ఆంధ్రప్రదేశ్‌లోని అనంతపురం జిల్లా రాప్తాడు జడ్పీ హైస్కూల్‌లో పదో తరగతి విద్యార్థినిపై జరిగిన దాడి ఘటన తీవ్ర కలకలం రేపింది. ఈ ఘటనను తీవ్రంగా పరిగణించిన రాష్ట్ర మానవ హక్కుల కమిషన్ సుమోటోగా కేసు నమోదు చేసింది. పాఠశాలల్లో విద్యార్థుల భద్రతకు తీసుకుంటున్న చర్యలపై సమగ్ర విచారణ జరిపి నాలుగు వారాల్లో నివేదిక సమర్పించాలని అధికారులను ఆదేశించింది. ఈ మేరకు రాష్ట్ర పాఠశాల విద్యాశాఖ కార్యదర్శి, అనంతపురం జిల్లా కలెక్టర్, జిల్లా విద్యాశాఖ అధికారులకు నోటీసులు జారీ చేసింది. రాష్ట్ర మానవ హక్కుల కమిషన్ ఛైర్‌పర్సన్ జస్టిస్ సత్యనారాయణమూర్తి ఈ ఆదేశాలు ఇచ్చారు. ఈ ఘటనను రాష్ట్ర మానవ హక్కుల కమిషన్ తీవ్రంగా పరిగణించింది. విద్యార్థులు చదువుకునే పాఠశాలల్లోకి బయటి వ్యక్తులు ఆయుధాలతో ప్రవేశించి దాడులకు పాల్పడటం విద్యార్థుల ప్రాణాలకు ముప్పుగా మారుతుందని ఆందోళన వ్యక్తం చేసింది. ఈ నేపథ్యంలో సుమోటోగా కేసు నమోదు చేసి సంబంధిత అధికారులకు నోటీసులు జారీ చేసింది.