ప్రముఖ నటి, దర్శకురాలు రేణూ దేశాయ్ చేసిన ఒక పోస్ట్ నెట్టింట తీవ్ర చర్చనీయాంశంగా మారింది. ప్రస్తుతం ఏదో ఒక సమస్యతో లేదా కష్టాల్లో ఉన్న వ్యక్తిని మరింత దూషించడం నైతికంగా ఎంతమాత్రం సరికాదని ఆమె అభిప్రాయపడ్డారు. ఇప్పటికే కింద పడిపోయిన వారిని ఇంకా తొక్కాలని చూడటం అమానుషమైన చర్య అని పేర్కొంటూ, ఎంతటి ఉన్నత స్థాయిలో ఉన్నవారైనా సరే చివరికి అందరూ మనుషులే అనే విషయాన్ని గుర్తించాలని హితవు పలికారు. మనం అద్దాల మేడల్లో ఉంటూ ఇతరుల ఇళ్లపై రాళ్లు విసరకూడదనే పాత సామెతను గుర్తుచేస్తూ సోషల్ మీడియా వేదికగా ఆమె తన ఆవేదనను వ్యక్తం చేశారు. తన పోస్ట్‌పై నెటిజన్లు ఎవరికి నచ్చినట్లు వారు రకరకాల ఊహాగానాలు, పొలిటికల్ ప్రాధాన్యతలు ఆపాదిస్తారని ముందే గ్రహించిన రేణూ దేశాయ్, దీనిపై కూడా ముందే స్పష్టత ఇచ్చారు. తాను ఇలా రాసినందుకు ఎవరూ ఊహాగానాలు మొదలుపెట్టవద్దని కోరారు. మానవీయ కోణంలో ఒక సమాజంగా మనం మరింత మెరుగ్గా, సున్నితంగా ప్రవర్తించాలని నమ్మడం వల్లే ఈ విషయాలు పంచుకున్నానని స్పష్టం చేశారు. అంతటితో ఆగకుండా, “నేను ఇలా సెన్సిబుల్‌గా (సున్నితంగా) మాట్లాడినందుకు నా పేటీఎం అకౌంట్‌లోకి ఏమీ రాలేదు” అని చమత్కరిస్తూనే, దారుణంగా ట్రోల్ చేసే విమర్శకులకు గట్టి కౌంటర్ ఇచ్చారు. ప్రస్తుతం ఈ ఇన్స్టాగ్రామ్ పోస్ట్ సోషల్ మీడియాలో విపరీతంగా వైరల్ అవుతోంది.