించి ఆ ఎఫ్‌ఐఆర్‌లన్నింటినీ కొట్టివేయాలని కేంద్రం విజ్ఞప్తి చేసింది. కేంద్ర ప్రభుత్వం తరఫున సొలిసిటర్ జనరల్ తుషార్ మెహతా ఈ అంశాన్ని భారత ప్రధాన న్యాయమూర్తి నేతృత్వంలోని ధర్మాసనం ఎదుట ప్రత్యేకంగా ప్రస్తావించారు. విద్యార్థులపై క్రిమినల్ రికార్డులు పడకుండా ఉపశమనం కల్పించాలన్న ఈ అభ్యర్థనపై అత్యున్నత న్యాయస్థానం సానుకూలంగా స్పందిస్తూ, తదుపరి విచారణను రేపటికి వాయిదా వేసింది.

జొమాటో తన కస్టమర్ సపోర్ట్ సెంటర్‌ను మూసివేస్తున్నట్లు ప్రకటించింది. మూసివేతలో భాగంగా హైదరాబాద్ ఆఫీసులో పనిచేస్తున్న సుమారు 250 మంది ఉద్యోగులను తొలగిస్తున్నట్లు ఆ కంపెనీ వెల్లడించింది. కేవలం ఖర్చులు తగ్గించుకోవడం కోసమే కాకుండా.. పునర్వ్యవస్థీకరణలో భాగంగానే ఈ లేఆఫ్స్ చేపట్టినట్లు ప్రకటించింది. హైదరాబాద్‌లో సెంటర్‌ను మూసివేస్తున్నప్పటికీ.. జొమాటో తన ఇన్-హౌస్ కస్టమర్ సపోర్ట్ ఆపరేషన్స్‌ను పూర్తిగా ఆపలేదని జొమాటో ప్రకటించింది. వీటిని హర్యానాలోని గురుగ్రామ్‌లో ఉన్న తన హెడ్ ఆఫీసుకు మారుస్తున్నట్లు ప్రకటించింది. ప్రొడక్ట్, టెక్నాలజీ, అనలిటిక్స్ వంటి కీలక విభాగాలకు కస్టమర్ సపోర్ట్ టీమ్ లను మరింత చేరువ చేయాలనే ఉద్దేశంతోనే ఈ నిర్ణయం తీసుకున్నట్లు జొమాటో కంపెనీ ప్రకటించింది. గత 6 నెలలుగా కస్టమర్ కేర్ బాధ్యతలను బయటి సంస్థలకు అవుట్‌సోర్సింగ్ చేయడం కూడా క్రమంగా పెరుగుతోన్న నేపథ్యంలో ఫుడ్ డెలవరీ కంపెనీ ఈ నిర్ణయం తీసుకుంది. తాజా నిర్ణయంతో ఉద్యోగం కోల్పోతున్న సిబ్బందికి జొమాటో తగిన భద్రత కల్పిస్తున్నట్లు తెలిసింది. ఉద్యోగులకు ఆగస్ట్ నెల పూర్తి జీతంతో పాటు కాంట్రాక్ట్ నోటీస్ పే, ఒకేసారి చెల్లించే ఎక్స్-గ్రేషియా కలిపి మొత్తం 4 నెలల వేతనాన్ని సెవెరెన్స్ ప్యాకేజీ కింద చెల్లిస్తున్నట్లు సమాచారం. అంతేకాకుండా ఉద్యోగం నుంచి రిలీజైన తర్వాత కూడా మార్చి 31, 2027 వరకు మెడికల్ ఇన్సూరెన్స్, కౌన్సెలింగ్ సపోర్ట్ కొనసాగించుకునే వెసులుబాటు జొమాటో కల్పించినట్లు తెలుస్తోంది. ప్రస్తుతం కంపెనీలు కస్టమర్ సపోర్ట్ కోసం భారీ ఇన్-హౌస్ టీమ్‌లను ఉంచుకోవడానికి బదులుగా ఏఐ, ఆటోమేషన్, థర్డ్-పార్టీ సర్వీస్ ప్రొవైడర్లపై ఎక్కువగా ఆధారపడుతున్న సంగతి తెలిసిందే. ఇదే ట్రెండ్ కొనసాగుతుండటంతో కస్టమర్ కేర్ ఉద్యోగులపై వేటు పడుతున్నట్లు నిపుణులు చెబుతున్నారు. గత ఏడాది ఏప్రిల్ 2025లోనూ జొమాటో సుమారు 500 మంది జూనియర్ స్థాయి ఉద్యోగులను తొలగించింది.

కర్ణాటకలోని బెంగళూరు జిల్లా దొడ్డబల్లాపుర రైల్వేస్టేషన్‌లో ట్రాక్‌ దాటుతుండగా ముగ్గురు ఆంధ్రప్రదేశ్ వాసులు దుర్మరణం చెందారు. మృతి చెందిన వారిలో మహిళతో సహా ఇద్దరు బాలికలు ఉన్నారు. ఆదివారం సెలవు కావడంతో దొడ్డబళ్లపురలోని బంధువుల ఇంటికి వెళ్లి సోమవారం తిరిగి వస్తుండగా ఈ ప్రమాదం జరిగింది. ఈ ప్రమాదంలో హిందూపురానికి చెందిన ఇర్ఫాన (46), రుకియా(13), రాకియా ( 8) అనే బాలికలు చనిపోయారు. సమాచారం అందుకున్న పోలీసులు ఘటనా స్థలానికి చేరుకుని కేసు నమోదు చేసి మృతదేహాలను మార్చురి ఆసుపత్రికి తరలించారు.

బెంగళూరులో ఒక పేయింగ్‌ గెస్ట్‌ హాస్టల్‌లో కలిసి నివసిస్తున్న ఒక జంట ఆ బిల్డింగ్‌ పైనుంచి కిందపడ్డారు. టెకీ అయిన యువతి మరణించగా ఆమె స్నేహితుడు తీవ్రంగా గాయపడ్డాడు. అతడ్ని ఆసుపత్రికి తరలించి చికిత్స అందిస్తున్నారు. పోలీసులు ఈ సంఘటనపై దర్యాప్తు చేస్తున్నారు. పుదుచ్చేరిలోని ఉలైవైక్కల్‌కు చెందిన 23 ఏళ్ల జనని, బెంగళూరులోని ఒక సంస్థలో సాఫ్ట్‌వేర్‌ ఇంజినీర్‌గా పని చేస్తున్నది. పుదుచ్చేరిలోని నల్లతూరుకు చెందిన 30 ఏళ్ల మణిచవేలు ఒక లాజిస్టిక్స్ కంపెనీలో పనిచేస్తున్నాడు. వైట్‌ఫీల్డ్‌లోని ఈసీసీ రోడ్డులో ఉన్న కో లివింగ్‌ పీజీ వసతి గృహంలో వీరిద్దరూ కలిసి నివసిస్తున్నారు. కాగా, ఆదివారం ఉదయం జనని, మణిచవేలు మధ్య వాగ్వాదం జరిగింది. ఈ నేపథ్యంలో పీజీ వసతి గృహం బిల్డింగ్‌ అంచు వైపు జనని వెళ్లింది. అక్కడి నుంచి కిందకు దూకే సమయంలో మణిచవేలును కూడా తనతో పాటు ఆమె లాగినట్లు తెలుస్తున్నది. దీంతో వీరిద్దరూ ఏడవ అంతస్తు నుంచి కింద పడ్డారు. తీవ్రంగా గాయపడిన జనని అక్కడికక్కడే మరణించింది. మరోవైపు మణిచవేలు మాత్రం ఆ బిల్డింగ్‌ ముందున్న చెట్టు కొమ్మలపై పడిన తర్వాత కిందపడ్డాడు. దీంతో అతడు ప్రాణాలతో బయటపడ్డాడు. గాయపడిన అతడ్ని ఒక ప్రైవేట్ ఆసుపత్రికి తరలించి చికిత్స అందిస్తున్నారు. ఈ సమాచారం తెలుసుకున్న పోలీసులు సంఘటనా స్థలానికి చేరుకున్నారు. జనని మృతదేహాన్ని పోస్ట్‌మార్టం కోసం ప్రభుత్వ ఆసుపత్రికి తరలించారు. ఈ సంఘటనపై కేసు నమోదు చేశారు. ఆ జంట మధ్య జరిగిన వాదనకు కారణంతో పాటు పలు కోణాల్లో దర్యాప్తు చేస్తున్నట్లు పోలీస్ అధికారి తెలిపారు.

రిజర్వ్ బ్యాంక్ ఆఫ్ ఇండియా అంచనాలను తారుమారు చేస్తూ 2026-2027 ఆర్థిక సంవత్సరం మొదటి త్రైమాసికంలో భారతదేశ స్థూల దేశీయోత్పత్తి (జీడీపీ) 7.8 శాతానికి పెరిగింది. ఏప్రిల్-జూన్ త్రైమాసికంలో జీడీపీ వృద్ధి రేటు అంతకుముందు త్రైమాసికం (8.6 శాతం) కంటే తక్కువగా ఉంది. కానీ గత ఆర్థిక సంవత్సరం ఇదే త్రైమాసికం కంటే ఇప్పుడు కాస్త ఎక్కువగా ఉందని చెప్పవచ్చు. గత ఏడాది ఏప్రిల్-జూన్ త్రైమాసికంలో భారత ఆర్థిక వ్యవస్థ 6.9 శాతం వృద్ధిని నమోదు చేయగా, ఇప్పుడు 7.8 శాతం నమోదైంది. గత ఏడాది ఇదే త్రైమాసికం కంటే ఇప్పుడు జీడీపీ వృద్ధి రేటు పెరగడం విశేషంగా చెప్పవచ్చు. ఈ మేరకు సోమవారం కేంద్రం జీడీపీ వృద్దికి సంబంధించి కీలక గణాంకాలను విడుదల చేసింది. 2026-27 ఆర్దిక సంవత్సరం మొదటి త్రైమాసికంలో ఆర్థిక, రియల్ ఎస్టేట్, ఐటీ, వృత్తిపరమైన సేవల రంగాలు భారతదేశ వృద్ధిని పెంచినట్లు కేంద్రం తెలిపింది. మొదటి త్రైమాసికంలో వాస్తవ జీడీపీ లేదా స్థిర ధరల వద్ద జీడీపీ రూ. 81.36 లక్షల కోట్లుగా అంచనా వేశారు. గత ఏడాది ఇదే త్రైమాసికంలో రూ. 75.46 లక్షల కోట్లుగా ఉంది. ప్రపంచవ్యాప్తంగా ఆర్ధిక అనిశ్చితి, ఉద్రిక్తతలు ఉన్నప్పటికీ భారత ఆర్థిక వ్యవస్థ వృద్ధి వేగాన్ని కొనసాగించినట్లు కేంద్రం స్పష్టం చేసింది. భారతదేశ వృద్ధికి భారతీయుల 'కఠోర శ్రమ' కారణమని ప్రశంసించింది. 'ఈ బలమైన పనితీరుకు కారణం భారత ప్రజల కృషి. ఎన్డీఏ ప్రభుత్వం చేపట్టిన సంస్కరణలు, ఆర్థిక వ్యవస్థ చురుకైన నిర్వహణతో కలిసి ఫలితాలనిస్తున్నాయి. మన పౌరులందరికీ ఆర్థిక అవకాశాలను మరింతగా విస్తరించడానికి ఎన్డీఏ ప్రభుత్వం కట్టుబడి ఉంది' అని ఆర్ధికశాఖ మంత్రి నిర్మలా సీతారామన్ పేర్కొన్నారు. కాగా భౌగోళిక రాజకీయ ఉద్రిక్తతలు, పెరిగిన ఇంధన ధరలు, ప్రపంచ వాణిజ్యంపై అనిశ్చితి నేపథ్యంలో ఈ జీడీపీ వృద్ది అంచనాలు చర్చనీయాంశంగా మారాయి. అంతర్జాతీయంగా ఆర్ధిక ఒత్తిళ్లు ఉన్నప్పటికీ ఆర్థిక కార్యకలాపాలకు దేశీయ డిమాండ్ కీలక మద్దతుగా నిలిచింది.

హైదరాబాద్‌కు చెందిన ఓ వృద్ధ దంపతులను పోలీసులమంటూ భయపెట్టి ఏకంగా నాలుగు నెలల పాటు సైబర్ నేరగాళ్లు డిజిటల్ అరెస్ట్‌లో ఉంచి రూ.64 లక్షలు కొల్లగొట్టారు. పహల్గాం ఉగ్రదాడి కేసులో మీ పేరు బయటపడిందంటూ నకిలీ పోలీసు అధికారులు బెదిరించడంతో బాధితులు వారి మాటలను నిజమని నమ్మి భారీ మొత్తాన్ని బదిలీ చేశారు. సైబర్ క్రైమ్ పోలీసులు తెలిపిన వివరాల ప్రకారం 71 ఏళ్ల బాధితుడు రిటైర్డ్ ప్రభుత్వ ఉద్యోగి. కొంతకాలం క్రితం ఆయనకు ఓ వ్యక్తి ఫోన్ చేసి క్రెడిట్ కార్డు బాకీ ఉందని చెప్పాడు. తనకు ఎలాంటి క్రెడిట్ కార్డు లేదని బాధితుడు స్పష్టం చేయడంతో వెంటనే మరో వ్యక్తి వాట్సాప్ కాల్ చేశాడు. తాను ఐపీఎస్ అధికారినని పరిచయం చేసుకున్న ఆ వ్యక్తి, బాధితుడి పేరు ఓ నేర విచారణలో బయటపడిందంటూ భయపెట్టాడు. సందీప్ కుమార్ అనే వ్యక్తికి సంబంధించిన దర్యాప్తులో బాధితుడి పేరు బయటపడిందని, పహల్గాం ఉగ్రదాడి కేసులో ఆయనపై కేసు నమోదైందని నకిలీ అధికారి చెప్పాడు. అంతేకాకుండా బాధితుడి కుటుంబ సభ్యుల వివరాలను కూడా సైబర్ నేరగాళ్లు చెప్పడంతో ఆయన మరింత ఆందోళనకు గురయ్యాడు. అమెరికాలో ఉంటున్న తన మనవడి వివరాలతో పాటు, మనవరాలు ప్రతిరోజూ వెళ్లే మార్గం గురించి కూడా నేరగాళ్లు చెప్పినట్లు పోలీసులు తెలిపారు. దీంతో వారు నిజంగానే పోలీసు అధికారులు అయి ఉంటారని బాధిత దంపతులు నమ్మారు. బాధితుల భయాన్ని ఆసరాగా చేసుకున్న సైబర్ నేరగాళ్లు.. దంపతులు డిజిటల్ అరెస్ట్‌లో ఉన్నారని ప్రకటించారు. తమ ఆదేశాలను పాటించకపోతే కుటుంబ సభ్యులను డ్రగ్స్ కేసులో ఇరికిస్తామని బెదిరించారు. దర్యాప్తు కొనసాగుతోందని, బ్యాంకు ఖాతాలను వెరిఫై చేయాల్సి ఉందని చెప్పి పలుమార్లు డబ్బులు బదిలీ చేయించారు. ఇలా నాలుగు నెలల పాటు వివిధ కారణాలు చెబుతూ బాధితుడి నుంచి మొత్తం రూ.64 లక్షలు బదిలీ చేయించుకున్నారు. చివరకు తాను మోసపోయినట్లు గుర్తించిన బాధితుడు సైబర్ క్రైమ్ పోలీసులను ఆశ్రయించి ఫిర్యాదు చేశాడు. ఫిర్యాదు ఆధారంగా కేసు నమోదు చేసిన పోలీసులు దర్యాప్తు ప్రారంభించారు. సైబర్ నేరగాళ్లు ఉపయోగించిన ఫోన్ నంబర్లు, బ్యాంకు ఖాతాలు, డిజిటల్ లావాదేవీల వివరాలను పోలీసులు పరిశీలిస్తున్నారు. డిజిటల్ అరెస్ట్ అంటూ ఎవరైనా బెదిరిస్తే వెంటనే అప్రమత్తం కావాలని పోలీసులు సూచిస్తున్నారు. నిజమైన పోలీసులు వీడియో కాల్‌లో విచారణ పేరుతో డబ్బులు బదిలీ చేయాలని, బ్యాంకు ఖాతాలను వెరిఫికేషన్ కోసం ఖాళీ చేయాలని ఎప్పుడూ ఆదేశించరని స్పష్టం చేస్తున్నారు.

కీప్యాడ్ ఫోన్ వినియోగదారుల కోసం ఫోన్‌పే 'యూపీఐ 123పే' అనే కొత్త ఫీచర్ ను లాంచ్ చేసింది. స్మార్ట్ ఫో న్, ఇంటర్నెట్ లేకపోయినా ఇకపై సులభంగా యూపీఐ చెల్లింపులు చేయొచ్చు. దీనిద్వారా ఎలాంటి నెట్ కనెక్షన్ లేకుండానే డబ్బులు పంపొచ్చు. దేశవ్యాప్తంగా ఉన్న 20 కోట్ల మంది ఫీచర్ ఫోన్ యూజర్లకు డిజిటల్ సేవలను చేరువ చేయడమే లక్ష్యంగా ఈ కొత్త సర్వీసును తీసుకొచ్చారు.

ఫైర్ బోల్ట్ సబ్ బ్రాండ్ బోల్ట్ ఇండియాలో కొత్త ఫోన్ లాంచ్ చేసింది. అదే బోల్ట్ ఏస్ 5G స్మార్ట్ ఫోన్ మరియు ఈ ఫోన్ ఆకట్టుకునే బడ్జెట్ ధరలో ఇండియన్ మార్కెట్లో లాంచ్ అయ్యింది. ఈ లేటెస్ట్ స్మార్ట్ ఫోన్ మొదటి సేల్ రేపు స్టార్ట్ అవుతుంది. ఈ ఫోన్ చాలా చవక ధరలో ఆకట్టుకునే ఫీచర్స్ తో వచ్చింది. బోల్ట్ అందించిన ఈ బ్రాండ్ న్యూ 5జి ఫోన్ మొత్తం మూడు ర్యామ్ అండ్ స్టోరేజ్ ఎంపికలో లభిస్తుంది. ఈ ఫోన్ బేసిక్ 4GB + 64GB వేరియంట్ రూ. 12,999 ధరతో లాంచ్ అయ్యింది. ఈ ఫోన్ 6GB + 128GB వేరియంట్ రూ. 13,999 ధరతో మరియు 8GB + 128GB వేరియంట్ రూ. 14,999 ధరతో లాంచ్ అయ్యాయి. రేపు మధ్యాహ్నం 12 గంటల నుంచి ఈ ఫోన్ ఫస్ట్ సేల్ ప్రారంభం అవుతుంది. ఈ ఫోన్ పై ఫ్లిప్ కార్ట్ రెండు బెస్ట్ డీల్స్ అందించింది. ఈ ఫోన్ ను ఫ్లిప్ కార్ట్ యాక్సెస్ మరియు ఫ్లిప్ కార్ట్ SBI క్రెడిట్ కార్డు తో వారికి రూ. 650 రూపాయల అదనపు డిస్కౌంట్ అందిస్తుంది. ఈ ఆఫర్ తో ఈ ఫోన్ కేవలం రూ. 12,349 రూపాయల ప్రారంభ ధరలో లభిస్తుంది. బోల్ట్ ఈ ఫోన్ ను 6.79 ఇంచ్ బిగ్ స్క్రీన్ తో లాంచ్ చేసింది. ఈ ఫోన్ స్క్రీన్ 600 నిట్స్ పీక్ బ్రైట్నెస్, HD+ రిజల్యూషన్ మరియు 120Hz రిఫ్రెష్ రేట్ కలిగి ఉంటుంది. బోల్ట్ ఈ ఫోన్ ని Unisoc T8200 చిప్ సెట్ తో జతగా 8GB ర్యామ్ మరియు 128 ఇంటర్నల్ స్టోరేజ్ తో అందించింది. ఈ ఫోన్ ను ఆండ్రాయిడ్ 16 OS తో అందించింది. ఈ ఫోన్ లో 64MP మెయిన్ సెన్సార్ కలిగిన ట్రిపుల్ రియర్ కెమెరా మరియు ముందు 8MP సెల్ఫీ కెమెరా ఉన్నాయి. ఈ ఫోన్ FHD వీడియో సపోర్ట్ మరియు మంచి ఏఐ వీడియో ఫీచర్స్ కూడా కలిగి ఉంటుంది. ఈ ఫోన్ లో 6000 mAh బిగ్ బ్యాటరీ మరియు 18w ఫాస్ట్ ఛార్జ్ సపోర్ట్ కూడా అందించింది. ఇది కాకుండా ఈ ఫోన్ లో బిల్ట్ ఇన్ జెమినీ ఏఐ, ఫేస్ అన్లాక్ మరియు సైడ్ మౌంటెడ్ ఫింగర్ ప్రింట్ సెన్సార్ వంటి ఫీచర్లు కూడా ఉన్నాయి.

కిర్గిస్థాన్‌లో జరుగుతున్న షాంఘై కో-ఆపరేషన్‌ సదస్సు సందర్భంగా ఇరాన్‌ అధ‍్యక్షుడు పెజెష‍్కియాన్‌తో ప్రధానమంత్రి నరేంద్ర మోడీ సమావేశమయ్యారు. రెండేళ్ల తర్వాత ఇద్దరు నేతలు సమావేశం కావడం ఇదే తొలిసారి. సోమవారం సాయంత్రం రష్యా అధ్యకక్షుడు పుతిన్‌తో కూడా మోడీ సమావేశం కానున్నారు. కిర్గిజిస్థాన్ అధ్యక్షుడు సదిర్ జపరోవ్ ఆహ్వానం మేరకు 6వ ప్రపంచ నోమాడ్ క్రీడల అధికారిక ప్రారంభ వేడుకలో పుతిన్‌ ఆయన పాల్గొంటారు. అర్మేనియా ప్రధాని నికోల్ పాషిన్యాన్‌తో కూడా మోడీ సమావేశమయ్యారు. ''బిష్కెక్‌లో జరుగుతున్న ఎస్‌సీఓ సదస్సు సందర్భంగా అర్మేనియా ప్రధాని నికోల్ పాషిన్యాన్‌తో సమావేశం జరిగింది. రక్షణ, ఐటీ, అంతరిక్షం, విద్య, ఔషధాలు తదితర రంగాల్లో భారత్-అర్మేనియా సహకారం మరింత పెరగనుంది. రానున్న రోజుల్లో వాణిజ్యం, పెట్టుబడుల సంబంధాలను మరింత బలోపేతం చేస్తామని కూడా మేము విశ్వసిస్తున్నాం'' అని మోడీ తెలిపారు. కాగా, కిర్గిజిస్థాన్ రక్షణ అధికారులు, కిర్గిజ్ రిపబ్లిక్ మహిళా కాంగ్రెస్ ప్రతినిధులు సోమవారం ప్రధాని నరేంద్ర మోదీని కలిసిన విషయాన్ని మీడియాకు తెలిపారు. భారత్-కిర్గిజిస్థాన్ మధ్య పెరుగుతున్న రక్షణ సంబంధాలను అధికారులు ప్రత్యేకంగా ప్రస్తావించారు. కిర్గిజిస్థాన్ రక్షణ మంత్రిత్వ శాఖకు చెందిన కెప్టెన్ తాలైబెక్ మాట్లాడుతూ.. "ప్రధాని మోదీని కలవడం మాకు జీవితంలో ఒక్కసారే వచ్చే అవకాశం. ఆయన ఇక్కడ కిర్గిజిస్థాన్‌కు రావడం గొప్ప విషయం" అని అన్నారు.

ఆంధ్రప్రదేశ్ ముఖ్యమంత్రి చంద్రబాబు నాయుడు వెలిగొండ ప్రాజెక్ట్ ను ప్రారంభించి జాతికి అంకితం చేశారు. దోర్నాల మండలం గంటవానిపల్లె వద్ద నల్లమల కొండల్లోని రెండు సొరంగాల నుంచి ప్రవహించిన కృష్ణా జలాలకు ముఖ్యమంత్రి చంద్రబాబు నాయుడు ప్రత్యేక పూజలు నిర్వహించి జలహారతి ఇచ్చి స్వాగతించారు. నల్లమల కొండల్ని చీల్చుకుంటూ గంటవానిపల్లె ఆక్విడెక్టు గుండా నల్లమల సాగర్‌కు చేరుకున్న కృష్ణమ్మను చూసి రైతులు, మహిళలు పులకించిపోయారు. సీఎం చంద్రబాబు నీళ్లలోకి దిగి పసుపు, కుంకుమ, చీర సమర్పించి భావోద్వేగానికి గురయ్యారు. క్రిష్ణమ్మకు సాష్టాంగ ప్రణామం చేశారు. ఈ దృశ్యం చూసి సభా ప్రాంగణంలోని ప్రజలు భావోద్వేగంతో హర్షధ్వానాలు చేశారు. వెలిగొండ తొలి దశ ద్వారా 1.19 లక్షల ఎకరాలకు సాగునీరు, నాలుగు లక్షల మందికి తాగునీరు అందనుంది. ప్రాజెక్టు గేట్లు ఎత్తే బటన్‌ను స్థానిక రైతులు, మహిళలతోనే నొక్కించిన చంద్రబాబు ఇది ప్రజలదని తెలియజేసేలా వారితోనే ప్రారంభోత్సవం నిర్వహించారు. గిరిజన మహిళలు లంబాడీ నృత్యంతో కృష్ణజలాలకు స్వాగతం పలికారు. మంత్రులు నిమ్మల రామానాయుడు, ఆనం రామనారాయణ రెడ్డి, కందుల దుర్గేష్, అనగాని సత్యప్రసాద్, బీజేపీ రాష్ట్ర అధ్యక్షుడు మాధవ్, ఎంపీలు, స్థానిక ప్రజాప్రతినిధులు హాజరయ్యారు. జలహారతి అనంతరం సీఎం పవిత్ర జలాలను మంత్రులు, అధికారులపై చల్లారు. జలహారతి ఇచ్చిన అనంతరం భావోద్వేగానికి గురైన చంద్రబాబు కెనాల్ ఒడ్డున కృష్ణమ్మకు సాష్టాంగ ప్రణామం చేశారు. వెలిగొండ ప్రాజెక్టు తొలి విడత పూర్తి చేసి నీటిని విడుదల చేసిన సందర్భంగా పైలాన్ ఆవిష్కరించారు. వెలిగొండ ఫీడర్ కెనాల్ ఒడ్డున ఏర్పాటు చేసిన వెలిగొండ ప్రాజెక్టు మీనియేచర్‌ను వీక్షించిన సీఎం చంద్రబాబు ఏయే ప్రాంతాలకు నీరు చేరుతుంది... ఎన్ని ఎకరాలకు సాగు నీరు అందుతుందో అధికారులను అడిగి తెలుసుకున్నారు. వెలిగొండ ప్రాజెక్టుపై మంత్రి నిమ్మల, అధికారులకు పలు సూచనలు చేశారు . మార్కాపురం ప్రాంత రైతులు, మహిళలు వెలిగొండ ప్రాజెక్ట్ ప్రారంభోత్సవ చారిత్రక క్షణాన్ని సభా ప్రాంగణం నుంచి ఆసక్తిగా తిలకించారు. నల్లమల సాగర్‌కు కృష్ణాజలాలు చేరడంతో వెలిగొండ ప్రాజెక్టు తొలి దశ సాకారమైంది.

హైదరాబాద్, అంబర్‌పేట పోలీస్ స్టేషన్ పరిధిలో ప్రేమ విఫలమవడంతో తీవ్ర మనస్తాపానికి గురైన ఏఆర్ కానిస్టేబుల్ ఆత్మహత్యకు పాల్పడ్డాడు. తిరుమలనగర్‌కు చెందిన నిభాష్ (25) పెట్లబుర్జులో ఏఆర్ కానిస్టేబుల్‌గా విధులు నిర్వహిస్తున్నాడు. కొంతకాలంగా ఓ యువతిని ప్రేమిస్తున్న అతను, ఆమెను వివాహం చేసుకోవాలని నిర్ణయించుకున్నాడు. అయితే ఈ పెళ్లికి యువతి కుటుంబ సభ్యులు అంగీకరించకపోవడంతో నిభాష్ తీవ్ర మనస్తాపానికి గురైనట్లు తెలుస్తోంది. ఈ క్రమంలోనే రాత్రి తన ఇంట్లో ఎవరూ లేని సమయంలో సీలింగ్ ఫ్యాన్‌కు చీరతో ఉరేసుకుని ఆత్మహత్యకు పాల్పడ్డాడు. అయితే, ఆత్మహత్య చేసుకునే ముందు ఈ విషయాన్ని తన స్నేహితులకు వాట్సాప్ ద్వారా తెలియజేశాడు. ఉదయం అతని స్నేహితులు ఇంటికి వచ్చి చూడగా, నిభాష్ విగతజీవిగా వేలాడుతూ కనిపించాడు. కుటుంబ సభ్యుల ఫిర్యాదు మేరకు పోలీసులు ఘటనాస్థలానికి చేరుకున్నారు. కేసు నమోదు చేసుకుని దర్యాప్తు ప్రారంభించారు. ప్రేమ వ్యవహారమే ఈ ఆత్మహత్యకు ప్రధాన కారణమని ప్రాథమికంగా నిర్ధారించారు.

షియోమీ తదుపరి ఫోల్డబుల్ స్మార్ట్‌ఫోన్‌గా షియోమీ 18 ఫోల్డ్ ను తీసుకురావడానికి సిద్ధమవుతున్నట్లు టెక్ ప్రచారం జరుగుతుంది. ఈ ఫోన్‌ను సెప్టెంబర్ ప్రారంభంలో చైనా మార్కెట్‌లో విడుదల చేసే అవకాశం ఉన్నట్లు నివేదికలు పేర్కొంటున్నాయి. అధికారిక లాంచ్‌కు ముందే ఫోన్‌కు సంబంధించిన పలు కీలక స్పెసిఫికేషన్లు ఆన్‌లైన్‌లో లీక్ అవుతున్నాయి. తాజాగా బ్యాటరీ, ఛార్జింగ్ సామర్థ్యాలకు సంబంధించిన వివరాలు కూడా వెలుగులోకి వచ్చాయి. ముఖ్యంగా 6,000mAh భారీ బ్యాటరీ ఈ ఫోన్‌కు ప్రత్యేక ఆకర్షణగా నిలిచే అవకాశం ఉంది. లీకైన సమాచారం ప్రకారం దీనిలో 6,000mAh బ్యాటరీ అందించనున్నట్లు తెలుస్తోంది. వెడల్పుగా తెరుచుకునే ఫోల్డబుల్ ఫోన్లలో ఇంత పెద్ద బ్యాటరీ సామర్థ్యం వినియోగదారులకు మెరుగైన బ్యాటరీ బ్యాకప్ అందించే అవకాశం ఉంది. ఫోల్డబుల్ ఫోన్లలో పెద్ద డిస్‌ప్లే కారణంగా సాధారణ స్మార్ట్‌ఫోన్లతో పోలిస్తే బ్యాటరీ వినియోగం ఎక్కువగా ఉంటుంది. ఈ నేపథ్యంలో 6,000mAh బ్యాటరీ అందించడం వల్ల ఎక్కువ సమయం ఫోన్‌ను ఉపయోగించుకునే అవకాశం లభించవచ్చు. టిప్‌స్టర్ సమాచారం ప్రకారం ఈ ఫోన్‌లో 67W వైర్డ్ ఫాస్ట్ ఛార్జింగ్, 50W వైర్‌లెస్ ఛార్జింగ్ సపోర్ట్ ఉండవచ్చని తెలుస్తోంది. భారీ బ్యాటరీని తక్కువ సమయంలో రీఛార్జ్ చేయడానికి 67W ఫాస్ట్ ఛార్జింగ్ ఉపయోగపడే అవకాశం ఉంది. వైర్‌లెస్ ఛార్జింగ్‌ను ఎక్కువగా ఇష్టపడే వినియోగదారులకు 50W సపోర్ట్ మరో అదనపు ప్రయోజనం కావచ్చు. దీనిలో 7.6 అంగుళాల ఫోల్డబుల్ డిస్‌ప్లే ఉండవచ్చని సమాచారం. ఫోన్‌ను విప్పినప్పుడు బిగ్ స్క్రీన్ లభించడంతో వీడియోలు చూడటం, గేమింగ్, మల్టీటాస్కింగ్ వంటి పనులకు ఇది ఉపయోగకరంగా ఉండవచ్చు. పెద్ద స్క్రీన్‌తో పాటు ఫోల్డబుల్ డిజైన్ కారణంగా ఈ ఫోన్ ప్రీమియం సెగ్మెంట్‌లో పోటీ పడే అవకాశం ఉంది. సాఫ్ట్‌వేర్ పరంగా Android 17 ఆధారిత HyperOS 4తో వచ్చే అవకాశం ఉందని నివేదికలు చెబుతున్నాయి. కొత్త HyperOS వెర్షన్‌లో మెరుగైన పనితీరు, మల్టీటాస్కింగ్, ఫోల్డబుల్ డిస్‌ప్లేకు అనుగుణమైన ఫీచర్లు అందించే అవకాశం ఉంది. ఈ ఫోన్‌లో 200MP ప్రైమరీ కెమెరా ఉండవచ్చని లీక్‌లు సూచిస్తున్నాయి. అయితే కెమెరా సెన్సార్, అల్ట్రా-వైడ్, టెలిఫోటో కెమెరాల వివరాలు, వీడియో రికార్డింగ్ సామర్థ్యాలపై ప్రస్తుతం పూర్తి సమాచారం అందుబాటులో లేదు. భద్రత కోసం ఈ ఫోన్‌లో సైడ్-మౌంటెడ్ ఫింగర్‌ప్రింట్ సెన్సార్ ఉండవచ్చని సమాచారం. ఫోల్డబుల్ డిజైన్‌కు అనుగుణంగా పక్క భాగంలో ఫింగర్‌ప్రింట్ సెన్సార్‌ను ఏర్పాటు చేసే అవకాశం ఉంది.

మహారాష్ట్ర వ్యాప్తంగా గేదె పాల ధరలు భారీగా పెరగనున్నాయి. బొంబాయి పాల ఉత్పత్తిదారుల సంఘం టోకు ధరను లీటరుకు రూ.9 నుంచి రూ.102కు చేర్చింది. దీని ప్రభావంతో రిటైల్ మార్కెట్లో ప్రాంతాన్ని బట్టి లీటరు గేదె పాల ధర రూ. 110 నుంచి రూ.112 వరకు చేరనుంది. ముఖ్యంగా దక్షిణ ముంబై ప్రాంతవాసులు అత్యధికంగా రూ.112 చెల్లించాల్సి వస్తుంది. ఈ పెంచిన టోకు ధర సవరణ 2027 ఫిబ్రవరి 28 వరకు అమల్లో ఉంటుందని పాల ఉత్పత్తిదారుల సంఘం స్పష్టం చేసింది. పశువుల మేత, ఉత్పత్తి ఖర్చులు భారీగా పెరగడమే ఈ నిర్ణయానికి ప్రధాన కారణమని ఉత్పత్తిదారులు వెల్లడించారు. గడిచిన ఏడాది కాలంలో ధాన్యం, కంది చుని, శనగ చుని, మొక్కజొన్న, పచ్చి మేత ధరలు దాదాపు 25 శాతం వరకు పెరిగాయి. దీనికి తోడు ఇంధనం, రవాణా, కార్మికుల కూలీ, నిర్వహణ ఖర్చులు కూడా పెరిగాయి. ప్రస్తుతం ఒక లీటరు పాలు ఉత్పత్తి చేయడానికి రూ.98 వరకు ఖర్చు అవుతోందని, పాత రేట్లతో నష్టాలు వస్తున్నాయని వారు వివరించారు. ముంబైలో ప్రతిరోజూ దాదాపు 40 లక్షల లీటర్ల గేదె పాలు విక్రయం అవుతుండటంతో ఈ ధరల సవరణ నిర్ణయానికి సభ్యులందరూ ఏకగ్రీవంగా ఆమోదం తెలిపారు. ఈ సవరణ ప్రకారం టోకు ధర రూ.93 నుంచి రూ.102కి పెరిగింది. రిటైల్ విభాగంలో దక్షిణ ముంబై ప్రాంతంలోని తబేలా పాలు లీటరు రూ.104 నుంచి రూ.112కి పెరగగా, ముంబైలోని ఇతర ప్రాంతాల్లో రూ.100 నుంచి రూ.110కి చేరాయి. ఈ కొత్త ధరలు సెప్టెంబర్ 1, 2026 నుంచి అమల్లోకి రానున్నాయి. కాగా గోకుల్ ప్యాకెట్ గేదె పాల ధర ఆగస్టులోనే లీటరుకు రూ.76 నుంచి రూ.78కి పెరిగి అమల్లో ఉంది.

హైదరాబాద్‌లోని బీజేపీ కార్యాలయం ముట్టడికి యూత్‌ కాంగ్రెస్‌ కార్యకర్తలు ప్రయత్నించడంతో ఉద్రిక్తత నెలకొంది. వారిని పోలీసులు అడ్డుకోవడంతో కార్యాలయం వద్ద కొద్దిసేపు హైటెన్షన్‌ వాతావరణం ఏర్పడింది. ఈ సందర్భంగా కాంగ్రెస్‌ కార్యకర్తలు 'కాంగ్రెస్‌ జిందాబాద్‌' అంటూ నినాదాలు చేశారు. కాంగ్రెస్‌ అధ్యక్షుడు మల్లికార్జున ఖర్గేను అవమానించడాన్ని నిరసిస్తూ యూత్‌ కాంగ్రెస్‌ ఈ ఆందోళన చేపట్టింది. కేంద్ర హోంమంత్రి అమిత్‌ షా రాజీనామా చేయాలని కార్యకర్తలు డిమాండ్‌ చేశారు. ఈ క్రమంలో అమిత్‌ షా దిష్టిబొమ్మను కాంగ్రెస్‌ కార్యకర్తలు దగ్ధం చేశారు. అనంతరం, బీజేపీ కార్యాలయం వైపు దూసుకెళ్లేందుకు ప్రయత్నించారు. దీంతో, ఆందోళనకారులను పోలీసులు అడ్డుకుని పరిస్థితిని అదుపులోకి తీసుకొచ్చే ప్రయత్నం చేయగా.. వారితో వాగ్వాదం జరిగింది.

ఆంధ్రప్రదేశ్ రాష్ట్ర రోడ్డు రవాణా సంస్థ ఏపీఎస్‌ఆర్‌టీసీ డిసెంబర్ నాటికి 1,050 ఎలక్ట్రిక్ బస్సులను రోడ్లపైకి తీసుకురానుంది. దేశ వ్యాప్తంగా కాలుష్యాన్ని నియంత్రించటం కోసం, కేంద్ర ప్రభుత్వం అమలు చేస్తున్న పీఎం ఈ-బస్ సేవా పీఎం ఈ-బస్ సేవా సేవా పథకం కింద ఈ బస్సులు కేటాయించబడ్డాయి. ఈ ఎలక్ట్రిక్ బస్సులు విశాఖపట్నం, విజయవాడ, తిరుపతి, గుంటూరు, అమరావతి, కాకినాడ, రాజమహేంద్రవరం, అనంతపురం, నెల్లూరు, కర్నూలు, కడప వంటి ప్రధాన నగరాల్లో నడవనున్నాయి. వీటిలో 12 మీటర్ల, 9 మీటర్ల పొడవు గల బస్సులు ఉన్నాయి. ఈ చర్య వల్ల డీజిల్ వాహనాల వల్ల కలిగే కాలుష్యం గణనీయంగా తగ్గుతుంది. ప్రజలలో ఈవీ వాహనాల వాడకం కూడా బాగా పెరుగుతుంది. వాయు కాలుష్యాన్ని, శబ్ద కాలుష్యాన్ని తగ్గించే ఈ బస్సుల ద్వారా ప్రయాణికులకు సౌకర్యవంతమైన, నిశ్శబ్ద ప్రయాణం అందుతుంది. చార్జింగ్ మౌలిక సదుపాయాల కోసం బస్ స్టేషన్లు, డిపోల వద్ద పనులు జరుగుతున్నాయి. విద్యుత్ సబ్‌స్టేషన్లు, లైన్లు వేసే పనులు కూడా చేపట్టారు. ఆర్టీసీ నిర్వహించే ఎలక్ట్రిక్ బస్సుల కోసం ఈ ఏర్పాట్లు జరుగుతున్నాయి. ప్రభుత్వం భవిష్యత్తులో కొత్తగా కొనుగోలు చేసే అన్ని బస్సులు ఎలక్ట్రిక్‌గా ఉండాలని నిర్ణయించింది. పల్లె వెలుగు సర్వీసుల్లో కూడా ఏసీ ఎలక్ట్రిక్ బస్సులు ప్రవేశపెట్టాలని లక్ష్యంగా పెట్టుకుంది. స్త్రీ శక్తి పథకం కింద మహిళలు ఈ ఎలక్ట్రిక్ ఏసీ బస్సుల్లో కూడా ఉచితంగా ప్రయాణించే అవకాశం ఉంది. ఈ నిర్ణయం తో ఆర్టీసీ పర్యావరణ హిత రవాణా వైపు పెద్ద ముందడుగు వేస్తోంది. ప్రయాణికులకు మెరుగైన సేవలు అందించడంతో పాటు కాలుష్య నియంత్రణకు కూడా ఇది దోహదపడుతుంది. కేంద్ర, రాష్ట్ర ప్రభుత్వాలు సంయుక్తంగా చేపట్టిన ఈ కార్యక్రమం దశలవారీగా అమలవుతుంది. మొత్తం 5500 ఎలక్ట్రిక్ బస్సులు దశల వారీగా ఏపీకి తీసుకురావాలని భావిస్తోంది. మళ్ళీ త్వరలో డిసెంబర్ నాటికి 1,050 ఎలక్ట్రిక్ బస్సులను రోడ్లపైకి తీసుకురానున్నారు. ఇది ఏపీ ప్రజలకు నిజంగా సుఖవంతమైన, సౌకర్యవంతమైన ప్రయాణం అందించే ఒక ముందడుగు.

పెట్రోల్ బంకుల్లో విక్రయించే ఇంధనంలో ఇథనాల్ శాతాన్ని స్పష్టంగా వెల్లడించాలంటూ దాఖలైన ప్రజా ప్రయోజన వ్యాజ్యాన్ని సుప్రీంకోర్టు సోమవారం కొట్టివేసింది. జస్టిస్ ఎం.ఎం. సుందరేష్, జస్టిస్ పి.బి. వరాలేలతో కూడిన ధర్మాసనం అడ్వకేట్ నరేంద్ర గోస్వామి దాఖలు చేసిన ఈ పిటిషన్‌ను తోసిపుచ్చింది. పిటిషనర్ అవసరమైతే సంబంధిత హైకోర్టును ఆశ్రయించవచ్చని న్యాయస్థానం స్పష్టం చేసింది. పెట్రోల్ బంకుల బోర్డులపై వినియోగదారులకు ఇచ్చే రసీదులు/ఇన్‌వాయిస్‌లపై ఇథనాల్ శాతాన్ని స్పష్టంగా నమోదు చేసేలా ఆదేశాలు ఇవ్వాలని పిటిషనర్ కోర్టును కోరారు. అలాగే E-20 పెట్రోల్ వాడకం వల్ల పాత, కొత్త వాహనాల పనితీరు, మైలేజీ, ఇంజన్ మన్నిక, నిర్వహణ ఖర్చులు, ఇన్సూరెన్స్ అంశాలపై అధ్యయనం చేయడానికి ఒక స్వతంత్ర నిపుణుల కమిటీని ఏర్పాటు చేయాలని ఎథనాల్ తయారీకి నీటి వినియోగం, ఆహార భద్రతపై దాని ప్రభావం మరియు ఉద్గారాలపై సమగ్ర నివేదిక అందించాలని కోరారు.

తెలంగాణలోని మంచిర్యాల జిల్లా దండేపల్లి మండలం లింగాపూర్ గ్రామంలో కుటుంబ కలహాల కారణంగా ఓ తల్లి తన ఆరేళ్ల కుమార్తెతో కలిసి వ్యవసాయ బావిలోకి దూకి ఆత్మహత్య చేసుకున్న ఘటన తీవ్ర విషాదాన్ని నింపింది. జగిత్యాల జిల్లాకు చెందిన అంజయ్య, రజిత దంపతులకు వివాహమై ఏడేళ్లు అవుతోంది. వీరికి ఒక కుమార్తె, ఒక కుమారుడు ఉన్నారు. అయితే, భార్యాభర్తల మధ్య తరచూ గొడవలు జరుగుతుండటంతో రజిత గత కొంతకాలంగా పిల్లలతో కలిసి లింగాపూర్‌లోని తన పుట్టింట్లోనే ఉంటోంది. ఈ క్రమంలో ఆదివారం పిల్లలను చూసేందుకు భర్త రాగా, ఇద్దరి మధ్య మరోసారి తీవ్ర వాగ్వాదం చోటుచేసుకుంది. భర్త వెళ్లిపోయిన కొద్దిసేపటికే తీవ్ర మనస్తాపానికి గురైన రజిత, ఇంట్లో నిద్రిస్తున్న 18 నెలల కుమారుడిని అక్కడే వదిలేసి, 6 ఏళ్ల కుమార్తె అక్షితను తన నడుముకు చీరతో కట్టుకుని సమీపంలోని వ్యవసాయ బావిలోకి దూకి ఆత్మహత్య చేసుకుంది. ఈ అఘాయిత్యానికి పాల్పడే ముందు రజిత తన సోదరికి ఫోన్ చేసి తాను చనిపోతున్నట్లు సమాచారం అందించడం గమనార్హం.

తమిళనాడు ముఖ్యమంత్రి జోసెఫ్‌ విజయ్‌ పేరుతో మరో కొత్త చర్చ మొదలైంది. 2029లో ప్రధానమంత్రి అభ్యర్థిగా విజయ్‌ను ప్రొజెక్ట్‌ చేస్తూ ఆయన పార్టీ టీవీకే వర్గాలు కొంత కాలంగా ప్రచారం చేస్తున్నాయి. తాజాగా ఇండియా టుడే-సీవోటర్‌ 'మూడ్‌ ఆఫ్‌ ది నేషన్‌' సర్వేలో ప్రధాని పదవికి విజయ్‌ మూడో స్థానంలో నిలవడం ఈ ప్రచారానికి మరింత ఊతమిచ్చింది. ఈ తరుణంలో.. అక్కడి ప్రతిపక్ష డీఎంకేతో పాటు టీవీకే మిత్రపక్షం కాంగ్రెస్‌ కూడా వ్యంగ్యాస్త్రాలు సంధిస్తోంది. రాజకీయ ఉద్దండులను తోసేసి నరేంద్ర మోడీ, రాహుల్‌ గాంధీ తర్వాత ప్రధాని రేసులో విజయ్‌ ఉన్నారన్నది ఇండియాటుడే సర్వేలో వెల్లడైంది. అంతేకాదు సమర్థవంతమైన ప్రతిపక్ష నేతగానూ ఆయనకు అర్హత ఉందంటూ రాహుల్‌ గాంధీ తర్వాతి ప్లేస్‌ను కట్టబెట్టారు. దీంతో విజయ్‌కు జాతీయ స్థాయిలో ఆదరణ ఉందని.. రాబోయే రోజుల్లో పక్కా దేశానికి ప్రధాని అవుతారంటూ టీవీకే హడావిడి చేస్తోంది. అయితే ఈ ప్రచారంపై డీఎంకే నేత ఆర్‌ఎస్‌ భారతి స్పందిస్తూ ఆయన పార్టీ కార్యకర్తలు కోరుకుంటే విజయ్‌ పీఎం ఏంటి.. ఏకంగా ఐక్యరాజ్యసమితి అధిపతి అవుతారని సెటైర్‌ వేశారు. "వారి ఊహలకు హద్దుల్లేవు.. ఏదైనా ఊహించుకోనివ్వండి" అంటూ ఆర్‌ఎస్‌ భారతి కామెంట్‌ చేశారు. విజయ్‌ను ప్రధాని అభ్యర్థిగా ప్రచారం చేస్తే.. కాంగ్రెస్‌ అగ్రనేత రాహుల్‌ గాంధీ ప్రధాని కావాలనే ఆ పార్టీ ఆశయం ఏమైపోతుందో అంటూ ఇంకో చురక అంటించారు. ఇండియా టుడే సర్వే, టీవీకే చేస్తున్న ప్రచారంపై కాంగ్రెస్‌ పార్టీ ఎంపీ మాణిక్కం ఠాగూర్‌ కూడా పరోక్షంగా స్పందించినట్లు ఆయన తాజా ట్వీట్‌తో స్పష్టమవుతోంది. 'ది ఫాక్స్‌ ఫేక్‌ పోల్‌' పేరుతో ఓ నక్క కథను ఎక్స్‌లో పంచుకున్న ఆయన సర్వేలో ఎంతమందిని ప్రశ్నించారు? ఎక్కడ నిర్వహించారు? ఏ ప్రశ్నలు అడిగారు? ఫలితాలను ఎలా లెక్కించారు? వంటి అంశాలను ప్రస్తావించారు. "ప్రతి సంఖ్య నిజాన్ని చెప్పదు.. ప్రతి సర్వే ప్రజల గొంతుక కాదు" అంటూ తేల్చేశారు. ఆయన చెప్పిన కథలో ఏముందంటే ఒక అడవిలో సింహం, ఏనుగు మంచి స్నేహితులు. అడవికి సంబంధించి ఏ నిర్ణయమైనా ఇద్దరూ కలిసే తీసుకుంటారు. వారి స్నేహాన్ని చూసి ఈర్ష్యపడిన గుంటనక్క కొందరిని మాత్రమే అడిగి ఓ సర్వే నిర్వహిస్తుంది. ఆ సర్వే పేరుతో సింహానికి ఏనుగుపై, ఏనుగుకు సింహంపై అనుమానాలు కలిగించి వాళ్లను విడగొట్టాలని చూస్తుంది. చివరకు ఓ చీమ ముందుకు వచ్చి నక్కను అందరి ముందే నిలదీస్తుంది. సర్వేలో ఎంతమందిని అడిగారు? ఎక్కడ నిర్వహించారు? ఏ ప్రశ్నలు వేశారు? ఫలితాలను ఎలా లెక్కించారు? అని ప్రశ్నించడంతో నక్క నీళ్లునములుతూ కనిపిస్తుంది. అలా ఏనుగు-సింహం స్నేహం చెడిపోకుండా కాపాడుతుంది.

నేపాల్, టిబెట్ సరిహద్దు ప్రాంతాలను ఊహించని రీతిలో ముంచెత్తి వందలాది మంది ప్రాణాలను బలిగొన్న భయంకరమైన జలప్రళయానికి అసలు కారణం గ్లాసియర్ విరిగి పడడం అనే విషయం అందరికీ తెలిసిందే. కానీ ఇదెలా జరిగిందో మాత్రం ఎవరికీ తెలియదు. కానీ ఓ టూరిస్ట్ డ్రోన్ కెమెరాలో గ్లేసియర్ విరిగిపడిన దృశ్యాలు రికార్డు అయ్యాయి. అయితే పర్వత ప్రాంతాల్లోని మంచు కొండలు హఠాత్తుగా కూలిపోతుండగా అనుకోకుండా రికార్డు కాగా ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది. సముద్ర మట్టానికి సుమారు 7,200 మీటర్ల కంటే ఎక్కువ ఎత్తులో ఉన్న లాంగ్‌టాంగ్ లిరుంగ్ పర్వత శిఖరం సమీపంలో ఈ ఘోరం జరిగింది. ఒక చైనా ఫోటోగ్రాఫర్ తీస్తున్న డ్రోన్ ఫుటేజ్‌లో ఒక భారీ రాతి కొండ, దానికి ఉన్న మంచు పలకలు ఒకేసారి పర్వత శ్రేణి నుంచి తెగిపడి కిందకు జారిపోయాయి. కొండచరియలు విరిగిపడటంతో ఆ ప్రాంతమంతా దట్టమైన దూళి మేఘాలు ఆవరించాయి. ఇదంతా డ్రోన్ కెమెరాలో రికార్డు కాగా.. ప్రస్తుతం ఈ వీడియో నెట్టింట తెగ వైరల్ అవుతోంది. ముఖ్యంగా పర్వతం పైభాగం నుంచి తెగిపడిన భారీ మంచు, రాళ్లు, మట్టి సుమారు 1,200 మీటర్ల కింద ఉన్న లోయలోకి తీవ్ర వేగంతో దూసుకొచ్చాయి. ఈ విధ్వంసకర ప్రవాహం వల్ల కింద ఉన్న భోటేకోషి, త్రిశూలి నదులు ఒక్కసారిగా ఉప్పొంగి ఆకస్మిక వరదలకు దారితీశాయి. ఆగస్టు 26వ తేదీన సంభవించిన ఈ భీకర ప్రళయంలో నేపాల్‌లో 903 మంది, టిబెట్‌లో 16 మంది మరణించారు. దాదాపు 4,500 మందికి పైగా ప్రజలు గల్లంతు అయ్యారు. ఈ దారుణ వైపరీత్యంపై నేపాల్ ప్రధాన మంత్రి బాలేంద్ర షా తీవ్ర ఆవేదన వ్యక్తం చేశారు. దేశం ఊహించని, హృదయ విదారకమైన విపత్తును ఎదుర్కొంటోందని సోషల్ మీడియా వేదికగా పేర్కొన్నారు. రసువాలోని భోటే కోషి నది సృష్టించిన బీభత్సం వల్ల జరిగిన ఆస్తి, ప్రాణ నష్టాలను అంచనా వేయడం అధికారులకు అత్యంత కష్టంగా మారిందని తెలిపారు. ప్రతికూల వాతావరణం, క్లిష్టమైన కొండ దారులు ఉన్నప్పటికీ పౌరుల ప్రాణాలను కాపాడేందుకు తమ ప్రభుత్వం నిరంతరం శ్రమిస్తోందని, ప్రజల ఐక్యతతో ఈ సంక్షోభం నుంచి బయటపడతామని ఆయన ధైర్యం చెప్పారు.

ఆర్థర్ యాష్ స్టేడియంలో జరిగిన మ్యాచ్ లో అర్జెంటీనా ఆటగాడు మరియానో నవోన్‌తో జరిగిన మారథాన్ ఐదు సెట్ల పోరులో 6-7, 7-5, 6-4, 2-6, 1-6 తేడాతో జకోవిచ్ ఓటమిపాలయ్యాడు. మ్యాచ్ ఆరంభం నుంచే జకోవిచ్ శారీరకంగా ఇబ్బంది పడుతూ కనిపించాడు. న్యూయార్క్‌లోని తీవ్ర ఉక్కపోత, తేమ వాతావరణం వల్ల తలపై పదే పదే ఐస్ బ్యాగ్ పెట్టుకున్నాడు. వర్షం కారణంగా స్టేడియం రూఫ్ మూసివేసినప్పుడు ఏసీ ఆన్ చేయాలని సూపర్వైజర్‌ను కూడా కోరాడు. మూడో సెట్ ఆరో గేమ్‌లో పరిస్థితి మరింత విషమించి, జకోవిచ్ కోర్టు వెనుకభాగంలో పలుమార్లు వాంతులు చేసుకున్నాడు. టోర్నమెంట్ ఫిజియో అతనికి మాత్రలు అందించగా, కోర్టు పక్కనుంచి సహాయక బృందం ద్రవాలు అందించింది. తొలి సెట్‌ను టైబ్రేక్‌లో 6-7తో కోల్పోయినప్పటికీ, తీవ్రమైన శారీరక ఇబ్బందుల నడుమ జకోవిచ్ అద్భుతంగా పుంజుకున్నాడు. రెండో సెట్‌ను 7-5తో, మూడో సెట్‌ను 6-4తో గెలుచుకుని విజయానికి కేవలం ఒక్క సెట్ దూరంలో నిలిచాడు. అయితే, యువ ఆటగాడు నవోన్ తగ్గకుండా నాలుగో సెట్‌ను 6-2తో గెలిచి మ్యాచ్‌ను నిర్ణయాత్మక ఐదో సెట్‌కు తీసుకెళ్లాడు. ఐదో సెట్‌లో నవోన్ పూర్తి ఆధిపత్యం ప్రదర్శించి 4-1 ఆధిక్యంలోకి దూసుకెళ్లాడు. అప్పటికే శరీరం సహకరించక, శక్తి పూర్తిగా క్షీణించడంతో మ్యాచ్ చేజారిపోతోందని గ్రహించిన జకోవిచ్ కోర్టులోనే భావోద్వేగానికి గురై కన్నీళ్లు పెట్టుకున్నాడు. గ్యాలరీలో ఉన్న ఆయన భార్య జెలెనా కూడా తీవ్ర ఆందోళనకు గురైంది. నవోన్ ఏమాత్రం తడబడకుండా ఐదో సెట్‌ను 6-1తో ముగించి తన కెరీర్‌లోనే అతిపెద్ద విజయాన్ని నమోదు చేశాడు.

తెలంగాణలోని కరీంనగర్‌, కోతిరాంపూర్ ప్రాంతంలోని ఓ ప్రైవేట్ లాడ్జిలో ఆన్‌లైన్ జూదం ఆటల్లో భారీగా డబ్బు పోగొట్టుకుని అప్పుల పాలైన వేములవాడకు చెందిన ఓ యువకుడు ఉరివేసుకొని బలవన్మరణానికి పాల్పడ్డాడు. వేములవాడ పట్టణంలోని సుభాష్‌నగర్‌కు చెందిన నరాల కార్తీక్ (35) ఆన్‌లైన్ గేమ్స్, క్యాసినో, జూదం ఆటలకు అలవాటు పడ్డట్లు సమాచారం. ఈ క్రమంలో భారీగా డబ్బు పోగొట్టుకున్నట్లు తెలుస్తోంది. ఈ ఆటల కారణంగా దాదాపు రూ.కోటి వరకు అప్పులు చేసినట్లు సమాచారం. అప్పుల భారం, ఆర్థిక ఇబ్బందులతో తీవ్ర మనస్తాపానికి గురైన కార్తీక్.. కరీంనగర్‌లోని కోతిరాంపూర్ ప్రాంతంలోని ఓ ప్రైవేట్ లాడ్జిలో ఉరివేసుకొని ఆత్మహత్య చేసుకున్నట్లు సమాచారం.

పోలవరం జాతీయ ప్రాజెక్టు లోపాల మయంగా మారిందని, ఈ లోపాల కారణంగా ప్రాజెక్టు భద్రత ప్రమాదంలో పడుతుందని ఆరోపిస్తున్న మాజీ ఐపీఎస్ అధికారి ఏబీ వెంకటేశ్వరరావు హైకోర్టులో తాజాగా పిటిషన్ దాఖలు చేశారు. పోలవరంలో లోపాల కారణంగా డ్యామ్ భద్రత ప్రశ్నార్ధకంగా మారుతుందని ఆరోపిస్తున్న ఆయన.. ఇవాళ ఈ కేసు విచారణలో భాగంగా హైకోర్టులో స్వయంగా తన వాదన వినిపించబోతున్నారు. గతంలో చంద్రబాబు ప్రభుత్వంలో రాష్ట్ర నిఘా విభాగాధిపతిగా పనిచేసిన ఏబీ వెంకటేశ్వరరావు .. అనంతరం జగన్ సర్కార్ లో నిఘా పరికరాల అక్రమ కొనుగోలు ఆరోపణలపై రెండుసార్లు సస్పెండ్ కూడా అయ్యారు. సుప్రీంకోర్టు వరకూ వెళ్లి ఈ కేసులో విజయం సాధించిన ఆయన.. ఆ తర్వాత రిటైర్ అయ్యారు. అనంతరం తిరిగి చంద్రబాబు ప్రభుత్వంలో సెంటర్ ఫర్ లిబర్టీ తరఫున జనంలోకి వెళ్లి ప్రజా సమస్యలపై పోరాటాలు చేస్తున్నారు. ఇందులో భాగంగానే ఆయన పోలవరం ప్రాజెక్టులో లోపాలపై హైకోర్టును ఆశ్రయించారు. అయితే తాను దాఖలు చేసిన కేసును స్వయంగా వాదించుకునేందుకు ఏబీవీ సిద్దం కావడం విశేషం. పోలవరం నిర్మాణ లోపాల మీద హైకోర్టులో ఏబీ వెంకటేశ్వరరావు దాఖలు చేసిన ప్రజా ప్రయోజన వాజ్యం ఇవాళ చీఫ్ జస్టిస్ ముందుకు వాదనలకు రాబోతోంది. ఈ కేసులో ఏబీవీ స్వయంగా హాజరైన వాదనలు వినిపించబోతున్నారు. పోలవరం ప్రాజెక్టు నిర్మాణంలో చాలా తప్పులు జరిగాయని, వాటి మూలంగా డ్యాంకి ఎటువంటి ప్రమాదం లేదని తేల్చమని జాతీయ డ్యామ్ సేఫ్టీ అథారిటీని ఆదేశించమని కోర్టును ఏబీవీ కోరుతున్నారు. ఈ విషయాన్ని సెంటర్ ఫర్ లిబర్టీలో ఆయన సహచరుడు నల్లమోతు చక్రవర్తి ట్వీట్ చేశారు. ఈ కేసులో హైకోర్టు ఇచ్చే ఆదేశాలు ప్రభుత్వానికి కూడా చాలా కీలకంగా మారే అవకాశాలున్నాయి.

అమెరికా ఇరాన్‌లోని లారక్ ద్వీపంపై రెండు క్షిపణి లాంచర్లను లక్ష్యంగా చేసుకుంది. హోర్ముజ్ జలసంధిలో సముద్రపు మైన్లను ప్రయోగించేందుకు ఇరాన్ దళాలు సిద్ధమవుతున్నట్లు గుర్తించడంతో ఈ దాడి చేసినట్లు అమెరికా సెంట్రల్ కమాండ్ తెలిపింది. అమెరికా దాడికి ప్రతీకారంగా ఇరాన్ రివల్యూషనరీ గార్డ్ కార్ప్స్ జోర్డాన్‌లోని అమెరికా సైనిక స్థావరాలపై బాలిస్టిక్ క్షిపణులు ప్రయోగించినట్లు ప్రకటించింది. కింగ్ హుస్సేన్, అల్ అజ్రాక్ స్థావరాలను లక్ష్యంగా చేసుకున్నట్లు వెల్లడించింది. అయితే జోర్డాన్ సైన్యం తమ గగనతలంలోకి ప్రవేశించిన ఎనిమిది క్షిపణులను అడ్డుకున్నట్లు ప్రకటించింది. పౌరులు లేదా ఆస్తులకు ముప్పు కలగకముందే వాటిని ధ్వంసం చేసినట్లు తెలిపింది. ఖార్గ్ ద్వీపం "పూర్తిగా ధ్వంసమైంది" అంటూ సోషల్ మీడియాలో ఓ యానిమేటెడ్ వీడియోను అమెరికా అధ్యక్షుడు డొనాల్డ్ ట్రంప్ పోస్టు చేశారు. అయితే ఖార్గ్ ద్వీపం పూర్తిగా ధ్వంసమైందన్న ట్రంప్ వాదనకు ఇప్పటివరకు స్వతంత్ర ధృవీకరించలేదు.

ఉత్తరప్రదేశ్ నుంచి ఢిల్లీ వస్తున్న 16 ఏళ్ల మైనర్ బాలికపై కదులుతున్న స్లీపర్ బస్సులోనే డ్రైవర్, కండక్టర్ కలిసి గ్యాంగ్ రేప్‌కు పాల్పడ్డారు. ఆగస్టు 4న చోటుచేసుకున్న ఉందంతం ఆలస్యంగా వెలుగులోకి వచ్చింది. బాధితురాలి కుటుంబ సభ్యులు, బంధువుల ఫిర్యాదు మేరకు పోలీసులు కేసు నమోదు చేసి నిందితులైన డ్రైవర్ కుల్దీప్, కండక్టర్ సందీప్‌లను అరెస్టు చేశారు. పోలీసులు తెలిపిన వివరాల ప్రకారం ఉత్తరప్రదేశ్‌లోని మైన్‌పురి జిల్లాకు చెందిన 16 ఏళ్ల విద్యార్థిని కుటుంబ సభ్యులతో గొడవపడి నోయిడాలోని తన బంధువుల ఇంటికి వెళ్లేందుకు బయలుదేరింది. ఈ క్రమంలో ఆమె గ్రేటర్ నోయిడాలోని పరిచౌక్ వద్ద ఢిల్లీ వైపు వెళ్తున్న ఓ ప్రైవేట్ స్లీపర్ బస్సు ఎక్కింది. గ్రేటర్ నోయిడాలోని పరిచౌక్ నుంచి ఢిల్లీలోని కశ్మీరీ గేట్ వరకు ఉన్న దాదాపు 47 కి.మీ ప్రయాణ దూరంలో ఈ దారుణం జరిగింది. స్లీపర్ బస్సు కిటికీలకు తెరలు వేసి ఉండటంతో లోపల ఏం జరుగుతుందో బయటి వారికి కనిపించకుండా పోయింది. ఈ అవకాశాన్ని ఆసరాగా చేసుకున్న బస్సు డ్రైవర్ కుల్దీప్, కండక్టర్ సందీప్‌లు కదులుతున్న బస్సులోనే బాలికపై అమానుషంగా అత్యాచారానికి ఒడిగట్టారు. దారుణం ముగిశాక బాలికను ఢిల్లీలోని కశ్మీరీ గేట్ బస్ స్టాండ్ వద్ద దింపి నిందితులు పరారయ్యారు. అనంతరం అచేతన స్థితిలో ఉన్న బాధితురాలు కుటుంబ సభ్యులకు సమాచారం అందజేయడంతో వారు స్పాట్‌కు చేరుకుని ఆమెను హుటాహుటిన ఆస్పత్రికి తరలించారు. ఇచ్చిన ఫిర్యాదు మేరకు రంగంలోకి దిగిన పోలీసులు బస్సు సమాచారం ఆధారంగా విచారణ జరిపి డ్రైవర్ కుల్దీప్, కండక్టర్ సందీప్‌లను అరెస్ట్ చేసి రిమాండ్‌కు తరలించారు.

పురుషుల హాకీ ప్రపంచ కప్‌లో జర్మనీ విజేతగా నిలిచింది. ఆదివారం ఉత్కంఠభరితంగా సాగిన ఫైనల్లో జర్మనీ 1-0 గోల్ తేడాతో స్పెయిన్‌ను ఓడించి ప్రపంచ ఛాంపియన్‌గా అవతరించింది. చివరి వరకు నువ్వానేనా అన్నట్టు సాగిన తుది సమరంలో జర్మనీ అతి కష్టం మీద విజయం సాధించింది. జర్మనీకి ఇది నాలుగో ప్రపంచ కప్ ట్రోఫీ కావడం విశేషం. ఇక అర్జెంటీనా టీమ్ కాంస్య పతకం సొంతం చేసుకుంది. ఆదివారం వావ్రే వేదికగా మూడో స్థానం కోసం నెదర్లాండ్స్‌తో జరిగిన పోరులో అర్జెంటీనా 2-1 గోల్స్ తేడాతో విజయం సాధించింది. చివరి వరకు ఉత్కంఠభరితంగా సాగిన సమరంలో అర్జెంటీనా చిరస్మరణీయ విజయాన్ని అందుకుంది. ప్రారంభం నుంచే ఇరు జట్లు నువ్వానేనా అన్నట్టు పోరాడాయి. ఒకరి గోల్ పోస్ట్‌పై మరోకరూ దాడులు చేస్తూ గోల్స్ కోసం ప్రయత్నించాయి. కానీ ప్రథమార్ధంలో రెండు జట్లకు ఒక్క గోల్ కూడా లభించలేదు. అయితే రెండో హాఫ్ ఆరంభంలోనే అర్జెంటీనా బోణీ కొట్టింది. టొమాస్ డొమెనె 41వ నిమిషంలో జట్టుకు తొలి గోల్ సాధించి పెట్టాడు. ఆ తర్వాత నెదర్లాండ్స్ ఎదురుదాడికి దిగింది. ప్రత్యర్థి జట్టుపై వరుస దాడులు చేస్తూ ఉక్కిరిబిక్కిరి చేసింది. ఇదే క్రమంలో 49వ నిమిషంలో ఫ్లోరిస్ నెదర్లాండ్స్‌కు గోల్ అందించాడు. దీంతో 11తో స్కోరు సమమైంది. ఆ తర్వాత రెండు జట్లు ఆధిక్యం కోసం సర్వం ఒడ్డి పోరాడాయి. కాగా, 59వ నిమిషంలో అర్జెంటీనా ఆటగాడు మతియాస్ రే అద్భుత గోల్ సాధించి జట్టుకు అద్భుత విజయం అందించాడు. ఈ గెలుపుతో అర్జెంటీనా కాంస్య పతకాన్ని దక్కించుకుంది. ఇక మహిళల విభాగంలో అర్జెంటీనా ప్రపంచకప్ ట్రోఫీని దక్కించుకున్న సంగతి తెలిసిందే. ఫైనల్లో నెదర్లాండ్స్‌ను ఓడించి అర్జెంటీనా విశ్వవిజేతగా నిలిచింది.

ఆంధ్రప్రదేశ్ లోని విశాఖపట్నం జిల్లా ఆనందపురం-పెందుర్తి సర్వీస్ రోడ్డులోని గాండ్రిగుండం పరిధిలో ఉన్న సత్తారువు జంక్షన్ వద్ద ఓ కారు లారీని బలంగా ఢీకొట్టింది. ప్రమాద ధాటికి కారులో ఒక్కసారిగా భారీగా మంటలు చెలరేగడంతో డ్రైవర్ వాహనం లోపలే చిక్కుకుపోయి సజీవ దహనమయ్యారు. జాతీయ రహదారి-16 సర్వీస్ రోడ్డుపై అతివేగంగా వెళ్తున్న కారు, తన ముందు వెళ్తున్న లారీని వెనుక నుంచి వేగంగా ఢీకొట్టింది. ఢీకొట్టిన తీవ్రతకు కారు ఇంజిన్‌లో మొదలైన మంటలు క్షణాల వ్యవధిలోనే వాహనం మొత్తానికి వ్యాపించాయి. దీంతో డ్రైవర్ బయటకు వచ్చే అవకాశం లేక మంటల్లో కాలి ప్రాణాలు కోల్పోయాడు. సమాచారం అందుకున్న అగ్నిమాపక సిబ్బంది, పోలీసులు అక్కడికి చేరుకునే సరికే కారు పూర్తిగా కాలి బూడిదైంది. ఆనందపురం ఎస్ఐ శివ ఘటనా స్థలాన్ని పరిశీలించారు. ప్రమాద సమయంలో కారు నంబర్ ప్లేట్ ఊడిపోయి లారీకి అతుక్కుపోవడాన్ని పోలీసులు గుర్తించారు. ఆ నంబర్ ఆధారంగా మృతుని వివరాలు తెలుసుకునేందుకు పోలీసులు దర్యాప్తు చేశారు.

ముంబైలోని చెంబూర్ ప్రాంతానికి చెందిన 25 ఏళ్ల ఆశిష్ మగర్, తన ప్రియురాలైన 19 ఏళ్ల విష్ణుమాయ, ఆమె బంధువైన మహిళతో కలిసి వారి ఇంట్లో నివసిస్తున్నాడు. రెండున్నర నెలల గర్భవతి అయిన విష్ణుమాయ ఆగస్టు 25న మరో ఫ్రెండ్‌తో కలిసి ఉండటం ఆశిష్‌ చూశాడు. ఆమెపై అతడు అనుమానం వ్యక్తం చేయడంతో ఆ జంట మధ్య వాగ్వాదం జరిగింది. అయితే కొద్దిసేపటికే ఆ గొడవ సద్దుమణిగింది. ఆ గొడవ తర్వాత ఆశిష్‌ విషం కలిపిన కూల్‌ డ్రింక్‌ను విష్ణుమాయకు ఇచ్చాడు. అది తాగిన తర్వాత ఆమె తీవ్ర అస్వస్థతకు గురైంది. కుటుంబ సభ్యులు ఆసుపత్రికి తరలించారు. ఆమె పరిస్థితి విషమించడంతో మరో ఆసుపత్రికి తరలించగా అప్పటికే మరణించినట్లు డాక్టర్లు నిర్ధారించారు. ఈ సమాచారం తెలుసుకున్న పోలీసులు విష్ణుమాయ మృతదేహానికి పోస్ట్‌మార్టం నిర్వహించగా విషం సేవించడం వల్లే ఆమె మరణించినట్లు రిపోర్ట్‌లో తేలింది. దీంతో ఆ యువతి మరణంపై పోలీసులు దర్యాప్తు చేశారు. విష్ణమాయ మరణానికి ముందు ప్రియుడు ఆశిష్‌తో గొడవ జరిగినట్లు పోలీసులకు తెలిసింది. అలాగే అతడు ఇచ్చిన కూల్‌ డ్రింక్‌ తాగిన తర్వాత తన ఆరోగ్య పరిస్థితి విషమించినట్లుగా ఆమె తమకు చెప్పిందని కుటుంబ సభ్యులు పోలీసులకు చెప్పారు. ఈ నేపథ్యంలో ఆశిష్‌ను అనుమానించి అదుపులోకి తీసుకుని ప్రశ్నించారు. అతడు బుకాయించేందుకు ప్రయత్నించినప్పటికి ఆధారాల మేరకు నిందితుడిగా నిర్ధారించి అరెస్ట్‌ చేశారు. ఆశిష్‌ను కోర్టులో ప్రవేశపెట్టగా ఐదు రోజుల పాటు పోలీస్‌ కస్టడీకి అప్పగించినట్లు పోలీస్‌ అధికారి తెలిపాడు. ఈ కేసుపై మరింతగా దర్యాప్తు చేస్తున్నట్లు వెల్లడించారు.

న్యూఢిల్లీలో రేపు జరగనున్న నేషనల్ ఇన్‌స్టిట్యూట్ ఆఫ్ ఫ్యాషన్ టెక్నాలజీ కంబైన్డ్ కాన్వొకేషన్ 2026కు భారత రాష్ట్రపతి ద్రౌపదీ ముర్ము ముఖ్య అతిథిగా హాజరుకానున్నారు. ఈ వేడుకలో ఎన్‌ఐఎఫ్‌టీ అధికారిక విజిటర్‌గా ఆమె పాల్గొని పట్టభద్రులకు డిగ్రీలను అందజేస్తారు. దేశవ్యాప్తంగా ఉన్న 18 ఎన్‌ఐఎఫ్‌టీ క్యాంపస్‌లకు చెందిన విద్యార్థులు ఈ సంయుక్త స్నాతకోత్సవంలో పాల్గొంటారు. కేంద్ర జౌళి శాఖ మంత్రి గిరిరాజ్ సింగ్‌తో పాటు పలువురు సీనియర్ అధికారులు, బోర్డ్ ఆఫ్ గవర్నర్స్ సభ్యులు, అధ్యాపకులు ఈ కార్యక్రమంలో పాలుపంచుకుంటారు. విద్యార్థుల విద్యా ప్రతిభ, సృజనాత్మకత, కృషిని గుర్తించేందుకు ఈ కాన్వొకేషన్ నిర్వహిస్తున్నారు. ప్రతి క్యాంపస్ నుంచి అన్ని కోర్సుల్లో అత్యధిక సీజీపీఏ సాధించిన ఉత్తమ విద్యార్థులను గోల్డ్ మెడల్స్‌తో సత్కరిస్తారు. ఈ ఉమ్మడి వేడుక అనంతరం, ఆయా క్యాంపస్‌ల వారీగా డిగ్రీల పంపిణీ కార్యక్రమాలు జరుగుతాయి. 1986లో కేంద్ర జౌళి శాఖ పరిధిలో ఏర్పాటైన ఎన్‌ఐఎఫ్‌టీ, 2006 ఎన్‌ఐఎఫ్‌టీ చట్టం ద్వారా చట్టబద్ధమైన సంస్థగా మారింది. సంప్రదాయ కళలు, ఆధునిక డిజైన్, సాంకేతికతను మిళితం చేస్తూ ప్రస్తుతం దేశవ్యాప్తంగా 20 క్యాంపస్‌లతో భారతదేశ ఫ్యాషన్ విద్యా రంగంలో అగ్రగామిగా నిలిచింది. 'వికసిత్ భారత్' సాధనలో ఈ యువ డిజైనర్లు కీలక పాత్ర పోషిస్తారని కేంద్ర ప్రభుత్వం ఆశాభావం వ్యక్తం చేసింది.

ఆంధ్రప్రదేశ్ లోని గుంటూరు నగరంలో పట్టపగలే దారుణ హత్య జరగడం కలకలం సృష్టించింది. స్థాని కొండా వెంకటప్పయ్య కాలనీలో చిన్నా అనే వ్యక్తిని ప్రత్యర్థులు కత్తులతో నరికి చంపారు. 20 ఏళ్ల క్రితం జరిగిన ఓ హత్య కేసులో చిన్నా నిందితుడిగా ఉన్నాడు. ఘర్షణల నేపథ్యంలో అతను తెలంగాణలోని సూర్యాపేట వెళ్లి అక్కడే కుటుంబంతో జీవిస్తున్నాడు. గుంటూరులో ఉండే అతడి బాబాయ్ చనిపోవడంతో అంత్యక్రియల్లో పాల్గొనేందుకు ఆదివారం సూర్యాపేట నుంచి గుంటూరు వచ్చాడు. దీంతో ప్రత్యర్థులు కాపు కాచి చిన్నాపై దాడి చేసి దారుణంగా హత్య చేశారు. నగరం పాలెం పోలీసులు కేసు నమోదు చేసి దర్యాప్తు చేస్తున్నారు.

వైయస్సార్‌సీపీ నాయకుడు సజ్జల రామకృష్ణా రెడ్డి మీడియా సమావేశంలో మాట్లాడుతూ విజయసాయిరెడ్డి వ్యాఖ్యలు అత్యంత దారుణమని అన్నారు. వైయస్సార్‌సీపీకి కర్త, కర్మ, క్రియ ఒక్క వైయస్‌ జగన్‌మోహన్‌రెడ్డే. పార్టీలో నంబర్‌ వన్‌, నంబర్‌ టూ అనే ప్రశ్నే లేదు. జగన్‌ నంబర్‌ టూ, సజ్జల నంబర్‌ వన్‌ అన్న విజయసాయిరెడ్డి వ్యాఖ్య అత్యంత అన్యాయం. జగన్‌ లేని వైయస్సార్‌సీపీకి అర్థమే లేదు. విజయసాయిరెడ్డిని పార్టీలో వెనక్కి లాగారన్న ఆరోపణకు ఆయనకు వచ్చిన పదవులే సమాధానం. రాజ్యసభ సభ్యత్వం, జాతీయ ప్రధాన కార్యదర్శి, పార్లమెంటరీ పార్టీ నేత, ఏపీ ప్రభుత్వ ప్రత్యేక ప్రతినిధి, ఉత్తరాంధ్ర సమన్వయకర్త, అనుబంధ విభాగాల ఇన్‌చార్జ్‌ వంటి అత్యంత కీలక బాధ్యతలు ఆయనకే దక్కాయి. 2020 నుంచే తనను తగ్గించారని విజయసాయిరెడ్డి ఇప్పుడు చెబుతున్నారు. అలా అయితే 2022లో రెండోసారి రాజ్యసభకు ఎందుకు పంపారు? పార్టీ నుంచి వెళ్లినప్పుడు 'వ్యక్తిగత కారణాలతోనే రాజీనామా చేస్తున్నాను, ఎవరిపైనా కోపం లేదు, సజ్జల వల్ల రాజీనామా చేయలేదు' అని చెప్పిన విజయసాయిరెడ్డి ఇప్పుడు అందుకు విరుద్ధంగా మాట్లాడుతున్నారు. జగన్‌ మతమార్పిడులను ప్రోత్సహించారన్న విజయసాయిరెడ్డి ఆరోపణ దారుణం. వైయస్‌ కుటుంబం అన్ని మతాలను ఎలా గౌరవించిందో దశాబ్దాలుగా దగ్గరగా ఉన్న విజయసాయిరెడ్డికి బాగా తెలుసు. విజయసాయిరెడ్డిపై జగన్‌కు ప్రత్యేకమైన అభిమానం, విశ్వాసం ఉండేది. తప్పుడు కేసుల్లో తనతో పాటు ఇబ్బందులు పడ్డారన్న భావనతో అత్యున్నత స్థాయి అవకాశాలు, బాధ్యతలు ఇచ్చారు. రాజకీయ పార్టీ పెట్టుకోవాలంటే విజయసాయిరెడ్డి స్వేచ్ఛగా పెట్టుకోవచ్చు. కానీ కొత్త రాజకీయ ప్రయాణానికి ప్రచారం కోసం జగన్‌ను, వైయస్సార్‌సీపీని టార్గెట్‌ చేయడం సరికాదు. ఇదే ధోరణి కొనసాగితే సమాధానం కూడా అంతే ఘాటుగా ఉంటుంది. 2024 ఎన్నికల్లో ఎదురుదెబ్బ తగిలినా వైయస్సార్‌సీపీ సంస్థాగతంగా మళ్లీ పుంజుకుంది. స్థానిక సంస్థల ఎన్నికలకైనా, 2029 సాధారణ ఎన్నికలకైనా, అంతకంటే ముందే ఎన్నికలు వచ్చినా పార్టీ సిద్ధం. వైయస్సార్‌సీపీ ఎన్నికలకు భయపడటం లేదు. డెడ్‌, అబ్సెంట్‌, ఘోస్ట్‌ ఓట్లను తొలగించి ఓటర్ల జాబితా శుద్ధి చేసిన తర్వాత ఎన్నికలు జరపాలన్నదే పార్టీ డిమాండ్‌.

అమెరికాలోని న్యూయార్క్‌ మాడిసన్‌ స్క్వేర్‌ గార్డెన్‌‍లో ఆర్ఎస్ఎస్ చీఫ్ మోహన్‌ భగవత్‌ మాట్లాడుతూ భారత్‌లో ముస్లింలు ఉండకూడదని ఎవరైనా అనుకుంటే వారు అసలు హిందువే కాదని అన్నారు. దీనిపై ఎంఐఎం చీఫ్, హైదరాబాద్ ఎంపీ అసదుద్దీన్ ఒవైసీ స్పందిస్తూ ప్రపంచం ముందు ఒకరకంగా, తమ కార్యకర్తలకు నూరిపోసేందుకు మరొక రకంగా మాట్లాడటం ఆరెస్సెస్‌కు అలవాటైన పాత వ్యూహమేనని ఆయన మండిపడ్డారు. ఈ మేరకు ఆదివారం ఒవైసీ ఎక్స్ (ట్విట్టర్) వేదికగా ఆర్ఎస్ఎస్ సిద్ధాంతాలు, ఆ సంస్థ పూర్వ నాయకుల పుస్తకాలలోని సారాంశాన్ని ప్రస్తావిస్తూ ఘాటు విమర్శలు చేశారు. ఆర్ఎస్ఎస్ భారత స్వాతంత్య్ర పోరాటంలో పాల్గొనలేదని ఒవైసీ ఆ సంస్థ వ్యవస్థాపకుడు హెడ్గేవార్ గాంధీజీ నాయకత్వంలోని 'హిందూ-ముస్లిం ఐక్యత'ను వ్యతిరేకిస్తూ కాంగ్రెస్ నుంచి బయటకు వచ్చారని ఒవైసీ అన్నారు. ఈ విషయం ఆర్ఎస్ఎస్ ప్రచురించిన ఆయన జీవిత చరిత్రలోనే స్పష్టంగా పేర్కొన్నారని తెలిపారు. ఆర్ఎస్ఎస్ ప్రజాస్వామ్యాన్ని వ్యతిరేకిస్తుందని, 1940లోనే ఎం.ఎస్. గోల్వాల్కర్ ఒకే జెండా, ఒకే నాయకుడు, ఒకే సిద్ధాంతం అని ప్రకటించారని పేర్కొన్నారు. గోల్వాల్కర్ రాసిన 'బంచ్ ఆఫ్ థాట్స్' పుస్తకంలోని ఇంటర్నల్ త్రెట్స్ అధ్యాయంలో ముస్లింలు, క్రైస్తవులను దేశానికి మొదటి, రెండు ప్రధాన ముప్పులుగా వర్ణించారని, ముస్లింలను నిరంతరం అనుమానించాలని రాశారని ఒవైసీ పేర్కొన్నారు. ఉమ్మడి పౌర స్మృతి, మతమార్పిడి నిరోధక చట్టాలు, ఉపా వంటి చట్టాల పేరుతో మైనారిటీలను లక్ష్యంగా చేసుకుంటున్నారని, 2002 గుజరాత్ అల్లర్లలో ముస్లింలపై జరిగిన హింసను ఈ సందర్భంగా ప్రస్తావించారు. మోహన్ భగవత్ బయటకు ఇలాంటి తియ్యటి మాటలు చెప్పడం మాని తమ పూర్వ నాయకులు హెడ్గేవార్, గోల్వాల్కర్, సావర్కర్ రాసిన పుస్తకాలలోని విషపూరిత అంశాలను ప్రజలకు బహిరంగంగా చదివి వినిపించాలని ఒవైసీ డిమాండ్ చేశారు. అప్పుడే ప్రజలు ఆర్ఎస్ఎస్ అసలు నిజస్వరూపాన్ని అర్థం చేసుకుంటారని విమర్శించారు.

పైలట్ శిక్షణ కేంద్రాన్ని కర్నూలు విమానాశ్రయంలో ఏర్పాటు చేసేందుకు ప్రణాళికలు సిద్ధమయ్యాయి. ఈ ప్రాజెక్టు కోసం ప్రసిద్ధ ఓరియంట్ ఫ్లైట్స్ ఏవియేషన్ అకాడమీ' సంస్థకు విమానాశ్రయ ప్రాంగణంలో 1.25 ఎకరాల స్థలాన్ని కేటాయించారు. దీనివల్ల ఆంధ్రప్రదేశ్ కి చెందిన ఔత్సాహిక యువత పైలట్ శిక్షణ కోసం ఇతర రాష్ట్రాలకు వెళ్లాల్సిన అవసరం లేకుండా స్థానికంగానే శిక్షణ పొందే అవకాశం లభిస్తుంది. దాదాపు రూ. 100 కోట్ల భారీ వ్యయంతో ఈ శిక్షణ కేంద్రాన్ని సకల సౌకర్యాలతో నిర్మిస్తున్నారు. ఇందులో ప్రత్యేకంగా అకాడమీ భవనం, విమానాలను ఉంచేందుకు హ్యాంగర్ , టాక్సీవే, మెయింటెనెన్స్ , రిపేర్ సెంటర్లతో పాటు విద్యార్థులకు అత్యంత ఖచ్చితమైన ప్రాక్టికల్ అనుభవాన్ని అందించేందుకు అధునాతన ఫ్లైట్ సిమ్యులేటర్లను అందుబాటులోకి తేనున్నారు. అంతర్జాతీయ ప్రమాణాలకు అనుగుణంగా డైరెక్టరేట్ జనరల్ ఆఫ్ సివిల్ ఏవియేషన్ నిబంధనలకు కట్టుబడి ఈ కేంద్రం రూపుదిద్దుకుంటోంది. శిక్షణ కార్యకలాపాలను ప్రారంభించడంలో భాగంగా కర్ణాటకలోని మైసూర్ కేంద్రం నుంచి మూడు శిక్షణా విమానాలను కర్నూలు ఎయిర్‌పోర్టుకు తీసుకురానున్నారు. ఈ కేంద్రం పూర్తిస్థాయిలో అందుబాటులోకి వచ్చిన తర్వాత విద్యార్థులకు క్లాస్‌రూమ్ పాఠాలతో పాటు ప్రాక్టికల్ ఫ్లయింగ్ ట్రైనింగ్‌ను ఇక్కడే ప్రత్యక్షంగా అందించనున్నారు. స్పష్టమైన వాతావరణం, విశాలమైన రన్‌వే ఉండటం వల్ల కర్నూలు ఎయిర్‌పోర్ట్ ఫ్లయింగ్ శిక్షణకు అత్యంత అనుకూలమైన వేదికగా నిలవనుంది. కమర్షియల్ పైలట్ లైసెన్స్ కోర్సులతో పాటు, రాబోయే రోజుల్లో ఏవియేషన్ రంగానికి అవసరమైన ఇతర వృత్తిపరమైన కోర్సులను కూడా ఇక్కడ విస్తరించాలని నిర్వాహకులు నిర్ణయించారు. భవిష్యత్తులో ఎయిర్‌పోర్ట్ గ్రౌండ్ స్టాఫ్ , కేబిన్ క్రూ శిక్షణా కోర్సులను కూడా ఇక్కడ నిర్వహించేందుకు ప్రణాళికలు రచిస్తున్నారు. ఈ ప్రతిష్టాత్మక కేంద్రం ఏర్పాటుతో రాయలసీమ ప్రాంతం ఏవియేషన్ హబ్‌గా మారడమే కాకుండా, స్థానిక యువతకు ఉపాధి, ఉన్నత అవకాశాలు లభించనున్నాయి.

ఉజ్బెకిస్తాన్ ప్రభుత్వం తమ దేశ అత్యున్నత పురస్కారమైన 'ఒలియ్ దరజాలి దోస్త్లిక్' ఆర్డర్‌ను భారత ప్రధాని నరేంద్ర మోడీకి ప్రదానం చేసింది. వాణిజ్యం, స్వచ్ఛ ఇంధనం, కనెక్టివిటీ రంగాల్లో ద్వైపాక్షిక సంబంధాలను బలోపేతం చేసుకునే లక్ష్యంతో రెండు రోజుల పర్యటన నిమిత్తం ఉజ్బెకిస్తాన్ వెళ్లిన ప్రధాని మోడీకి, ఆ దేశ అధ్యక్షుడు షౌకత్ మిర్జియోయేవ్ స్వయంగా ఈ ప్రతిష్టాత్మక అవార్డును అందజేశారు. ఈ గౌరవం అందుకోవడంపై ప్రధాని మోడీ హర్షం వ్యక్తం చేస్తూ, ఈ అవార్డును భారత్-ఉజ్బెకిస్తాన్ మధ్య ఉన్న శాశ్వత బంధానికి అంకితమిస్తున్నట్లు సామాజిక మాధ్యమాల్లో పేర్కొన్నారు. ఉజ్బెకిస్తాన్ అత్యున్నత పురస్కారం అందుకోవడం తనకు దక్కిన వ్యక్తిగత గౌరవం కాదని, ఇది 140 కోట్ల మంది భారతీయులకు దక్కిన గౌరవమని స్పష్టం చేశారు. 'దోస్త్లిక్' అనే పదానికి 'స్నేహం' అని అర్థమని, భారతదేశంలో ప్రతి కుటుంబానికి ఈ పదం ఎంతో సుపరిచితమని ఆయన గుర్తుచేశారు. భారత్, ఉజ్బెకిస్తాన్ మధ్య శతాబ్దాల నాటి చారిత్రక మైత్రి, ఉమ్మడి వారసత్వానికి ఈ పురస్కారం నిదర్శనమని ప్రధాని పేర్కొంటూ ఉజ్బెక్ అధ్యక్షుడు, అక్కడి ప్రజలకు హృదయపూర్వక ధన్యవాదాలు తెలిపారు. అవార్డు ప్రదానానికి ముందు ఇరుదేశాల అధినేతల మధ్య జరిగిన ద్వైపాక్షిక చర్చల్లో భారత్-ఉజ్బెకిస్తాన్ సంబంధాలను 'సమగ్ర వ్యూహాత్మక భాగస్వామ్యం' స్థాయికి పెంచాలని నిర్ణయించారు.

అర్హత ఉన్నప్పటికీ ఈపీఎఫ్‌ పరిధిలోకి రాని ఉద్యోగులను నమోదు చేసేందుకు 'ఎంప్లాయీస్‌ ఎన్‌రోల్‌మెంట్‌ క్యాంపెయిన్‌ 2026'ను కేంద్ర ప్రభుత్వం ప్రారంభించింది. గతంలో మిగిలిపోయిన నమోదు, కాంప్లయన్స్‌ లోపాలను సరిదిద్దడంతోపాటు మరింత మంది ఉద్యోగులకు పీఎఫ్‌, పెన్షన్‌, బీమా వంటి సామాజిక భద్రతా ప్రయోజనాలను అందుబాటులోకి తీసుకురావడం ఈ కార్యక్రమం ప్రధాన ఉద్దేశం. కేంద్ర కార్మిక, ఉపాధి మంత్రిత్వ శాఖ 2026 జూన్‌ 29న ఈఈసీ - 2026ను నోటిఫై చేసింది. ఈ ప్రత్యేక ప్రచారం జూలై 1 నుంచి అమల్లోకి వచ్చింది. ఉద్యోగుల నమోదు కోసం అక్టోబర్‌ 31 వరకు అవకాశం ఉంది. వివిధ సంస్థల్లో 2009 ఏప్రిల్‌ 1 నుంచి 2026 మార్చి 31 మధ్య కాలంలో పనిచేసినా, అర్హత ఉన్నప్పటికీ గతంలో ఈపీఎఫ్ లో నమోదు కాని ఉద్యోగులను ఈ పథకం కింద చేర్చవచ్చు. అయితే డిక్లరేషన్‌ సమయంలో సంబంధిత ఉద్యోగి అదే సంస్థలో ఉద్యోగంలో కొనసాగుతూ ఉండాలి. గతంలో ఉద్యోగుల నుంచి పీఎఫ్‌ వాటా మినహాయించకపోయిన సందర్భాల్లో, EEC-2026 కింద ప్రకటించిన ఉద్యోగులకు ఉద్యోగి వాటా చెల్లింపు నుంచి మినహాయింపు కల్పించారు. అయితే యజమాని తన వాటాతోపాటు వర్తించే వడ్డీ, అడ్మినిస్ట్రేటివ్‌ ఛార్జీలు చెల్లించాల్సి ఉంటుంది. సాధారణంగా విధించే నష్టపరిహారానికి బదులుగా ఈ ప్రచారం కింద ఒక్కో సంస్థకు రూ.100 లంప్‌సమ్‌ డ్యామేజెస్‌ నిబంధనను తీసుకొచ్చారు. ఈ ప్రచారం ప్రధానంగా గతంలో ఈపీఎఫ్‌ కవరేజీకి దూరమైన అర్హత కలిగిన ఉద్యోగుల కోసం ఉద్దేశించినది. ఈపీఎఫ్‌ పరిధిలో ఉన్న లేదా ఈపీఎఫ్‌ చట్టం/సామాజిక భద్రతా కోడ్‌ కింద కవరేజీకి వచ్చే సంస్థలు ఈ అవకాశాన్ని వినియోగించుకోవచ్చు. యజమానులు తమ పాత ఉద్యోగ, వేతన రికార్డులను పరిశీలించి అర్హులైన ఉద్యోగులు ఎవరైనా నమోదు కాకుండా మిగిలిపోయారా అనేది గుర్తించాలని ఈపీఎఫ్‌వో సూచించింది. EEC-2026 కింద నమోదు ప్రక్రియను ఆన్‌లైన్‌ విధానంలో నిర్వహించనున్నారు. ప్రకటించిన ఉద్యోగులకు ఉమాంగ్‌యాప్‌ ద్వారా ఫేస్‌ ఆథెంటికేషన్‌ ఆధారంగా UAN జనరేషన్, అనంతరం ECR ద్వారా సంబంధిత పీఎఫ్‌ కాంట్రిబ్యూషన్ల చెల్లింపు వంటి విధానాలను ఈపీఎఫ్‌వో పేర్కొంది. దీంతో గతంలో నమోదు కాని ఉద్యోగులను అధికారిక సామాజిక భద్రతా వ్యవస్థలోకి తీసుకురావడంతోపాటు రికార్డుల్లో పారదర్శకత పెరగనుంది. ఈపీఎఫ్‌లో నమోదు కావడం ద్వారా అర్హత కలిగిన ఉద్యోగులకు భవిష్య నిధి మాత్రమే కాకుండా సంబంధిత పెన్షన్‌, ఉద్యోగి డిపాజిట్‌ లింక్డ్‌ ఇన్సూరెన్స్‌ వంటి సామాజిక భద్రతా ప్రయోజనాలు అందుబాటులోకి వస్తాయి. అదే సమయంలో సంస్థల గత కాంప్లయన్స్‌ లోపాలను క్రమబద్ధీకరించేందుకు కూడా ఈ ప్రత్యేక విండో ఉపయోగపడుతుంది.

బెంగళూరులో గత కొన్ని వారాలుగా ఆటో రిక్షాల ఛార్జీలు విపరీతంగా పెరిగిపోయాయని, ఆటో డ్రైవర్లు ఇష్టారాజ్యంగా ప్రవర్తిస్తున్నారని నగరవాసులు తీవ్ర ఆవేదన వ్యక్తం చేస్తున్నారు. వేగవంతమైన, తక్కువ ఖర్చుతో కూడిన ప్రయాణానికి ఉపకరించే బైక్ ట్యాక్సీల లభ్యత గణనీయంగా తగ్గిపోవడమే ఈ పరిస్థితికి ప్రధాన కారణమని తెలుస్తోంది. గతంలో బైక్ ట్యాక్సీలపై ఆధారపడిన ప్రయాణికులు, ఇప్పుడు ప్రత్యామ్నాయాలు లేక ఆటోలను ఆశ్రయించాల్సి వస్తోంది. ఇదే అవకాశంగా మలుచుకుంటున్న కొంతమంది ఆటో డ్రైవర్లు, ప్రయాణికుల అవసరాన్ని ఆసరాగా చేసుకుని విపరీతంగా బేరసారాలు సాగిస్తున్నారు. యాప్ ద్వారా ఆటో బుక్ చేసుకోవడం కూడా ఇప్పుడు ప్రయాణికులకు ఒక పెద్ద సమస్యగా పరిణమించింది. వివిధ డిజిటల్ యాప్‌ల ద్వారా ఆటోను రైడ్ చేసే సమయంలో డ్రైవర్లు అనుసరిస్తున్న తీరుపై ప్రయాణికులు పలు ఫిర్యాదులు చేస్తున్నారు. ఒకే సమయంలో అనేక యాప్‌ల నుండి బుకింగ్‌లను స్వీకరిస్తున్న ఆటో డ్రైవర్లు, తక్కువ ధరకు ఉన్న రైడ్‌లను నిష్కర్షగా రద్దు చేస్తున్నారు. యాప్‌లో డిస్‌ప్లే అయ్యే ఛార్జీ తక్కువగా ఉందంటూ ప్రయాణికులకు నేరుగా ఫోన్ చేసి అదనపు మొత్తం డిమాండ్ చేయడం లేదా రైడ్ అంగీకరించేలా చేయడానికి ప్రయాణికులే సొంతంగా 'టిప్' జోడించాల్సిన పరిస్థితులు ఏర్పడుతున్నాయి. యాప్ ద్వారా వచ్చిన బుకింగ్‌ను యాప్‌లోనే రద్దు చేయించి, పరస్పరం మాట్లాడుకున్న ఎక్కువ మొత్తాన్ని నేరుగా నగదు రూపంలో చెల్లించాలని కోరుతున్నారు. యాప్ ఆధారిత బుకింగ్‌లు ప్రయాణికులకు సులభమైన మరియు పారదర్శకమైన సేవలను అందించాలనే లక్ష్యంతో ప్రారంభమైనప్పటికీ, ప్రస్తుత పరిస్థితులు ఆ ఉద్దేశ్యాన్నే దెబ్బతీస్తున్నాయి. రవాణా శాఖ అధికారులు తక్షణమే స్పందించి ఆటో డ్రైవర్ల అదనపు వసూళ్లను అరికట్టాలని నగరవాసులు కోరుతున్నారు.

గ్లోబల్ మార్కెట్‌లో విశేష ఆదరణ పొందిన తన ప్రీమియం ఫ్లాగ్‌షిప్ 7-సీటర్ ఎస్‌యూవీ 'కియా సోరెంటో'ను భారత మార్కెట్లోకి లాంచ్ చేసేందుకు వేగంగా ఏర్పాట్లు పూర్తి చేస్తోంది. కొత్త డిజైన్ ల్యాంగ్వేజ్, ఫ్యూచరిస్టిక్ కేబిన్ డిజైన్, అత్యంత శక్తివంతమైన ఇంజిన్ కాంబినేషన్‌లతో రాబోతున్న ఈ కారుకు సంబంధించిన అధికారిక వివరాలను కంపెనీ ఇప్పటికే పంచుకుంది. డిజైన్ పరంగా కియా సోరెంటో రోడ్డుపై ప్రీమియం లుక్‌తో కనిపిస్తుంది. ముందుభాగంలో కియా సిగ్నేచర్ డిజైన్‌తో కూడిన టైగర్ నోస్ గ్రిల్, కొత్త డిజైన్‌తో వచ్చే నిలువు ఎల్‌ఈడీ హెడ్‌లైట్లు, డైనమిక్ ఎల్‌ఈడీ డీఆర్‌ఎల్‌లు , స్పోర్టీ బంపర్ ఈ ఎస్‌యూవీకి సాలిడ్ అప్పీల్‌ను ఇస్తాయి. కారు వెనుక వైపు కనెక్టెడ్ ఎల్‌ఈడీ టెయిల్ లైటింగ్, ఇంటిగ్రేటెడ్ రూఫ్ స్పాయిలర్ , సిల్వర్ స్కిడ్ ప్లేట్ లుక్ మరింత ఆకర్షణీయంగా మార్చాయి. కారు లోపలికి అడుగుపెడితే లగ్జరీ రీచ్‌తో కూడిన డ్యూయల్-టోన్ కేబిన్ స్వాగతం పలుకుతుంది. ముఖ్యంగా డ్రైవర్ సౌకర్యం కోసం 12.3-అంగుళాల డిజిటల్ ఇన్‌స్ట్రుమెంట్క్లస్టర్ , 12.3-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్‌లను ఒకే ప్యానెల్‌పై జత చేసి రూపొందించిన భారీ 30-అంగుళాల కర్వ్‌డ్ డిస్‌ప్లే కేబిన్‌కు ప్రధాన ఆకర్షణగా నిలుస్తుంది. డాష్‌బోర్డ్ చుట్టూ సాఫ్ట్-టచ్ మెటీరియల్స్, ప్రీమియం లెదర్ అపోల్స్టరీ, యాంబియంట్ మూడ్ లైటింగ్, , సువిశాలమైన పనోరమిక్ సన్‌రూఫ్ ఈ కారుకు సరికొత్త లగ్జరీ లుక్‌ని ఇస్తాయి. టెక్నాలజీ ప్రియులను ఆకట్టుకునేలా కియా ఈ మోడల్‌ను అత్యుత్తమ సేఫ్టీ, ఇన్ఫోటైన్‌మెంట్ ఫీచర్లతో నింపేసింది. ఇందులో ఆండ్రాయిడ్ ఆటో, ఆపిల్ కార్‌ప్లే కనెక్టివిటీతో పాటు ఆర్టిఫిషియల్ ఇంటెలిజెన్స్ వాయిస్ అసిస్టెంట్ సపోర్ట్ అందుబాటులో ఉంది. ప్రయాణికుల అత్యుత్తమ సౌకర్యం కోసం ముందు సీట్లలో వెంటిలేషన్ ఫంక్షన్, మల్టీ-జోన్ ఆటోమేటిక్ క్లైమేట్ కంట్రోల్ విత్ డిజిటల్ ఏసీ ప్యానెల్, రోటరీ డయల్ గేర్ సెలెక్టర్, పుష్-బటన్ స్టార్ట్-స్టాప్, వైర్‌లెస్ స్మార్ట్‌ఫోన్ ఛార్జింగ్ ప్యాడ్, పవర్డ్ టెయిల్‌గేట్ , 360-డిగ్రీ సరౌండ్ వ్యూ కెమెరా వ్యవస్థలను పొందుపరిచారు. భద్రతకు సంబంధించి లెవెల్-2 అడ్వాన్స్‌డ్ డ్రైవర్ అసిస్టెన్స్ సిస్టమ్, అడాప్టివ్ క్రూయిజ్ కంట్రోల్, లేన్ కీప్ అసిస్ట్, మల్టిపుల్ ఎయిర్‌బ్యాగ్‌లు, , ఎలక్ట్రానిక్ స్టెబిలిటీ కంట్రోల్ వంటి అధునాతన సేఫ్టీ కేర్ ఫీచర్లు ఇందులో ఉన్నాయి. పర్ఫార్మెన్స్ విషయంలో రాజీపడకుండా ఈ ఎస్‌యూవీని పెట్రోల్, డీజిల్ , హైబ్రిడ్ ఆప్షన్లలో తీసుకువస్తున్నారు. ప్రాథమిక మోడల్‌గా 1.6-లీటర్ టర్బో-పెట్రోల్ హైబ్రిడ్ ఇంజిన్ అందుబాటులోకి రానుంది. ఇది అత్యుత్తమ ఇంధన సామర్థ్యంతో పాటు మెరుగైన మైలేజీని అందిస్తుంది. లాంగ్ డ్రైవ్‌లు, పవర్‌ఫుల్ పర్ఫార్మెన్స్ కోరుకునే వారి కోసం 2.2-లీటర్ టర్బో-డీజిల్ ఇంజిన్ ఆప్షన్ కూడా రానుంది. ఇవి మాన్యువల్ , ఆటోమేటిక్ గేర్‌బాక్స్ ఆప్షన్‌లలో లభించనున్నాయి. ముఖ్యంగా, భారతీయ మార్కెట్‌లో ఆల్-వీల్-డ్రైవ్ టెక్నాలజీతో రాబోతున్న కియా మొదటి హైబ్రిడ్ ఎస్‌యూవీగా సోరెంటో నిలవబోతోంది. ఈ ఫ్లాగ్‌షిప్ ఎస్‌యూవీ అధికారిక ధరల వివరాలను కంపెనీ అధికారిక ఆవిష్కరణ సమయాన్నే ప్రకటిస్తుంది. అయినప్పటికీ, భారత మార్కెట్‌లో సోరెంటో ఎక్స్-షోరూమ్ ధర సుమారు ₹35 లక్షల నుండి ₹40 లక్షల శ్రేణిలో ఉండే అవకాశం ఉందని ఆటోమొబైల్ వర్గాలు భావిస్తున్నాయి. ప్రీమియం 3-రో ఎస్‌యూవీ సెగ్మెంట్‌లో అడుగుపెడుతున్న కియా సోరెంటో, మార్కెట్‌లో దశాబ్దాలుగా ఏకఛత్రాధిపత్యం చెలాయిస్తున్న టయోటా ఫార్చ్యూనర్, జీప్ మెరిడియన్, స్కోడా కొడియాక్ , ఎంజీ గ్లోస్టర్ వంటి దిగ్గజ మోడళ్లకు నిశ్చితంగా గట్టి పోటీని ఇస్తుంది.

జీఎస్టీ కౌన్సిల్ సమావేశం సెప్టెంబర్ 12న జరగనుంది. ఈ భేటీ ఎజెండా ఇంకా అధికారికంగా విడుదల కాకపోయినా, స్మార్ట్‌ఫోన్లపై జీఎస్టీ తగ్గించే అవకాశం ఉందనే చర్చ నడుస్తోంది. ప్రస్తుతం మొబైళ్లపై 18 శాతం జీఎస్టీ ఉంది. ఇది మార్కెట్లో ఫోన్ల ధరలు, ఆఫర్లను నేరుగా ప్రభావితం చేస్తోంది. ఒకవేళ జీఎస్టీ కౌన్సిల్ మొబైళ్లపై పన్నును 18 శాతం నుంచి 12 శాతానికి తగ్గిస్తే కంపెనీలు బేస్ ప్రైస్ పెంచనంత వరకు ఎంఆర్ఫీ ధరల్లో దాదాపు 5 శాతం వరకు తగ్గుదల ఉంటుంది. కొత్త ఫోన్‌కి అప్‌గ్రేడ్ అవ్వాలనుకునే వారు, అర్జెంట్ అవసరం లేని విద్యార్థులు సెప్టెంబర్ 12 వరకు వేచి చూడటం మంచిది.

హైదరాబాద్, ఆర్టీసీ క్రాస్ రోడ్స్, అజామాబాద్‌లోని సుమారు రూ. 500 కోట్ల విలువైన తెలంగాణ ఆయిల్‌ఫెడ్ భూమిని కారుచౌకగా ప్రైవేటుపరం చేయడాన్ని నిరసిస్తూ ముఖ్యమంత్రి రేవంత్ రెడ్డికి మాజీ మంత్రి, బీఆర్ఎస్ శాసనసభాపక్ష ఉపనేత తన్నీరు హరీశ్ రావు ఆదివారం బహిరంగ లేఖ రాశారు. రేవంత్ రెడ్డి ప్రభుత్వం ప్రజా సంక్షేమాన్ని గాలికి వదిలేసి, కమీషన్ల కోసం రియల్ ఎస్టేట్ ఏజెన్సీలా మారిపోయిందని విమర్శించారు. అజామాబాద్‌లో మూడు దశాబ్దాలుగా ప్రభుత్వ ఆధీనంలో ఉన్న మూడు ఎకరాల 23 గుంటల (15,984 చదరపు గజాలు) ఆయిల్‌ఫెడ్ భూమిని కేవలం రూ. 87 కోట్లకే ఒక ప్రైవేట్ వ్యక్తికి అప్పగించేందుకు భారీ కుంభకోణానికి తెరలేపారని హరీశ్ రావు ఆరోపించారు. ఆ రూ. 87 కోట్లను చెల్లించడానికి ప్రభుత్వ రంగ సంస్థ అయిన ఆయిల్‌ఫెడ్ సిద్ధంగా ఉన్నప్పటికీ, దానిని కాదని ప్రైవేట్ వ్యక్తికి కట్టబెట్టడం వెనుక మర్మమేంటని ఆయన ప్రశ్నించారు. 1987లోనే సుప్రీంకోర్టు సదరు ప్రైవేట్ సంస్థ దావాను కొట్టివేసి ప్రభుత్వానిదే హక్కు అని స్పష్టం చేసినా, కాంగ్రెస్ పాలకులు స్వార్థ ప్రయోజనాలు, కమీషన్ల కోసం అత్యున్నత న్యాయస్థానం తీర్పును సైతం తుంగలో తొక్కారని మండిపడ్డారు. వెంటనే ఈ అక్రమ భూ కేటాయింపును రద్దు చేసి, సదరు భూమిని తెలంగాణ ఆయిల్‌ఫెడ్‌కే కేటాయిస్తూ ఫ్రీహోల్డ్ హక్కులు కల్పించాలని ముఖ్యమంత్రి రేవంత్ రెడ్డిని హరీశ్ రావు డిమాండ్ చేశారు. ప్రజల సొత్తును ప్రైవేటు వ్యక్తులకు దోచిపెట్టే చర్యలను బీఆర్ఎస్ పార్టీ చూస్తూ ఊరుకోబోదని, ఈ నిర్ణయాన్ని ప్రభుత్వం వెనక్కి తీసుకునే వరకు ప్రజాక్షేత్రంలో రాజీలేని మహా పోరాటం చేస్తామని ఆయన స్పష్టం చేశారు.

నేపాల్‌ వరద బీభత్సం పెను విషాదాన్ని మిగిల్చింది. వందలాదిమందిని పొట్టన బెట్టుకుంది. అయితే ఇంతటి భారీ విపత్తులో అక్కడక్కడా వెలుగు చూస్తున్న కొన్ని ఘటనలు నెట్టింట ప్రశంసలందుకుంటున్నాయి. ఒక ఉపాధ్యాయుడు రానున్న విపత్తును ఊహించి, త్వరితగతిన స్పందించి, వందలమంది విద్యార్థులను సురక్షిత ప్రాంతానికి తరలించి వారి ప్రాణాలను కాపాడిన ఘటన భారీ ఊరటనిస్తోంది. బుధవారం ఉదయం 9:20 గంటలకు, నేపాల్‌లోని నువాకోట్‌కు చెందిన త్రిభువన్ త్రిశూలి సెకండరీ స్కూల్ ప్రిన్సిపాల్ రాజేంద్ర దవాడీ (47), ఆకస్మికంగా వచ్చిన భయంకరమైన వరదల నుంచి తన సమయస్ఫూర్తితో 1,643 మంది విద్యార్థులను సురక్షితంగా కాపాడారు. గ్రామం వరదల్లో కొట్టుకుపోయిందని స్నేహితుడి నుంచి ఫోన్ రావడంతో పాటు, ఒక విద్యార్థి తండ్రి వరద నీరు వేగంగా పెరుగుతోందని హెచ్చరించాడు. దీనితో వెంటనే అప్రమత్తమైన ఇంగ్లీష్ ఉపాధ్యాయుడు , ప్రిన్సిపాల్ కూడా అయిన దవాడీ, పాఠశాల గంట మోగించి తరగతి గదులను ఖాళీ చేయాల్సిందిగా ఉపాధ్యాయులను ఆదేశించారు. పాఠశాల భవనాలు వరద నీటిలో కొట్టుకుపోకముందే, దవాడీ 1,643 మంది పిల్లలను కాలినడకన కొండపై ఉన్న ఒక రావి చెట్టు కిందకు సురక్షితంగా తీసుకెళ్లారు. అయితే విద్యార్థులందరూ సురక్షితంగా బయటపడినప్పటికీ, ఇద్దరు పాఠశాల సిబ్బంది ప్రాణాలు కోల్పోవడం అంతులేని విచారాన్ని మిగిల్చింది. సంతోష్ పరియార్ (32), సోషల్ హిస్టరీ టీచర్, నది ఒడ్డున ఉన్న తన గదికి తిరిగి వెళ్లిన సమయంలో వరదలో కొట్టుకుపోయారు. అలాగే పాఠశాల తలుపులు మూసివేయడానికి వెనుకకు వెళ్లిన పాఠశాల జానిటర్ సుల్తాన్ లామా కూడా వరదలో ప్రాణాలు కోల్పోయారు.

దేశవ్యాప్తంగా ప్రశాంత వాతావరణంలో 'నీట్ పీజీ-2026' పరీక్ష ప్రారంభమైంది. అయితే, రంగారెడ్డి జిల్లాలోని ఒక కేంద్రంలో నిబంధనలు ఉల్లంఘించిన విద్యార్థిని అధికారులు పరీక్ష రాయకుండా తిప్పి పంపిన సంఘటన చోటుచేసుకుంది. రంగారెడ్డి జిల్లా శేరిగూడలోని ఒక పరీక్షా కేంద్రానికి ఓ విద్యార్థి మద్యం తాగి హాజరయ్యాడు. కేంద్రం వద్ద తనిఖీలు చేపట్టిన అధికారులు అతడు మద్యం సేవించినట్లు గుర్తించారు. పరీక్షా నిబంధనలకు విరుద్ధంగా ప్రవర్తించడంతో అతడిని పరీక్ష రాయడానికి అనుమతించకుండా వెనక్కి పంపించివేశారు. కంప్యూటర్ ఆధారిత పరీక్ష విధానంలో ఉదయం 9:00 గంటల నుంచి మధ్యాహ్నం 12:30 గంటల వరకు పరీక్ష జరుగుతోంది. దేశవ్యాప్తంగా: దాదాపు 1,300 కేంద్రాల్లో పరీక్షలు నిర్వహిస్తున్నారు.తెలంగాణలో మొత్తం 56 కేంద్రాలను ఏర్పాటు చేశారు. అభ్యర్థులు ఎటువంటి ఆటంకాలు లేకుండా పరీక్ష రాసేందుకు పరీక్షా కేంద్రాల వద్ద పోలీసులు, విద్యాశాఖ అధికారులు కఠిన భద్రతా ఏర్పాట్లు చేశారు.

మహారాష్ట్రలోని చంద్రపూర్‌ జిల్లా మోహర్లీ అటవీ ప్రాంతంలోని 154 కంటోన్మెంట్‌ పరిధిలో పులి విరుచుకుపడింది. జునోనా గ్రామానికి చెందిన విజయ్‌ మధుకర్‌ మేశ్రామ్‌ (25)పై పులి దాడి చేయడంతో అక్కడికక్కడే మృతి చెందారు. ఈ ఘటనతో చుట్టుపక్కల గ్రామాల ప్రజలు తీవ్ర భయాందోళనకు గురవుతున్నారు. స్థానికులు, అధికారులు తెలిపిన వివరాల ప్రకారం విజయ్‌ పశువులను మేపేందుకు అటవీ ప్రాంతానికి వెళ్లారు. అదే సమయంలో పొదల్లో మాటువేసి ఉన్న పులి ఒక్కసారిగా విజయ్‌పై దాడి చేసినట్లు తెలుస్తోంది. పులి దాడిలో తీవ్రంగా గాయపడిన విజయ్‌ అక్కడికక్కడే ప్రాణాలు కోల్పోయారు. ఈ ఘటన గురించి సమాచారం అందడంతో అటవీశాఖ అధికారులు, పోలీసులు వెంటనే సంఘటనా స్థలానికి చేరుకున్నారు. పరిస్థితిని పరిశీలించి, మృతదేహాన్ని స్వాధీనం చేసుకునేందుకు చర్యలు చేపట్టారు. ఈ ఘటనపై అధికారులు పూర్తి వివరాలు సేకరిస్తున్నారు. మరోవైపు పులి సంచారాన్ని గుర్తించేందుకు అటవీశాఖ అప్రమత్తమైంది. పులి కదలికలను పర్యవేక్షించేందుకు కెమెరా ట్రాప్‌లు ఏర్పాటు చేశారు. పులి ఏ ప్రాంతంలో సంచరిస్తోంది? అదే పులి గతంలోనూ గ్రామ పరిసరాల్లో కనిపించిందా? అనే కోణాల్లో అధికారులు నిఘా కొనసాగిస్తున్నారు.

ఐపీఎల్ పాలక మండలిలోని రెండు సభ్య పదవుల ఎన్నికకు బీసీసీఐ నోటిఫికేషన్ విడుదల చేసింది. సెప్టెంబర్ 18న జరిగే బీసీసీఐ వార్షిక సర్వసభ్య సమావేశంలో ఈ ఎన్నికలు జరగనున్నాయి. ప్రస్తుతం చైర్మన్ గా ఉన్న అరుణ్ ధుమాల్, సభ్యుడు మజుందార్ ఏకగ్రీవంగా తిరిగి ఎన్నికయ్యే అవకాశమున్నట్లు తెలుస్తోంది. నిబంధనల ప్రకారం వీరి పదవీకాలం ఏడాది మాత్రమే కావడంతో మళ్లీ ఎన్నిక అనివార్యమైంది.

భారత్ సంచార్ నిగమ్ లిమిటెడ్ వోడాఫోన్ ఐడియా చేతులు కలిపింది. ఈ రెండు కంపెనీల మధ్య జరిగిన కీలకమైన ‘నెట్‌వర్క్ షేరింగ్ ఒప్పందం’ వల్ల నెట్‌వర్క్ కవరేజ్ మరింత బలోపేతం కానుంది. ఈ భాగస్వామ్యంతో యూజర్లకు మెరుగైన కవరేజ్ లభించడమే కాకుండా BSNL 5G సేవల రాకకు దారి సుగమం కానుందా అనే చర్చ ప్రారంభమైంది. తమ టవర్లను, నెట్‌వర్క్ మౌలిక వసతులను పంచుకుంటాయి. దీనివల్ల Vi టవర్లు ఉన్నచోట BSNL సిగ్నల్, BSNL నెట్‌వర్క్ బలంగా ఉన్న ప్రాంతాల్లో Vi యూజర్లకు మెరుగైన సిగ్నల్ లభిస్తాయి. గ్రామీణ ప్రాంతాలు, సరిహద్దు పరిసరాల్లో బిఎస్ఎన్ఎల్ కవరేజ్ బలంగా ఉండగా, నగరాలు, పట్టణ ప్రాంతాల్లో Vi మౌలిక వసతులు మెరుగ్గా ఉన్నాయి. ఈ ఒప్పందంతో రెండు కంపెనీల వినియోగదారులకు నెట్‌వర్క్ లోపాలు లేకుండా సేవలు అందుతాయి. ముఖ్యంగా రీఛార్జ్ ధరలు పెరిగిన తర్వాత BSNL వైపు మొగ్గు చూపిన వినియోగదారులకు ఇండోర్ కవరేజ్, డేటా స్పీడ్ పరంగా ఎదురవుతున్న సమస్యలకు ఈ నిర్ణయం పెద్ద ఊరట నివ్వనుంది. ఈ నెట్‌వర్క్ షేరింగ్ డీల్ వల్ల BSNL 5G వేగవంతం కానుందా అనే ప్రశ్నలు వ్యక్తమవుతున్నాయి. ప్రస్తుతం BSNL దేశవ్యాప్తంగా తన 4G నెట్‌వర్క్‌ను వేగంగా విస్తరిస్తోంది. ఈ 4G టవర్లను త్వరలోనే 5G కి అప్‌గ్రేడ్ చేసే విధంగా స్వదేశీ సాంకేతికతతో రూపకల్పన చేస్తున్నారు. Vi ఇప్పటికే కొన్ని ప్రాంతాల్లో 5G ట్రయల్స్, విస్తరణపై దృష్టి పెట్టడంతో ఈ భాగస్వామ్యం ద్వారా BSNL కూడా తన యూజర్లకు త్వరలోనే 5G అనుభవాన్ని అందించేందుకు అనుకూలమైన వాతావరణం ఏర్పడుతుంది.

ఒక్కో బిట్‌కాయిన్ విలువ భవిష్యత్తులో 1 మిలియన్‌ డాలర్లకు (ప్రస్తుత మారక విలువ ప్రకారం సుమారు రూ.9.5 కోట్లు) చేరడం ఖాయమని, ఇందుకు 25 ఏళ్లు పట్టకపోవచ్చని బినాన్స్ వ్యవస్థాపకుడు చాంగ్‌పెంగ్ జావో అభిప్రాయపడ్డారు. ఇటీవల హాంకాంగ్‌లో జరిగిన బిట్‌కాయిన్‌ ఆసియా 2026 సదస్సులో 'బిట్‌కాయిన్‌ శతాబ్ధి' పేరుతో జరిగిన చర్చలో ఆయన ఈ వ్యాఖ్యలు చేశారు. అయితే బిట్‌కాయిన్‌ను కేవలం ధర ఆధారంగా అంచనా వేయడం సరికాదని చాంగ్‌పెంగ్ జావో స్పష్టం చేశారు. రాబోయే దశాబ్దంలో దాని వినియోగం, చెల్లింపుల్లో వినియోగం, సంస్థాగత స్వీకరణ భారీగా పెరగాల్సిన అవసరం ఉందన్నారు. పెద్ద ఎత్తున బిట్‌కాయిన్ చెల్లింపులు జరగడం, రిటైర్మెంట్ ఫండ్లు, పెన్షన్ ఫండ్లు, పెట్టుబడి నిధులు, ప్రభుత్వాల రిజర్వ్ ఆస్తుల్లో బిట్‌కాయిన్‌కు స్థానం లభించడం వంటి పరిణామాలు కీలక మైలురాళ్లుగా మారతాయని పేర్కొన్నారు. భవిష్యత్తులో బిట్‌కాయిన్ ప్రాధాన్యత బంగారాన్ని మించే అవకాశం ఉందని చాంగ్‌పెంగ్ జావో అభిప్రాయపడ్డారు. ముఖ్యంగా తదుపరి బుల్‌ మార్కెట్‌లో బిట్‌కాయిన్ మార్కెట్ విలువ పరంగా బంగారాన్ని అధిగమించవచ్చని ఆయన పేర్కొన్నట్లు ది బ్లాక్ నివేదించింది. అయితే ప్రస్తుతం ఈ రెండింటి మధ్య భారీ వ్యత్యాసం ఉంది. ఇటీవలి మార్కెట్ డేటా ప్రకారం బిట్‌కాయిన్ ధర ఆగస్టు చివర్లో సుమారు 80,000 డాలర్ల వద్ద కొనసాగుతోంది. ఆగస్టు 25న ఇది 80,600 డాలర్ల ప్రాంతాన్ని తాకింది. దీంతో 1 మిలియన్ డాలర్ల లక్ష్యాన్ని చేరాలంటే ప్రస్తుత స్థాయి నుంచి బిట్‌కాయిన్ దాదాపు 12 రెట్లు పెరగాల్సి ఉంటుంది. క్రిప్టో రంగంలో వచ్చే పదేళ్లలో కేవలం బిట్‌కాయిన్ మాత్రమే కాకుండా స్టేబుల్‌కాయిన్లు, టోకెనైజేషన్, ఆర్టిఫిషియల్ ఇంటెలిజెన్స్, AI ఏజెంట్లు కీలక పాత్ర పోషిస్తాయని సీజెడ్‌ అంచనా వేశారు. టోకెనైజ్డ్ ఆస్తులు, డిజిటల్ చెల్లింపులు వేగంగా విస్తరించడంతో సంప్రదాయ ఆర్థిక వ్యవస్థతో క్రిప్టో రంగం అనుసంధానం మరింత బలపడుతుందని ఆయన అన్నారు. బిట్‌కాయిన్ ప్రధానంగా దీర్ఘకాలిక పొదుపు, రిజర్వ్ ఆస్తిగా ఎదగవచ్చని, మరోవైపు స్టేబుల్‌కాయిన్లు రోజువారీ చెల్లింపులు, ట్రేడింగ్, అలాగే AI ఏజెంట్ల మధ్య జరిగే మెషిన్-టు-మెషిన్ లావాదేవీల్లో కీలకంగా మారవచ్చని ఆయన వివరించారు.

Subscribe to: Posts ( Atom )

August 2026

Popular Posts

Wikipedia

Featured Coupons

Multimedia Updates

Fashion

News

Food

Circulos

Sports

Food

Technology

Menu Footer Widget

Featured

Social Plugin

Videos

Bonjour & Welcome

Popular Posts

Formulir Kontak

Contact Us

Instagram

Subscribe

Categories

Comment

Ad Code

Contact Us

statistics

Archive

Follow by Email

Recent

Comment

Blogger templates

Subscribe

Updates

Like Us

DCM V1

Follow Us

About The Author

Followers

Category

Label

Labels

Translate

Custom Featured

Blogger templates

Blogroll

Get The App

Social Buttons

Video

About

Blogroll

About

Popular Posts

Comments

Pages

Entri Populer

Labels