ఆంధ్రప్రదేశ్ లో ఎస్సీ వర్గాల లబ్ధిదారులకు చెందిన ఎన్ఎస్ఎఫ్డీసీ, ఎన్ఎస్కేఎఫ్డీసీ రుణాలపై వడ్డీ మాఫీకి మంత్రివర్గం ఆమోదం తెలిపింది. ఈ నిర్ణయం ద్వారా రాష్ట్రంలోని వందల పేద ఎస్సీ కుటుంబాలకు భారీ ఉపశమనం లభించనుంది. ముఖ్యమంత్రి చంద్రబాబు నాయుడు అధ్యక్షతన జరిగిన సమావేశంలో మొత్తం రూ.41.61 కోట్ల వడ్డీ రుణ భారాన్ని మాఫీ చేయాలని నిర్ణయించారు. ఇది మొత్తం 11,479 మంది లబ్ధిదారులకు ప్రయోజనం చేకూర్చనుంది. అయితే, ఈ మాఫీ పొందాలంటే లబ్ధిదారులు తమ అసలు రుణ మొత్తాన్ని నాలుగు నెలల్లోగా చెల్లించాల్సి ఉంటుంది. నేషనల్ షెడ్యూల్డ్ కాస్ట్స్ ఫైనాన్స్ అండ్ డెవలప్మెంట్ కార్పొరేషన్ , నేషనల్ సఫాయి కర్మచారి ఫైనాన్స్ అండ్ డెవలప్మెంట్ కార్పొరేషన్ పథకాల కింద ఇచ్చిన రుణాలపై పేరుకుపోయిన వడ్డీని మాఫీ చేయడం ద్వారా ఈ లబ్ధిదారులు మళ్లీ కొత్త రుణాలకు అర్హులవుతారు. ఇది వారి ఆర్థిక స్థితిని బలోపేతం చేస్తుంది. వడ్డీని మాఫీ చేయడం ద్వారా ఎస్సీ సామాజిక వర్గాలకు చెందిన వ్యక్తులు స్వయం ఉపాధి, చిన్న వ్యాపారాలు ప్రారంభించుకోగలరు. వారి ఆర్థిక భారం తగ్గుతుంది. ప్రభుత్వం ఈ మాఫీ కోసం నాలుగు నెలల్లో అసలు చెల్లించాలనే కండీషన్ పెట్టడం ద్వారా త్వరగా రుణాల చెల్లింపులు పూర్తవుతాయని అధికారులు భావిస్తున్నారు.
