దేశంలోని అనేక ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని భారత వాతావరణ శాఖ పలు రాష్ట్రాలకు భారీ వర్షాల హెచ్చరికలు జారీ చేసింది. మరోవైపు వాతావరణ మార్పుల నేపథ్యంలో కేంద్ర ప్రభుత్వం ప్రకృతి వైపరీత్యాల జాబితాలో కీలక మార్పులు చేస్తూ నిర్ణయం తీసుకుంది. ఈశాన్య భారతం లోని అస్సాం, మేఘాలయ రాష్ట్రాల్లో అత్యంత తీవ్ర వర్షపాతం నమోదయ్యే అవకాశం ఉంది. అరుణాచల్ ప్రదేశ్లోనూ భారీ వానలు కురియనున్నాయి. ఉత్తర భారతంలోని ఉత్తరాఖండ్, హిమాచల్ ప్రదేశ్, జమ్మూ కాశ్మీర్లో భారీ వర్షాలు కురిసే సూచనలు ఉన్నాయి. జమ్మూ కాశ్మీర్లో ఇప్పటికే మేఘ విస్ఫోటనాలు, ఆకస్మిక వరదలు సంభవించాయి. ఉత్తరప్రదేశ్లో భారీ వర్షాలు, ఢిల్లీ, హర్యానా, పంజాబ్, చండీగఢ్లలో ఉరుములు, మెరుపులతో కూడిన వర్షాలు పడనున్నాయి. బీహార్, జార్ఖండ్, ఒడిశా, సిక్కిం, పశ్చిమ బెంగాల్లో భారీ వర్షాలు పడతాయని అంచనా. కొంకణ్, గోవా, మధ్య మహారాష్ట్రలో అతి భారీ వర్షాలు; కేరళ, కర్ణాటక, ఆంధ్రప్రదేశ్, తెలంగాణ, తమిళనాడులో వర్షాల ప్రభావం ఉండనుంది. దేశవ్యాప్తంగా ఈ విస్తారమైన వర్షాలకు రుతుపవన ద్రోణి మరియు పలు వాతావరణ ఆవర్తనాలే కారణమని ఐఎండీ వివరించింది. అనూప్గఢ్ నుంచి ఢిల్లీ, షాజహాన్పూర్, బస్తీ మీదుగా నాగాలాండ్ వరకు రుతుపవన ద్రోణి విస్తరించి ఉంది. బంగాళాఖాతం, ఆంధ్రప్రదేశ్ తీర ప్రాంతం, కర్ణాటక ప్రాంతాలలో ఏర్పడిన వాతావరణ వ్యవస్థలు సమృద్ధిగా తేమను అందిస్తూ వర్షాలకు అనుకూల వాతావరణాన్ని సృష్టిస్తున్నాయి. వాతావరణ మార్పుల కారణంగా తీవ్ర వాతావరణ ఘటనలు పెరుగుతుండటంతో కేంద్ర ప్రభుత్వం ఒక కీలక నిర్ణయం తీసుకుంది. ఇందులో భాగంగా వడగాలులు మరియు పిడుగుపాటును అధికారికంగా ‘నోటిఫైడ్ ప్రకృతి వైపరీత్యాల జాబితా’లో చేర్చింది. దీనివల్ల ప్రభావిత రాష్ట్రాలు ఎస్డీఆర్ఎఫ్, ఎన్డీఆర్ఎఫ్ నిధులను ఉపయోగించి తక్షణ సహాయక చర్యలు చేపట్టేందుకు వెసులుబాటు లభిస్తుంది.
