అమెరికా, ఓక్లహోమా సిటీ శివారు ప్రాంతమైన ఎడ్మండ్లోని అర్కాడియా లేక్ సమీపంలో యువకులు ఏర్పాటు చేసుకున్న ఒక పార్టీలో ఆదివారం రాత్రి గుర్తు తెలియని వ్యక్తులు విచక్షణారహితంగా కాల్పులు జరిపారు. ఈ ఘటనలో కనీసం 10 మంది తీవ్రంగా గాయపడగా, వారిని వెంటనే వివిధ ఆసుపత్రులకు తరలించారు. క్షతగాత్రుల్లో కొందరి పరిస్థితి విషమంగా ఉన్నట్లు తెలుస్తోంది. మరికొంతమంది బాధితులు స్వయంగా కార్లలో ఆసుపత్రులకు వెళ్లినట్లు పోలీసులు భావిస్తున్నారు. రాత్రి 9 గంటల సమయంలో కాల్పులు జరిగినట్లు సమాచారం అందుకున్న పోలీసులు వెంటనే ఘటనా స్థలానికి చేరుకున్నారు. ప్రస్తుతం మెట్రో ఏరియా అంతటా బాధితులు, సాక్షుల నుంచి వివరాలు సేకరిస్తున్నారు. విహారయాత్రలకు, బోటింగ్ మరియు ఫిషింగ్కు ప్రసిద్ధి చెందిన ఈ ప్రాంతంలో ఒక్కసారిగా కాల్పులు జరగడంతో స్థానికులు భయాందోళనకు గురయ్యారు. కేసు నమోదు చేసిన పోలీసులు నిందితుల కోసం గాలిస్తున్నారు.
