తెలంగాణ కొత్త డీజీపీగా సీవీ ఆనంద్ నియామకం

తెలంగాణ రాష్ట్ర కొత్త డీజీపీగా సీనియర్ ఐపీఎస్ అధికారి సీవీ ఆనంద్ నియమితులయ్యారు.ఈ మేరకు తెలంగాణ ప్రభుత్వం అధికారికంగా ఉత్తర్వులు జారీ చేసింది. ప్రస్తుతం హోం శాఖలో ప్రత్యేక ప్రధాన కార్యదర్శిగా బాధ్యతలు నిర్వహిస్తున్న ఆయనను బదిలీ చేసి, డైరెక్టర్ జనరల్ ఆఫ్ పోలీస్ గా నియమిస్తూ సాధారణ పరిపాలన శాఖ ఉత్తర్వులు విడుదల చేసింది. ప్రభుత్వ ఉత్తర్వుల ప్రకారం, సీవీ ఆనంద్ బాధ్యతలు స్వీకరించిన తేదీ నుంచే ఈ నియామకం అమల్లోకి రానుంది. ప్రస్తుత డీజీపీ శివధర్‌రెడ్డి ఈ నెల 30న పదవీ విరమణ చేయనున్నారు. డీజీపీ హోదాలో ఆయన రాష్ట్ర పోలీస్ వ్యవస్థకు నాయకత్వం వహించనున్నారు. రాష్ట్రంలో శాంతి భద్రతల పరిరక్షణ, నేర నియంత్రణ, పోలీస్ పరిపాలన బలోపేతం, ఆధునిక సాంకేతికత వినియోగం వంటి కీలక అంశాలపై ఆయన దృష్టి సారించే అవకాశం ఉంది. సీవీ ఆనంద్ 1991 బ్యాచ్‌కు చెందిన ఐపీఎస్ అధికారి. ఆయనకు పోలీస్ శాఖలో మూడు దశాబ్దాలకు పైగా అనుభవం ఉంది. తెలంగాణతో పాటు ఉమ్మడి ఆంధ్రప్రదేశ్ కాలంలోనూ అనేక కీలక పదవుల్లో పనిచేశారు. హైదరాబాద్ నగర పోలీస్ కమిషనర్‌గా పనిచేసిన సమయంలో ట్రాఫిక్ నియంత్రణ, సైబర్ నేరాలపై చర్యలు, ప్రజా భద్రత చర్యలు, ఆధునిక పోలీసింగ్ విధానాలతో ప్రత్యేక గుర్తింపు తెచ్చుకున్నారు. ప్రజలతో అనుసంధానం పెంచే విధంగా సోషల్ మీడియా వినియోగం, అవగాహన కార్యక్రమాలు చేపట్టడంలో కూడా ఆయన ప్రత్యేక శైలి ప్రదర్శించారు. ఇటీవల ఆయనను హోం శాఖలో ప్రత్యేక ప్రధాన కార్యదర్శిగా నియమించగా, ఇప్పుడు రాష్ట్ర అత్యున్నత పోలీస్ పదవికి ఎంపిక చేశారు. యూపీఎస్సీ మార్గదర్శకాల ప్రకారం జరిగిన ఎంపానెల్‌మెంట్ కమిటీ సమావేశం సిఫార్సుల ఆధారంగా ఈ నియామకాన్ని ఖరారు చేసినట్లు ప్రభుత్వం తెలిపింది. కేంద్ర పబ్లిక్ సర్వీస్ కమిషన్ సూచనల మేరకు ఈ ప్రక్రియ పూర్తి చేసి ఉత్తర్వులు జారీ చేసినట్లు వెల్లడించింది. తెలంగాణ గవర్నర్ పేరుతో ప్రధాన కార్యదర్శి కే. రామకృష్ణారావు ఈ ఉత్తర్వులను జారీ చేశారు.