ఏఐ ఇంపాక్ట్ సమ్మిట్‌ 2026కు విశేష స్పందన

న్యూ ఢిల్లీలోని భారత్ మండపంలో ఏఐ ఇంపాక్ట్ సమ్మిట్‌ 2026 ప్రారంభమైంది. నేటి నుంచి 20వ తేదీ వరకు జరుగుతుంది. ఈ సమ్మిట్‌ ఏఐ రంగంలో భారతదేశ సత్తాను ప్రపంచానికి చాటిచెబుతోంది. దాదాపు 70వేల చదరపు మీటర్ల విస్తీర్ణంలో, 10 భారీ అరేనాల్లో ఏర్పాటు చేసిన ఈ ఎక్స్‌పోకు ఊహించని రీతిలో స్పందన లభిస్తోంది. ఈ సమ్మిట్ కోసం దేశ విదేశాల నుంచి 2.5 లక్షల మంది ప్రతినిధులు రిజిస్టర్ చేసుకోవడం విశేషం. ప్రభుత్వం ఊహించిన దానికంటే ఇది ఎంతో ఎక్కువని ఐటీ శాఖ కార్యదర్శి ఎస్. కృష్ణన్ వెల్లడించారు. ఈ సదస్సులో మొత్తం 600 పైగా స్టార్టప్ కంపెనీలు, 300కు పైగా ఎగ్జిబిషన్ పవిలియన్లు కొలువుదీరాయి. అమెరికా, రష్యా, జపాన్ సహా 13 దేశాలు ప్రత్యేక పవిలియన్లను ఏర్పాటు చేశాయి. 500 సెషన్లలో దాదాపు 3,250 మంది నిపుణులు ప్రసంగించబోతున్నారు. ఈ సమ్మిట్‌లో దక్షిణాది స్టార్టప్‌లు అందరి దృష్టిని ఆకర్షిస్తున్నారు. ముఖ్యంగా చెన్నైకి చెందిన ఏఐ కంపెనీలు తమ వినూత్న ఆవిష్కరణలతో అదరగొడుతున్నాయి. చెన్నైకి చెందిన 'అత్సుయ టెక్నాలజీస్' తన AOne ప్లాట్‌ఫామ్‌తో గ్లోబల్ ఇంపాక్ట్ ఛాలెంజ్‌లో టాప్-20లో నిలిచింది. పారిశ్రామిక రంగంలో ఏఐ ఏజెంట్ల ద్వారా రియల్ టైమ్ నిర్ణయాలు తీసుకునే ఈ సాంకేతికతకు భారీ స్పందన లభిస్తోంది. అలాగే చెన్నైకే చెందిన వజ్ర గ్లోబల్, కోర్ స్టాక్, కిడౌరా ఇన్నోవేషన్స్ వంటి కంపెనీలు హెల్త్ కేర్, డేటా గవర్నెన్స్ రంగాల్లో తమ ఏఐ సత్తాను చాటుతున్నాయి. దక్షిణ భారతదేశం నుంచి వచ్చిన ఈ స్టార్టప్‌లు కేవలం భారత్ కోసమే కాకుండా ప్రపంచవ్యాప్తంగా ఉపయోగించదగిన ప్రాక్టికల్ పరిష్కారాలను చూపిస్తున్నాయి. భారతీయ భాషల వైవిధ్యాన్ని దృష్టిలో ఉంచుకుని ఈ సమ్మిట్‌లో 12 స్వదేశీ ఫౌండేషన్ మోడల్స్‌ను ఆవిష్కరించారు. ఇవి భారత రాజ్యాంగం గుర్తించిన 22 అధికారిక భాషల్లో శిక్షణ పొందాయి. సుందర్ పిచాయ్, సామ్ ఆల్ట్‌మాన్, బిల్ గేట్స్ వంటి గ్లోబల్ టెక్ దిగ్గజాలు కూడా ఈ సదస్సులో పాల్గొననుండటం దీని ప్రాధాన్యతను పెంచుతోంది. వ్యవసాయం, విద్య, రక్షణ రంగాల్లో ఏఐ ఎలా ప్రాణప్రదంగా మారబోతుందో ఈ సమ్మిట్ వేదికగా ప్రపంచానికి తెలియజేస్తున్నారు.