బేబీ పౌడర్‌తో క్యాన్సర్ ఆరోపణలు : బాధితులకు $5.5 బిలియన్ పరిహారం చెల్లించనున్న జాన్సన్ & జాన్సన్

ప్రపంచ ప్రఖ్యాత ఔషధ, వినియోగదారుల ఉత్పత్తుల తయారీ సంస్థ జాన్సన్ & జాన్సన్ టాల్క్ ఆధారిత బేబీ పౌడర్‌కు సంబంధించిన వేలాది క్యాన్సర్ కేసుల్లో కీలక నిర్ణయం తీసుకుంది. తమ టాల్క్ ఉత్పత్తులను దీర్ఘకాలంగా ఉపయోగించడం వల్ల అండాశయ  క్యాన్సర్ వచ్చిందని ఆరోపిస్తూ దాఖలైన దాదాపు 69,000 కేసుల పరిష్కారం కోసం కంపెనీ 5.5 బిలియన్ డాలర్లు(రూ.52,663 కోట్లు) చెల్లించేందుకు అంగీకరించింది. టాల్క్ బేబీ పౌడర్‌కు సంబంధించిన వివాదంలో ఇది ఇప్పటివరకు జరిగిన అతిపెద్ద పరిణామాల్లో ఒకటిగా భావిస్తున్నారు. గత దాదాపు 15 ఏళ్లుగా జాన్సన్ & జాన్సన్ టాల్క్ ఉత్పత్తులపై అమెరికాలో భారీ స్థాయిలో న్యాయపోరాటం కొనసాగుతోంది. ముఖ్యంగా మహిళలు, కంపెనీ తయారు చేసిన టాల్క్ ఆధారిత బేబీ పౌడర్, ఇతర ఉత్పత్తులను సంవత్సరాల తరబడి ఉపయోగించడం వల్ల తమకు అండాశయ క్యాన్సర్ వచ్చిందని ఆరోపిస్తూ కోర్టులను ఆశ్రయించారు. ఈ ఉత్పత్తుల్లో ఆస్బెస్టాస్ వంటి ప్రమాదకర పదార్థాలు ఉండొచ్చని, లేదా టాల్క్ వినియోగం క్యాన్సర్ ప్రమాదాన్ని పెంచుతుందని వారు వాదించారు. అయితే ఈ ఆరోపణలను జాన్సన్ & జాన్సన్ ఎప్పటి నుంచో ఖండిస్తోంది. తమ టాల్క్ ఉత్పత్తులు పూర్తిగా సురక్షితమైనవని, వాటిలో ఆస్బెస్టాస్ లేదని, ఉత్పత్తుల భద్రతకు శాస్త్రీయ ఆధారాలు ఉన్నాయని కంపెనీ పునరుద్ఘాటిస్తోంది. కంపెనీ ఇప్పటికీ తమ ఉత్పత్తులు క్యాన్సర్‌కు కారణమనే ఆరోపణలను అంగీకరించకపోయినా, దీర్ఘకాలంగా కొనసాగుతున్న న్యాయ వివాదాలకు ముగింపు పలకడానికే ఈ పరిష్కారానికి అంగీకరించినట్లు తెలిపింది. జాన్సన్ & జాన్సన్ వెల్లడించిన వివరాల ప్రకారం ఫెడరల్ కోర్టులో ఏకీకృతం చేసిన సుమారు 69,000 కేసులతో పాటు రాష్ట్ర కోర్టుల్లో పెండింగ్‌లో ఉన్న సంబంధిత కేసులు కూడా ఈ ఒప్పందం పరిధిలోకి వస్తాయి. కంపెనీ అంచనా ప్రకారం, ప్రస్తుతం మిగిలి ఉన్న టాల్క్ సంబంధిత క్లెయిమ్‌లలో దాదాపు 99.75 శాతం ఈ ఒప్పందం ద్వారా పరిష్కారమయ్యే అవకాశం ఉంది. వాదుల తరఫు న్యాయ సంస్థలు కూడా ఈ ఒప్పందాన్ని ధృవీకరిస్తూ, దశాబ్దకాలంగా కొనసాగుతున్న న్యాయపోరాటానికి ఇది కీలక మలుపు అని పేర్కొన్నాయి. ఈ ఒప్పందం కుదిరే కొద్ది రోజుల ముందే ఒక ఫెడరల్ న్యాయమూర్తి, టాల్క్ ఉత్పత్తులే నేరుగా అండాశయ క్యాన్సర్‌కు కారణమయ్యాయని ప్రతి వ్యక్తిగత వాది నిరూపించడం సులభం కాదని వ్యాఖ్యానించారు. ఈ అభిప్రాయం జాన్సన్ & జాన్సన్ చట్టపరమైన వాదనకు కొంత బలం చేకూర్చిందని న్యాయ నిపుణులు భావిస్తున్నారు. అదే సమయంలో కోర్టు వెలుపల వివాదాలను పరిష్కరించేందుకు ఇరు పక్షాలు చర్చలు వేగవంతం చేసినట్లు తెలుస్తోంది. ఈ కేసులను ముగించేందుకు జాన్సన్ & జాన్సన్ గతంలో అనేకసార్లు ప్రయత్నించింది. ముఖ్యంగా ఒక అనుబంధ సంస్థను దివాలా ప్రక్రియలోకి తీసుకెళ్లి, దాని ద్వారా పరిహారాన్ని చెల్లించి కేసులను ముగించాలని ప్రయత్నించినా, ఆ ప్రయత్నాలు కోర్టుల్లో విఫలమయ్యాయి. దీంతో మూడు సంవత్సరాలకు పైగా న్యాయపరమైన ప్రతిష్ఠంభన కొనసాగింది. చివరకు 2025 మార్చిలో కేసుల విచారణ మళ్లీ ప్రారంభమైన తర్వాత, ఇరు పక్షాల మధ్య చర్చలు జరగడంతో ఈ తాజా ఒప్పందం కుదిరింది. కంపెనీ ప్రకారం, ఈ పరిష్కారం అమల్లోకి రావాలంటే రాష్ట్ర, ఫెడరల్ కోర్టుల్లో పెండింగ్‌లో ఉన్న అండాశయ క్యాన్సర్‌కు సంబంధించిన టాల్క్ కేసుల్లో కనీసం 95 శాతం క్లెయిమ్‌లకు ప్రాతినిధ్యం వహిస్తున్న ప్రధాన వాదుల న్యాయ సంస్థలు ఈ ఒప్పందానికి అంగీకరించాలి. అవసరమైన సంఖ్యలో వాదులు అంగీకరిస్తే, దాదాపు 15 ఏళ్లుగా కంపెనీని వెంటాడుతున్న ఈ వివాదానికి శాశ్వత ముగింపు లభించే అవకాశం ఉందని జాన్సన్ & జాన్సన్   పేర్కొంది. ఇదిలా ఉండగా, తమ ఉత్పత్తులు క్యాన్సర్‌కు కారణమనే ఆరోపణలను తిరస్కరిస్తూనే, జాన్సన్ & జాన్సన్ 2020లో అమెరికాలో టాల్క్ ఆధారిత బేబీ పౌడర్ అమ్మకాలను నిలిపివేసింది. ఈ నిర్ణయానికి కొనసాగుతున్న న్యాయపరమైన వివాదాలతో పాటు, వినియోగదారుల అభిరుచుల్లో వచ్చిన మార్పులు, టాల్క్ ఉత్పత్తులపై తగ్గుతున్న డిమాండ్ కూడా కారణమని కంపెనీ తెలిపింది. అనంతరం టాల్క్ స్థానంలో కార్న్‌స్టార్చ్ ఆధారిత బేబీ పౌడర్ను మార్కెట్‌లోకి తీసుకువచ్చింది.