పెట్రోలియం మరియు సహజ వాయువు శాఖ సహాయ మంత్రి సురేష్ గోపి పార్లమెంట్లో ప్రశ్నకు సమాధానంగా మాట్లాడుతూ E20 పెట్రోల్కు అనుకూలంగా ఉన్న వాహనాల సంఖ్యను అంచనా వేయడానికి ఎటువంటి అధ్యయనం నిర్వహించలేదని తెలిపారు. అయితే ఇథనాల్ బ్లెండింగ్ ప్రోగ్రామ్కు శాస్త్రీయ అధ్యయనాలు, ఆటోమొబైల్ తయారీదారులు మరియు సాంకేతిక సంస్థల సంప్రదింపుల మద్దతు ఉందని ఆయన స్పష్టం చేశారు. అందుబాటులో ఉన్న అధ్యయనాలు మరియు పరిశ్రమ డేటా ప్రకారం ఇథనాల్ కలిపిన ఇంధనం ఉపయోగించడానికి సురక్షితమైనదని మంత్రి పేర్కొన్నారు. భారీ పరిశ్రమల మంత్రిత్వ శాఖ ద్వారా ఇటువంటి అసెస్మెంట్ ఏదీ జరగలేదని వారు తెలిపారని మంత్రి సమాధానమిచ్చారు. దేశంలో E20 అనుకూల వాహనాల సంఖ్యపై ఎలాంటి అధికారిక అంచనా అందుబాటులో లేదనేది గమనించదగ్గ అంశం. ఇథనాల్ బ్లెండెడ్ పెట్రోల్ కార్యక్రమాన్ని దశలవారీగా, శాస్త్రీయంగా ప్రామాణీకరించి, చర్చల ప్రక్రియ ద్వారా ప్రవేశపెట్టినట్లు ప్రభుత్వం తెలిపింది. ఈ ప్రక్రియలో నీతి ఆయోగ్, ఆటోమొబైల్ తయారీదారులు, ఆయిల్ మార్కెటింగ్ కంపెనీలు , ఆటోమోటివ్ రీసెర్చ్ అసోసియేషన్ ఆఫ్ ఇండియా , సొసైటీ ఆఫ్ ఇండియన్ ఆటోమొబైల్ మ్యానుఫ్యాక్చరర్స్ , ఇండియన్ ఇన్స్టిట్యూట్ ఆఫ్ పెట్రోలియం మరియు ఇతర సాంకేతిక సంస్థలు భాగస్వామ్యమయ్యాయి. ప్రభుత్వం ఇచ్చిన సమాధానం ప్రకారం… ARAI, SIAM, ఇండియన్ ఆయిల్ కార్పొరేషన్, IIP మరియు ఆటోమొబైల్ తయారీదారులు జరిపిన ల్యాబ్ అధ్యయనాలు మరియు ఫీల్డ్ ట్రయల్స్లో ఇంజిన్ మన్నిక, డ్రైవిబిలిటీ, స్టార్టబిలిటీ, తుప్పు పట్టకుండా ఉండే నిరోధకత, ఉద్గారాలు మరియు ఇంధన సామర్థ్యంతో సహా పలు అంశాలను హైలైట్ చేశారు. E20 ఇంధనంతో నడిచే పాత వాహనాల పనితీరులో పెద్దగా మార్పు రాలేదని, ఎలాంటి అసాధారణ అరుగుదల కనిపించలేదని మోడీ ప్రభుత్వం తెలిపింది. ఈ సమాధానం ప్రకారం, E15+ పెట్రోల్ మూడేళ్లన్నరకు పైగా, E19-E20 ఇంధనం రెండేళ్లన్నరకు పైగా విస్తృతంగా వినియోగంలో ఉంది. ఈ కాలంలో 200 మిలియన్లకు పైగా ద్విచక్ర వాహనాలు, 30 మిలియన్లకు పైగా పెట్రోల్ కార్లు ఈ ఇంధనంతో నడిచాయి. ఇథనాల్ కలపడం వల్ల విస్తృతంగా ఇంజిన్ వైఫల్యాలు లేదా వాహనాలు దెబ్బతిన్నట్లు ఎటువంటి ఆధారాలు లభించలేదని ప్రభుత్వం తెలిపింది.
