దిగ్విజయంగా ముగిసిన బ్రిక్స్ సదస్సు : న్యూఢిల్లీ డిక్లరేషన్ 2026 ఆమోదం

న్యూఢిల్లీలోని భారత్ మండపంలో మూడు రోజుల పాటు అత్యంత వైభవంగా జరిగిన 18వ బ్రిక్స్ సదస్సు ఆదివారం విజయవంతంగా ముగిసింది. ఈ అంతర్జాతీయ వేదికపై భారత్ తన దౌత్యపరమైన వ్యూహాలతో తిరుగులేని విజయం సాధించింది. వివాదాస్పద అంశాలను పక్కనపెట్టి 'న్యూఢిల్లీ డిక్లరేషన్ 2026' పేరుతో రూపొందించిన ఉమ్మడి తీర్మానానికి సభ్య దేశాలన్నీ పూర్తి ఆమోదం తెలిపాయి. ఈ మూడు రోజుల్లో భారత ప్రధాన మంత్రి నరేంద్ర మోడీ  బిజీ షెడ్యూల్‌తో గడిపారు. రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు జిన్‌పింగ్, ఇరాన్ అధ్యక్షుడు మసూద్ పెజెష్కియన్ సహా సుమారు 15 దేశాల అగ్రనేతలతో ప్రధాని ద్వైపాక్షిక సమావేశాలు నిర్వహించారు. ప్రపంచంలో సంక్షోభాలు ఉన్నప్పటికీ, గ్లోబల్ సౌత్ దేశాల ఐక్యతను చాటాలని మోడీ పిలుపునిచ్చారు. పశ్చిమ దేశాలతో సంబంధాలు దెబ్బతినకుండా చూసుకుంటూనే, బ్రిక్స్ భాగస్వామ్య దేశాలతో సమతూకం పాటిస్తూ భారత్ దౌత్యపరంగా తన ప్రత్యేక ముద్ర వేసింది. సదస్సు మొదటి రోజున ప్రధాని మోడీ  రష్యా అధ్యక్షుడు పుతిన్‌తో ప్రత్యేకంగా సమావేశమయ్యారు. 2030 నాటికి భారత్, రష్యా మధ్య ద్వైపాక్షిక వాణిజ్యాన్ని 100 బిలియన్ డాలర్లకు చేర్చాలని ఇరు దేశాలు లక్ష్యంగా పెట్టుకున్నాయి. రక్షణ, ఇంధనం, ఎరువుల సరఫరా రంగాల్లో సహకారాన్ని బలోపేతం చేసుకోవడంపై చర్చించారు. అనంతరం ఇరాన్ అధ్యక్షుడు పెజెష్కియన్‌తో భేటీ అయిన మోడీ , పశ్చిమాసియా సంక్షోభాన్ని కేవలం చర్చల ద్వారానే పరిష్కరించుకోవాలని స్పష్టం చేశారు. సముద్ర మార్గాల్లో రవాణా భద్రతపై ఆందోళన వ్యక్తం చేశారు. ఐరాస ప్రధాన కార్యదర్శి ఆంటోనియో గుటెర్రస్‌తో సమావేశమై భద్రతా మండలిలో సమగ్ర సంస్కరణలు తేవాలని మోడీ కోరారు. సదస్సు రెండో రోజున దాదాపు ఏడేళ్ల సుదీర్ఘ విరామం తర్వాత భారత్‌కు వచ్చిన చైనా అధ్యక్షుడు జిన్‌పింగ్‌తో ప్రధాని మోడీ  భేటీ కావడం ప్రధాన ఆకర్షణగా నిలిచింది. సరిహద్దు భద్రత, భారీ వాణిజ్య లోటు అంశాలపై ఇరు దేశాలు సమాలోచనలు జరిపాయి. రెండు దేశాల మధ్య ఉన్న అభిప్రాయభేదాలు ఎట్టి పరిస్థితుల్లోనూ వివాదాలుగా మారకూడదని నేతలు ఒక అవగాహనకు వచ్చారు. ఇదే రోజున ఇథియోపియా, మలేషియా, యూఏఈ, వియత్నాం దేశాల అగ్రనేతలతో కూడా మోడీ విడివిడిగా సమావేశమై వాణిజ్యం, రక్షణ రంగాల్లో పరస్పర సహకారాన్ని విస్తరించుకోవడంపై ఒప్పందాలు చేసుకున్నారు. చివరి రోజైన ఆదివారం ఇరాన్, యూఏఈ మధ్య నెలకొన్న విభేదాలను అధిగమించి సభ్య దేశాలన్నింటి సంపూర్ణ ఏకాభిప్రాయంతో న్యూఢిల్లీ డిక్లరేషన్ 2026ను అధికారికంగా ఆమోదించారు. పుతిన్, జిన్‌పింగ్ పక్కన నిలబడి మోడీ  దిగిన గ్రూప్ ఫోటో ప్రపంచ దేశాల దృష్టిని ఆకర్షించింది. ఇండోనేషియా అధ్యక్షుడు ప్రబోవో సుబియాంతో, దక్షిణాఫ్రికా అధ్యక్షుడు సిరిల్ రామఫోసా, ఈజిప్ట్ అధ్యక్షుడు ఎల్-సిసితో చర్చలు జరిపిన అనంతరం మోడీ  సదస్సును ముగించారు.