స్నేహితుడితో కలిసి యువతి దిగిన వీడియో సామాజిక మాధ్యమాల్లో వైరల్ : పరువు పోయిందంటూ హత్య చేసిన కన్నతండ్రి, సోదరుడు
సో ఫియా అనే యువతి స్నేహితుడితో కలిసి దిగిన ఒక వీడియో సామాజిక మాధ్యమాల్లో వైరల్ కావడంతో ఆగ్రహానికి గురైన తండ్రి మహమ్మద్ ఫరూక్, సోదరుడు హాఫిల్ కలిసి సోఫియా అనే యువతిని అత్యంత దారుణంగా కొట్టి చంపిన ఘటన దేశవ్యాప్తంగా తీవ్ర కలకలం రేపింది. కుమార్తె వీడియో నెట్టింట ప్రచారం కావడంతో కుటుంబ పరువు పోయిందని భావించిన తండ్రి, సోదరుడు ఆమెపై కక్ష పెంచుకుని హతమార్చేందుకు కుట్ర పన్నారు. బయటకు సరదాగా తిరిగి వద్దామని నమ్మబలికి సోఫియాను నిర్మానుష్య ప్రాంతానికి తీసుకెళ్లారు. అక్కడ ఆమెతో వాగ్వాదానికి దిగి, వెంట తెచ్చుకున్న సుత్తితో ఆమె తలపై బలంగా కొట్టారు. తీవ్ర రక్తస్రావంతో కుప్పకూలిన సోఫియా ఘటనా స్థలంలోనే ప్రాణాలు విడిచింది. సమాచారం అందుకున్న పోలీసులు అక్కడికి చేరుకుని ఆమె మృతదేహాన్ని స్వాధీనం చేసుకుని పోస్ట్మార్టం నిమిత్తం తరలించారు. అనంతరం హత్యకు పాల్పడిన తండ్రి మహమ్మద్ ఫరూక్, సోదరుడు హాఫిల్లను అదుపులోకి తీసుకుని దర్యాప్తు చేస్తున్నారు.