బాక్సింగ్ డే టెస్ట్‌ని కైవశం చేసుకున్న ఇంగ్లాండ్

మెల్‌బోర్న్‌ క్రికెట్‌ గ్రౌండ్‌ వేదికగా యాషెస్‌ సిరీస్‌లో భాగంగా జరిగిన నాలుగో టెస్ట్‌ మ్యాచ్‌ (బాక్సింగ్‌ డే టెస్ట్‌)లో ఆసీస్‌, ఇంగ్లాండ్‌ జట్లు తలపడ్డాయి. ప్రపంచవ్యాప్తంగా అభిమానులు ఆసక్తిగా ఎదురుచూసిన ఈ ప్రతిష్ఠాత్మక మ్యాచ్‌లో ఇంగ్లాండ్‌ 4 వికెట్ల తేడాతో ఘన విజయం సాధించింది. సాధారణంగా ఐదు రోజుల పాటు సాగే టెస్ట్‌ మ్యాచ్‌లు అరుదుగా రెండు రోజుల్లోనే ముగుస్తుంటాయి. కానీ ఈ టెస్ట్‌ మాత్రం బౌలర్ల ఆధిపత్యంతో కేవలం రెండు రోజుల్లోనే ముగియడం విశేషంగా నిలిచింది. రెండో ఇన్నింగ్స్‌లో 175 పరుగుల విజయ లక్ష్యంతో బరిలోకి దిగిన ఇంగ్లాండ్‌ జట్టు దూకుడుగా ఆడింది. 32.2 ఓవర్లలో 6 వికెట్లు మాత్రమే కోల్పోయి 178 పరుగులు చేసి లక్ష్యాన్ని సులభంగా ఛేదించింది. ఓపెనర్లు జాక్‌ క్రాలీ మరియు బెన్‌ డకెట్‌ జట్టుకు అద్భుతమైన ఆరంభాన్ని అందించారు. క్రాలీ 48 బంతుల్లో 3 ఫోర్లు, ఒక సిక్స్‌తో 37 పరుగులు చేయగా, డకెట్‌ కేవలం 26 బంతుల్లోనే 4 ఫోర్లు, ఒక సిక్స్‌తో 34 పరుగులు చేశాడు. వీరిద్దరూ తొలి వికెట్‌కు 42 బంతుల్లోనే 51 పరుగుల భాగస్వామ్యాన్ని నెలకొల్పి, ఆసీస్‌ బౌలర్లపై ఒత్తిడిని తెచ్చారు. ఆరంభంలో వికెట్లు పడిన దశలో జాకబ్‌ బెథెల్‌ సమయోచిత ఇన్నింగ్స్‌తో ఇంగ్లాండ్‌ను గెలుపు దిశగా నడిపించాడు. అతడు 46 బంతుల్లో 5 ఫోర్లతో 40 పరుగులు చేసి కీలక పాత్ర పోషించాడు. అయితే మిడిల్‌ ఆర్డర్‌లో బ్రైడన్‌ కార్స్‌ (6), జో రూట్‌ (15), కెప్టెన్‌ బెన్‌ స్టోక్స్‌ (2) బ్యాటింగ్‌లో విఫలమయ్యారు. చివర్లో హ్యారీ బ్రూక్‌ (2 నాటౌట్‌) మరియు జెమ్మీ స్మిత్‌ (3 నాటౌట్‌) క్రీజులో నిలబడి జట్టుకు విజయాన్ని అందించారు. ఆసీస్‌ బౌలర్లలో స్కాట్‌ బోలాండ్‌, రిచర్డ్‌సన్‌, మిచెల్‌ స్టార్క్‌ తలో రెండు వికెట్లు తీసుకుని పోరాడారు. ఇక రెండో రోజు ఆటను 4/0 ఓవర్‌నైట్‌ స్కోర్‌తో ప్రారంభించిన ఆస్ట్రేలియా జట్టు పూర్తిగా ఇంగ్లాండ్‌ బౌలర్లకు లొంగిపోయింది. కేవలం 34.3 ఓవర్లలోనే 132 పరుగులకు ఆలౌటైంది. తొలి ఇన్నింగ్స్‌లో పొందిన 42 పరుగుల ఆధిక్యంతో కలిపి, ఇంగ్లాండ్‌కు 175 పరుగుల విజయ లక్ష్యాన్ని నిర్దేశించింది. ఆసీస్‌ బ్యాటర్లలో ట్రావిస్‌ హెడ్‌ మాత్రమే కొంత ప్రతిఘటన చూపించాడు. అతడు 67 బంతుల్లో 4 ఫోర్లతో 46 పరుగులు చేసి టాప్‌ స్కోరర్‌గా నిలిచాడు. మిగతా బ్యాటర్లు మాత్రం ఇంగ్లాండ్‌ పేస్‌ దాడికి తట్టుకోలేకపోయారు. స్కాట్‌ బోలాండ్‌ (6), జేక్‌ వెదర్లాడ్‌ (5), లబుషేన్‌ (8), ఉస్మాన్‌ ఖవాజా (0), కామెరూన్‌ గ్రీన్‌ (19), మైఖేల్‌ నీసర్‌ (0), మిచెల్‌ స్టార్క్‌ (0), రిచర్డ్‌సన్‌ (7) వరుసగా వికెట్లు కోల్పోయారు. స్టీవ్‌ స్మిత్‌ మాత్రం 39 బంతుల్లో ఒక ఫోర్‌తో 24 పరుగులు చేసి నాటౌట్‌గా నిలిచాడు. ఇంగ్లాండ్‌ బౌలింగ్‌లో బ్రైడన్‌ కార్స్‌ నాలుగు వికెట్లు తీసి ఆసీస్‌ పతనంలో కీలక పాత్ర పోషించాడు. జోష్‌ టంగ్‌ మరియు బెన్‌ స్టోక్స్‌ తలో రెండు వికెట్లు సాధించగా, గస్‌ అట్కిన్సన్‌ ఒక వికెట్‌ తన ఖాతాలో వేసుకున్నాడు. రెండు ఇన్నింగ్స్‌ల్లో కలిపి మొత్తం 7 వికెట్లు తీసిన జోష్‌ టంగ్‌ అద్భుత ప్రదర్శనకు గాను 'ప్లేయర్‌ ఆఫ్‌ ది మ్యాచ్‌' అవార్డును అందుకున్నాడు.