ప్రపంచవ్యాప్తంగా సంతానోత్పత్తి రేటు గణనీయంగా పడిపోతుండటంపై టెస్లా, స్పేస్ఎక్స్ సీఈవో ఎలాన్ మస్క్ మళ్లీ తీవ్ర ఆందోళన వ్యక్తం చేశారు. ఈ ధోరణి ఇలాగే కొనసాగితే మానవ జాతి క్రమంగా క్షీణించి, చివరికి పూర్తిగా అంతరించిపోయే ప్రమాదం ఉందని మస్క్ హెచ్చరించారు. ఇటీవల జెరోధా సహ వ్యవస్థాపకుడు నిఖిల్ కామత్తో పాడ్కాస్ట్లో మస్క్ ఈ విషయాన్ని మరింత స్పష్టంగా చర్చించారు. 'నువ్వు కూడా తప్పనిసరిగా పిల్లల్ని కనాలి' అంటూ నిఖిల్ కామత్ను డైరెక్ట్గా కోరారు. మానవ మనుగడ కొనసాగాలంటే ప్రతి ఒక్కరూ సంతానోత్పత్తిలో భాగస్వామ్యం వహించాలని ఆయన బలమైన సందేశం ఇచ్చారు. ఈ మాటలు సోషల్ మీడియాలో వేగంగా వైరల్ అవుతున్నాయి. అనేక అభివృద్ధి చెందిన దేశాల్లో ఇప్పటికే జనాభా పెరుగుదల రేటు ఋణాత్మక స్థాయికి చేరిందన్న వాస్తవాన్ని మస్క్ గుర్తు చేశారు. దక్షిణ కొరియా, జపాన్, ఇటలీ వంటి దేశాల్లో పుట్టుక రేటు రికార్డు స్థాయిలో తగ్గిపోవడంతో భవిష్యత్తులో ఆర్థిక, సామాజిక సమస్యలు తీవ్రతరం కానున్నాయని ఆయన ఆవేదన వ్యక్తం చేశారు. మస్క్ స్వయంగా తన జీవితంలో ఈ సిద్ధాంతాన్ని అమలు చేస్తున్నారన్న విషయం కూడా ఆసక్తికరంగా ఉంది. ఆయనకు పదకొండు మంది పిల్లలు ఉన్నారు. 'నేను మాటలతో మాత్రమే కాదు, చేతలతోనూ చూపిస్తున్నాను' అని ఆయన గతంలోనూ పలుమారు చెప్పుకొచ్చారు. మానవ జాతి భవిష్యత్తు కోసం పిల్లలు కనడం ఒక బాధ్యత అని మస్క్ నమ్మకం కొనసాగుతోంది.
