ఒడిశా ప్రభుత్వ ఇంజనీర్ బైకుంఠ నాథ్ బెహెరాకు చెందిన పలు నివాసాలు, కార్యాలయాలపై విజిలెన్స్ బృందం ఏకకాలంలో దాడులు నిర్వహించింది. సదరు ఇంజనీర్ తన ఉద్యోగ కాలంలో సంపాదించిన చట్టబద్ధమైన ఆదాయ వనరుల కంటే చాలా రెట్లు ఎక్కువ ఆస్తులను కూడబెట్టినట్లు ఆరోపణలు వచ్చాయి. ఈ సోదాలలో కోట్ల విలువైన నగదు, బంగారం మరియు ఆస్తులు లభ్యమయ్యాయి. ఒడిశా విజిలెన్స్ అధికారులు శనివారం కంధమాల్ జిల్లా బాలిగూడలోని ఇంటిగ్రేటెడ్ ట్రైబల్ డెవలప్‌మెంట్ ఏజెన్సీ  అసిస్టెంట్ ఎగ్జిక్యూటివ్ ఇంజనీర్ కి సంబంధించిన తొమ్మిది ప్రాంతాలలో ఏకకాలంలో తనిఖీలు చేపట్టారు. ఆదాయానికి మించిన ఆస్తుల కేసులో ఈ చర్య తీసుకున్నారు. అధికారిక వర్గాల సమాచారం ప్రకారం.. విజిలెన్స్ సాంకేతిక విభాగం (టెక్నికల్ వింగ్) గుర్తించిన భవనాలు మరియు ప్లాట్ల కొలతలను, వాటి విలువను అంచనా వేస్తోంది. ఈ దాడుల సమయంలో అవినీతి నిరోధక శాఖ సిబ్బంది నిందితుడి నుండి ₹2,66,400 నగదును ప్రాథమికంగా స్వాధీనం చేసుకున్నారు. దీంతో పాటు భారీగా బంగారు, వెండి ఆభరణాలు, వేర్వేరు బ్యాంకులలో ఉన్న రెండు లాకర్లు మరియు బ్యాంక్ డిపాజిట్లను కూడా కనుగొన్నారు, ప్రస్తుతం వాటి లెక్కింపు జరుగుతోంది. పూర్తి విశ్లేషణ మరియు లెక్కింపు పూర్తయిన తర్వాతే అతని అక్రమ ఆస్తుల అసలు విలువ ఎంతో తెలుస్తుందని అధికారులు తెలిపారు. ఈ భారీ దాడులను ఏకకాలంలో నిర్వహించడానికి ఇద్దరు అదనపు ఎస్పీలు, ఐదుగురు డీఎస్పీలు, ఆరుగురు ఇన్‌స్పెక్టర్లు మరియు ఇతర సహాయక సిబ్బంది రంగంలోకి దిగారు. బెహెరా ఆగస్టు 16, 1999న నబరంగ్‌పూర్ జిల్లాలో కేవలం ₹6,000 నెలవారీ జీతంతో జూనియర్ ఇంజనీర్ (సివిల్) గా ప్రభుత్వ ఉద్యోగంలో చేరారు. ఆ తర్వాత ఫిబ్రవరి 12న ఆయనకు అసిస్టెంట్ ఎగ్జిక్యూటివ్ ఇంజనీర్‌గా పదోన్నతి (ప్రమోషన్) లభించింది. అనంతరం కంధమాల్ జిల్లా బాలిగూడలోని ఐటీడీఏలో పోస్టింగ్ ఇచ్చారు. అప్పటి నుండి ఆయన అక్కడే విధులు నిర్వహిస్తున్నారు. విజిలెన్స్ బృందాలు బారిపద మరియు పాండువాలో ఉన్న బెహెరా ఇద్దరు బంధువుల ఇళ్లకు కూడా తనిఖీలను విస్తరించాయి. దర్యాప్తులో భాగంగా బాలిగూడలోని ఐటీడీఏ కార్యాలయంలోని ఆయన ఛాంబర్, కార్యాలయ ఆవరణకు సమీపంలో ఉన్న ఆయన ప్రభుత్వ నివాసంలో కూడా తనిఖీలు చేస్తున్నారు. విజిలెన్స్ వర్గాల సమాచారం ప్రకారం.. సదరు ఇంజనీర్ వద్ద ఉన్న ఆస్తులు చట్టబద్ధమైన ఆదాయం కంటే ఎక్కువ ఉన్నాయా లేదా అని నిర్ధారించడానికి చర, స్థిరాస్తులు, ఆర్థిక లావాదేవీలు, పెట్టుబడులు మరియు ఇతర రికార్డులకు సంబంధించిన పత్రాలను క్షుణ్ణంగా పరిశీలిస్తున్నారు.