క్యాన్సర్ నివారణకు ప్రస్తుతం వాడుతున్న 1364 మందుల ధరల్ని భారీగా తగ్గిస్తూ కేంద్రం తీసుకున్న నిర్ణయం ఇవాళ అమల్లోకి వచ్చింది. ఈ మేరకు జాతీయ ఔషధ ధరల నియంత్రణ సంస్థ ఉత్తర్వులు జారీ చేసింది. క్యాన్సర్ మందుల్నీ గరిష్ట ధరలకు అమ్ముతూ రోగుల్ని దోచుకుంటున్నారన్న విమర్శలు వెల్లువెత్తడం, దీనిపై సుప్రీంకోర్టు కూడా స్పందించిన నేపథ్యంలో.. కేంద్రం ఈ నిర్ణయం తీసుకుని, అమలు చేస్తోంది. ఇవాళ్టి నుంచి 85 ఫార్మా కంపెనీలు ఉత్పత్తి చేస్తున్న 121 ఔషధాలకు చెందిన 1364 క్యాన్సర్ నిరోధ మందుల ధరల్ని తగ్గించారు. దీంతో 679 బ్రాండ్ లకు చెందిన మందుల ధరలు 50 శాతం పైగా తగ్గినట్లు అత్యధికంగా ఇందులో 96.45 శాతం ధరలు కూడా తగ్గినట్లు రసాయనాలు, ఎరువుల మంత్రిత్వశాఖకు చెందిన ఫార్మాసుటికల్ విభాగం ఇవాళ ఓ ప్రకటనలో తెలిపింది. కేంద్ర ఆరోగ్య, కుటుంబ సంక్షేమ శాఖ పరిధిలోని డైరెక్టర్ జనరల్ ఆఫ్ హెల్త్ సర్వీసెస్ ఏర్పాటు చేసిన నిపుణుల కమిటీ గత నెలలో సమర్పించిన సిఫార్సుల ఆధారంగా ఈ నిర్ణయం తీసుకున్నారు. ఈ మేరకు ఫార్మా విభాగం ఆధ్వర్యంలో పనిచేస్తున్న నేషనల్ ఫార్మాసుటికల్ ప్రైసింగ్ అథారిటీ 137 క్యాన్సర్ నిరోధక మందుల ఎమ్మార్పీలపై ఇచ్చే వాణిజ్య మార్జిన్లపై పరిమితి విధించింది. దీంతో ధరలు తగ్గుముఖం పట్టాయి. క్యాన్సర్ మందులపై సవరించిన ఎమ్మార్పీ కంటే ఎక్కువ వసూలు చేసేందుకు ఏ కెమిస్ట్ లేదా ఆస్పత్రి ఫార్మసీకి అనుమతి లేదని ప్రభుత్వం ఇవాళ తెలిపింది. ఎమ్మార్పీ, ఫార్మా సహీ దామ్ యాప్ లేదా అధికారిక ఎన్పీపీఏ వెబ్ సైట్ nppa.gov.in లోకి వెళ్లి రోగులు క్యాన్సర్ మందుల ధరల్ని సరిచూసుకోవచ్చని తెలిపింది. ఎక్కడైనా ఎక్కువగా వసూలు చేస్తుంటే వినియోగదారులు ఫార్మా జన్ సమాధాన్ పోర్టల్ ద్వారా ఫిర్యాదులు చేయవచ్చని, అలాగే 1800-111-255 హెల్ప్ లైన్ నంబర్ కు కానీ కాల్ చేసి ఫిర్యాదు చేయవచ్చని వెల్లడించింది.