ఆర్టిఫిషియల్ ఇంటెలిజెన్స్ రంగాన్ని శాసిస్తున్న అంతర్జాతీయ దిగ్గజ సంస్థ ఓపెన్ ఏఐ డేటా సెంటర్ల ఏర్పాటు కోసం భారత ఐటీ దిగ్గజం టాటా కన్సల్టెన్సీ సర్వీసెస్ విశాఖలో సుమారు 200 ఎకరాల భారీ భూమిని కొనుగోలు చేసినట్లు తెలుస్తోంది. గ్లోబల్ విప్లవంగా మారిన కృత్రిమ మేధ అవసరాలకు అనుగుణంగా గ్రీన్ డేటా సెంటర్లు, ఏఐ ఇన్ఫ్రాస్ట్రక్చర్ను నిర్మించే దిశగా టీసీఎస్ చేపట్టిన ఈ అడుగు తెలుగు రాష్ట్రాల ఐటీ రంగానికి సరికొత్త ఉత్తేజాన్ని ఇచ్చింది. ప్రపంచవ్యాప్తంగా ఓపెన్ ఏఐ కంపెనీ తన డేటా ప్రాసెసింగ్, క్లౌడ్ కంప్యూటింగ్ , ఏఐ మోడల్స్ శిక్షణ కోసం ఆసియా-పసిఫిక్ ప్రాంతంలో భారీ డేటా సెంటర్ కారిడార్ను నెలకొల్పేందుకు ప్రణాళికలు రచిస్తోంది. ఇందులో భాగంగానే విశ్వసనీయ భాగస్వామి అయిన టాటా గ్రూప్తో కలిసి ఈ ప్రాజెక్టుకు శ్రీకారం చుట్టినట్లు ప్రచారం జరుగుతోంది. విశాఖపట్నంలోని భోగాపురం ఇంటర్నేషనల్ ఎయిర్పోర్ట్ కారిడార్ , ఐటీ హిల్స్ పరిసర ప్రాంతాలలో సేకరించిన ఈ 200 ఎకరాల్లో మల్టీ-గిగావాట్ సామర్థ్యం కలిగిన అత్యాధునిక ఏఐ డేటా సెంటర్ పార్కును డెవలప్ చేయనున్నట్లు తెలుస్తోంది. సముద్రతీర నగరం కావడంతో పాటు అంతర్జాతీయ సబ్సీ కేబుల్ లాండింగ్ స్టేషన్లకు అవకాశం ఉండటం, విద్యుత్ , నీటి వసతులు సులభంగా లభ్యమవ్వడం విశాఖకు పెద్ద ప్లస్ పాయింట్గా మారింది. ఈ భారీ ఏఐ డేటా సెంటర్ ఏర్పాటుతో విశాఖపట్నం కేవలం సాధారణ ఐటీ సేవలకే పరిమితం కాకుండా, గ్లోబల్ ఏఐ హబ్గా రూపాంతరం చెందనుంది. నిరంతర క్లౌడ్ సర్వీసులు, హై-పెర్ఫార్మెన్స్ కంప్యూటింగ్ సామర్థ్యంతో రూపుదిద్దుకోబోయే ఈ ప్రాజెక్టు ద్వారా ప్రత్యక్షంగా, పరోక్షంగా వేలాది మంది హై-టెక్ ఇంజనీర్లకు, డేటా సైంటిస్టులకు ఉపాధి అవకాశాలు లభించనున్నాయి. ఇటీవలి కాలంలో ఆంధ్రప్రదేశ్ ప్రభుత్వం డేటా సెంటర్లు , ఏఐ రంగానికి ప్రత్యేక ప్రోత్సాహకాలు ప్రకటిస్తూ, సింగిల్ విండో అనుమతుల ద్వారా బహుళజాతి సంస్థలను ఆకర్షిస్తోంది. టాటా గ్రూప్ వంటి విశ్వసనీయ పారిశ్రామిక సంస్థ, ఓపెన్ ఏఐతో కలిసి విశాఖ వేదికగా డేటా సెంటర్ నెట్వర్క్ను నిర్మించడం ద్వారా మరిన్ని గ్లోబల్ టెక్ కంపెనీలు వైజాగ్ వైపు చూపు చూసే అవకాశముంది.
