వేదికపైనే కుప్ప కూలిన రష్యన్ రోబో 'ఐడల్'

మాస్కోలోని యారోవిట్ హాల్ కాంగ్రెస్ సెంటర్‌లో నవంబర్ 10న జరిగిన టెక్నాలజీ షోకేస్ సందర్భంగా 'ఐడల్' రోబోట్ ను ఆవిష్కరించారు. ప్రారంభంలో మెల్లగా అడుగులు వేసుకుంటూ వేదికపైకి వచ్చిన రోబోట్, అక్కడున్నవారికి అభివాదం చేస్తున్నట్లు చెయ్యి పైకెత్తింది. ఆ తరువాత ఓ రెండడుగులు ముందుకు వేసి కిందకు పడిపోయింది. దీంతో అక్కడే ఉన్న సిబ్బంది దానిని పైకిలేపి కష్టం మీద తీసుకెళ్లారు. కానీ అనుకున్నదొకటి, అయినది ఒకటిగా జగడంతో కార్యక్రమం మధ్యలోనే నిలిచిపోయింది. ఐడల్ రోబోట్ కిందికి పడగానే దానికి ఫిక్స్ చేసిన కొన్ని భాగాలు కూడా ఊడిపోయాయి. రష్యన్ రోబోటిక్స్ సంస్థ రూపొందించిన ఈ ఐడల్ ప్రస్తుతం ఇంకా టెస్టింగ్ దశలోనే ఉంది. ప్రజల సందర్శనార్థం దీనిని ప్రదర్శించాలనుకున్నప్పుడు ఈ సంఘటన జరిగిందని కంపెనీ సీఈఓ పేర్కొన్నారు. కాగా ఇంజనీర్లు ఐడల్ రోబోట్ బ్యాలెన్స్ సిస్టమ్‌, కంట్రోల్ సాఫ్ట్‌వేర్‌ వంటి వాటిని ఇంకా పరిశీలించాల్సి ఉందని ఆయన అన్నారు.