స్విట్జర్లాండ్‌లోని ఆరౌ జిల్లా షాచెన్ లోని హార్స్ రేసింగ్ ట్రాక్‌లో ఆదివారం తెల్లవారుజామున జరిగిన ఓ కార్యక్రమం సమయంలో గుర్తుతెలియని వ్యక్తులు విచక్షణారహితంగా కాల్పులు జరిపారు. ఈ ఘటనలో పలువురు గాయపడ్డారు. సమాచారం అందుకున్న వెంటనే అర్గావ్‌ కంటోనల్ పోలీసులు భారీ ఎత్తున మోహరించి పెద్ద ఎత్తున రెస్క్యూ ఆపరేషన్ చేపట్టారు. ప్రజలు, సందర్శకులు ఎవరూ ఆ ప్రాంతం వైపు రావద్దని అత్యవసర హెచ్చరికలు జారీ చేశారు. స్థానిక కాలమానం ప్రకారం తెల్లవారుజామున 2:30 గంటల ప్రాంతంలో ఈ ఘటన జరిగింది. రేసింగ్ ట్రాక్ మైదానంలో "ఆర్గావు రేవ్" పేరుతో భారీ ఈవెంట్ జరుగుతున్న సమయంలో ఈ కాల్పులు చోటుచేసుకున్నాయి. తొలుత పైకప్పుపై నిప్పు రవ్వలను చూసి అక్కడున్నవారంతా టపాసులు పేలుతున్నాయని భావించారు. అయితే, కొద్దిసేపటికే ఎవరో "అందరూ కిందకు పడుకోండి!" అని గట్టిగా అరవడంతో ఒక్కసారిగా భయాందోళనలు నెలకొన్నాయి. ప్రాణభయంతో జనం డీజే బూత్ కింద తలదాచుకున్నారు. ఈ ఘటనలో పలువురు తీవ్రంగా గాయపడ్డారని పోలీసులు తెలిపారు. క్షతగాత్రుల సంఖ్య, వారి గాయాల తీవ్రతపై పూర్తి వివరాలు ఇంకా అధికారికంగా వెలువడాల్సి ఉంది. ఈ అత్యవసర పరిస్థితిని ఎదుర్కొనేందుకు పోలీసులు భారీ భద్రతా చర్యలు చేపట్టారు. అగ్గువ కంటోనల్ డిజాస్టర్ రెస్పాన్స్ యూనిట్ రంగంలోకి దిగగా, క్షతగాత్రుల సహాయార్థం ఆర్మీకి చెందిన సూపర్ పుమా హెలికాప్టర్‌ను కూడా సంఘటనా స్థలానికి రప్పించారు. భద్రతా కారణాల దృష్ట్యా ఆరావులోని స్విమ్మింగ్ పూల్‌ను తదుపరి ఆదేశాలు వచ్చే వరకు మూసివేశారు.
No comments:
Post a Comment