ఆంధ్రప్రదేశ్ ఉప ముఖ్యమంత్రి పవన్ కళ్యాణ్ ప్రాచీన జపనీస్ యుద్ధకళ అయిన 'కెంజుట్సు'లో అధికారికంగా ప్రవేశం పొంది, జపాన్ సంప్రదాయ మార్షల్ ఆర్ట్స్ చరిత్రలో ఒక ప్రత్యేక అధ్యాయాన్ని సృష్టించారు. కెంజుట్సు అనేది కేవలం కత్తిసాము మాత్రమే కాదు. ఇది క్రమశిక్షణ, ఆత్మ నియంత్రణ, మానసిక స్థైర్యం, శరీర-మనస్సు సమతుల్యతకు ప్రతీకగా భావిస్తారు. ఇలాంటి గొప్ప సంప్రదాయాన్ని కలిగిన యుద్ధకళలో పవన్ కళ్యాణ్ అధికారిక గుర్తింపు పొందడం విశేషం. జపాన్లోని అత్యంత గౌరవనీయమైన యుద్ధకళా సంస్థలలో ఒకటైన సోగో బుడో కన్రి కై నుంచి ఆయనకు 'ఫిఫ్త్ డాన్' ర్యాంక్ లభించింది. ఈ స్థాయి సాధారణంగా సంవత్సరాల తరబడి కఠిన సాధన, అంకితభావం, సంప్రదాయాల పట్ల గౌరవం ఉన్నవారికే లభిస్తుంది. విదేశీయుడిగా ఈ స్థాయిని అందుకోవడం మరింత అరుదైన విషయం. పవన్ కళ్యాణ్ చిన్ననాటి నుంచే మార్షల్ ఆర్ట్స్ పట్ల చూపిన ఆసక్తి, నిరంతర సాధన, క్రమశిక్షణ ఈ విజయానికి మూలకారణంగా చెప్పవచ్చు. సినిమా పాత్రల కోసం మాత్రమే కాకుండా, జీవిత విధానంగా ఆయన యుద్ధకళలను అభ్యసించడం ఇప్పుడు అంతర్జాతీయ గుర్తింపుకు దారి తీసింది. , 'పవర్ స్టార్' అనే బిరుదుకు ఇప్పుడు 'టైగర్ ఆఫ్ మార్షల్ ఆర్ట్స్' అనే అంతర్జాతీయ గౌరవం కూడా జతకావడం, ఆయన వ్యక్తిత్వానికి మరో గొప్ప అలంకారంగా నిలిచింది.
