సెప్టెంబర్ 15న రెడ్‌మి నోట్ 17 ప్రో సిరీస్ విడుదల

దేశీయ మార్కెట్లో  సెప్టెంబర్ 15న రెడ్‌మి నోట్ 17 ప్రో సిరీస్ విడుదల అవుతుంది. ఈ సిరీస్‌లోని కనీసం ఒక మోడల్‌లో ఏకంగా 10,000mAh కెపాసిటీ బ్యాటరీ ఉండబోతున్నట్లు రెడ్‌మి ఇండియా టీజర్లు స్పష్టం చేస్తున్నాయి. కంపెనీ ప్రమోషన్లలో దీన్ని "mAhster of strength" అని అభివర్ణిస్తోంది. ప్రత్యేక మైక్రోసైట్‌తో పాటు ప్రముఖ టెక్ వర్గాలు కూడా ఈ లాంచ్ డేట్‌ను ధృవీకరిస్తున్నాయి. ఇదే కనుక నిజమైతే, మిడ్-రేంజ్ స్మార్ట్‌ఫోన్ విభాగంలో బ్యాటరీ ప్రాధాన్యతలు పూర్తిగా మారిపోవడం ఖాయం.  షావోమి ఇప్పటికే భారత్‌లో 8,000mAh బ్యాటరీతో రెడ్‌మి నోట్ 17 5Gని లాంచ్ చేసింది. ఆగస్టు 6న అందుబాటులోకి వచ్చిన ఈ ఫోన్‌ను అమెజాన్, mi.com లలో ఆకర్షణీయమైన లాంచ్ ఆఫర్లతో విక్రయించారు. అయితే ఇప్పుడు రాబోయే ప్రో మోడల్స్ అంతకంటే పెద్ద బ్యాటరీతో రానున్నాయి. దీనివల్ల ఫోన్ స్టాండ్‌బై టైమ్, వైఫై హాట్‌స్పాట్ వాడకం, గేమింగ్ టైమ్ మరింత మెరుగ్గా ఉంటుంది. కాకపోతే కచ్చితమైన బ్యాటరీ కెపాసిటీ, ఛార్జింగ్ స్పీడ్ వివరాలను లాంచ్ రోజే అధికారికంగా ప్రకటించనున్నారు. లీకైన వివరాల ప్రకారం ఈ ప్రో మోడళ్లలో కనీసం ఒక ఫోన్ క్వాల్‌కామ్ స్నాప్‌డ్రాగన్ 6 జెన్ 5 ప్రాసెసర్‌తో రానుంది. అంతేకాకుండా 120Hz రిఫ్రెష్ రేట్ కలిగిన OLED డిస్‌ప్లే, మెయిన్ కెమెరాకు OIS (ఆప్టికల్ ఇమేజ్ స్టెబిలైజేషన్) సపోర్ట్, బలమైన బిల్డ్ క్వాలిటీ ఉండే అవకాశం ఉంది. అమెజాన్ టీజర్ల ప్రకారం ఈ ఫోన్‌లో గట్టి ప్రొటెక్షన్ గ్లాస్‌తో పాటు నీరు, దుమ్ము నుంచి రక్షణ కోసం హై ఐపీ రేటింగ్ ఇస్తున్నారు. అంటే కేవలం బ్యాటరీ మాత్రమే కాకుండా నాణ్యత, పనితీరులోనూ మెరుగైన అనుభవాన్ని అందించనున్నారు.