అంతర్రాష్ట్ర గంజాయి రవాణా ముఠా గుట్టును ఛేదించిన తెలంగాణ ఈగల్ ఫోర్స్

అస్సాంకు చెందిన భాస్కర్ హజారికా నిర్వహిస్తున్న అంతర్రాష్ట్ర గంజాయి రవాణా ముఠా గుట్టును తెలంగాణ ఈగల్ ఫోర్స్ ఛేదించింది. సుమారు 60 రోజుల పాటు కొనసాగిన వేట అనంతరం ప్రధాన నిందితుడు భాస్కర్ హజారికాతో పాటు మొత్తం ఐదుగురిని పోలీసులు అరెస్ట్ చేశారు. ఈగల్ ఫోర్స్, చౌటుప్పల్ పోలీసుల జాయింట్ ఆపరేషన్‌లో 24.7 కిలోల గంజాయి, ఏడు మొబైల్ ఫోన్లను స్వాధీనం చేసుకున్నారు.2026 ఆగస్టు 27న చౌటుప్పల్ పరిధిలో పోలీసులు నిర్వహించిన తనిఖీల్లో మారుతి సుజుకి ఫ్రాంక్స్ కారులో తరలిస్తున్న 20.36 కిలోల గంజాయిని స్వాధీనం చేసుకున్నారు. ఈ ఘటనలో ఒడిశాకు చెందిన త్రిలోచన్ సమంతరాయ్, సాగర్‌బల్లను అరెస్ట్ చేశారు. విచారణలో బికాస్ బారిక్, అస్సాంకు చెందిన భాస్కర్ హజారికా పేర్లు బయటపడ్డాయి. అనంతరం బికాస్ బారిక్‌ను కూడా అరెస్ట్ చేయగా, అతడి సమాచారం ఆధారంగా భాస్కర్ హజారికాపై పోలీసులు ప్రత్యేక నిఘా ఏర్పాటు చేశారు. భాస్కర్ హజారికాపై 2024లో మాదాపూర్ పోలీస్ స్టేషన్‌లో రెండు, గచ్చిబౌలి పోలీస్ స్టేషన్‌లో ఒక గంజాయి కేసు నమోదైనట్లు పోలీసులు వెల్లడించారు. ఈ కేసుల్లో బెయిల్‌పై బయటకు వచ్చిన అనంతరం తిరిగి గంజాయి వ్యాపారాన్ని కొనసాగించినట్లు దర్యాప్తులో గుర్తించారు. ఒడిశాకు చెందిన సరఫరాదారుల నుంచి గంజాయిని కొనుగోలు చేసి హైదరాబాద్‌లో విక్రయిస్తున్నట్లు పోలీసులు గుర్తించారు. కిలో గంజాయితో సుమారు 150 చిన్న ప్యాకెట్లు తయారుచేసి ఒక్కో ప్యాకెట్‌ను రూ. 300 విక్రయిస్తున్నట్టు గుర్తించారు ఈగల్ ఫోర్స్ అధికారులు. సెక్యూరిటీ గార్డ్ ముసుగులో గంజాయి విక్రయాలు జరిపి, కోట్లు సొమ్ము చేసుకున్న భాస్కర్ హజారికా నెట్‌వర్క్‌పై సమగ్ర ఈగల్ అధికారులు దర్యాప్తు చేపడుతున్నారు.

Read More...

భారత్‌-శ్రీలంక తొలి వన్డే : ఢిల్లీ నుంచి విశాఖకు వేదిక మార్పు

భారత్, శ్రీలంక జట్ల మధ్య డిసెంబర్ 13న జరగాల్సిన తొలి వన్డే మ్యాచ్ వేదిక మారింది. తొలుత ఢిల్లీలోని అరుణ్ జైట్లీ స్టేడియంలో ఈ మ్యాచ్ నిర్వహించాలని నిర్ణయించినప్పటికీ తాజాగా విశాఖపట్నానికి మార్చినట్లు బీసీసీఐ ప్రకటించింది. ఢిల్లీ క్రికెట్ సంఘం చేసిన విజ్ఞప్తి మేరకు ఈ నిర్ణయం తీసుకున్నట్లు బీసీసీఐ వెల్లడించింది. ఢిల్లీలో వాతావరణ పరిస్థితుల కారణంగా మ్యాచ్‌కు అంతరాయం కలిగే అవకాశం ఉండటంతో పాటు.. స్టేడియంలో మరమ్మతులు, పునరుద్ధరణ పనులు కొనసాగుతుండటమే వేదిక మార్పునకు కారణమని తెలిపింది. దీంతో డిసెంబర్ 13న జరగనున్న తొలి వన్డేకు విశాఖపట్నంలోని ఏసీఏ-వీడీసీఏ క్రికెట్ స్టేడియం ఆతిథ్యమివ్వనుంది. ఈ సిరీస్‌లో రెండో వన్డే బెంగళూరులో, చివరి మ్యాచ్ అహ్మదాబాద్‌లో జరగనున్నాయి.

Read More...

వి.బి-జీ రామ్ జీ అమలు : తెలంగాణ ప్రభుత్వ కృషిని ప్రశంసిస్తూ మంత్రి సీతక్కకు లేఖ రాసిన కేంద్రమంత్రి శివరాజ్ సింగ్ చౌహాన్

వి.బి-జీ రామ్ జీ అమల్లో తెలంగాణ ప్రభుత్వ కృషిని కేంద్రమంత్రి శివరాజ్ సింగ్ చౌహాన్ ప్రశంసిస్తూ తెలంగాణ రాష్ట్ర పంచాయతీరాజ్, గ్రామీణాభివృద్ధి శాఖ మంత్రి సీతక్కకు ఈరోజు  లేఖ రాశారు. 2026-27 ఆర్థిక సంవత్సరానికి తెలంగాణకు రూ.3,825.3 కోట్ల నిధులను కేటాయించినట్లు వెల్లడించారు. తెలంగాణ ప్రతిపాదించిన గృహ నిర్మాణ పథకంతో పాటు పలు పనులకు అనుమతి ఇచ్చినట్లు శివరాజ్ సింగ్ చౌహాన్ స్పష్టం చేశారు. వి.బి-జీ రామ్ జీ కింద ఇప్పటివరకు రాష్ట్రంలో 1.83 కోట్ల పనిదినాలను కల్పించినట్లు ప్రస్తావించారు. కేంద్రమంత్రి లేఖలో తెలంగాణ ప్రభుత్వ కృషిపై ప్రశంసలు కురిపించారు. గ్రామీణ కుటుంబాలకు ఉపాధి కల్పన, చట్ట నిబంధనల అమల్లో రాష్ట్ర ప్రభుత్వ నిబద్ధతను కొనియాడారు. రాష్ట్రంలో పలు పనులను అమలు చేయడం, ప్రారంభించడంపై కేంద్రమంత్రి సంతృప్తి వ్యక్తం చేశారు. రాష్ట్ర ప్రభుత్వం సూచించిన అదనపు పనుల ప్రతిపాదనలకు కేంద్ర ప్రభుత్వం ఆమోదం తెలిపిందని శివరాజ్ సింగ్ చౌహాన్ పేర్కొన్నారు. వి.బి-జీ రామ్ జీ కింద అనుమతించిన పనుల జాబితా 375కు విస్తరిస్తామని తెలిపారు. తెలంగాణ ప్రతిపాదించిన రాష్ట్ర గృహ నిర్మాణ పథకానికి కూడా అనుమతి ఇస్తామని స్పష్టం చేశారు. గ్రామీణ ఉపాధి కల్పనలో తెలంగాణ సాధించిన పురోగతిని గుర్తించామని కేంద్ర మంత్రి శివరాజ్ సింగ్ చౌహాన్ పేర్కొన్నారు.

Read More...

తనను కాదని వేరే వ్యక్తితో పెళ్లికి సిద్ధపడటాన్ని తట్టుకోలేకపోయిన ప్రియురాలి హత్య చేసిన ప్రియుడు

ఉత్తరప్రదేశ్‌లోని మీరట్‌లో ప్రేమించిన యువతి వేరే వ్యక్తిని పెళ్లి చేసుకునేందుకు సిద్ధపడిందన్న కక్షతో, ఒక వ్యక్తి ఆమెను దారుణంగా గొంతు నులిమి హత్య చేశాడు. పోలీసులు తెలిపిన వివరాల ప్రకారం.. మీరట్‌కు చెందిన సేమరీన్ అనే యువతి, ఫిరోజ్ అనే యువకుడు కొంతకాలంగా ప్రేమలో ఉన్నారు. అయితే ఇటీవల సేమరీన్‌కు కుటుంబ సభ్యులు వేరే వ్యక్తితో వివాహం నిశ్చయం చేశారు. ఈ విషయం తెలిసి ఫిరోజ్ తీవ్ర తీవ్ర ఆగ్రహానికి, అసంతృప్తికి గురయ్యాడు. తనను కాదని వేరే వ్యక్తితో పెళ్లికి సిద్ధపడటాన్ని తట్టుకోలేకపోయిన ఫిరోజ్, సేమరీన్‌ను చివరిసారిగా మాట్లాడుకుందామని నమ్మించి పిలిచాడు. అనంతరం ఆమెను నిర్మానుష్యంగా ఉన్న ఒక పొలంలోకి తీసుకెళ్లి, పెళ్లి విషయమై తీవ్ర వాగ్వాదానికి దిగాడు. వివాహానికి ఆమె నిరాకరించడంతో ఆవేశంతో రగిలిపోయి, ఆమె గొంతు నులిమి దారుణంగా హత్య చేశాడు. ఘటనకు సంబంధించిన సమాచారం అందుకున్న వెంటనే పోలీసులు సంఘటనా స్థలానికి చేరుకున్నారు. మృతదేహాన్ని స్వాధీనం చేసుకుని పోస్టుమార్టం నిమిత్తం ఆసుపత్రికి తరలించారు. ఈ హత్యకు పాల్పడిన నిందితుడు ఫిరోజ్‌ను పోలీసులు వెంటనే అదుపులోకి తీసుకుని, కేసు నమోదు చేసి దర్యాప్తు వేగవంతం చేశారు.

Read More...

దేశంలోని పలు రాష్ట్రాల్లో ముస్లింలను విద్యకు దూరం చేయడానికి పక్కా వ్యూహం : కేంద్రంపై అసదుద్దీన్ ఒవైసీ తీవ్ర ఆరోపణలు

హైదరాబాద్‌లో ఎఐఎంఐఎం అధినేత, ఎంపీ అసదుద్దీన్ ఒవైసీ జాతీయ మీడియాతో మాట్లాడుతూ దేశంలోని పలు రాష్ట్రాల్లో ముస్లింలను విద్యకు దూరం చేయడానికి పక్కా వ్యూహంతో కుట్ర జరుగుతోందని తీవ్ర స్థాయిలో ధ్వజమెత్తారు. కేంద్ర ప్రభుత్వ అధికారిక గణాంకాలను ఆధారంగా చేసుకుని తీవ్ర విమర్శలు గుప్పించారు. బెంగాల్, ఉత్తరప్రదేశ్, బీహార్ వంటి రాష్ట్రాల్లో వందలాది ముస్లిం జనాభా ఉన్న గ్రామాల్లో కనీసం ఒక్క ప్రాథమిక పాఠశాల కూడా లేకపోవడం శోచనీయమని ఆవేదన వ్యక్తం చేశారు. ఇది తాను చెబుతున్న సొంత సమాచారం కాదని.. స్వయంగా భారత ప్రభుత్వమే వెల్లడించిన అధికారిక డేటా అని అసదుద్దీన్ ఒవైసీ ధ్వజమెత్తారు. ఉత్తరప్రదేశ్‌ లో ముస్లిం జనాభా 19.26 శాతంగా ఉందని అసదుద్దీన్ ఒవైసీ అన్నారు. 2021-22 ప్రభుత్వ డేటా ప్రకారం.. ప్రాథమిక విద్యలో ముస్లిం పిల్లల చేరికలు 17.3 శాతంగా ఉందని తెలిపారు. అయితే ఇది సెకండరీ స్థాయికి వచ్చేసరికి 12.6 శాతానికి, హయ్యర్ సెకండరీకి వచ్చేసరికి 11.4 శాతానికి ఘోరంగా పడిపోతోందని పేర్కొన్నారు. పాఠశాల విద్య పూర్తయ్యేసరికే ఇన్ని విద్యా సంవత్సరాల వ్యవధిలో పిల్లలు బడికి దూరమవడానికి కారణమెవరు..? కచ్చితంగా ప్రభుత్వమే దీనికి బాధ్యత వహించాలని అసదుద్దీన్ ఒవైసీ డిమాండ్ చేశారు. ముస్లిం విద్యార్థుల విద్యావకాశాలను మెరుగుపరచడానికి, తగిన చర్యలు తీసుకోవడానికి కేంద్ర ప్రభుత్వం, ఆయా రాష్ట్ర ప్రభుత్వాలు సుముఖత చూపడం ఒవైసీ మండిపడ్డారు. ఒకవైపు తగినన్ని పాఠశాలలు అందుబాటులో లేకపోగా, మరోవైపు విద్యాభ్యాసానికి అనుకూలమైన సురక్షితమైన వాతావరణం కూడా అక్కడ కనిపించడం లేదన్నారు. బీజేపీ అధికారంలో ఉన్న ప్రతి రాష్ట్రంలోనూ ముస్లింలను విద్యావ్యవస్థకు, ఉన్నత చదువులకు దూరం చేయడమే లక్ష్యంగా కుట్రపూరితమైన ప్రయత్నం స్పష్టంగా కనిపిస్తోందని అన్నారు. ఇప్పటికైనా మైనారిటీ వర్గాల విద్యాభివృద్ధికి ప్రభుత్వం తక్షణమే తగిన చర్యలు తీసుకోవాలని, విద్యా హక్కు అందరికీ సమానంగా అందేలా చూడాలని అసదుద్దీన్ ఒవైసీ డిమాండ్ చేశారు.

Read More...

గ్లోబల్ సమ్మిట్‌పై ఉన్నతాధికారులతో సీఎం రేవంత్ రెడ్డి సమీక్ష : జాతీయ, అంతర్జాతీయ ప్రతినిధులకు ఎలాంటి ఇబ్బందులు కలగకుండా అన్ని ఏర్పాట్లు చేయాలని ఆదేశం

డిసెంబరు 7, 8, 9 తేదీల్లో భారత్‌ ఫ్యూచర్‌ సిటీలో నిర్వహించ తలపెట్టిన గ్లోబల్ సమ్మిట్ ఏర్పాట్లపై ముఖ్యమంత్రి రేవంత్ రెడ్డి ఉన్నతాధికారులతో సమీక్ష నిర్వహించారు. సమ్మిట్‌కు హాజరయ్యే జాతీయ, అంతర్జాతీయ ప్రతినిధులకు ఎలాంటి ఇబ్బందులు కలగకుండా అన్ని ఏర్పాట్లు పక్కాగా చేయాలని అధికారులను ఆదేశించారు. ప్రతి ప్రతినిధికి లైజనింగ్ అధికారులను నియమించాలని సూచించారు. సమ్మిట్‌లో పాల్గొనే ప్రతినిధుల రిజిస్ట్రేషన్, పాస్‌ల జారీ ప్రక్రియను త్వరితగతిన పూర్తి చేయాలని సీఎం స్పష్టం చేశారు. ప్రతి విభాగానికి ప్రత్యేక అధికారితో పాటు సెక్యూరిటీ అధికారిని నియమించాలని ఆదేశించారు. సమ్మిట్ నిర్వహణలో సమన్వయంతో వ్యవహరించాలని, భద్రతా ఏర్పాట్ల విషయంలో ఎలాంటి నిర్లక్ష్యం ఉండకూడదని సూచించారు. తెలంగాణ రాష్ట్ర ప్రత్యేకతలు, పర్యాటక ప్రాధాన్యతను ప్రపంచానికి చాటిచెప్పేలా రాష్ట్రంలోని ప్రముఖ పర్యాటక ప్రాంతాలను గ్లోబల్ సమ్మిట్‌లో ప్రదర్శించాలని సీఎం సూచించారు. వాతావరణ మార్పులు, పర్యావరణ పరిరక్షణ వంటి కీలక అంశాలపై సమ్మిట్‌లో చర్చలు జరిగేలా కార్యక్రమాలను రూపొందించాలని చెప్పారు. అదేవిధంగా నర్సరీ స్థాయి నుంచి ఆక్స్‌ఫర్డ్ స్థాయి వరకు తెలంగాణ విద్యావ్యవస్థలోని వివిధ అంశాలు, విద్యారంగంలో వస్తున్న మార్పులు ప్రతిబింబించేలా చర్చలు నిర్వహించాలని అధికారులకు దిశానిర్దేశం చేశారు. నవంబర్ 15వ తేదీ నాటికి సమ్మిట్‌కు సంబంధించిన ఏర్పాట్లపై పూర్తి స్థాయి ప్రణాళిక సిద్ధం చేసుకోవాలని ఆదేశించారు. గ్లోబల్ సమ్మిట్‌కు ఇతర రాష్ట్రాల ముఖ్యమంత్రులను కూడా ఆహ్వానించాలని సీఎం సూచించారు. అంతర్జాతీయ స్థాయిలో తెలంగాణ ప్రతిష్టను మరింత పెంచేలా సమ్మిట్ నిర్వహణ ఉండాలని, పటిష్టమైన భద్రతా ఏర్పాట్లతో పాటు ప్రతి అంశాన్ని ముందస్తుగా ప్రణాళికాబద్ధంగా పూర్తి చేయాలని ఉన్నతాధికారులకు స్పష్టం చేశారు.

Read More...

గోపీచంద్ బ్యాడ్మింటన్ అకాడమీలో వెబ్‌ల్యాబ్స్ అభివృద్ధి చేసిన స్పోర్ట్-ఈ డిజిటల్ ప్లాట్ ఫామ్ ప్రారంభం

హైదరాబాద్ లోని పుల్లెల గోపీచంద్ బ్యాడ్మింటన్ అకాడమీలో వెబ్‌ల్యాబ్స్ అభివృద్ధి చేసిన స్పోర్ట్-ఈ డిజిటల్ ప్లాట్ ఫామ్ ను రాష్ట్ర సమాచార సాంకేతికత, పరిశ్రమల శాఖ మంత్రి దుద్దిళ్ళ శ్రీధర్‌బాబుతో పాటు భారతీయ మాజీ ఫస్ట్-క్లాస్ క్రికెటర్ చాముండేశ్వరనాథ్ , భారత మాజీ బ్యాడ్మింటన్ క్రీడాకారుడు, పుల్లెల గోపీచంద్ లు  ఆవిష్కరించారు. స్పోర్ట్-ఈ సాప్ట్‌వేర్ ప్లాట్‌ఫామ్ క్రీడా వేదికలు, స్పోర్ట్స్ అకాడమీల నిర్వహణను మరింత సులభతరం చేసే దిశగా రూపొందింది. ఈ సందర్భంగా పుల్లెల గోపీచంద్ మాట్లాడుతూ, "క్రీడా మౌలిక సదుపాయాలు సమర్థవంతంగా పనిచేయాలంటే తెరవెనుక బలమైన నిర్వహణ వ్యవస్థ అవసరం. SportE ద్వారా క్రీడా వేదికలను నిర్వహించే వారికి సాంకేతిక పరిజ్ఞానాన్ని అందుబాటులోకి తీసుకురావాలని భావిస్తున్నాం. తద్వారా వారు పరిపాలనా అంశాల కంటే క్రీడాకారులు, క్రీడా సమాజ అభివృద్ధిపై మరింత దృష్టి సారించగలుగుతారు" అని అన్నారు. అలాగే, ప్రతి క్రీడా వేదికకు తనదైన బ్రాండ్ గుర్తింపును ఏర్పరచుకోవడంతో పాటు, వినియోగదారులతో దీర్ఘకాలిక సంబంధాలను పెంపొందించుకునే అవకాశం ఉండాలని ఆయన పేర్కొన్నారు. స్పోర్ట్-ఈ ఈ లక్ష్య సాధనకు దోహదపడుతుందని, క్రీడా సదుపాయాల నిర్వాహకులు ఈ ప్లాట్ఫామ్ను పరిశీలించి తమ సంస్థల అభివృద్ధికి వినియోగించుకోవాలని పిలుపునిచ్చారు. స్పోర్ట్-ఈ లో ఆయన భాగస్వామి, మెంటర్‌గా వ్యవహరిస్తున్నారు. శ్రీకాంత్ పునాటి, శ్యామ్ కతురోజుతో కలిసి ప్రారంభించిన ఈ వెంచర్ క్రీడా రంగాన్ని ఆధునిక సాంకేతిక పరిజ్ఞానంతో మరింత బలోపేతం చేయాలనే ఉమ్మడి లక్ష్యంతో ముందుకు సాగుతోందని గోపిచంద్ అన్నారు. స్పోర్ట్-ఈ లోని 'E' అంటే 'Ecosystem' అని, క్రీడా మౌలిక సదుపాయాలు, కోచింగ్, క్రీడాకారుల భాగస్వామ్యం, వ్యాపార కార్యకలాపాలను ఒకే వ్యవస్థతో అనుసంధానించడమే దీని విస్తృత లక్ష్యమని తెలిపారు. ఈ సందర్భంగా SportE ప్రతినిధి శ్రీకాంత్ పునాటి మాట్లాడుతూ, క్రీడా సదుపాయాల నిర్వాహకులు తమ బ్రాండ్ పేరుతో ప్రత్యేక వెబ్‌సైట్‌ను ఏర్పాటు చేసుకుని, అందులో తమ సౌకర్యాలను ప్రదర్శించడంతో పాటు ఆన్‌లైన్ బుకింగ్‌లను కూడా స్వీకరించవచ్చని వివరించారు. తద్వారా ప్రతి సంస్థకు ప్రత్యేక డిజిటల్ గుర్తింపు లభించడంతో పాటు మార్కెటింగ్, ప్రచారం, వినియోగదారులతో అనుబంధాన్ని పెంపొందించుకునే అవకాశం ఉంటుందని తెలిపారు. ఈ ప్లాట్ఫామ్‌లో అందుబాటులో ఉండే సెంట్రలైజ్డ్ డ్యాష్‌బోర్డ్ ద్వారా బుకింగ్ రికార్డులు, కస్టమర్ల వివరాలు, చెల్లింపులను ఒకే చోట నిర్వహించుకోవచ్చు. వివిధ వ్యవస్థల మధ్య సమన్వయం కోసం మాన్యువల్గా చేసే పనులను తగ్గించుకోవచ్చని నిర్వాహకులు తెలిపారు. అంతేకాకుండా, తమ సొంత పేమెంట్ గేట్వేను అనుసంధానించుకోవడంతో పాటు, అందుబాటులో ఉన్న ఇతర బుకింగ్ అగ్రిగేటర్లతోనూ అనుసంధానం చేసుకునే సదుపాయం కల్పించారు. దీనివల్ల తమ డేటాపై పూర్తి నియంత్రణను కొనసాగిస్తూ కార్యకలాపాలను సమర్థవంతంగా నిర్వహించుకోవచ్చు. భవిష్యత్ ప్రణాళికల్లో భాగంగా ఆర్టిఫిషియల్ ఇంటెలిజెన్స్ ఆధారిత అనలిటిక్స్, రిపోర్టింగ్ సదుపాయాలను కూడా ప్రవేశపెట్టనున్నారు. వీటి ద్వారా కార్యకలాపాల తీరును విశ్లేషించడం, పనితీరు ధోరణులను అంచనా వేయడం, మెరుగుదల అవసరమైన అంశాలను గుర్తించడం సాధ్యమవుతుంది. తద్వారా క్రీడా సంస్థల నిర్వాహకులు మరింత సమర్థవంతమైన వ్యాపార నిర్ణయాలు తీసుకునేందుకు ఈ సాంకేతిక పరిజ్ఞానం తోడ్పడుతుందని వివరించారు.

Read More...

అంతర్జాతీయ ఫుట్‌బాల్‌కు రిటైర్‌మెంట్ ప్రకటించిన క్రిస్టియానో రొనాల్డో

అంతర్జాతీయ ఫుట్‌బాల్‌కు వీడ్కోలు పలుకుతున్నట్లు క్రిస్టియానో రొనాల్డో ప్రకటించాడు. సోషల్ మీడియాలో తన రిటైర్‌మెంట్ నిర్ణయాన్ని ప్రకటించాడు. దీంతో పోర్చుగల్ జాతీయ జట్టుతో రొనాల్డోకు ఉన్న 23 ఏళ్ల అనుబంధం ముగియనుంది. 2003 ఆగస్టులో పోర్చుగల్ తరఫున అంతర్జాతీయ అరంగేట్రం చేసిన 41 ఏళ్ల రొనాల్డో అప్పటి నుంచి జట్టులో కీలక ఆటగాడిగా కొనసాగుతున్నాడు. మైదానంలో తన ఆటతీరుతో ఎన్నో విజయాలను అందించాడు. జట్టుకు నాయకుడిగా అనేక చిరస్మరణీయ విజయాల్లో భాగమయ్యాడు. ఇప్పుడు అంతర్జాతీయ కెరీర్‌కు ముగింపు పలుకుతూ.. తన జెర్సీ నంబర్ 7ను తిరిగి జాతీయ జట్టుకు ఇచ్చే సమయం ఆసన్నమైందని వెల్లడించాడు. జాతీయ జట్టు తరఫున ఇకపై తన ఐకానిక్ నంబర్ 7 జెర్సీని ధరించబోనని చెప్పాడు రొనాల్డో. పోర్చుగల్ ప్రజలను ఉద్దేశించి భావోద్వేగ సందేశాన్ని విడుదల చేశాడు. 23 ఏళ్ల పాటు ఆ జెర్సీని ధరించడం.. దేశం తరఫున మైదానంలో పోరాడటం తనకు దక్కిన గొప్ప గౌరవమన్నాడు. ఆ నంబర్ కేవలం తనది మాత్రమే కాదని.. దేశానికి చెందినదని తన సందేశంలో చెప్పుకొచ్చాడు. 2003 ఆగస్టులో మొదలైన తన ప్రయాణం ఇవాళ్టితో ముగిసిందని అన్నాడు. పోర్చుగల్ తరఫున రొనాల్డో సృష్టించిన రికార్డులు అసాధారణం. అంతర్జాతీయ ఫుట్‌బాల్‌లో అత్యధిక మ్యాచ్‌లు ఆడిన ఆటగాడిగా.. అత్యధిక గోల్స్ చేసిన ప్లేయర్‌గా తన పేరును చరిత్రలో లిఖించుకున్నాడు. ఇప్పటివరకు పోర్చుగల్ తరఫున 234 మ్యాచ్‌లు ఆడి 146 గోల్స్ సాధించాడు. 2016లో పోర్చుగల్ తొలిసారి యూరోపియన్ ఛాంపియన్‌షిప్ గెలవడంలో రొనాల్డో కీలక పాత్ర పోషించాడు. ఆ తర్వాత 2019, 2025లో UEFA నేషన్స్ లీగ్ టైటిళ్లను కూడా అందుకున్నాడు. వ్యక్తిగతంగా ఎన్నో అవార్డులు సాధించిన అతడు.. జట్టుకు కూడా అద్భుతమైన విజయాలను అందించాడు. రొనాల్డో కెరీర్‌లో ప్రపంచకప్‌లకు ప్రత్యేక స్థానం ఉంది. 2006 నుంచి 2026 వరకు మొత్తం ఆరు ఫిఫా ప్రపంచకప్ టోర్నీల్లో పోర్చుగల్‌కు ప్రాతినిధ్యం వహించాడు. ఆరు వేర్వేరు ప్రపంచకప్ టోర్నీల్లో గోల్స్ చేసిన తొలి ఆటగాడిగా చరిత్ర సృష్టించాడు. అయితే ఇంతటి గొప్ప కెరీర్ ఉన్నా.. ప్రపంచకప్ ట్రోఫీని మాత్రం అందుకోలేకపోయాడు. 2026 ప్రపంచకప్‌లో స్పెయిన్ చేతిలో పోర్చుగల్ ఓడిపోవడంతో ఆ కల నెరవేరలేదు. రొనాల్డో టీమ్‌లోకి వచ్చిన తరువాత పోర్చుగల్ 2006 వరల్డ్ సెమీస్‌కు చేరుకుంది. ప్రపంచకప్‌లో పోర్చుగల్‌కు ఇదే అత్యుత్తమ ప్రదర్శన. తమ దేశ ఫుట్‌బాల్‌కు రొనాల్డో చేసిన సేవలను పోర్చుగల్ ఫుట్‌బాల్ సమాఖ్య ప్రత్యేకంగా గుర్తించింది. రొనాల్డో అంతర్జాతీయ కెరీర్‌కు గ్రాండ్ వీడ్కోలు కార్యక్రమాన్ని నిర్వహించాలని భావిస్తున్నట్లు తెలిపింది. అభిమానులు, దేశ ప్రజలు మరోసారి అతడి సేవలను గుర్తుచేసుకునేలా ఈ కార్యక్రమం నిర్వహిస్తామని వెల్లడించింది.

Read More...

తిరుపతి లడ్డూ కేసు : ఆంధ్రప్రదేశ్ వెలుపలకు బదిలీ చేయాలంటూ దాఖలైన పిటిషన్‌ను కొట్టివేసిన సుప్రీంకోర్టు

తిరుపతి లడ్డూల నెయ్యి కల్తీ కేసు విచారణను ఆంధ్రప్రదేశ్ వెలుపలకు బదిలీ చేయాలంటూ దాఖలైన పిటిషన్‌ను సుప్రీంకోర్టు గురువారం తిరస్కరించింది. ఈ కేసులో నిందితుడు, మహారాష్ట్రకు చెందిన పాడి పరిశ్రమ వ్యాపారవేత్త మరియు మాల్‌గంగా మిల్క్ అండ్ ఆగ్రో ప్రొడక్ట్స్ ప్రైవేట్ లిమిటెడ్ మేనేజింగ్ డైరెక్టర్ అయిన మచింద్ర శాంతారామ్ లంకే దాఖలు చేసిన పిటిషన్‌ను ప్రధాన న్యాయమూర్తి సూర్యకాంత్, జస్టిస్ జయమాల్య బాగ్చీలతో కూడిన ధర్మాసనం కొట్టివేసింది. లంకే తరఫున హాజరైన సీనియర్ న్యాయవాది సిద్ధార్థ్ దవే, ఈ కేసుకు సంబంధించి రాజకీయ నాయకులు ప్రకటనలు చేస్తూనే ఉన్నారని, ఇది స్వేచ్ఛాయుత విచారణకు ప్రతికూల వాతావరణాన్ని సృష్టించిందని వాదించారు. “ఇది ఒక రాజకీయ అంశంగా మారింది. రాష్ట్రంలో ప్రతికూల వాతావరణం నెలకొని ఉంది. ముఖ్యమంత్రి, ఉప ముఖ్యమంత్రి ఈ కేసుకు సంబంధించి నిరంతరం ప్రకటనలు చేస్తున్నారు,” అని దవే అన్నారు. నెయ్యిలో జంతువుల కొవ్వు లేదని ఫోరెన్సిక్ నివేదిక తేల్చి చెప్పినప్పటికీ, రాజకీయ నాయకులు ఇలాంటి ప్రకటనలు చేయడంలో నిమగ్నమై ఉన్నారని దవే అన్నారు. “స్వేచ్ఛాయుత, నిష్పక్షపాత విచారణ కోసం దయచేసి ఈ కేసును పక్క రాష్ట్రానికి బదిలీ చేయండి. నిందితులలో చాలామంది ఉత్తర భారతదేశానికి చెందినవారు. భాషాపరమైన అడ్డంకి కూడా ఉంది,” అని ఆయన విన్నవించుకున్నారు. ఈ వ్యాఖ్యల వల్ల విచారణ న్యాయమూర్తి ప్రభావితం కాకపోవచ్చు అయినప్పటికీ, ఇలాంటి పరిస్థితులలో నిష్పక్షపాత విచారణను ఆశించలేమని ఆయన అన్నారు. సీజేఐ కాంత్ డేవ్‌తో, “మేము మా ఉత్తర్వుతో వారందరినీ నిశ్శబ్దం చేశాము. ఏమైనా జరిగితే, మీరు మా వద్దకు రావచ్చు,” అని అన్నారు. దేవ్ విన్నవించుకుంటూ, “దయచేసి ఎలాంటి ప్రకటనలు చేస్తున్నారో చూడండి. ఇది నా విచారణలో నాకు పక్షపాతం కలిగిస్తుంది. దీని నుండి ఎవరూ మినహాయింపు కాదు. విచారణ చాలా రాజకీయ ప్రతికూల వాతావరణంలో జరుగుతుంది. నష్టపోయేది నేను మాత్రమే. రాజకీయ నాయకుల మధ్య పోరాటంలో నన్ను వాడుకుంటున్నారు. దీనిని ఇక్కడికి తీసుకురమ్మని నేను అడగడం కూడా లేదు. ఏదైనా పొరుగు రాష్ట్రానికి తీసుకువస్తే చాలు. ఏమైనప్పటికీ, ఇది సీబీఐ విచారణ; నిందితులలో చాలామంది ఉత్తర భారతదేశానికి చెందినవారు, బలమైన భాషాపరమైన అడ్డంకి ఉంది,” అని అన్నారు. అయితే, ధర్మాసనం అందుకు అయిష్టత వ్యక్తం చేస్తూ, రాష్ట్రానికి చెందిన సాక్షులు చాలామంది ఉన్నారని, అది విచారణను ప్రభావితం చేస్తుందని పేర్కొంది. సుప్రీంకోర్టు స్వయంగా ఏర్పాటు చేసిన ప్రత్యేక దర్యాప్తు బృందం ఈ విచారణ జరిపిందని అది పేర్కొంది. “మేము విచారణను బదిలీ చేయడానికి సుముఖంగా లేము. కొట్టివేస్తున్నాము,” అని ధర్మాసనం ఆదేశించింది. “కోట్ల మంది ప్రజల మనోభావాలను శాంతింపజేయడానికి”, తిరుపతి లడ్డూల తయారీలో జంతువుల కొవ్వును ఉపయోగిస్తున్నారన్న ఆరోపణలపై విచారణ జరిపేందుకు 2024 అక్టోబర్ 4న సుప్రీంకోర్టు ఐదుగురు సభ్యులతో కూడిన స్వతంత్ర సిట్ ను ఏర్పాటు చేసింది. అదే సమయంలో, కోర్టును “రాజకీయ యుద్ధరంగంగా” ఉపయోగించలేమని స్పష్టం చేసింది.

Read More...

కేఎస్‌ఆర్‌టీసీ బస్సు ఛార్జీలు పెంపు : బీఎంటీసీ సిటీ బస్సుల్లో 35 శాతం, కేఎస్‌ఆర్‌టీసీ బస్సుల్లో సగటున 23 శాతం పెంపు

కర్ణాటక రాష్ట్రవ్యాప్తంగా ఆర్టీసీ బస్సు ప్రయాణ ధరలను నవంబర్ 5 నుంచి సుమారు 35 శాతం వరకు పెంచుతూ ప్రభుత్వం నిర్ణయం తీసుకుంది. కేఎస్‌ఆర్‌టీసీ బస్సుల్లో సగటున 23 శాతం మేరకు, బెంగళూరు నగరానికి చెందిన బీఎంటీసీ సిటీ బస్సుల్లో ఏకంగా 35 శాతం వరకు టికెట్ ధరలను సవరించారు. గత కొంతకాలంగా పెరుగుతున్న డీజిల్ ధరలు, బస్సుల నిర్వహణ వ్యయం విపరీతంగా పెరగడం వల్లే ఈ నిర్ణయం తీసుకోవాల్సి వచ్చిందని రవాణా శాఖ స్పష్టం చేసింది. బస్సు ఛార్జీల పెంపు నిర్ణయం సామాన్యులపై తీవ్ర ప్రభావాన్ని చూపుతున్నప్పటికీ, మహిళలకు ప్రభుత్వం కాస్త ఊరటనిచ్చింది. ఎంతో ప్రజాదరణ పొందిన ‘శక్తి’ పథకం కింద మహిళలకు కల్పిస్తున్న ఉచిత ప్రయాణ సౌకర్యం యథావిధిగా కొనసాగుతుందని ప్రభుత్వం అధికారికంగా ప్రకటించింది. అయితే నిత్యావసర వస్తువులు, పాల ధరలు ఇప్పటికే పెరిగి ప్రజలు సతమతమవుతున్న తరుణంలో, తాజాగా ఆర్టీసీ ఛార్జీల మోత మోగడం సామాన్య, మధ్యతరగతి ప్రజలకు తీవ్ర ఆందోళన కలిగిస్తోంది.

Read More...

మెర్సిడెస్ బెంజ్ కొత్త ఎలక్ట్రిక్ SUV విడుదల : విడుదలైన 36 గంటల్లో 550 మందికి పైగా కారు కోసం నమోదు చేసుకున్న వినియోగదారులు

దేశీయ మార్కెట్లోకి మెర్సిడెస్ బెంజ్ అత్యంత అధునాతనమైన సరికొత్త ఎలక్ట్రిక్ SUVని విడుదల చేసింది. ఈ సరికొత్త లగ్జరీ ఎలక్ట్రిక్ SUV ప్రారంభ ధర రూ. 78.50 లక్షలుగా నిర్ణయించారు. ఈ ఎలక్ట్రిక్ SUV సామర్థ్యం, బ్యాటరీ పనితీరు విభాగంలో సరికొత్త ప్రమాణాలను నెలకొల్పుతోంది. ఇందులో అత్యంత శక్తివంతమైన 94 kWh బ్యాటరీ ప్యాక్ను అమర్చారు. ఈ కారును ఒక్కసారి పూర్తి ఛార్జ్ చేస్తే ఏకంగా 711 కిలోమీటర్ల సుదీర్ఘ రేంజ్ ఇస్తుందని కంపెనీ అధికారికంగా పేర్కొంది. దూరప్రాంత ప్రయాణాలకు ఈ రేంజ్ ఎంతగానో ఉపయోగపడనుంది. 39.1 ఇంచుల MBUX హైపర్ స్క్రీన్ & అత్యాధునిక ఫీచర్లు ఇంటీరియర్ పరంగా ఈ కారు అత్యంత విలాసవంతమైన అనుభూతిని అందిస్తుంది. డ్యాష్‌బోర్డ్‌లో ప్రధాన ఆకర్షణగా 39.1 ఇంచుల బృహత్తర MBUX హైపర్ స్క్రీన్ ను అందించారు. ప్రయాణికులు, డ్రైవర్‌కు అత్యుత్తమ ఇన్ఫోటైన్‌మెంట్ అనుభవాన్ని అందించేందుకు ఇందులో ఆర్టిఫిషియల్ ఇంటెలిజెన్స్ ఆధారిత కనెక్టెడ్ కార్ ఫీచర్లు, అడ్వాన్స్‌డ్ సేఫ్టీ సిస్టమ్‌లను పొందుపరిచారు. దేశంలో తన తయారీ కార్యకలాపాలు, అసెంబ్లీ ప్లాంట్లను విస్తరించే వ్యూహంలో భాగంగా మెర్సిడెస్ బెంజ్ దాదాపు రూ. 200 కోట్ల అదనపు పెట్టుబడిని పెట్టింది. ఈ సరికొత్త ఎలక్ట్రిక్ కారు ప్రకటన వెలువడిన వెంటనే మార్కెట్‌లో ఊహించని స్పందన లభించింది. కారు ఫీచర్లు, లుక్స్ పట్ల వాహన ప్రియులు తీవ్ర ఆసక్తి చూపించడంతో విడుదలైన కేవలం 36 గంటల్లోనే 550 మందికి పైగా వినియోగదారులు ఈ కారు కోసం నమోదు  చేసుకోవడం విశేషం.

Read More...

జనవరిలో ఐఫోన్ 18 విడుదల? : 1.5K రిజల్యూషన్‌తో పాటు 120Hz రిఫ్రెష్ రేట్‌కు సపోర్ట్ చేసే 6.3-అంగుళాల ఓఎల్‌ఈడీ డిస్‌ప్లే

యాపిల్‌ ఐఫోన్‌ సిరీస్‌లో అద్భుతమైన స్మార్ట్‌ఫోన్‌ను విడుదల చేసేందుకు సిద్ధమైనట్లు తెలుస్తోంది. ఇటీవలే ఐఫోన్ 18 ప్రో సిరీస్ లాంచ్‌ చేసిన సంగతి తెలిసిందే. అయితే, ఇందులో కేవలం ప్రో మోడల్స్‌ను మాత్రమే అందుబాటులోకి తీసుకు వచ్చింది. కానీ యాపిల్‌ త్వరలోనే ఐఫోన్ 18 మోడల్‌ను కూడా లాంచ్‌ చేసేందుకు సిద్ధమైనట్లు తెలుస్తోంది. దీనిని కంపెనీ వచ్చే ఏడాది మొదటి నెలలో విడుదల చేసే అవకాశాలు ఉన్నట్లు తెలుస్తోంది. ఇది ఓఎల్‌ఈడీ  డిస్‌ప్లేను కలిగి ఉండబోతున్నట్లు లీక్‌ అయిన వివరాలు చెబుతున్నాయి. ప్రముఖ టిప్‌స్టర్ డిజిటల్ చాట్ స్టేషన్ వీబోలో తెలిపిన వివరాల ప్రకారం ఐఫోన్ 18 మోడల్‌లో 1.5K రిజల్యూషన్‌తో పాటు 120Hz రిఫ్రెష్ రేట్‌కు సపోర్ట్ చేసే 6.3-అంగుళాల ఓఎల్‌ఈడీ డిస్‌ప్లేను కూడా కలిగి ఉండబోతున్నట్లు తెలిపారు. ఇందులో యాపిల్ సొంత నెక్స్ట్-జెన్ A20 చిప్‌సెట్ వినియోగించినట్లు లీక్‌ అయిన వివరాలు చెబుతున్నాయి. లుక్స్ పరంగా కంపెనీ తన ట్రేడ్‌మార్క్ డైనమిక్ ఐలాండ్ డిజైన్‌తో దీనిని వినియోగదారులకు పరిచయం చేయబోతున్నట్లు తెలుస్తోంది.. మార్కెట్‌లోకి ఐఫోన్ 18 మోడల్‌తో పాటు తక్కువ బడ్జెట్ వినియోగదారుల కోసం ఐఫోన్ 18eతో పాటు ఐఫోన్ ఎయిర్ 2 మోడల్స్‌ను కూడా అందుబాటులోకి తీసుకు వచ్చే అవకాశాలు ఉన్నట్లు తెలుస్తోంది. గత సంవత్సరం భారత్‌లో ఐఫోన్ 17 ప్రారంభ ధర రూ.82,900తో లాంచ్‌ అయిన సంగతి తెలిసిందే.. అయితే, మెమరీ కాంపోనెంట్ల ధరలు విపరీతంగా పెరిగిపోవడంతో మార్కెట్లో ధరలు కూడా విపరీతంగా పెరిగినట్లు తెలుస్తోంది.. తాజా సమాచారం ప్రకారం.. ఐఫోన్ 18 ధర మరింత పెరిగే అవకాశాలు కూడా ఉన్నాయని టెక్‌ నిపుణులు తెలుపుతున్నారు.. యాపిల్ అత్యాధునిక ఆర్టిఫిషియల్ ఇంటెలిజెన్స్ ఫీచర్లు అద్భుతంగా పని చేసేందుకు ఐఫోన్ 18, ఐఫోన్ 18e మోడల్స్‌లో మెమరీని భారీగా అప్‌గ్రేడ్ చేయబోతున్నట్లు తెలుస్తోంది.. వీటిలో ఏకంగా 9GB ర్యామ్‌ను కూడా తీసుకు వచ్చే అవకాశాలు కూడా ఉన్నాయని టెక్‌ నిపుణులు తెలుపుతున్నారు. ఐఫోన్ 18e మోడల్ మాత్రం బడ్జెట్‌లో అందుబాటులోకి రాబోతున్నట్లు తెలుస్తోంది. అయితే, ఇది 60Hz రిఫ్రెష్ రేట్‌తో కూడిన 6.12-అంగుళాల LTPS OLED డిస్ల్పేను కూడా కలిగి ఉండబోతున్నట్లు తెలుస్తోంది.. ఈ స్మార్ట్‌ఫోన్‌లో కూడా A20 ప్రాసెసర్‌తో పాటు 9GB ర్యామ్‌తో లాంచ్‌ చేయబోతున్నట్లు లీక్‌ అయిన వివరాలు స్పష్టం చేశాయి.. అంతేకాకుండా 48-మెగాపిక్సెల్ ప్రధాన రియర్ కెమెరాతో పాటు సెల్ఫీలు, వీడియో కాల్స్ కోసం ఫ్రంట్‌ భాగంలో 24-మెగాపిక్సెల్ కెమెరాను తీసుకు రాబోతున్నట్లు తెలుస్తోంది..

Read More...

పంట నష్టంపై వివరాలు సేకరించి రైతులకు ఇబ్బందులు కలగకుండా చర్యలు తీసుకుంటాం : తుపాను ప్రభావిత ప్రాంతాల్లో పర్యటించిన పొంగులేటి

తెలంగాణాలో మురసు తుపాను ప్రభావంతో భారీగా వరద నీరు చేరి దెబ్బతిన్న ప్రాంతాల్లో రాష్ట్ర రెవెన్యూ, గృహ నిర్మాణం, సమాచార శాఖల మంత్రి పొంగులేటి శ్రీనివాసరెడ్డి గురువారం పర్యటించారు. సత్తుపల్లి, దమ్మపేట మండలాల్లో తెగిన చెరువు కట్టలు, నీట మునిగిన పంట పొలాలను క్షేత్రస్థాయిలో పరిశీలించి బాధిత రైతులకు ప్రభుత్వం అండగా ఉంటుందని భరోసా ఇచ్చారు. సత్తుపల్లి ఎమ్మెల్యే మట్టా రాగమయి, అశ్వారావుపేట ఎమ్మెల్యే జారే ఆదినారాయణ, కలెక్టర్లు దివాకర టీఎస్, అంకిత్‌లతో కలిసి బేతుపల్లి పెద్ద చెరువు ముంపు ప్రాంతంలోని పంట పొలాలను మంత్రి పరిశీలించారు. వరద తీవ్రత, పంటలకు జరిగిన నష్టంపై రైతులను అడిగి తెలుసుకున్నారు. అనంతరం దమ్మపేట మండలం నాగుపల్లి వద్ద మల్లెపూల వాగు ఉప్పొంగడంతో దెబ్బతిన్న పంటలను పరిశీలించారు. ముసలి బంధం చెరువు కట్టకు ఐదు చోట్ల గండ్లు పడిన ప్రాంతాన్ని సందర్శించి పరిస్థితిని అధికారులను అడిగి తెలుసుకున్నారు. గండుగులపల్లి వద్ద వాగు పరిసరాల్లో దెబ్బతిన్న కట్టను, దమ్మపేటలో తెగిపోయిన పేరంటాల చెరువు కట్టను పరిశీలించారు. ఆయా ప్రాంతాల్లో వరద ఉద్ధృతి, సహాయక చర్యలు, చేపట్టాల్సిన మరమ్మతులపై అధికారులకు పలు సూచనలు చేశారు. అనంతరం సత్తుపల్లిలోని డబుల్ బెడ్‌రూమ్ ఇళ్ల ప్రాంతంలోకి వరద నీరు చేరిన ప్రాంతాన్ని సందర్శించి స్థానిక పరిస్థితులను సమీక్షించారు. ఈ సందర్భంగా మంత్రి పొంగులేటి మాట్లాడుతూ దెబ్బతిన్న చెరువు కట్టలకు తక్షణమే మరమ్మతులు చేపడతామని, పంట నష్టంపై వివరాలు సేకరించి రైతులకు ఇబ్బందులు కలగకుండా చర్యలు తీసుకుంటామని తెలిపారు. బాధిత రైతులకు ప్రభుత్వం అన్ని విధాలా అండగా నిలుస్తుందని స్పష్టం చేశారు. ప్రజలకు, రైతులకు ఎలాంటి ఇబ్బందులు తలెత్తకుండా అధికారులు సమన్వయంతో పనిచేయాలని ఆదేశించారు.

Read More...

ఎదురుగా వస్తున్న వాహనాన్ని తప్పించబోయి విద్యుత్ ట్రాన్స్‌ఫార్మర్‌ను డీకొట్టిన ఆర్‌టిసి బస్సు : తృటిలో తప్పిన పెను ప్రమాదం

తెలంగాణలోని జగిత్యాల జిల్లా మేడిపల్లి గ్రామ శివారులో గురువారం ఒక ఆర్‌టిసి బస్సు ప్రమాదానికి గురైంది. ఎదురుగా వస్తున్న XL వాహనాన్ని తప్పించబోయి ఆర్‌టిసి బస్సు రోడ్డు పక్కనే ఉన్న విద్యుత్ ట్రాన్స్‌ఫార్మర్‌ను డీకొట్టింది. ఈ ఘటనలో XL వాహనంపై వెళ్తున్న వ్యక్తికి స్వల్ప గాయాలయ్యాయి. డ్రైవర్ సమయస్ఫూర్తితో వ్యవహరించడంతో బస్సులోని ప్రయాణికులందరూ సురక్షితంగా బయటపడ్డారు. ప్రమాద సమాచారం అందుకున్న అధికారులు ఘటనా స్థలానికి చేరుకుని వివరాలు సేకరిస్తున్నారు.

Read More...

పీఓకేలో పాకిస్తాన్ భద్రతా దళాలు జరిపిన డ్రోన్ దాడులు, తుపాకీ కాల్పుల్లో ముగ్గురు పౌరులు మృతి : 18 మందికి తీవ్ర గాయాలు

పాక్ ఆక్రమిత జమ్మూ కాశ్మీర్ లో రావల్కోట్‌లోని ఉమర్ ఫరూఖ్ చౌక్ సమీపంలో  పాకిస్తానీ భద్రతా దళాలు జరిపిన డ్రోన్ దాడులు, విచక్షణారహిత తుపాకీ కాల్పుల్లో ముగ్గురు పౌరులు ప్రాణాలు కోల్పోగా, మరో 18 మంది తీవ్రంగా గాయపడ్డారు. గురువారం తెల్లవారుజామున ఐదు గంటల నుంచే పాకిస్తానీ సైనికులు నిరాయుధులైన నిరసనకారులు, పౌరుల ఇళ్లను లక్ష్యంగా చేసుకుని కాల్పులకు తెగబడ్డారని స్థానికులు ఆరోపిస్తున్నారు. ఈ దాడులకు సంబంధించిన విజువల్స్ సామాజిక మాధ్యమాల్లో వైరల్‌గా మారాయి. పౌరుల ఇళ్లు తగలబడుతుండటం, నిరంతరంగా తుపాకీ కాల్పుల శబ్దాలు వినిపిస్తుండటం రావల్కోట్‌లో నెలకొన్న భయానక వాతావరణానికి అద్దం పడుతోంది. ఘటన స్థలం నుంచి స్వాధీనం చేసుకున్న శ్రాప్నెల్ (బాంబు శకలాలు)ను ప్రదర్శిస్తూ, పాకిస్తాన్ సైన్యం తమపై మరణ శాసనం రాస్తోందని స్థానికులు ఆవేదన వ్యక్తం చేస్తున్నారు. చిన్నపిల్లలు, మహిళలు అని కూడా చూడకుండా భద్రతా దళాలు కాల్పులు జరిపాయని తీవ్రంగా మండిపడుతున్నారు. పాక్ ఆక్రమిత కాశ్మీర్‌లో పౌరులపై సైనిక దాడులు జరగడం ఇదే మొదటిసారి కాదు. గత జూన్ నుంచి ప్రారంభమైన పౌర నిరసనలను అణచివేసేందుకు పాకిస్తాన్ సైన్యం జరిపిన దాడుల్లో ఇప్పటివరకు 153 మందికి పైగా పౌరులు ప్రాణాలు కోల్పోయారు. రావల్కోట్‌లో నిరసనల తీవ్రత పెరగడంతో ప్రభుత్వం ముందస్తు చర్యగా మొబైల్, ఇంటర్నెట్ సేవలను పూర్తిగా నిలిపివేసింది. అయినప్పటికీ, ప్రజలు భయాందోళనలను పక్కనపెట్టి పెద్ద ఎత్తున వీధుల్లోకి వచ్చి తమ నిరసనను వ్యక్తం చేస్తున్నారు. అసిమ్ మునీర్ నేతృత్వంలోని పాకిస్తాన్ సైన్యం ఎంతటి దమనకాండకు పాల్పడినా వెనక్కి తగ్గేది లేదని స్థానిక ప్రజలు స్పష్టం చేస్తున్నారు. ఇది కేవలం సబ్సిడీ పిండి, చౌక విద్యుత్ కోసం మాత్రమే జరుగుతున్న పోరాటం కాదని.. స్థానిక శాసనసభలో సరైన ప్రాతినిధ్యం, తమ ప్రాంతీయ వనరులపై తమకే హక్కులు , పరిపాలనా స్వయంప్రతిపత్తి సాధించేంత వరకు ఈ పోరాటం ఆగదని నిరసనకారులు తేల్చిచెబుతున్నారు. 

Read More...

సముద్రపు అలల ధాటికి కొట్టుకొచ్చిన పడవలో నాలుగు మృతదేహాలు లభ్యం!

ఆంధ్రప్రదేశ్ లోని ప్రకాశం జిల్లా కొత్తపట్నం సముద్ర తీరంలో చేపల వేటకు వెళ్లిన ఓ మత్స్యకారుల బోటు ప్రమాదానికి గురైనట్లు అనుమానాలు వ్యక్తమవుతున్నాయి. సముద్రపు అలల ధాటికి కొట్టుకొచ్చిన పడవలో నాలుగు మృతదేహాలు కనిపించడంతో స్థానికంగా కలకలం రేగింది. కొత్తపట్నం తీరానికి చేరుకున్న బోటును స్థానిక మత్స్యకారులు గుర్తించారు. అందులో నాలుగు మృతదేహాలు ఉండటాన్ని గమనించి వెంటనే పోలీసులకు, మెరైన్ అధికారులకు సమాచారం అందించారు. సముద్రంలో అలల ఉధృతి కారణంగా బోటు అదుపుతప్పి బోల్తా పడి ఉండవచ్చని ప్రాథమికంగా అనుమానిస్తున్నారు. సదరు బోటులో మొత్తం 15 మందికి పైగా మత్స్యకారులు ఉన్నట్లు భావిస్తున్నారు. పడవలో నలుగురి మృతదేహాలు మాత్రమే లభించడంతో మిగిలినవారు సముద్రంలో గల్లంతై ఉండవచ్చని అధికారులు అనుమానిస్తున్నారు. అయితే ప్రమాదానికి గురైన వారి పూర్తి వివరాలు ఇంకా తెలియాల్సి ఉంది. సమాచారం అందుకున్న కొత్తపట్నం పోలీసులు, మెరైన్ అధికారులు వెంటనే ఘటనాస్థలానికి చేరుకుని బోటును పరిశీలించారు. మృతదేహాలను పోస్టుమార్టం నిమిత్తం రిమ్స్ ఆసుపత్రికి తరలించేందుకు ఏర్పాట్లు చేపట్టారు. మృతుల వివరాలు, వారి స్వస్థలాలను గుర్తించే ప్రయత్నం చేస్తున్నారు. వీరు తమిళనాడుకు చెందిన మత్స్యకారులా ? లేక స్థానిక తీరప్రాంత గ్రామాల వారా ? అనే కోణంలో విచారణ సాగిస్తున్నారు. మరోవైపు గల్లంతైన వారి ఆచూకీ కోసం మెరైన్ పోలీసులు, కోస్ట్ గార్డ్ బృందాలు సముద్రంలో గాలింపు చర్యలు చేపట్టాయి. నౌకలు, స్థానిక మత్స్యకారుల పడవల సహాయంతో అన్వేషణ కొనసాగిస్తున్నారు. బోటు సముద్రంలో అలల ఉధృతికి అదుపుతప్పిందా? లేదా ఏదైనా భారీ నౌక ఢీకొనడం వల్ల ప్రమాదం జరిగిందా? అనే కోణాల్లో అధికారులు దర్యాప్తు చేస్తున్నారు. ప్రమాదానికి అసలు కారణం ఏమిటనేది విచారణ పూర్తయిన తర్వాత స్పష్టమయ్యే అవకాశం ఉంది. గల్లంతైన మత్స్యకారుల ఆచూకీ కోసం సహాయక చర్యలు కొనసాగుతున్నాయి.

Read More...

మధ్యంతర ఎన్నికల్లో ట్రంప్ పార్టీ ఓటమి : ప్రపంచవ్యాప్తంగా స్టాక్ మార్కెట్లకు భారీ ఊరట : 2008 పాయింట్లు లాభపడ్డ సెన్సెక్స్ : రూ.8 లక్షల కోట్లు పెరిగిన ఇన్వెస్టర్ల సంపద

అమెరికాలో జరిగిన మధ్యంతర ఎన్నికల్లో అధ్యక్షుడు ట్రంప్ పార్టీ ఓటమి పాలు కావటం అమెరికాతో పాటు ప్రపంచవ్యాప్తంగా స్టాక్ మార్కెట్లకు భారీ ఊరటను అందించింది. ఇదే క్రమంలో క్రూడ్ ఆయిల్ ధరలు కూడా 5 శాతం మేర పతనం అయ్యాయి. ట్రంప్ ఓటమితో పాజిటివ్ ట్రెండ్ తో మెుదలైన దేశీయ స్టాక్ మార్కెట్లు బుల్స్ దూకుడుతో సూపర్ ర్యాలీని నమోదు చేశాయి. గురువారం స్టాక్ మార్కెట్లు క్లోజ్ అయ్యే నాటికి బెంచ్ మార్క్ సూచీ సెన్సెక్స్ 2008 పాయింట్లు లాభపడగా, మరో కీలక సూచీ నిఫ్టీ 576 పాయింట్లు, నిఫ్టీ బ్యాంక్ సూచీ 1860 పాయింట్లు, నిఫ్టీ మిడ్ క్యాప్ సూచీ 1115 పాయింట్ల లాభాలతో క్లోజ్ అయ్యాయి. దీంతో గడచిన 6 ట్రేడింగ్ సెషన్లలో సెన్సెక్స్, నిఫ్టీలు ఏకంగా 10 శాతం లాభపడి ఇన్వెస్టర్లపై లాభాల వర్షం కురిపించాయి. ఈరోజు ప్రధఆనంగా ఆటో, ఐటీ, ఫైనాన్షియల్ రంగాలకు చెందిన షేర్లలో భారీ కొనుగోళ్ల కోలాహలం కనిపించింది. ట్రంప్ ఓటమి వార్తలతో క్రూడ్ రేట్లు కూడా పడిపోయాయి. ఇవాళ బ్రెంట్ క్రూడ్ ఆయిల్ ధర బ్యారెల్ 94 డాలర్లు పలకటంతో దేశీయంగా దిగుమతుల భారం, ద్రవ్యోల్బణం భయాలు నెమ్మదించాయి. కేవలం ఈ ఒక్కరోజున ఇన్వెస్టర్ల సంపద దాదాపు రూ.8 లక్షల కోట్లకు పైనే పెరిగింది. 

Read More...

అమెజాన్ గ్రేట్ ఫెస్టివల్ సేల్ : ఐక్యూ జడ్ 11 లైట్ 5జీపై డిస్కౌంట్ ఆఫర్

అమెజాన్ గ్రేట్ ఫెస్టివల్ సేల్ లో ఐక్యూ జడ్ 11 లైట్ 5జీ డిస్కౌంట్ తో చవక ధరలో లభిస్తోంది. ఈ స్మార్ట్ ఫోన్ రూ. 17,999 ప్రైస్ తో లాంచ్ అయ్యింది.ఈరోజు అమెజాన్ సేల్ నుంచి కూడా రూ. 500 డిస్కౌంట్ తో రూ. 17,499 బేసిక్ ప్రైస్ తో లిస్ట్ అయ్యింది. అమెజాన్ ఈరోజు ఈ స్మార్ట్ ఫోన్ పైన రూ. 2,500 రూపాయల భారీ కూపన్ డిస్కౌంట్ అందించింది. ఈ ఆఫర్ తో ఈ స్మార్ట్ ఫోన్ ను కేవలం రూ. 14,999 రూపాయల ఆఫర్ ధరలో సొంతం చేసుకోవచ్చు. ఈ స్మార్ట్ ఫోన్ పైన అదనపు బెనిఫిట్ అందుకునే అవకాశం కూడా అందించింది. అదేమిటంటే, ఈ స్మార్ట్ ఫోన్ ను Amazon Pay ICICI క్రెడిట్ కార్డు తో కొనుగోలు చేసే వారికి రూ. 524 రూపాయల అదనపు బ్యాంక్ డిస్కౌంట్ అందిస్తుంది. ఈ ఆఫర్స్ తో ఈ ఫోన్ ను మీరు కేవలం రూ. 14,475 రూపాయల ఆఫర్ ధరలో అందుకోవచ్చు. ఈ స్మార్ట్ ఫోన్ 6.74 అంగుళాల LCD డిస్‌ప్లే కలిగి ఉంటుంది. ఈ స్క్రీన్ HD+ రిజల్యూషన్, 120Hz రిఫ్రెష్ రేట్ మరియు 1200 నిట్స్ గరిష్ఠ బ్రైట్‌ నెస్ (HBM), తో ఆకట్టుకునే విజువల్స్ అందిస్తుంది. ఐకూ ఈ ఫోన్‌ లో MediaTek Dimensity 6300 5G ప్రాసెసర్‌ ను అందించింది. ఇది 6nm టెక్నాలజీతో రూపొందించిన ఈ ఆక్టా-కోర్ చిప్‌ సెట్. అలాగే, ఈ ఫోన్ లో 4GB LPDDR4X ర్యామ్ తో పాటు 128GB UFS 2.2 ఇంటర్నల్ స్టోరేజ్ అందించింది. లభిస్తుంది. ఈ ఫోన్ లో 6GB వరకు వర్చువల్ RAM పొందవచ్చు. ఈ ఫోన్ వెనుక భాగంలో 50 మెగాపిక్సెల్ Sony IMX852 ప్రధాన కెమెరా కలిగిన రియర్ మరియు ముందు 5MP సెల్ఫీ కెమెరా కూడా ఉంటుంది. ఈ కెమెరాలో నైట్ మోడ్, పోర్ట్రెయిట్, పనోరమా, డాక్యుమెంట్, టైమ్‌లాప్స్, స్లో మోషన్, 50MP మోడ్ వంటి ఫీచర్లు ఉన్నాయి. ఈ స్మార్ట్‌ ఫోన్‌ లో 6,500mAh బ్యాటరీ మరియు ఈ ఫోన్ ను వేగంగా ఛార్జ్ చేసే 44W Flash Charge ఫాస్ట్ ఛార్జింగ్ సపోర్ట్ ఉంది.

Read More...

దేశీయ ద్విచక్ర వాహన మార్కెట్లోకి అడుగుపెట్టేందుకు సిద్ధమౌతున్న ఇటాల్‌జెట్

ఇటలీకి చెందిన ప్రముఖ టూ వీలర్ తయారీ సంస్థ ఇటాల్‌జెట్   భారతీయ ద్విచక్ర వాహన మార్కెట్లోకి అడుగుపెట్టేందుకు సిద్ధమవుతోంది. ఇటలీలోని మిలాన్ నగరంలో జరుగుతున్న EICMA 2026 అంతర్జాతీయ మోటార్‌సైకిల్ ప్రదర్శనలో తన కొత్త డ్రాగ్‌స్టర్ స్కూటర్ లైనప్‌ను ఆవిష్కరించింది. ఈ ప్రదర్శనలో ఇటాల్‌జెట్ మూడు కొత్త మోడళ్ల పరిచయం తో ప్రత్యేక ఆకర్షణగా నిలిచింది. ఇప్పటికే అంతర్జాతీయ మార్కెట్లలో తనదైన గుర్తింపు సంపాదించుకున్న ఈ బ్రాండ్ ఇప్పుడు భారతీయ వినియోగదారులకు కూడా స్కూటర్లను లక్ష్యంగా పెట్టుకుంది. ఇందుకోసం కోల్హాపూర్‌కు చెందిన మోటోహౌస్ ఇండియాతో భాగస్వామ్యం కుదుర్చుకుంది. ఈ కొత్త భాగస్వామ్యం ద్వారా భారతీయ మార్కెట్లో తన వ్యాపారాన్ని విస్తరించాలని కంపెనీ భావిస్తోంది. డిజైన్,పెర్ఫార్మన్స్ లో ప్రత్యేక గుర్తింపు పొందాయి . ఇటాల్‌జెట్ స్కూటర్ లో 278cc సింగిల్ సిలిండర్, 4-స్ట్రోక్, లిక్విడ్ కూల్డ్ ఇంజన్ ఉంటుంది. ఇది ఎలక్ట్రానిక్ ఫ్యూయల్ ఇంజెక్షన్ టెక్నాలజీతో పనిచేస్తుంది. ఈ ఇంజన్ 8,250rpm @ 23.8hp పవర్‌,టార్క్ 6,250rpm@ 26Nmగా ఉంటుంది . ఇందులో CVT ఆటోమేటిక్ ట్రాన్స్‌మిషన్, బెల్ట్ డ్రైవ్ సిస్టం ఉంటాయి. డిజైన్ విషయానికి వస్తే Dragster 300 ప్రత్యేకమైన ఎక్స్‌పోజ్డ్ ట్యూబులర్ స్టీల్ ట్రెల్లిస్ ఫ్రేమ్‌తో స్పోర్టీ లుక్ కలిగి ఉంటుంది. సాధారణ స్కూటర్లకు భిన్నంగా ఫ్రేమ్, మెకానికల్ పార్ట్స్ బయటకు కనిపించేలా దీన్ని రూపొందించారు. ముందు భాగంలో Independent Steering System టెక్నాలజీని ఉపయోగించారు. ఇందులో సింగిల్ ఆర్మ్, హైడ్రోన్యూమాటిక్ షాక్ అబ్జార్బర్, అడ్జస్టబుల్ స్ప్రింగ్ ఉంటాయి. వెనుకవైపు లింక్ టైప్ మోనోషాక్ సస్పెన్షన్ అందించారు. బ్రేకింగ్ కోసం ముందు 240mm డిస్క్, వెనుక 175mm డిస్క్ బ్రేక్‌లతో పాటు Brembo బ్రేకింగ్ , డ్యూయల్ ఛానల్ ABS అందించారు. ముందు 120/70 R12, వెనుక 140/60 R13 టైర్లు ఉంటాయి. సేఫ్టీతో పాటు రైడింగ్ సౌకర్యాన్ని దృష్టిలో ఉంచుకుని ఈ సిస్టం ను రూపొందించారు. ఇతర ఫీచర్లలో కలర్ TFT ఇన్‌స్ట్రుమెంట్ డిస్‌ప్లే, ఫుల్ LED లైటింగ్, 11 లీటర్ల ఫ్యూయల్ ట్యాంక్, 770mm సీట్ హైట్ ఉన్నాయి.  ఇటాల్‌జెట్ స్కూటర్ మోడల్ లో 449cc ప్యారలల్ ట్విన్ సిలిండర్, లిక్విడ్ కూల్డ్ ఇంజన్ ఉంటుంది. ఇది DOHC టెక్నాలజీతో రూపొందించారు . ఈ ఇంజన్ 9,500rpm @ 47.58hp పవర్‌, 8,000rpm@41Nm టార్క్‌ను ఉత్పత్తి చేస్తుంది. ఇందులో 6-స్పీడ్ గేర్‌బాక్స్‌తో పాటు SmartShift టెక్నాలజీ అందించారు. ఈ ప్రత్యేకమైన సిస్టం ద్వారా ఆటోమేటిక్ గేర్ ఆపరేషన్‌తో పాటు హ్యాండిల్‌బార్‌పై ఉండే ప్యాడిల్ షిఫ్టర్ల సహాయంతో మాన్యువల్ తరహాలో గేర్లు మార్చుకోవచ్చు. దీంతో రైడర్లు తమ అవసరానికి అనుగుణంగా రైడింగ్ విధానాన్ని ఎంచుకోవచ్చు. డిజైన్ పరంగా Dragster 459 ఎక్స్‌పోజ్డ్ స్టీల్ ట్రెల్లిస్ ఫ్రేమ్, అగ్రెసివ్ బాడీ స్టైలింగ్, స్పోర్టీ రైడింగ్ పొజిషన్‌తో ఆకట్టుకుంటుంది. ముందు భాగంలో పూర్తిగా అడ్జస్టబుల్ Marzocchi USD ఫోర్క్, వెనుకవైపు Marzocchi మోనోషాక్ సస్పెన్షన్ అందించారు. ఇందులో 15 ఇంచుల వీల్స్‌తో పాటు Pirelli టైర్లు ఉపయోగించారు. ముందు 120 సెక్షన్, వెనుక 160 సెక్షన్ టైర్లు ఉంటాయి. బ్రేకింగ్ లో ముందు రెండు 270mm డిస్క్ బ్రేకులు, వెనుక 260mm డిస్క్ బ్రేక్ అందించారు. Brembo బ్రేకింగ్ వ్యవస్థతో పాటు డ్యూయల్ ఛానల్ ABS, ట్రాక్షన్ కంట్రోల్ వంటి సేఫ్టీ ఫీచర్లు ఉన్నాయి. ఇవి జారుడు రోడ్లపై, ఆకస్మిక బ్రేకింగ్ సమయంలో స్కూటర్‌పై నియంత్రణను మెరుగుపరచడంలో సహాయపడతాయి. ఇతర ఫీచర్లలో కలర్ TFT డిస్‌ప్లే, LED లైటింగ్, 16 లీటర్ల ఫ్యూయల్ ట్యాంక్, 815mm సీట్ హైట్ ఉన్నాయి. మూడు మోడళ్లలో అత్యంత శక్తివంతమైన స్కూటర్. ఇందులో 698cc ప్యారలల్ ట్విన్ సిలిండర్, లిక్విడ్ కూల్డ్ ఇంజన్ ఉంటుంది. ఇది DOHC టెక్నాలజీతో రూపొందించారు . Autocar India నివేదిక ప్రకారం ఈ ఇంజన్ 70hp పవర్, 70Nm టార్క్‌ను ఉత్పత్తి చేస్తుంది. అయితే Italjet అధికారిక అంతర్జాతీయ టెక్నికల్ షీట్ ప్రకారం 8,000rpm @ 68hp పవర్, 5,500rpm @ 67Nm టార్క్ అందిస్తుంది . ఇందులో 6-స్పీడ్ మాన్యువల్ గేర్‌బాక్స్, వెట్ మల్టీ ప్లేట్ క్లచ్, చైన్ డ్రైవ్ సిస్టం ఉంటాయి. ఇది సాధారణ ఆటోమేటిక్ స్కూటర్లకు భిన్నంగా మోటార్‌సైకిల్ తరహా రైడింగ్ అనుభూతిని అందిస్తుంది. డిజైన్ విషయానికి వస్తే Dragster 700 ఎక్స్‌పోజ్డ్ ట్యూబులర్ స్టీల్ ట్రెల్లిస్ ఫ్రేమ్, అగ్రెసివ్ స్పోర్టీ బాడీవర్క్‌తో ప్రత్యేకంగా కనిపిస్తుంది. ముందు భాగంలో పూర్తిగా అడ్జస్టబుల్ Marzocchi USD ఫోర్క్, వెనుకవైపు Marzocchi అడ్జస్టబుల్ మోనోషాక్ సస్పెన్షన్ అందించారు. వెనుక సస్పెన్షన్‌లో ISAS సిస్టం ను ఉపయోగించారు. ఇందులో ముందు, వెనుక 15 ఇంచుల అల్లాయ్ వీల్స్ ఉంటాయి. Pirelli 120/70 R15 ఫ్రంట్, 160/60 R15 రియర్ టైర్లు అందించారు. బ్రేకింగ్ కోసం ముందు 270mm డ్యూయల్ డిస్క్ బ్రేకులు, వెనుక 260mm సింగిల్ డిస్క్ బ్రేక్ ఉంటాయి. Brembo కాలిపర్లు, డ్యూయల్ ఛానల్ ABS, ట్రాక్షన్ కంట్రోల్ సేఫ్టీ ఫీచర్లుగా ఉన్నాయి. ఇతర ఫీచర్లలో కలర్ TFT ఇన్‌స్ట్రుమెంట్ డిస్‌ప్లే, LED లైటింగ్, 16 లీటర్ల ఫ్యూయల్ ట్యాంక్, 815mm సీట్ హైట్ ఉన్నాయి. అంతర్జాతీయ వెర్షన్ గరిష్ట వేగం గంటకు 190 కిలోమీటర్లుగా పేర్కొన్నారు.

Read More...

వెన్న, నెయ్యి ధరలు పెంచిన అమూల్ : తక్షణమే అమల్లోకి కొత్త ధరలు

ప్రముఖ డెయిరీ ఉత్పత్తుల సంస్థ అమూల్ నెయ్యి, వెన్న ధరలను పెంచింది. దేశవ్యాప్తంగా కొత్త ధరలను ఇప్పటినుంచే అమల్లోకి తీసుకొచ్చింది. అన్నీ రిటైల్ అవుట్‌లెట్లతో పాటు ఆన్‌లైన్ ఫ్లాట్‌ఫామ్స్‌లలో కొత్త ధరలను తక్షణమే అప్డేట్ చేశారు. ఆన్‌లైన్ ఫ్లాట్‌ఫామ్‌లలో ఇప్పటికే ఉత్పత్తి లేబుళ్లను అప్డేట్ చేశారు. దీపావళి సందర్భంగా స్వీట్ల వినియోగం ఎక్కువగా ఉంటుంది. ఒకరికొకరు స్వీట్లు పంచుకుంటూ ఉంటారు. స్వీట్ల తయారీలో నెయ్యి ఎక్కువగా ఉపయోగిస్తుంటారు. ఇప్పుడు అమూల్ తీసుకున్న నిర్ణయతో స్వీట్ల ధరలు పెరగనున్నాయి. కేజీ నెయ్యి కార్టన్ ధర రూ.50 పెంచగా, 500 గ్రాముల వెన్న ప్యాక్ ధర రూ.15 పెరిగింది. దీంతో పెరిగిన ధరలతో కేజీ నెయ్యి కార్టన్ ధర రూ.630 నుంచి రూ.680కి చేరుకుంది. ఇక 500 గ్రామలు స్వచ్చమైన నెయ్యి పౌచ్ ధర రూ.325 నుంచి రూ.345కి పెరిగింది. ఇక 100 గ్రాముల వెన్న క్యాక్ ధర రూ.63 నుంచి రూ.66కి పెరగ్గా.. 500 గ్రామలు ప్యాక్ ధర రూ.310 నుంచి రూ.325కి పెంచినట్లు అమూల్ సంస్థ తెలిపింది. నెయ్యి, వెన్న కొనుగోలు చేసేవారిపై ఇది తీవ్ర ప్రభావం చూపనుంది. పండుగ సమయంలో వివిధ రకాల వంటల్లో నెయ్యి, వెన్న ఉపయోగిస్తుంటారు. ఇప్పుడు వీటి ధరలు పెరగడం సామాన్యులకు చేదువార్తగా చెప్పవచ్చు. పశువుల మేత, ప్యాకేజింగ్ ఖర్చు, ఇంధన ఖర్చుల ధరలు పెరగడమే వీటి ధరలు పెంచడానికి కారణమని అమూల్ చెబుతోంది. ఈ ఏడాది మే నెలలో దేశవ్యాప్తంగా పాల ప్యాకెట్ల ధరలను పెంచింది. లీటర్‌పై రూ.2 చొప్పున పెంచింది. మే 14వ తేదీ నుంచి ఈ కొత్త ధరలు అమల్లోకి వచ్చేశాయి. తాజా, గోల్డ్, శక్తి, ఆవు పాలు ధరలను పెంచింది. గుజరాత్ కోఆపరేటివ్ మిల్క్ మార్కెటింగ్ ఫెడరేషన్ అమూల్ ఉత్పత్తులను విక్రయిస్తోంది. పశువుల మేత, ప్యాకేజింగ్, ఇంధన ఖర్చులు పెరగడం వల్ల ధరలను పెంచుతున్నట్లు చెబుతోంది. ఇక పాల రైతులకు చెల్లించే సేవకరణ ధరల్లో కూడా మార్పుల చేసింది. లీటర్‌కు 2.5 శాతం నుంచి 3.50 శాతానికి పెంచింది. అటు ఎల్‌నివో ప్రభావం కూడా పాల ఉత్పత్తుల ధరలు పెరగడానికి కారణంగా చెబుతోంది. 

Read More...

కాక్రోచ్ నేతలకు అమెరికా నిధులు, అశుతోష్ రాంకాకు పాకిస్తాన్ తో సంబంధాలు : కేంద్ర హోంశాఖ సహాయ మంత్రి జితేంద్ర సింగ్ ఆరోపణలు

నీట్ అక్రమాలపై, ఎన్నికల కమిషన్ అక్రమాలపై పలు ఉద్యమాలు చేసిన కాక్రోచ్ జనతా పార్టీ నేతలపై ఇవాళ కేంద్రం సంచలన ఆరోపణలు చేసింది. సీజేపీ జాతీయ కన్వీనర్ అభిజీత్ దిప్కేతో పాటు మరో నేత అశుతోష్ రాంకాను టార్గెట్ చేసుకుని కేంద్ర హోంశాఖ సహాయ మంత్రి జితేంద్ర సింగ్ ఈ ఆరోపణలు చేశారు. వీరిలో అభిజీత్ దిప్కేకు అమెరికా నుంచి నిధులు అందుతున్నాయని, అశుతోష్ రాంకాకు పాకిస్తాన్ తో సంబంధాలు ఉన్నాయని ఆరోపించారు. అనధికారిక వనరుల నుండి, దేశంలోని, దేశం వెలుపల ఉన్న భారత్ వ్యతిరేక ఎన్జీవోలు, భారత్ వ్యతిరేక సంస్థల నుండి వారికి నిధులు అందుతున్నాయని చూపించడానికి తగినన్ని సాక్ష్యాలు ఉన్నాయని జితేంద్ర సింగ్ ఆరోపించారు. విదేశీ నిధులతో నడిచే ఎన్జీవోలు, డీప్ స్టేట్ ఆపరేటివ్‌లు, భారత్ వ్యతిరేక శక్తులు వీళ్లను నడిపిస్తున్నాయని ఆయన తెలిపారు. అభిజీత్ దిప్కేకు అమెరికాలో ఉన్న దాతల నుండి నిధులు అందుతున్నాయని ఆయన ఆరోపించారు. అలాగే అశుతోష్ రాంకాకు పాకిస్థానీ రాజకీయ నాయకుల నుండి డబ్బులు అందాయని పేర్కొన్నారు. కేంద్రమంత్రి జితేంద్ర సింగ్ వ్యాఖ్యలపై సీజేపీ తీవ్రంగా స్పందించింది. ఆయన ఆరోపణలను తిరస్కరించడమే కాకుండా, ఉన్నత రాజ్యాంగ, రాజకీయ పదవులలో ఉన్నవారు చేసే ప్రకటనల విశ్వసనీయతను కూడా ప్రశ్నించింది. ఇదే సిగ్గుచేటైన వాస్తవమని ట్వీట్ చేసింది. ఒక కేంద్ర మంత్రి ఏమైనా మాట్లాడవచ్చు, ఎటువంటి పరిణామాలు లేకుండా తప్పించుకోగలడని తెలిపింది.అందుకే, అత్యున్నత పదవుల్లో ఉన్న వ్యక్తులు పలికే మాటలకు కూడా ఇవాళ ఏమాత్రం విలువ లేదని సీజేపీ వ్యాఖ్యానించింది. తనకు పాకిస్తాన్ రాజకీయ నేతల నుంచి నిధులు అందుతున్నట్లు కేంద్రమంత్రి చేసిన ఆరోపణలపై అశుతోష్ రాంకా వ్యంగంగా స్పందించారు. పేపర్ లీక్ చేసింది, స్కూళ్లు నాశనం చేసింది, ఓట్ల చోరీ చేసిందీ, నిరుద్యోగుల్ని తయారు చేసిందీ పాకిస్తానే అంటూ ట్వీట్ చేశారు.

Read More...

భూ ఆక్రమణ కేసులో లేడీ డాన్ కోనేటి సులోచన సహా ముగ్గురి అరెస్ట్

ఆంధ్రప్రదేశ్‌లోని అన్నమయ్య జిల్లా మదనపల్లెలో నకిలీ పత్రాలు సృష్టించి విలువైన భూమిని కబ్జా చేశారనే ఆరోపణలపై రౌడీషీటర్ కోనేటి సులోచన సహా ముగ్గురిని పోలీసులు అరెస్ట్ చేశారు. పీటీ వారెంట్‌పై వారిని అదుపులోకి తీసుకుని కోర్టులో హాజరుపరిచారు. అనంతరం న్యాయస్థానం ఆదేశాల మేరకు రిమాండ్‌కు తరలించారు. ఈ కేసులో మరో ఎనిమిది మంది పరారీలో ఉన్నట్లు పోలీసులు వెల్లడించారు. పోలీసులు వెల్లడించిన వివరాల ప్రకారం.. మదనపల్లెకు చెందిన మార్పూరి శ్రీరామ్‌కు సంబంధించిన భూమిని ఆయన పెద్దనాన్న కుమారుడు మార్పూరి వెంకటేష్ 2023లోనే రాసిచ్చినట్లు నకిలీ పత్రాలు సృష్టించినట్లు ఆరోపణలు ఉన్నాయి. అనంతరం వైఎస్సార్ కడప జిల్లా పులివెందుల సబ్ రిజిస్ట్రార్ కార్యాలయంలో ఆ పత్రాల ఆధారంగా అక్రమంగా రిజిస్ట్రేషన్ చేయించినట్లు తెలుస్తోంది. ఆ తర్వాత నిందితులు సదరు భూమిలోకి ప్రవేశించి, అక్కడి ఆస్తులను ధ్వంసం చేసి స్థలాన్ని తమ ఆధీనంలోకి తీసుకున్నారని బాధితుడు పోలీసులకు ఫిర్యాదు చేశారు. ఈ ఫిర్యాదు ఆధారంగా పోలీసులు కేసు నమోదు చేసి దర్యాప్తు చేపట్టారు. ఈ వ్యవహారంలో ఇప్పటికే ఇతర కేసులకు సంబంధించి మదనపల్లె సబ్‌జైలులో ఉన్న నిందితులపై పోలీసులు పీటీ వారెంట్ జారీ చేశారు. దీంతో రౌడీషీటర్ కోనేటి సులోచన, ఆమె అనుచరుడు గుండిగల మోహన్, రియల్టర్ కడియాల శ్రీరాములునాయుడును పోలీసులు అదుపులోకి తీసుకున్నారు. అనంతరం కోర్టులో హాజరుపరిచి రిమాండ్‌కు తరలించారు. మదనపల్లె టూటౌన్ ఎస్ఐ నాగేశ్వర్‌రావు ఈ కేసుకు సంబంధించిన వివరాలను వెల్లడించారు. భూ ఆక్రమణ వ్యవహారంలో మరో ఎనిమిది మంది ప్రమేయం ఉన్నట్లు గుర్తించామని, ప్రస్తుతం వారు పరారీలో ఉన్నారని తెలిపారు. వారి కోసం గాలింపు కొనసాగుతోందని, త్వరలోనే పట్టుకుంటామని పేర్కొన్నారు. ఈ కేసులో ప్రధాన నిందితులుగా పేర్కొంటున్న కోనేటి సులోచన, కడియాల శ్రీరాములునాయుడులపై గతంలోనూ పలు క్రిమినల్, భూ ఆక్రమణ కేసులు నమోదైనట్లు పోలీసులు వెల్లడించారు. ఈ తాజా అరెస్టులతో మదనపల్లెలో భూ ఆక్రమణ వ్యవహారం మరోసారి చర్చనీయాంశంగా మారింది.

Read More...