అమెరికాను వణికిస్తున్న నార్ ఈస్టర్ తుఫాన్ : 439 విమానాలు రద్దు : న్యూయార్క్, న్యూజెర్సీలో ఎమర్జెన్సీ

అమెరికా తూర్పు తీరాన్ని భారీ 'నార్ ఈస్టర్' తుఫాన్ వణికిస్తోంది. వాషింగ్టన్ డీసీ నుంచి మైనే వరకు పలు ప్రాంతాల్లో భారీ వర్షాలు, బలమైన ఈదురు గాలులు, తీర ప్రాంత వరదలు జనజీవనాన్ని తీవ్రంగా ప్రభావితం చేస్తున్నాయి. పరిస్థితి తీవ్రతతో న్యూయార్క్, న్యూజెర్సీ రాష్ట్రాల్లో అత్యవసర పరిస్థితిని ప్రకటించారు. తుఫాన్ ప్రభావం విమాన సర్వీసులపై తీవ్రంగా పడింది. ఫ్లైట్‌అవేర్ వివరాల ప్రకారం ఒకేరోజు 439 విమానాలు రద్దు కాగా, మరో 2,459 విమానాలు ఆలస్యంగా నడిచాయి. దీంతో విమానాశ్రయాల్లో ప్రయాణికులు గంటల తరబడి వేచి ఉండాల్సిన పరిస్థితి ఏర్పడింది. వాతావరణ పరిస్థితులు మరింత తీవ్రంగా ఉంటే విమాన రాకపోకలపై ప్రభావం కొనసాగొచ్చని అధికారులు సూచిస్తున్నారు. తుఫాన్ కారణంగా విద్యుత్ వ్యవస్థపైనా తీవ్ర ప్రభావం పడింది. న్యూజెర్సీ, కనెక్టికట్, న్యూయార్క్, పెన్సిల్వేనియా రాష్ట్రాల్లో లక్షకు పైగా ఇళ్లు, వ్యాపార సంస్థలకు విద్యుత్ సరఫరా నిలిచిపోయింది. బలమైన గాలులకు చెట్లు కూలిపోవడం, విద్యుత్ తీగలు తెగిపడటంతో పలు ప్రాంతాల్లో విద్యుత్ అంతరాయం ఏర్పడింది. విద్యుత్ పునరుద్ధరణ కోసం సిబ్బంది రంగంలోకి దిగారు. తుఫాన్ ప్రభావాన్ని దృష్టిలో ఉంచుకుని న్యూయార్క్, న్యూజెర్సీ గవర్నర్లు అత్యవసర పరిస్థితిని ప్రకటించారు. కనెక్టికట్‌లో ఎమర్జెన్సీ ఆపరేషన్ సెంటర్‌ను కూడా అప్రమత్తం చేశారు. తీర ప్రాంతాల్లో పరిస్థితిని అధికారులు నిరంతరం పర్యవేక్షిస్తున్నారు. అవసరమైన ప్రాంతాల్లో ప్రజలను సురక్షిత ప్రాంతాలకు తరలించేందుకు ఏర్పాట్లు చేస్తున్నారు. భారీ వర్షాలు, సముద్ర అలల ప్రభావంతో న్యూజెర్సీలోని బెర్గెన్ కౌంటీ నుంచి కేప్ మే కౌంటీ వరకు పలు లోతట్టు ప్రాంతాల్లో వరదలు ఏర్పడ్డాయి. తీర ప్రాంత ప్రజలు అప్రమత్తంగా ఉండాలని అధికారులు సూచించారు.

Read More...