ఉత్తరప్రదేశ్ మాజీ ముఖ్యమంత్రి, సమాజ్‌వాదీ పార్టీ జాతీయ అధ్యక్షుడు అఖిలేశ్ యాదవ్ డిసెంబర్ 12న అయోధ్యలోని రామ మందిరాన్ని సందర్శించనున్నారు. 2024 జనవరిలో రామ మందిర ప్రారంభోత్సవం జరిగిన తర్వాత ఆయన ఆలయాన్ని సందర్శించడం ఇదే తొలిసారి కానుంది. ఈ విషయాన్ని సమాజ్‌వాదీ పార్టీ నేత పవన్ పాండే శనివారం వెల్లడించారు. డిసెంబర్ 12న అఖిలేశ్ యాదవ్ అయోధ్యకు వస్తారని, ముందుగా హనుమాన్ గఢీ ఆలయంలో ఆంజనేయస్వామి ఆశీస్సులు తీసుకుంటారని పవన్ పాండే తెలిపారు. అనంతరం రామ మందిరాన్ని సందర్శించి రాముడి ఆశీస్సులు పొందుతారని చెప్పారు. ఆయన రాక కోసం ఎంతో సంతోషంగా ఎదురుచూస్తున్నామని, ఘనంగా స్వాగతం పలుకుతామని పేర్కొన్నారు. 2024 జనవరి 22న జరిగిన రామ మందిర ప్రాణప్రతిష్ఠ కార్యక్రమానికి అఖిలేశ్ యాదవ్‌కు ఆహ్వానం అందింది. అయితే, ఆ సమయంలో తన కుటుంబంతో కలిసి మరోసారి ఆలయాన్ని సందర్శిస్తానని ఆయన ప్రకటించారు. ఈ ఏడాది అక్టోబర్ 8న భాగవత కథ కార్యక్రమంలో పాల్గొనేందుకు అయోధ్యకు వెళ్లినప్పటికీ రామ మందిరాన్ని సందర్శించలేదు. దీనిపై అధికార బీజేపీ నేతలు విమర్శలు చేశారు. అఖిలేశ్ యాదవ్ ప్రతిపాదిత అయోధ్య పర్యటనపై బీజేపీ స్పందించింది. ఉత్తరప్రదేశ్‌లో వచ్చే ఏడాది ప్రారంభంలో అసెంబ్లీ ఎన్నికలు జరగనున్న నేపథ్యంలో అఖిలేశ్ పర్యటనను ఎన్నికల స్టంట్‌గా బీజేపీ అధికార ప్రతినిధి రాకేశ్ త్రిపాఠి అభివర్ణించారు. రామజన్మభూమి ఉద్యమ సమయంలో సమాజ్‌వాదీ పార్టీ వ్యవహరించిన తీరును రామభక్తులు ఎన్నటికీ మర్చిపోరని విమర్శించారు. దాదాపు పదేళ్ల విరామం తర్వాత ఉత్తరప్రదేశ్‌లో తిరిగి అధికారంలోకి రావాలని సమాజ్‌వాదీ పార్టీ అఖిలేశ్ యాదవ్ నాయకత్వంలో ప్రయత్నిస్తోంది. ఈ నేపథ్యంలో ఆయన అయోధ్య పర్యటన రాజకీయంగా ప్రాధాన్యం సంతరించుకుంది. సమాజ్‌వాదీ పార్టీ జాతీయ అధ్యక్షుడు, ఉత్తరప్రదేశ్ మాజీ ముఖ్యమంత్రి అఖిలేశ్ యాదవ్ డిసెంబర్ 12న అయోధ్యలోని రామ మందిరాన్ని సందర్శించనున్నారు. 2024 జనవరిలో రామ మందిర ప్రారంభోత్సవం జరిగిన తర్వాత ఆయన ఆలయాన్ని సందర్శించడం ఇదే తొలిసారి కానుంది. ఈ విషయాన్ని సమాజ్‌వాదీ పార్టీ నేత పవన్ పాండే శనివారం వెల్లడించారు.
