అక్టోబర్ 21 నుంచి 23 వరకు జియో ప్లాట్‌ఫామ్స్ ఐపీవో : మీడియా సమావేశంలో ఆసక్తికర విషయాలు పంచుకున్న ఇషా అంబానీ

జియో ప్లాట్‌ఫామ్స్ తన తొలి పబ్లిక్ ఆఫరింగ్ కోసం రెడ్ హెరింగ్ ప్రాస్పెక్టస్ దాఖలు చేసిన అనంతరం నిర్వహించిన మీడియా సమావేశంలో ఇషా అంబానీ మాట్లాడుతూ దేశీయ స్టాక్ మార్కెట్ చరిత్రలోనే అతిపెద్ద పబ్లిక్ ఇష్యూగా నిలవనున్న జియో ప్లాట్‌ఫామ్స్ ఐపీవో, కేవలం పెట్టుబడుల సమీకరణ మాత్రమే కాదని, భారతదేశ డిజిటల్ పరివర్తనలో సామాన్య ప్రజలను నేరుగా భాగస్వాములను చేసే సరికొత్త ప్రయాణమని స్పష్టం చేశారు. ఆకాష్, నేను అమెరికాలో చదువుకుంటున్న రోజుల్లో సెలవుల కోసం ముంబైలోని ఇంటికి వచ్చాం. ఆ సమయంలో నేను ఒక కాలేజ్ అసైన్‌మెంట్‌ను ఆన్‌లైన్‌లో సబ్మిట్ చేయడానికి ప్రయత్నిస్తే, ఇంటర్నెట్ సరిగ్గా లేకపోవడంతో సబ్మిట్ చేయలేకపోయాను. పశ్చిమ దేశాల్లో లభించే అత్యుత్తమ ఇంటర్నెట్ కనెక్టివిటీ మన భారతదేశంలో ఎందుకు లభించకూడదు? అనే ప్రశ్న ఆ క్షణంలో మా ఇద్దరిలో తలెత్తింది. భారతీయ వినియోగదారుల కనెక్టివిటీ అవసరాలను తీర్చేందుకు ఒక డిజిటల్ టెక్నాలజీ ప్లాట్‌ఫామ్‌ను ఏర్పాటు చేయడమే సరైన పరిష్కారమని ఆకాష్ అంబానీ బలంగా నమ్మారని ఆమె పేర్కొన్నారు. ఆ విధంగా, కాలేజ్ అసైన్‌మెంట్ సబ్మిట్ చేయడంలో ఎదురైన చిన్న సాంకేతిక అంతరాయమే దేశంలో టెలికాం విప్లవానికి నాంది పలికి, రిలయన్స్ జియో ఏర్పాటుకు బలమైన పునాది వేసిందని ఆమె వెల్లడించారు. ఈ ఆలోచనల ఫలితంగానే సెప్టెంబర్ 2016లో రిలయన్స్ జియో వాణిజ్య సేవలను ప్రారంభించింది. ఉచిత వాయిస్ కాల్స్, అత్యంత చౌకైన డేటా సేవలతో భారత టెలికాం మార్కెట్‌లోకి అడుగుపెట్టిన జియో, దేశవ్యాప్తంగా మొబైల్ ఇంటర్నెట్ వినియోగాన్ని అనూహ్య స్థాయికి చేర్చింది. దాదాపు దశాబ్దం తర్వాత రిలయన్స్ ఇండస్ట్రీస్ అనుబంధ విభాగమైన జియో ప్లాట్‌ఫామ్స్ పబ్లిక్ మార్కెట్లలో లిస్టింగ్‌కు సిద్ధమైంది. ఒక్కో షేరు ధర శ్రేణి రూ. 1,065 నుంచి రూ. 1,119గా నిర్ణయించారు. యాంకర్ ఇన్వెస్టర్ల బిడ్డింగ్ అక్టోబర్ 19న ప్రారంభం కానుండగా, సాధారణ ఇన్వెస్టర్లకు అక్టోబర్ 21న అందుబాటులోకి వచ్చి, అక్టోబర్ 23న ముగియనుంది. సుమారు 27 కోట్ల సరికొత్త ఈక్విటీ షేర్లను జారీ చేయడం ద్వారా దాదాపు రూ. 30,213 కోట్లు సమీకరించాలని కంపెనీ లక్ష్యంగా పెట్టుకుంది. సమీకరించిన నిధులలో కొంత భాగాన్ని అనుబంధ సంస్థ రిలయన్స్ జియో ఇన్ఫోకామ్ రుణాల చెల్లింపునకు, మిగిలిన మొత్తాన్ని సాధారణ కార్పొరేట్ అవసరాలకు వినియోగించనున్నారు.ఈ ఐపీవో ప్రణాళికను రిలయన్స్ తమ 2025 ఏజీఎంలో ప్రకటించగా, జూన్ 19, 2026న ముసాయిదా పత్రాలను సమర్పించింది. అనంతరం ఆగస్టు 28న మార్కెట్ నియంత్రణ సంస్థ సెబీ (SEBI) నుంచి తుది అనుమతి పొందింది. వ్యాపార విస్తరణలో రిలయన్స్ గ్రూప్ అనుసరించే మూడు ప్రాథమిక సూత్రాలను ఈ సందర్భంగా ఇషా అంబానీ వివరించారు. స్వల్పకాలిక ప్రయోజనాల కంటే దశాబ్దాల కాలాన్ని దృష్టిలో పెట్టుకుని వ్యూహాత్మక నిర్ణయాలు తీసుకోవడం. సంబంధిత పరిశ్రమ ముఖచిత్రాన్నే మార్చగల భారీ స్థాయి కార్యాచరణను రూపొందించడం.  రూపొందించుకున్న ప్రణాళికలను ఎక్కడా లోపాలు లేకుండా క్షేత్రస్థాయిలో సమర్థవంతంగా అమలు చేయడం.

'సర్‌' అమలు తీరుపై అమెరికా కాంగ్రెస్ సభ్యురాలు ప్రమిలా జయ్‌పాల్ తీవ్ర ఆందోళన

దేశంలో ఓటరు జాబితాల ప్రత్యేక సమగ్ర సవరణ పై అమెరికా కాంగ్రెస్ సభ్యురాలు, భారత సంతతికి చెందిన ప్రమిలా జయ్‌పాల్ తీవ్ర ఆందోళన వ్యక్తం చేశారు. సర్ ప్రక్రియ ద్వారా డ్రాఫ్ట్ ఓటర్ల జాబితా నుండి దాదాపు 13 కోట్ల మంది (130 మిలియన్లు) ఓటర్ల పేర్లను తొలగించడంపై ఆమె ఆందోళన వ్యక్తం చేశారు. ప్రపంచంలోనే అతి పెద్ద ప్రజాస్వామ్య దేశంగా వెలుగొందుతున్న ఇండియాలో గంప గుత్తగా ఇంత పెద్ద మొత్తంలో పేర్లను తొలగించడాన్ని ప్రమిలా జయ్‌పాల్ "ప్రజాస్వామ్య వ్యతిరేక ప్రయత్నం"గా అభివర్ణించారు. అంతేకాదు అమెరికాలో ఓటర్ల హక్కులను కాలరాయడానికి గతంలో యూఎస్ ప్రెసిడెంట్ డోనాల్డ్‌ ట్రంప్ యంత్రాంగం అనుసరించిన వ్యూహాల తరహాలోనే ప్రస్తుతం భారతదేశంలో కూడా జరుగుతోందని ఆమె సోషల్ మీడియా వేదికగా విమర్శించారు. ప్రజాస్వామ్య వాదులు ఇలాంటి చర్యలను హర్షించబోరన్నారు. 'సర్‌స ప్రక్రియకు వ్యతిరేకంగా ఓటర్ల తొలగింపును నిరసిస్తూ ఢిల్లీ, ముంబై సహా భారతదేశంలోని వివిధ ప్రాంతాలలో జరుగుతున్న శాంతియుత నిరసన ప్రదర్శనలకు ఆమె తన పూర్తి మద్దతును ప్రకటించారు. ప్రజాస్వామ్యానికి ఓటు హక్కు పునాది అని, ప్రజాస్వామ్య పరిరక్షణ కోసం శాంతియుతంగా చేపట్టి ఎలాంటి చర్యలకైనా మద్దతు ప్రకటించాలని ఆమె పిలుపునిచ్చారు. కాగా, సర్‌పై దేశవ్యాప్తంగా ప్రతిపక్షాలు ఆందోళనలు చేపట్టాయి. సీఈసీ జ్ఞానేష్ కుమార్ రాజీనామా చేయాలని డిమాండ్ చేస్తున్న తరుణంలో ప్రమిలా జయ్‌పాల్ వ్యాఖ్యలు ప్రాధాన్యం సంతరించుకున్నాయి.

భారీ లాభాలతో ముగిసిన మార్కెట్లు : సెన్సెక్స్ 1,533 పాయింట్లు, నిఫ్టీ 374 పాయింట్లు పెరుగుదల

దేశీయ స్టాక్ మార్కెట్లకు ట్రేడింగ్‌లో కొనుగోళ్ల మద్దతు బలంగా లభించడంతో సూచీలు భారీ లాభాలతో ట్రేడింగ్‌ను ముగించాయి. కార్పొరేట్ షేర్లలో సానుకూల ధోరణి కనిపించడంతో పాటు, అంతర్జాతీయ మార్కెట్ల నుంచి వచ్చిన అనుకూల సంకేతాలు మన మార్కెట్లకు కొండంత బలాన్నిచ్చాయి. ఈ ట్రేడింగ్ సెషన్‌లో ప్రధాన సూచీలు దూసుకెళ్లాయి. బాంబే స్టాక్ ఎక్స్ఛేంజ్ సూచీ సెన్సెక్స్ ఏకంగా 1,533 పాయింట్లు ఎగబాకి 74,315 వద్ద ముగించింది. మరోవైపు నేషనల్ స్టాక్ ఎక్స్ఛేంజ్ సూచీ నిఫ్టీ కూడా 374 పాయింట్లు బలపడి 22,997 స్థాయి వద్ద స్థిరపడింది. ఈ ఊహించని భారీ లాభాలు దేశీయ మదుపర్లలో సరికొత్త ఆశాభావాన్ని, ఉత్సాహాన్ని నింపాయి.

అదుపుతప్పి కారు బోల్తా : ఇద్దరికి తీవ్ర గాయాలు

ఆంధ్రప్రదేశ్ లోని మార్కాపురం జిల్లా పొదిలి మండలంలోని ఉప్పలపాడు గ్రామం వద్ద కారు అదుపుతప్పి బోల్తా పడిన ఘటనలో ఇద్దరు వ్యక్తులు గాయపడ్డారు. సమాచారం మేరకు పొదిలికి చెందిన వెంకట్రామిరెడ్డి (బొర్ల), జాని కారులో ప్రయాణిస్తుండగా ఉప్పలపాడు గ్రామం వద్ద కారు అదుపుతప్పి బోల్తా పడింది. ఈ ప్రమాదంలో కారులో ఉన్న ఇద్దరికీ గాయాలయ్యాయి. ప్రమాదం జరిగిన వెంటనే స్పందించిన స్థానికులు క్షతగాత్రులకు సహాయం అందించేందుకు ముందుకు వచ్చారు. సమాచారం అందుకున్న 108 అత్యవసర వైద్య సేవల సిబ్బంది సంఘటనా స్థలానికి చేరుకుని క్షతగాత్రులకు వైద్య సహాయం అందించారు. అనంతరం వారిని 108 వాహనంలో పొదిలి ప్రభుత్వ వైద్యశాలకు తరలించారు. అక్కడ వైద్యులు వారికి చికిత్స అందించినట్లు సమాచారం.

మహీంద్రా XUV 3XO సీఎన్‌జీ విడుదల

దేశీయ మార్కెట్లో మహీంద్రా అండ్ మహీంద్రా ఎక్స్‌యూవీ 3ఎక్స్ఓ సీఎన్‌జీని లాంచ్ చేసింది. దీని ధర రూ.9.99 లక్షలు (ఎక్స్ షోరూమ్). ఇప్పటికే పెట్రోల్, డీజిల్, ఎలక్ట్రిక్ వెర్షన్లలలో అందుబాటులో ఉండే ఎక్స్‌యూవీ 3ఎక్స్ఓ సీఎన్‌జీ రూపంలో కూడా అందుబాటులోకి వచ్చింది. మహీంద్రా ఎక్స్‌యూవీ 3ఎక్స్ఓ సీఎన్‌జీ.. 1.2 లీటర్ టర్బోచార్జ్డ్ ఎంపీఎఫ్ఐ పెట్రోల్ ఇంజిన్‌ పొందుతుంది. ఇది 114 హార్స్ పవర్, 200 న్యూటన్ మీటర్ టార్క్ అందిస్తుంది. ఇది సీఎన్‌జీ మోడ్‌లో 24.7 కి.మీ/కేజీ మైలేజ్ అందిస్తుంది. 0-60 కి.మీ/గం వేగాన్ని సుమారు 4.9 సెకన్లలో.. 0-100 కి.మీ/గం వేగాన్ని 11.8 సెకన్లలో అందుకుంటుందని సంస్థ వెల్లడించింది. సేఫ్టీ ఫీచర్ల జాబితాలో ఆరు ఎయిర్‌బ్యాగ్‌లు, అన్ని సీట్లకు సీట్‌బెల్ట్ రిమైండర్‌లు, నాలుగు డిస్క్ బ్రేక్‌లు, పటిష్టమైన ఛాసిస్ ఉన్నాయి. 

పినరయి విజయన్‌పై విజిలెన్స్ఎఫ్‌ఐఆర్ పై అపీల్‌ను కొట్టేసిన కేరళ హైకోర్టు

కేరళ మాజీ సీఎం పినరయి విజయన్, ఆయన కుమార్తె వీణ, అల్లుడు మహమ్మద్ రియాస్‌లకు కేరళ హైకోర్టులో భారీ ఎదురుదెబ్బ తగిలింది. సీఎంఆర్‌ఎల్ - ఎక్సాలాజిక్' నెలవారీ లంచాల వ్యవహారంలో విజిల్స్ ఎఫ్‌ఐఆర్ నమోదు, సమగ్ర విచారణకు ఆదేశిస్తూ సింగిల్ జడ్జి ఇచ్చిన తీర్పును సవాలు చేసేందుకు అనుమతించాలని వారు దాఖలు చేసిన పిటిషన్లను హైకోర్టు డివిజన్ బెంచ్ ఇవాళ కొట్టివేసింది. జస్టిస్ కె.నటరాజన్, జస్టిస్ జాన్సన్ జాన్‌లతో కూడిన డివిజన్ బెంచ్ పినరయి విజయన్ కుటుంబం వేసిన దాఖలాలను తిరస్కరిస్తూ, అవినీతి నిరోధక చట్టం కింద విచారణకు ఉద్దేశించిన ఉత్తర్వులను సమర్థించింది. కాగా, ప్రైవేట్ మినరల్ సంస్థ అయిన కొచ్చిన్ మినరల్స్ అండ్ రుటైల్ లిమిటెడ్, ఎక్సాలాజిక్ సొల్యూషన్స్ మధ్య అక్రమ ఆర్థిక లావాదేవీలు, చెల్లింపులు జరిగాయనే ఆరోపణలు అప్పట్లో రాష్ట్రాన్ని షేక్ చేశాయి. విజిల్స్ అండ్ యాంటీ కరప్షన్ బ్యూరో ఈ కేసులో తదుపరి విచారణ జరిపేందుకు లైన్ క్లియర్ కావడంతో, సీనియర్ రాజకీయ నాయకులు, ప్రముఖులపై కోర్టు పర్యవేక్షణలో చట్టపరమైన విచారణ వేగవంతం కానుంది.

సింగరేణి ప్రతిష్ఠ దెబ్బతిసే విధంగా కేటీఆర్ వాఖ్యలు ఉన్నాయి : సింగరేణిని బీఆర్‌ఎస్ ఏటీఎంలా వాడుకుంది : మంత్రి శ్రీధర్ బాబు

తెలంగాణ ఐటీ మంత్రి శ్రీధర్ బాబు ఈరోజు మీడియాతో మాట్లాడుతూ బీఆర్‌ఎస్ వర్కింగ్ ప్రెసిడెంట్ కేటీఆర్‌పై తీవ్రస్థాయిలో విరుచుకుపడ్డారు. కేటీఆర్‌కు 12 ఏళ్ల తర్వాత సింగరేణి గుర్తుకు వచ్చిందా అని ప్రశ్నించారు. సింగరేణిని బీఆర్‌ఎస్ పార్టీ ఏటీఎంలా వాడుకుందని, సింగరేణి ప్రతిష్ఠ దెబ్బతిసే విధంగా కేటీఆర్ వాఖ్యలు ఉన్నాయని మండిపడ్డారు. కాంగ్రెస్ ప్రభుత్వం వచ్చాక సింగరేణి టెండర్లు పారదర్శకంగా జరుగుతున్నాయని, అందుకే కొన్ని శక్తులు అసత్య ఆరోపణలు చేస్తున్నారని అన్నారు. సింగరేణికి బీఆర్ఎస్ ప్రభుత్వం వేల కోట్ల బకాయిలు పెట్టిందని తెలిపారు. సింగరేణి సంస్థను గత పదేళ్లు నడిపింది కేటీఆర్ కుటుంబ సభ్యులు కాదా అని నిలదీశారు.  బీఆర్‌ఎస్ విధానాల వల్లే సింగరేణిలో ఉత్పత్తి తగ్గిందని మంత్రి విమర్శించారు. సింగరేణి కార్మికులకు గత పదేళ్లలో ఇచ్చిన హామీలు ఎన్ని నెరవేర్చారో చెప్పాలని డిమాండ్ చేశారు. సింగరేణిని ప్రైవేటీకరణ చేయాలని బీఆర్ఎస్ చూసిందన్నారు. తాడిచర్ల బ్లాక్‌ను ప్రైవేటు సంస్థకు ఇచ్చింది గత బీఆర్ఎస్ ప్రభుత్వమన్నారు. సింగరేణిని ప్రైవేటుపరం చేసే ప్రసక్తే లేదని స్పష్టం చేస్తూ ఎవరైనా చేస్తా అంటే ఊరుకోమని హెచ్చరించారు. సింగరేణి బోగ్గు నాణ్యతకు అనుగుణంగా గత ప్రభుత్వం నిర్ణయం తీసుకోలేదన్నారు. జీ9 బోగ్గును సింగరేణి సరఫరా చేస్తుందని శ్రీధర్ బాబు అన్నారు. కేటీఆర్ వాస్తవాలు తెలుసుకుని మాట్లాడాలని హితవుపలికారు. యాదాద్రి థర్మల్ పవర్‌కు ప్రతీ సంవత్సరం 14 మిలియన్ బొగ్గు అవసరమని.. దానికి అనుగుణంగా బీఆర్ఎస్ ప్రభుత్వం బొగ్గు ఉత్పత్తి ఎందుకు పెంచలేదని నిలదీశారు. కొత్త గనులపై ఎందుకు దృష్టి సారించలేదన్నారు. ఇప్పుడు అదే సమస్యగా మారి యాదాద్రి థర్మల్ ప్లాంట్‌కు ఇబ్బందిగా మారిందని, తమ ప్రభుత్వం వచ్చాక నైనీ కోల్ బ్లాక్ నుంచి యాదాద్రి ప్లాంట్‌కు బొగ్గు సరఫరా చేస్తున్నామన్నారు. బొగ్గు ఉత్పత్తి నుంచి సరఫరా వరకు సాంకేతిక పర్యావేక్షణ ఉందని తెలిపారు. బొగ్గు మాయం అనేది కేవలం రాజకీయ ఆరోపణే అని మంత్రి తెలిపారు. బీఆర్ఎస్ ప్రభుత్వం అమలు చేసిన టెండర్ల విధానమే ఇప్పుడు అమలు చేస్తున్నామని చెప్పారు. అప్పుడు తప్పు కానిది ఇప్పుడు ఎలా అవుతుందని ప్రశ్నించారు. గత పదేళ్లు సింగరేణి కాంట్రాక్టులన్నీ బీఆర్ఎస్ నేతల అనుచరులకే కట్టబెట్టారని, కళ్లున్నా చూడలేని కబోధిలా కేటీఆర్ మారారంటూ ఆగ్రహం వ్యక్తం చేశారు. కాంట్రాక్టు ఉద్యోగులే లేరని కేసీఆర్ ప్రకటించారని, కానీ కాంగ్రెస్ ప్రభుత్వం వచ్చాక కాంట్రాక్టు ఉద్యోగులకు దసరా బోనస్ ఇస్తున్నామని మంత్రి శ్రీధర్ బాబు పేర్కొన్నారు.

పాఠశాల పై కప్పుకూలి ఉపాధ్యాయురాలుతో సహా 28 మంది విద్యార్థులు దుర్మరణం

పాకిస్థాన్‌‍లోని పెషావర్‌లో ఓ ప్రైవేట్ పాఠశాల పైకప్పు కూలి 29 మంది ప్రాణాలు కోల్పోయారు. మృతుల్లో అత్యధికులు 13 ఏళ్లలోపు చిన్నారులు ఉండటం గమనార్హం. ఈరోజు ఉదయం తరగతులు జరుగుతుండగా పాఠశాల భవనం పైకప్పు ఒక్కసారిగా కూలిపోయింది. సమాచారం అందుకున్న సహాయక బృందాలు వెంటనే ఘటనా స్థలానికి చేరుకుని సహాయక చర్యలు చేపట్టాయి. ఈ దుర్ఘటనలో 28 మంది విద్యార్థులు, ఓ ఉపాధ్యాయురాలు మరణించినట్లు స్థానిక అధికారులు వెల్లడించారు. మరో 40 మందికిపైగా గాయపడ్డారు. మృతుల సంఖ్య మరింత పెరిగే అవకాశం ఉంది. ప్రమాదం నేపథ్యంలో పాఠశాల యజమానిని పోలీసులు అరెస్టు చేశారు. ఘటనపై పాకిస్థాన్‌ ప్రధాని షెహబాజ్‌ షరీఫ్‌ తీవ్ర దిగ్భ్రాంతి వ్యక్తం చేశారు. ఈ దుర్ఘటనపై పూర్తిస్థాయి విచారణకు ఆదేశించారు.

నవంబర్ లో నేపాల్ ప్రధాని బలేంద్ర షా భారత్‌లో పర్యటన

నవంబర్ లో నేపాల్ ప్రధాని బలేంద్ర షా భారత్‌లో పర్యటించడానికి ఏర్పాట్లు చేసుకుంటున్నారు. ఆయన ప్రధానిగా మార్చిలో బాధ్యతలు చేపట్టిన దాదాపు ఎనిమిది నెలల తర్వాత ఈ పర్యటన జరుగుతుండటం విశేషం. నవంబర్ మూడో లేదా నాలుగో వారంలో జరగబోయే ఈ మూడు రోజుల పర్యటనే ప్రధానిగా ఆయనకు మొదటి అధికారిక విదేశీ ద్వైపాక్షిక పర్యటన కానుంది. అంతకుముందు సెప్టెంబర్‌లో ఆయన ఐక్యరాజ్యసమితి సర్వసభ్య సమావేశాల కోసం అమెరికా వెళ్లినప్పటికీ అది ద్వైపాక్షిక పర్యటన కాదు. అక్కడ మాట్లాడిన ఆయన, లొసుగులతో కూడిన వ్యవస్థల వల్ల నేపాల్, బంగ్లాదేశ్, భారత్ వంటి దక్షిణాసియా దేశాలకు ఎలాంటి ముప్పు పొంచి ఉందో నొక్కిచెప్పారు. ది ఖాట్మండు పోస్ట్ కథనం ప్రకారం.. బలేన్ షా భారత పర్యటనలో భారీ ఎజెండా ఉండబోతోంది. కీలక ఇన్‌ఫ్రాస్ట్రక్చర్ ప్రాజెక్టులు, సరిహద్దు వివాదాల నుంచి వరద పునరుద్ధరణ పనుల వరకు అనేక అంశాలు చర్చకు రానున్నాయి. ప్రారంభంలో విదేశీ దౌత్యవేత్తలను, ముఖ్యంగా భారత్, చైనా ప్రతినిధులను కలవడానికి పెద్దగా ఆసక్తి చూపని బలేన్ షా, ఇప్పుడు భారత్‌కు రానుండటం ప్రాధాన్యం సంతరించుకుంది. పైగా ఆగస్టులో నేపాల్‌లో వచ్చిన భయంకరమైన వరదల సమయంలో భారత్ తక్షణమే స్పందించి సహాయ సామాగ్రిని, రెస్క్యూ నిపుణులను పంపింది. ప్రస్తుతం పర్యటనకు సంబంధించిన సన్నాహాలు జరుగుతున్నప్పటికీ, ఖాట్మండు గానీ, న్యూఢిల్లీ గానీ పర్యటన తేదీలను అధికారికంగా ఇంకా ప్రకటించలేదు. అక్టోబర్ 15న ది ఖాట్మండు పోస్ట్ ఇచ్చిన నివేదిక ప్రకారం, ఈ పర్యటన సమయంలో ప్రారంభించదగిన లేదా శంకుస్థాపన చేయదగిన ప్రాజెక్టుల జాబితాలను ఇరుదేశాల అధికారులు ఇప్పటికే మార్పిడి చేసుకున్నారు. బలేన్ షా భారత ప్రధాని నరేంద్ర మోడీతో ద్వైపాక్షిక చర్చలు జరపడంతో పాటు పలువురు కేంద్ర మంత్రులను కూడా కలవనున్నారు. కొన్ని ఒప్పందాలు, అవగాహన ఒప్పందాలపై చర్చలు సాగుతున్నాయని తెలుస్తోంది. కాట్మండుకు ఆగ్నేయంలో ఉన్న పనౌతీలో భారత్ నిధులతో నిర్మించిన ‘నేపాల్ పోలీస్ అకాడమీ’, ఉత్తరప్రదేశ్ సరిహద్దులోని సునౌలీ దగ్గర ఉన్న భైరహవా ఇంటిగ్రేటెడ్ చెక్ పోస్ట్ (దీనికి జూన్ 2023లో శంకుస్థాపన జరిగింది), దార్చులా జిల్లాలోని వారధులు, అలాగే మహాకాళి నదిపై వంతెనల ప్రారంభోత్సవాలు ఈ పర్యటనలో ఉండే అవకాశముంది. వీటితో పాటు దొధారా చాందని ఇంటిగ్రేటెడ్ చెక్ పోస్ట్, లోయర్ అరుణ్ హైడ్రోపవర్ ప్రాజెక్ట్, సిలిగురి-ఝాపా పెట్రోలియం పైప్‌లైన్ నిర్మాణ పనులకు ప్రధానులిద్దరూ శ్రీకారం చుట్టే అవకాశముంది.

రిటైర్డ్ కస్టమ్స్ అధికారిని కాల్చి చంపిన దుండగులు : భూ వివాదమే ఈ హత్యకు కారణమై ఉండవచ్చన్న పోలీసులు

బీహార్‌లోని భోజ్‌పూర్ జిల్లాలో కస్టమ్స్ శాఖకు చెందిన ఒక రిటైర్డ్ అధికారిని ఆయన కుమారుడి కళ్లముందే దుండగులు కాల్చి చంపారు. ఈ ఘటన ఆయన ఇంటి గేటు వద్ద జరిగింది. దాడి చేసిన వారు ఎవరనేది ఇంకా తెలియరాలేదు. కస్టమ్స్ శాఖలో అసిస్టెంట్ కమిషనర్‌గా పనిచేసిన 67 ఏళ్ల రామ్ కుమార్ సింగ్‌ పై దుండగులు ఎనిమిది రౌండ్లు కాల్చారు. ఆయన 2015లో ఉద్యోగ విరమణ చేశారు. ఘటన జరిగిన సమయంలో ఆయన తన కుమారుడు రాజేష్ కుమార్‌తో కలిసి ఉదయపు నడకకు బయలుదేరుతుండగా, దుండగులు అడ్డుకుని ఆయనను హతమార్చారు. ఈ ఘటన అర్రా నగరవాసులను తీవ్ర దిగ్భ్రాంతికి గురిచేసింది. కాల్పుల అనంతరం సింగ్‌ను ఆసుపత్రికి తరలించగా, అప్పటికే ఆయన మరణించినట్లు వైద్యులు ధృవీకరించారు. సింగ్ ప్రతిరోజూ ఉదయం తన కుమారుడితో కలిసి సమీపంలోని మైదానానికి నడక కోసం వెళ్లేవారు. గురువారం ఉదయం, ఆయన నడకకు వెళ్లేందుకు ఇంటి గేటును మూసివేస్తుండగా, ఆయన కుమారుడు కారులో ఉన్నారు. అకస్మాత్తుగా వెనుక నుంచి వచ్చిన ముగ్గురు సాయుధ వ్యక్తులు ఆయనపై కాల్పులు జరిపి, ఆ తర్వాత అక్కడి నుంచి పారిపోయారు. భూ వివాదమే ఈ హత్యకు కారణమై ఉండవచ్చని పోలీసులు అనుమానిస్తున్నారు. పదవీ విరమణ పొందిన సదరు అధికారి తన కుమారుడు రాజేష్ కుమార్ పేరు మీద 13 కథాల (భూమి కొలత ప్రమాణం) భూమిని కొనుగోలు చేశారు. కొందరు వ్యక్తులు ఆ భూమిని ఆక్రమించుకోవడానికి ప్రయత్నించడంతో, సింగ్ పోలీసులకు ఫిర్యాదు చేశారు. ఈ భూ వివాదం కారణంగా తన తండ్రికి గతంలోనే బెదిరింపులు వచ్చాయని, గతంలో ఆయనపై దాడి కూడా జరిగిందని రాజేష్ కుమార్ తెలిపారు. హత్యకు గురైన అధికారి భార్య సుశాలి దేవి మాట్లాడుతూ, కొందరు వ్యక్తులు తమ భూమిని కాజేసేందుకు నకిలీ పత్రాలను సృష్టించారని, అంతేకాకుండా తన భర్తను చంపేస్తామని బెదిరించారని ఆరోపించారు. ఈ ఆరోపణలపై విచారణ జరుపుతున్నట్లు పోలీసులు తెలిపారు. సీనియర్ పోలీసు అధికారులు అవధేష్ దీక్షిత్ మరియు సుశీల్ కుమార్ ఘటనా స్థలానికి చేరుకుని పరిశీలించారు. భూ వివాదంతో పాటు ఇతర కోణాల్లో కూడా దర్యాప్తు చేస్తున్నట్లు పోలీసులు పేర్కొన్నారు. పరారీలో ఉన్న నిందితులను పట్టుకోవడానికి స్థానిక నిఘా వ్యవస్థను అప్రమత్తం చేసినట్లు వారు తెలిపారు.

అక్టోబర్ 18న శాంసంగ్ గాలక్సీ ఎఫ్ 70 5జీ విడుదల

దేశీయ మార్కెట్లో అక్టోబర్ 18న శాంసంగ్ గాలక్సీ ఎఫ్ 70 5జీ లాంచ్ కానున్నట్లు సమాచారం. ఈ ఫోన్‌లో 120Hz రిఫ్రెష్ రేట్‌తో కూడిన sAMOLED డిస్‌ప్లే, Exynos ప్రాసెసర్, OIS సపోర్ట్ ఉన్న 50MP ప్రధాన కెమెరా వంటి ఫీచర్లు ఉన్నాయి. ఈ స్మార్ట్‌ఫోన్‌లో FHD+ రిజల్యూషన్‌తో కూడిన sAMOLED డిస్‌ప్లేను అందించనున్నారు. అలాగే 120Hz రిఫ్రెష్ రేట్ ఉండటంతో స్క్రోలింగ్, యానిమేషన్లు మరింత స్మూత్‌గా ఉండే అవకాశం ఉంది. ఈ ఫోన్‌లో Exynos 1330 చిప్‌సెట్‌ను అందించనున్నారు. రోజువారీ పనులు, సోషల్ మీడియా వినియోగం, సాధారణ గేమింగ్ వంటి అవసరాలకు ఈ ప్రాసెసర్ ఉపయోగపడుతుంది. ఫోటోగ్రఫీ కోసం వెనుకవైపు మూడు కెమెరాల సెటప్ ఉండనుంది. 50MP ప్రధాన కెమెరా – OIS సపోర్ట్‌తో, 5MP అల్ట్రా వైడ్ కెమెరా, 2MP మాక్రో కెమెరా. ముఖ్యంగా ప్రధాన కెమెరాలోని OIS ఫీచర్ ఫోటోలు తీసేటప్పుడు, వీడియోలు రికార్డ్ చేసేటప్పుడు చేతి కదలికల వల్ల కలిగే ప్రభావాన్ని తగ్గించడంలో సహాయపడుతుంది. సెల్ఫీలు, వీడియో కాల్స్ కోసం ముందు భాగంలో 13MP కెమెరా ఉండనుంది. దీనిలో 5,000mAh బ్యాటరీని అందించనున్నారు. దీనికి 25W ఫాస్ట్ ఛార్జింగ్ సపోర్ట్ కూడా ఉండనుంది. Samsung Galaxy F70 5G స్మార్ట్‌ఫోన్‌లో Corning Gorilla Glass Victus ప్రొటెక్షన్‌ను అందించనున్నట్లు సమాచారం. ఈ ఫోన్ కేవలం 7.5mm సన్నని డిజైన్‌తో ఆకట్టుకునే అవకాశం ఉంది. అలాగే, గూగుల్ సెర్చ్‌ను మరింత సులభతరం చేసే Circle to Search ఫీచర్‌తో పాటు, AI ఆధారిత పనుల కోసం Gemini AI ఫీచర్లు కూడా ఉండనున్నాయి. డిజిటల్ చెల్లింపుల కోసం శాంసంగ్ వాలెట్ ద్వారా Tap and Pay సదుపాయం అందుబాటులో ఉండవచ్చు. సాఫ్ట్‌వేర్ విషయానికి వస్తే, ఈ ఫోన్ Android 16తో పాటు One UI 8.5 లేదా One UI 9తో రావచ్చని అంచనా. వినియోగదారుల డేటా, వ్యక్తిగత సమాచారానికి మెరుగైన రక్షణ కల్పించేందుకు Samsung Knox Security ఫీచర్ కూడా ఉపయోగపడనుంది. 

బంగారం కోసం తవ్వకాలు జరుపుతున్న కార్మికులపై యుద్ధ విమానం దాడి : 72 మంది దుర్మరణం

సూడాన్‌-ఈజిప్ట్‌ వివాదాస్పద సరిహద్దు జబల్‌ అల్‌-ఉకైదత్‌ ప్రాంతంలో భయానక పరిస్థితులు నెలకొన్నాయి. బంగారం కోసం తవ్వకాలు జరుపుతున్న కార్మికుల పై ఓ యుద్ధ విమానం దాడి చేసింది. ఉదయం 8 గంటల సమయంలో ఆకాశంలో విమానం కనిపించిందని వరుసగా ఐదుసార్లు జరిపిన దాడుల్లో చాలామంది ప్రాణాలు కోల్పోయారని యూసుఫ్‌ అనే కార్మికుడు మీడియాకు తెలిపాడు. దాడి జరిగిన సమయంలో వేలాది మంది కార్మికులు పనిచేస్తున్నారు. దాడి మొదలవగానే ప్రాణాలు కాపాడుకునేందుకు అందరూ తలా ఓ దిక్కుకు పరుగులు తీశారనీ చెప్పాడు. కొంతమంది అల్‌-అన్సారీ మార్కెట్‌ వైపు వెళ్లగా, మరికొందరు మరో దారిలో వెళ్లిపోయారనీ తాము పారిపోతున్న సమయంలో నేలపై మృతదేహాలు కనిపించాయని, శిథిలాల కింద మరికొందరు చిక్కుకుపోయి ఉండవచ్చని ప్రాణాలతో బయటపడిన వారు ఆవేదన వ్యక్తం చేశారు. సమీపంలోని పట్టణాలకు చేరుకోవడానికి కూడా చాలా సమయం పట్టే ప్రాంతం కావడంతో సహాయక చర్యలు చేపట్టడం కష్టంగా మారింది. జబల్‌ అల్‌-ఉకైదత్‌లో ఈ ఏడాది వైమానిక దాడి జరగడం ఇది రెండోసారి. గత జూన్‌లోనూ ఇదే ప్రాంతంలోని అక్రమ బంగారు తవ్వకాల గనిపై దాడి జరిగిన ఘటనలో 23 మంది కార్మికులు మృతి చెందారు. ఆ సమయంలో తమ దేశ సరిహద్దుల్లో అక్రమ బంగారు తవ్వకాలను అడ్డుకునేందుకు పెద్ద ఎత్తున ఆపరేషన్‌ చేపట్టినట్లు ఈజిప్ట్‌ సైన్యం ప్రకటించింది. 223 మందిని అదుపులోకి తీసుకుంది, వారిలో 136 మంది విదేశీయులు ఉన్నారని తెలిపింది. అక్రమ బంగారు తవ్వకాలు, ఆయుధాల అక్రమ రవాణాను అడ్డుకోవడమే తమ లక్ష్యమని ప్రకటించింది. తాజా దాడికి కూడా ఈజిప్ట్‌ వైమానిక దళమే కారణమని ‘ఎమర్జెన్సీ లాయర్స్‌’ ఆరోపించింది. సూడాన్‌, ఈజిప్ట్‌ మధ్య కొంతకాలంగా సరిహద్దు వివాదం కొనసాగుతోంది. ముఖ్యంగా ఖనిజ సంపదతో సమృద్ధిగా ఉన్న హలాయెబ్‌ ట్రయాంగిల్‌ ప్రాంతంపై ఇరు దేశాలు హక్కులు కోరుతున్నాయి. బంగారు గనులు ఉన్న ఈ ప్రాంతం వ్యూహాత్మకంగా కూడా కీలకమైంది. తాజా దాడి సూడాన్‌ భూభాగంలో జరిగింది. సరిహద్దు ప్రాంతాల్లోని బంగారం, ఇతర ఖనిజ సంపదపై నియంత్రణ సాధించేందుకు ఈజిప్ట్‌ ప్రభుత్వం ప్రయత్నిస్తుంది. ఎర్ర సముద్రం నుంచి లిబియా వరకు సుమారు 1,200 కిలోమీటర్ల మేర విస్తరించి ఉన్న ఈజిప్ట్‌-సూడాన్‌ సరిహద్దు ప్రాంతంలో బంగారం అక్రమ రవాణా, మనుషుల అక్రమ రవాణా చాలా కాలంగా కొనసాగుతున్నాయి. వీటిని అడ్డుకునేందుకు ఈజిప్ట్‌ చర్యలు చేపడుతోంది. సూడాన్‌లో కొనసాగుతున్న యుద్ధం కారణంగా జీవనోపాధి కోల్పోయిన అనేకమంది ప్రమాదకరమైన బంగారు గనుల్లో పనిచేస్తూ జీవనం సాగిస్తున్నారు. ఈ గనుల ద్వారా లభించే బంగారం యుద్ధంలో పాల్గొంటున్న వర్గాలకు ఆర్థికంగా ఉపయోగపడుతోంది. దీంతో బంగారం తవ్వకాల ప్రాంతాలు మరింత ఉద్రిక్తంగా మారుతున్నాయి. తాజా వైమానిక దాడి సరిహద్దు ప్రాంతంలో మరోసారి ఉద్రిక్తతలను పెంచింది.

నటుడు ఇమ్రాన్ ఖాన్ ఈ నెల 28 కల్లా దేశం విడిచి వెళ్లాలని ముంబై పోలీసులు ఆదేశాలు జారీ

బాలీవుడ్ సీనియర్ నటుడు అమీర్ ఖాన్ మేనల్లుడు, నటుడు  ఇమ్రాన్ ఖాన్ ఈ నెల 28 కల్లా దేశం విడిచి వెళ్లాలని ముంబై పోలీసులు ఆదేశాలు జారీ చేశారు. ముంబైలో జరిగిన సీఈసీ వ్యతిరేక నిరసనల్లో పాల్గొన్న ఇమ్రాన్ ఖాన్ ను ఈ మేరకు దేశం విడిచి వెళ్లాలని ముంబై పోలీసులు ఆదేశించారు. స్వతహాగా అమెరికా పౌరుడు అయిన ఇమ్రాన్ ఖాన్ ఈ నెల 10వ తేదీన ముంబైలో జరిగిన సీఈసీ వ్యతిరేక నిరసనల్లో పాల్గొన్నారు. ఈ సందర్భంగా ఆయన్ను పోలీసులు అరెస్టు చేసి, అనంతరం విడిచి పెట్టారు. సీఈసీ రాజీనామాను డిమాండ్ చేస్తూ అక్టోబర్ 10న ముంబైలోని ఆగస్ట్ క్రాంతి మైదాన్‌లో గుమిగూడిన వారిలో ఇమ్రాన్ ఖాన్ కూడా ఉన్నారు. ఆయనతో పాటు ఆయన భాగస్వామి, నటి లేఖా వాషింగ్టన్, ఆయన బంధువు జైన్ మేరీ ఖాన్ కూడా ఉన్నారు. ఈ నిరసన ప్రదర్శన సందర్భంగా ముంబై పోలీసులు ఆ ముగ్గురినీ అదుపులోకి తీసుకున్నారు. అయితే ఇప్పుడు ఇమ్రాన్ భారత పౌరుడు కానప్పటికీ నిరసనలో పాల్గొన్నారనే ఆరోపణలపై, ఇమ్మిగ్రేషన్ చట్టంలోని నిబంధనల కింద ఆయనపై చర్యలు ప్రారంభించినట్లు తెలుస్తోంది. ఇందులో భాగంగానే అక్టోబర్ 28 కల్లా దేశం విడిచి వెళ్లాలని ఆదేశాలు ఇచ్చినట్లు సమాచారం. మరోవైపు పోలీసుల చర్యలకు ముందే బీజేపీ నేత కిరీట్ సోమయ్య, ఇమ్రాన్‌ను దేశం నుండి బహిష్కరించాలని ముంబై పోలీసులను కోరడం విశేషం. ఇమ్రాన్ ఖాన్న అమెరికా పౌరుడని పేర్కొంటూ అతనిని దేశం నుండి బహిష్కరించాలని ఆయన డిమాండ్ చేశారు. ఇమ్రాన్ ఖాన్ పౌరసత్వాన్ని ధృవీకరించాలని సోమయ్య ముంబై పోలీసులను కోరారు. ఒక విదేశీయుడు రాజకీయ ఆందోళనలో పాల్గొనడం సరైనదేనా అని ప్రశ్నించారు. ఆ తర్వాత పోలీసులు ఈ ఆదేశాలు జారీ చేయడం ప్రాధాన్యం సంతరించుకుంది.

ఎల్బీనగర్-హయత్‌నగర్ డబుల్ డెక్కర్ కారిడార్ కు కేంద్రం ఆమోదం

జాతీయ రహదారి-65 పై అత్యంత రద్దీగా ఉండే ఎల్బీనగర్ నుంచి హయత్‌నగర్ వరకు 7.1 కిలోమీటర్ల మేర అత్యాధునిక డబుల్ డెక్కర్ ఎలివేటెడ్ కారిడార్ నిర్మాణానికి కేంద్ర ఉపరితల రవాణా, జాతీయ రహదారుల మంత్రిత్వ శాఖ అధికారికంగా ఆమోదం తెలిపింది. ఢిల్లీలో కేంద్ర మంత్రి నితిన్ గడ్కరీతో రాష్ట్ర రోడ్లు-భవనాల శాఖ మంత్రి కోమటిరెడ్డి వెంకట్‌రెడ్డి జరిపిన ఉన్నత స్థాయి భేటీలో ఈ ప్రాజెక్టుపై సమగ్ర చర్చలు జరగ్గా, కేంద్రం దీనికి సానుకూలంగా స్పందించి గ్రీన్ సిగ్నల్ ఇచ్చింది. ఈ అనుమతితో హైదరాబాద్ తూర్పు ముఖద్వారమైన విజయవాడ హైవేపై దశాబ్దాలుగా నెలకొన్న ట్రాఫిక్ సమస్యలకు తెరపడనుంది. ఈ భారీ ప్రాజెక్టును మల్టీ-లెవల్ ఇంటిగ్రేటెడ్ డిజైన్‌తో నిర్మించనున్నారు. ప్రస్తుత ప్రతిపాదనల ప్రకారం.. భూమి మీద సాధారణ సర్వీస్ రోడ్లు కొనసాగుతుండగా, మొదటి అంతస్తు వాహనాల రాకపోకల కోసం 3-లేన్ల ఎలివేటెడ్ ఫ్లైఓవర్‌ను నిర్మిస్తారు. ఇక దీనిపై ఉండే రెండో అంతస్తు లో హైదరాబాద్ మెట్రో రైల్ ఫేజ్-2 విస్తరణ మార్గం వెళ్లేలా ప్రణాళిక రూపొందించారు. రోడ్డు రవాణా, మెట్రో నెట్‌వర్క్ రెండింటినీ ఒకే స్తంభాల వరుసపై అనుసంధానించడం వల్ల భూసేకరణ భారం భారీగా తగ్గడంతో పాటు, సిగ్నల్ రహితంగా వేగవంతమైన ప్రయాణం సాధ్యమవుతుంది. ఈ డబుల్ డెక్కర్ కారిడార్ అందుబాటులోకి వస్తే హైదరాబాద్-విజయవాడ జాతీయ రహదారిపై ప్రయాణించే లక్షలాది మందికి ఊరట లభించనుంది. ప్రస్తుతం ఎల్బీనగర్ నుంచి హయత్‌నగర్ మధ్య ఉన్న చింతలకుంట, పనామా, సుష్మ, వనస్థలిపురం, ఆటోనగర్ వంటి ప్రధాన జంక్షన్లలో పీక్ అవర్లలో గంటల తరబడి ట్రాఫిక్ జామ్‌లు ఏర్పడుతున్నాయి. 7.1 కిలోమీటర్ల ఈ మార్గాన్ని దాటడానికే అరగంట నుంచి నలభై నిమిషాల సమయం పడుతోంది. ఎలివేటెడ్ కారిడార్ నిర్మాణం పూర్తయితే సిటీ నుంచి విజయవాడ, సూర్యాపేట వైపు వెళ్లే దూరప్రాంత వాహనాలు నేరుగా హయత్‌నగర్ మీదుగా ఓఆర్ఆర్‌ను చేరుకోవచ్చు. దీనివల్ల ఎల్బీనగర్ చుట్టుపక్కల విస్తరించిన 60కి పైగా కాలనీల స్థానిక ప్రజలకు ట్రాఫిక్ రద్దీ తగ్గి సురక్షిత ప్రయాణం దక్కుతుంది. కేంద్ర, రాష్ట్ర ప్రభుత్వాల ఉమ్మడి భాగస్వామ్యంతో శరవేగంగా డీపీఆర్ సిద్ధం చేసి, త్వరలోనే టెండర్ల ప్రక్రియను పూర్తి చేసి పనులు ప్రారంభించేందుకు అధికారులు కసరత్తు చేస్తున్నారు. 

హిందూ సామాజిక వ్యవస్థ నుంచి హిందూయేతర సామాజిక వ్యవస్థలోకి మారిన ఏ వ్యక్తికి రిజర్వేషన్లు వర్తించవు !

హిందూ సామాజికవర్గం నుంచి ఇస్లాం మతంలోకి మారిన వ్యక్తి వెనుకబడిన తరగతుల రిజర్వేషన్లకు ఎట్టి పరిస్థితుల్లో అర్హులు కాబోరని సుప్రీంకోర్టు స్పష్టం చేసింది. ఈ కేసులో మద్రాస్ హైకోర్టు ధర్మాసనం ఇచ్చిన తీర్పును సమర్థిస్తూ సుప్రీంకోర్టు ఈ కీలక తీర్పు వెలువరించింది. జస్టిస్ పీకే మిశ్రా, జస్టిస్ శ్రీ చంద్రశేఖర్‌ లతో కూడిన ధర్మాసనం ఈ మేరకు స్పష్టమైన తీర్పును వెలువరించింది. వాదనల సందర్భంగా ధర్మాసనం కీలక వ్యాఖ్యలు చేసింది. హిందూ సామాజిక వ్యవస్థ నుంచి హిందూయేతర సామాజిక వ్యవస్థలోకి మారిన ఏ వ్యక్తి కూడా బీసీ రిజర్వేషన్ ప్రయోజనాలను క్లెయిమ్ చేయడానికి వీలుపడని అంశమని, అలాంటి వాళ్లందిరికరికీ ఈ తీర్పులు వర్తిస్తుందని అని పేర్కొన్నది. వెనుకబడిన తరగతులకు చెందిన ముస్లింలలో ఏడు శాఖల వారికి బీసీ గుర్తింపునిస్తూ తమిళనాడు ప్రభుత్వం తీసుకున్న నిర్ణయాన్ని గతంలో మద్రాస్ హైకోర్టు రద్దు చేసింది. వెనుకబడిన తరగతుల నుంచి ఇస్లాం మతంలోకి మారిన వ్యక్తులను 'బీసీ ముస్లింలు'గా పరిగణించేలా తమిళనాడు ప్రభుత్వం తెచ్చిన జీవోను హైకోర్టు తప్పుపట్టింది. హైకోర్టు ధర్మాసనం ఇచ్చిన ఆ ఉత్తర్వులను సవాలు చేస్తూ తమిళనాడు ప్రభుత్వం సుప్రీంకోర్టును ఆశ్రయించగా, తాజాగా సర్వోన్నత న్యాయస్థానం కూడా హైకోర్టు తీర్పును సమర్థిస్తూ తుది తీర్పును వెలువరించింది.

అదుపుతప్పి డివైడర్‌ను బలంగా ఢీకొట్టిన మహీంద్రా కారు : తప్పిన ప్రాణనష్టం

హైదరాబాద్ లోని పాతబస్తీ పరిధి కాంచన్‌బాగ్ పోలీస్ స్టేషన్ పరిధిలో గురువారం వేకువజామున బాబా నగర్ ఫంక్షన్ హాల్ సమీపంలో మితిమీరిన వేగంతో దూసుకొచ్చిన మహీంద్రా కారు అదుపుతప్పి డివైడర్‌ను బలంగా ఢీకొట్టింది. ఆ వేగానికి కారు గాల్లోకి లేచి రోడ్డుపై పల్టీ కొట్టింది. ఈ ప్రమాద సమయంలో కారులో ఇద్దరు వ్యక్తులు ఉన్నట్లు తెలుస్తోంది. వాహనం బోల్తా పడిన వెంటనే డ్రైవర్ అక్కడి నుంచి పరారయ్యాడు. డ్రైవర్ మద్యం మత్తులో అతివేగంగా నడపడం వల్లే ఈ ప్రమాదం జరిగి ఉంటుందని అనుమానిస్తున్నారు. ఈ ప్రమాదంలో ఎవరికీ ప్రాణాపాయం జరగకపోవడంతో స్థానికులు, ప్రయాణికులు ఊపిరి పీల్చుకున్నారు. కాగా, కారు ముందు భాగం పూర్తిగా నుజ్జునుజ్జయ్యింది. సమాచారం అందిన వెంటనే రాజేంద్రనగర్ డీసీపీ శ్రీనివాస్ ఘటనా స్థలానికి చేరుకుని పరిస్థితిని సమీక్షించారు. పోలీసులు క్రేన్ సహాయంతో ధ్వంసమైన కారును రోడ్డుపై నుంచి తొలగించి ట్రాఫిక్‌ను పునరుద్ధరించారు. కారు రిజిస్ట్రేషన్ నంబర్ ఆధారంగా వాహన యజమానిని గుర్తించిన కాంచన్‌బాగ్ పోలీసులు వారిని అదుపులోకి తీసుకుని విచారిస్తున్నారు. పరారైన డ్రైవర్ కోసం గాలింపు చర్యలు చేపట్టడంతో పాటు, సీసీటీవీ దృశ్యాల ఆధారంగా కేసు నమోదు చేసుకుని దర్యాప్తు చేస్తున్నారు.

ఓపెన్ఏఐ ఇన్‌ఫ్రాస్ట్రక్చర్ విభాగానికి అధిపతిగా ఉదయ్ రుద్దరాజు

ఓపెన్ఏఐ ఇన్‌ఫ్రాస్ట్రక్చర్ విభాగాన్ని పర్యవేక్షించిన సచిన్ కట్టి స్థానంలో ఉదయ్ రుద్దరాజుకు సంస్థ బాధ్యతలు అప్పగించింది. ఉదయ్ రుద్దరాజు గత ఏడాది ఓపెన్ ఏఐలో చేరారు. జూలైలో కంప్యూట్ విభాగానికి చీఫ్ టెక్నాలజీ ఆఫీసర్‌గా బాధ్యతలు చేపట్టారు. ఇప్పుడు సంస్థలోని ఇన్‌ఫ్రాస్ట్రక్చర్, కంప్యూటింగ్ విభాగాలను ఆయన పర్యవేక్షించనున్నారు. కాగా సచిన్ కట్టి రాబోయే కొన్ని వారాల్లో తన ప్రస్తుత బాధ్యతల నుంచి తప్పుకుని, కంపెనీలో సలహాదారుగా కొనసాగనున్నారు. సంస్థలో పనిచేసిన సమయంలో కట్టి పలు భారీ డేటా సెంటర్ ప్రాజెక్టులను పర్యవేక్షించారు. ఓపెన్ఏఐ డేటా సెంటర్లపై ఎక్కువ దృష్టిపెడుతోంది. దీనికి కారణం చాట్‌జీపీటీ వంటి ఏఐ వ్యవస్థలు పనిచేయాలంటే భారీ కంప్యూటింగ్ సామర్థ్యం అవసరం. ఇందుకోసం అధిక సామర్థ్యం కలిగిన చిప్‌లు, సర్వర్లు, నిరంతర విద్యుత్ సరఫరా, శీతలీకరణ వ్యవస్థలు అవసరమవుతాయి. వీటన్నింటినీ ఏర్పాటు చేయడానికి భారీగా పెట్టుబడులు పెట్టాల్సి ఉంటుంది. ఓపెన్ఏఐ అధినేత శామ్ ఆల్ట్‌మన్ కూడా భవిష్యత్తులో ఏఐ అభివృద్ధికి అవసరమైన భౌతిక మౌలిక సదుపాయాల కోసం ట్రిలియన్ డాలర్ల స్థాయిలో ఖర్చు చేయాల్సి రావచ్చని గతంలో పేర్కొన్నారు.

ఆంధ్రప్రదేశ్, తెలంగాణ రాష్ట్రాల్లో రాబోయే రెండు మూడు రోజుల్లో వర్షాలు కురిసే అవకాశం : భారత వాతావరణ శాఖ

తెలుగు రాష్ట్రాల్లోని పలు ప్రాంతాల్లో రాబోయే రెండు మూడు రోజుల్లో వర్షాలు కురిసే అవకాశం ఉందని భారత వాతావరణ శాఖ వెల్లడించింది. తెలంగాణలో ప్రస్తుతం వాతావరణం పాక్షికంగా మేఘావృతమై ఉంది. ఐఎమ్‌డీ అంచనాల ప్రకారం, అక్టోబరు 15 నుంచి ఈ నెల 20వ తేదీ వరకు రాష్ట్రంలో విస్తారంగా వర్షాలు కురవనున్నాయి. తొలి రోజు ములుగు, ఖమ్మం, సూర్యాపేట, నల్గొండ, నాగర్‌కర్నూల్, వనపర్తి, మహబూబ్‌నగర్ వంటి దక్షిణ తెలంగాణ జిల్లాల్లో మోస్తరు నుంచి భారీ వర్షాలు పడే అవకాశం ఉంది. అక్టోబరు 16న పెద్దపల్లి, భూపాలపల్లి, ములుగు, సిద్దిపేట, వరంగల్, రంగారెడ్డి, మహబూబ్‌నగర్, వనపర్తి, నాగర్‌కర్నూల్, నల్గొండ జిల్లాల్లో వర్షాల తీవ్రత ఎక్కువగా ఉండనుంది. అలాగే 17 నుంచి 20వ తేదీ వరకు వివిధ ప్రాంతాల్లో వర్షాలు కొనసాగుతాయని వాతావరణ శాఖ స్పష్టం చేసింది. ఆంధ్రప్రదేశ్‌లోనూ రాబోయే రోజుల్లో వాతావరణం పూర్తిగా చల్లబడనుంది. అక్టోబరు 15న అల్లూరి సీతారామరాజు జిల్లాలో భారీ వర్షాలు కురిసే అవకాశం ఉందని ఐఎమ్‌డీ అంచనా వేసింది. ఇక అక్టోబరు 16న అల్లూరి జిల్లాతో పాటు రాయలసీమలోని అనంతపురం, శ్రీ సత్యసాయి, అన్నమయ్య, చిత్తూరు జిల్లాల్లో భారీ వర్షాలు కురుస్తాయని హెచ్చరించింది. ఈ జిల్లాలకు ఇప్పటికే వాతావరణ శాఖ 'యెల్లో అలర్ట్' జారీ చేసింది. అక్టోబరు 17న కర్నూలు, అనంతపురం, సత్యసాయి, అన్నమయ్య జిల్లాలతో పాటు పలు ప్రాంతాల్లో మంచి వర్షాలు కురిసే సూచనలున్నాయి. వర్షాలతో పాటు కొన్ని ప్రాంతాల్లో గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని అధికారులు తెలిపారు. రేపటి నుంచి అక్టోబరు 18 వరకు ఏపీ, తెలంగాణ వ్యాప్తంగా వాతావరణం చల్లబడి, ప్రజలకు ఎండ వేడిమి నుంచి పెద్దఎత్తున ఉపశమనం లభించనుంది. 

కల్తీ నెయ్యి స్కాం కేసు : బోలేబాబా ఆర్గానిక్ డెయిరీ మిల్క్ ప్రైవేట్ లిమిటెడ్, శ్రీవైష్ణవి డెయిరీ స్పెషాలిటీస్ సంస్థల రూ.130 కోట్ల ఆస్తులు జప్తు

తిరుమల తిరుపతి దేవస్థానం శ్రీవారి ప్రసాదాల తయారీకి సరఫరా చేసిన కల్తీ నెయ్యి కుంభకోణంలో ఎన్‌ఫోర్స్‌మెంట్ డైరెక్టరేట్ కీలక నిర్ణయం తీసుకుంది. మనీలాండరింగ్ నిరోధక చట్టం కింద దర్యాప్తును ముమ్మరం చేసిన ఈడీ అధికారులు ఈ భారీ మోసానికి పాల్పడిన బోలేబాబా ఆర్గానిక్ డెయిరీ మిల్క్ ప్రైవేట్ లిమిటెడ్, శ్రీవైష్ణవి డెయిరీ స్పెషాలిటీస్ సంస్థలకు చెందిన సుమారు రూ.130 కోట్ల విలువైన స్థిర, చరాస్తులను తాత్కాలికంగా జప్తు చేస్తూ ఆదేశాలు జారీ చేశారు. నిందితులు టీటీడీ టెండర్లను దక్కించుకునేందుకు పక్కా ప్లాన్ ప్రకారం వ్యవహరించారు. నిబంధనల ప్రకారం అర్హత లేకపోయినా బినామీ సంస్థలను అడ్డం పెట్టుకుని, ఏకంగా రూ.234 కోట్ల విలువైన కల్తీ నెయ్యిని బోలేబాబా డెయిరీ నేరుగా తిరుమలకు సరఫరా చేసినట్లు ఈడీ గుర్తించింది. అసలు ఆ సంస్థ ప్రాంగణాల్లో వాస్తవంగా పాల సేకరణ, నెయ్యి ఉత్పత్తి రికార్డులేవీ లేవని.. ఇతర సంస్థల నుంచి కొనుగోలు చేసిన కెమికల్స్, పామాయిల్, చేప నూనె, ఇతర రసాయనాలను కలిపి కృత్రిమంగా నెయ్యిని తయారు చేసి పవిత్ర తిరుమల ఆలయానికి పంపినట్లు విచారణలో బట్టబయలైంది. ఈ నెయ్యి సరఫరా వెనుక భారీ అంతర్రాష్ట్ర రాకెట్ పనిచేసినట్లు ఈడీ నిర్ధారించింది. బోలేబాబా సంస్థ తయారు చేసిన కల్తీ నెయ్యిని టీటీడీకి చేరవేసేందుకు శ్రీవైష్ణవి డెయిరీ సహా ఇతర అనుబంధ కంపెనీలను ఫ్రంట్ ఎంటిటీస్ గా వాడుకున్నారు. టీటీడీ నుంచి విడుదలైన వందలాది కోట్ల రూపాయల నిధులను నేరుగా ఒకే ఖాతాలో ఉంచకుండా.. డమ్మీ కంపెనీలు, రౌండ్ ట్రిప్పింగ్ పద్ధతుల ద్వారా పలు ఖాతాల్లోకి మళ్లించి, ఆ మొత్తంతో ఉత్తరాఖండ్, ఢిల్లీ, రాజస్థాన్, ఉత్తరప్రదేశ్ తదితర ప్రాంతాల్లో భారీగా భూములు, భవనాలు, ప్లాంట్లు కొనుగోలు చేసినట్లు ఈడీ గుర్తించింది. ఈ అక్రమ ధనార్జనతో కూడబెట్టిన ఆస్తులనే తాజాగా పీఎంఎల్ఏ కింద జప్తు చేశారు. ఈడీతో పాటు సీబీఐ నేతృత్వంలోని సిట్ ఇప్పటికే సమర్పించిన చార్జిషీట్లలోనూ ఈ సింథటిక్ నెయ్యి కుంభకోణం విలువ రూ.230 కోట్ల నుంచి రూ.250 కోట్ల మేర ఉన్నట్లు తేలింది. ఇప్పటికే సుకృతి ఫుడ్స్ ప్రమోటర్‌తో పాటు పలువురు వ్యాపారులను అదుపులోకి తీసుకున్న దర్యాప్తు సంస్థలు.. టీటీడీ అంతర్గత అధికారులు, కొనుగోళ్ల విభాగంలో సహకరించిన వారి పాత్రపై మరింత లోతుగా కూపీ లాగుతున్నాయి. పవిత్రమైన శ్రీవారి ప్రసాదాలను సైతం వ్యాపార సరుకుగా మార్చి కోట్లు కొల్లగొట్టిన డెయిరీ యజమానులు, సహకరించిన బడా బాబులపై త్వరలోనే మరిన్ని కఠిన చర్యలు, అదనపు ఆస్తుల జప్తులు ఉండబోతున్నాయని ప్రచారం జరుగుతోంది.

రెడీ-టు-డ్రింక్ పాల ఉత్పత్తుల మార్కెట్‌లోకి ప్రవేశించిన రిలయన్స్ కన్స్యూమర్ ప్రొడక్ట్స్ లిమిటెడ్

రిలయన్స్ కన్స్యూమర్ ప్రొడక్ట్స్ లిమిటెడ్ రెడీ-టు-డ్రింక్ పాల ఉత్పత్తుల మార్కెట్‌లోకి ప్రవేశించింది. ఈ కంపెనీ తమిళనాడులో రూ. 20 ధరతో 'జాయ్‌ల్యాండ్ ఫ్లేవర్డ్ మిల్క్'ను విడుదల చేస్తున్నట్లు ప్రకటించింది. కస్టమర్లకు పాల ఉత్పత్తులను అందుబాటు ధరలో అందించడమే కంపెనీ లక్ష్యమని ఈ సందర్భంగా సంస్థ ఒక ప్రకటనలో తెలియచేసింది. జాయ్‌ల్యాండ్ ఫ్లేవర్డ్ మిల్క్‌ బ్రాండ్ తో, రిలయన్స్ కన్స్యూమర్ ప్రొడక్ట్స్ తన పానీయాల పోర్ట్‌ఫోలియోను విస్తరించింది. కంపెనీ ప్రకారం, జాయ్‌ల్యాండ్ ఫ్లేవర్డ్ మిల్క్‌ను నిజమైన పాల పదార్థాలతో తయారు చేస్తామని తెలిపింది. ప్రారంభంలో స్ట్రాబెర్రీ, వెనీలా ఫ్లేవర్లను అందుబాటులో ఉంచింది. ఈ ఉత్పత్తి ద్వారా, పాల రుచిని, పోషక ప్రయోజనాలను ప్యాకేజ్డ్ డ్రింక్ రూపంలో కస్టమర్లకు అందించాలని కంపెనీ లక్ష్యంగా పెట్టుకుంది. కాగా ఈ ప్యాకేజ్డ్ డ్రింక్ ధరను అయిన రూ. 20 కేటగిరీలో ప్రారంభం కానుంది. రిలయన్స్ ఇండస్ట్రీస్ పటిష్టమైన పంపిణీ వ్యవస్థ, రిటైల్ మార్కెట్ చైన్ సిస్టం, వినియోగదారుల అవగాహనను ఉపయోగించుకొని, ఈ ఉత్పత్తిని మార్కెట్లో మరింతగా విస్తరించనున్నట్లు కంపెనీ పేర్కొంది. తమిళనాడులో ప్రారంభించిన అనంతరం, దీనిని దేశంలోని ఇతర ప్రాంతాలలో దశలవారీగా ప్రవేశపెట్టనున్నారు. కంపెనీ ప్రణాళికలు కేవలం ఫ్లేవర్డ్ మిల్క్‌కు మాత్రమే పరిమితం కాలేదు. భవిష్యత్తులో, రిలయన్స్ కన్స్యూమర్ ప్రోడక్ట్స్ 'జాయ్‌ల్యాండ్' బ్రాండ్ క్రింద కొత్త ఫ్లేవర్లను ప్రవేశపెట్టాలని, ఇతర మిల్క్ బేస్ పానీయాల విభాగాలలోకి విస్తరించాలని భావిస్తోంది. ఈ కార్యక్రమాల ద్వారా, రెడీ-టు-డ్రింక్ పాల ఉత్పత్తుల మార్కెట్లో తన ఉనికిని బలోపేతం చేసుకోవడానికి కంపెనీ సిద్ధమవుతోంది. రెడీ-టు-డ్రింక్ పాల ఉత్పత్తుల మార్కెట్లోకి ప్రవేశించడం అనేది కంపెనీని విస్తరించడంలో ఒక ముఖ్యమైన ముందడుగు అని రిలయన్స్ కన్స్యూమర్ ప్రోడక్ట్స్ లిమిటెడ్ డైరెక్టర్ టి. కృష్ణకుమార్ పేర్కొన్నారు. జాయ్‌ల్యాండ్ ద్వారా, తక్కువ ధరలకు డైరీ ఉత్పత్తులు వీలైనన్ని ఎక్కువ కుటుంబాలకు చేరేలా చూడాలని కంపెనీ లక్ష్యంగా పెట్టుకుంది. 'జాయ్‌ల్యాండ్' ఫ్లేవర్డ్ మిల్క్ విడుదల ద్వారా పాల ఆధారిత పానీయాల విభాగంలోకి ఆ సంస్థ విస్తరణకు సంకేతంగా నిలిచింది. ఈ మార్కెట్‌లో బలమైన స్థానాన్ని ఏర్పరచుకుంది. 

ఎన్నికల్లో పోటీపై వివాదం : కొడుకు, కోడలిని కారుతో ఢీకొట్టి హత్య చేసిన తండ్రి

రాజస్థాన్‌లోని చూరు జిల్లాలోని తారానగర్ పోలీసు స్టేషన్ పరిధిలో ఎన్నికల్లో పోటీ చేసే విషయమై తండ్రికి, కొడుక్కి మధ్య జరిగిన వివాదం ఇద్దరి ప్రాణాలను బలిగొంది. స్వయంగా తండ్రే కారుతో ఢీకొట్టి కొడుకు, కోడలిని అత్యంత కౄ రంగా హతమార్చాడు. పోలీసులు తెలిపిన వివరాల ప్రకారం చూరు జిల్లాలోని చంగోయ్ గ్రామానికి చెందిన రామచంద్ర త్వరలో జరగనున్న పంచాయతీ ఎన్నికల్లో పోటీ చేయాలని నిర్ణయించుకున్నాడు. అయితే, ఆయన నిర్ణయాన్ని కుమారుడు రవీంద్ర తీవ్రంగా వ్యతిరేకించాడు. ఈ విషయమై తండ్రీకొడుకుల మధ్య కొన్ని రోజులుగా గొడవలు జరుగుతుండేవని స్థానికులు చెబుతున్నారు. ఈ క్రమంలోనే ఘటన జరిగిన రోజు రాత్రి కూడా ఇద్దరి మధ్య తీవ్ర వాగ్వాదం చోటుచేసుకుంది. దీంతో మనస్తాపానికి గురైన రవీంద్ర అర్ధరాత్రి సమయంలో ఇల్లు విడిచి సమీపంలోని వేబ్రిడ్జ్ వైపు వెళ్లాడు. అతడిని ఇంటికి తీసుకెళ్లేందుకు భార్య మహీంద్ర వెళ్ళింది. ఇదే సమయంలో రామచంద్ర కూడా అక్కడి చేరుకున్నాడు. తన కారుతో వారిద్దరిని ఢీకొట్టి తొక్కించాడు. ఈ బీభత్సంలో కొడుకు రవీంద్ర, కోడలు మహీంద్ర అక్కడికక్కడే దుర్మరణం చెందారు. సమాచారం అందుకున్న తారానగర్ పోలీసులు వెంటనే ఘటనా స్థలానికి చేరుకున్నారు. నిందితుడు రామచంద్రను అదుపులోకి తీసుకున్నారు. రవీంద్ర మామ ఫిర్యాదు మేరకు నిందితుడిపై హత్య కేసు నమోదు చేసి దర్యాప్తు జరుపుతున్నట్లు పోలీసులు వెల్లడించారు. ఎన్నికల గొడవలతో పాటు గతంలోనూ తండ్రీకొడుకుల మధ్య కుటుంబ కలహాలు ఉన్నట్లు పోలీసులు గుర్తించారు.

మీరట్ బ్లూ డ్రమ్ మర్డర్ కేసు : ముస్కాన్ రస్తోగి, సాహిల్ శుక్లాలకు ఉరిశిక్ష విధించిన మీరట్ కోర్టు

దేశవ్యాప్తంగా సంచలనం సృష్టించిన మీరట్ ''బ్లూ డ్రమ్ మర్డర్'' కేసులో కోర్టు సంచలన తీర్పు వెలువరించింది. భర్త సౌరభ్ రాజ్‌పుత్‌ను దారుణంగా హత్య చేసిన భార్య ముస్కాన్ రస్తోగి, సాహిల్ శుక్లాలకు మీరట్ కోర్టు ఉరిశిక్ష విధించింది. బుధవారం మరణశిక్ష విధిస్తూ న్యాయమూర్తి అరవింద్ కుమార్ మిశ్రా ''భగవద్గీత''ను ప్రస్తావించారు. ''తప్పులు చేసిన వారిని శిక్షించడము ధర్మమే''అని కోర్టు తన విధిని నిర్వర్తిస్తుందని మహాభారతంలోని సూచనల్ని న్యాయమూర్తి ఉదహరించారు. ఈ విషయాన్ని బాధితుడి తరుఫు న్యాయవాది కోర్టు బయట మీడియాతో చెప్పారు. విదేశాల్లో మర్చంట్ నేవీ ఆఫీసర్‌గా పనిచేస్తున్న సౌరభ్ రాజ్‌పుత్‌ను భారత్ వచ్చిన కొద్దిరోజులకే ముస్కాన్, సాహిల్ హత్య చేశారు. భోజనంలో మత్తు పదార్థాలు కలిపి, శరీరాన్ని నరికి ముక్కలుగా చేసి, ఒక డ్రమ్‌లో వేసి దానిని సిమెంట్‌తో కప్పేశారు. బుధవారం కోర్టు తీర్పుకు ముందు ముస్కాన్ తల్లిదండ్రులు కూడా తన అల్లుడు సౌరభ్ చాలా మంచి వ్యక్తి అని, దోషులకు మరణశిక్ష విధిస్తే తాము నిరసన తెలపబోమని చెప్పారు. ఈ కేసులో 126 సార్లు విచారణ జరగగా, 22 మంది సాక్ష్యాలను పరిగణలోకి తీసుకుని శిక్షను విధించారు.