'సేవ్ డెమోక్రసీ' పేరుతో ఇండియా కూటమికి చెందిన ఎంపీలు మంగళవారం ఢిల్లీలో ఆందోళన చేపట్టారు. ముఖ్య ఎన్నికల కమిషనర్ జ్ఞానేశ్ కుమార్ రాజీనామా చేయాలని వారు డిమాండ్ చేశారు. ఓటర్ల జాబితా సవరణకు సంబంధించి చేపట్టిన స్పెషల్ ఇంటెన్సివ్ రివిజన్ ప్రక్రియలో అవకతవకలు చోటుచేసుకున్నాయని ప్రతిపక్షాలు ఆరోపిస్తున్నాయి. ఎన్నికల ప్రక్రియలో పారదర్శకత, విశ్వసనీయతను కాపాడాల్సిన అవసరం ఉందని పేర్కొంటూ ఈ నిరసనకు పిలుపునిచ్చాయి. పార్లమెంట్ పరిసరాల్లోని మకర్ ద్వార్ నుంచి ఎన్నికల సంఘం ప్రధాన కార్యాలయం నిర్వచన్ సదన్ వరకు మార్చ్ నిర్వహించేందుకు ప్రతిపక్ష ఎంపీలు సిద్ధమయ్యారు. కాంగ్రెస్‌తో పాటు ఇండియా కూటమిలోని పలు పార్టీల నేతలు ఈ కార్యక్రమంలో పాల్గొన్నారు. నిరసన నేపథ్యంలో ఢిల్లీలో పోలీసులు భారీ భద్రతా ఏర్పాట్లు చేశారు. పలు ప్రాంతాల్లో బారికేడ్లు ఏర్పాటు చేయడంతో పాటు ర్యాపిడ్ యాక్షన్ ఫోర్స్, ఇతర భద్రతా సిబ్బందిని మోహరించారు. నిరసనకారులు ఎన్నికల సంఘం కార్యాలయం వైపు వెళ్లకుండా పలు మార్గాల్లో ఆంక్షలు విధించారు. ఇదిలా ఉండగా SIRకు సంబంధించిన కొన్ని నిర్ణయాలు ఎన్నికల కమిషన్‌లోని ఇతర సభ్యుల అభిప్రాయాలను పరిగణనలోకి తీసుకోకుండా తీసుకున్నారన్న ఆరోపణలపై సుప్రీంకోర్టులోనూ విచారణ కొనసాగుతోంది. చట్టపరమైన నిబంధనలకు విరుద్ధంగా నిర్ణయాలు తీసుకున్నట్లు తేలితే వాటిని రద్దు చేసే అంశాన్ని పరిశీలిస్తామని సుప్రీంకోర్టు స్పష్టం చేసింది. ప్రజాస్వామ్య సంస్థలను కాపాడేందుకు తమ పోరాటాన్ని కొనసాగిస్తామని ప్రతిపక్ష నేతలు తెలిపారు.
No comments:
Post a Comment