సోఫాపై ఉన్న ప్రియుడిపైకి దూకిన ప్రియురాలు : ఊపిరాడక మృతి చెందిన ప్రియుడు : ప్రియురాలికి జైలు శిక్ష విధిస్తూ కోర్టు తీర్పు

అమెరికాలో ప్రేమికుల మధ్య ఒక చిన్న వాగ్వాదం ఊహించని విధంగా ఒకరి ప్రాణం తీసింది. విండీ థామస్ అనే మహిళ తన ప్రియుడిపై ఒక్కసారిగా దూకి కూర్చోవడంతో ఊపిరాడక  అతను మరణించాడు. అనేక సంవత్సరాల సుదీర్ఘ కోర్టు విచారణ తర్వాత, ఈ కేసులో నిందితురాలైన మహిళకు తాజాగా న్యాయస్థానం జైలు శిక్ష విధించింది. అమెరికాకు చెందిన 44 ఏళ్ల కీనో బట్లర్ బరువు కేవలం 54 కిలోలు మాత్రమే. అతను 136 కిలోల భారీ బరువు ఉన్న విండీ థామస్‌ అనే మహిళతో కలిసి లివ్-ఇన్ రిలేషన్‌షిప్‌లో ఉంటున్నాడు. గతంలో ఒకరోజు వీరిద్దరి మధ్య జరిగిన ఘర్షణ తీవ్రరూపం దాల్చి పరస్పర దాడికి దారితీసింది. తీవ్ర ఆగ్రహానికి లోనైన విండీ థామస్ సోఫాపై ఉన్న తన ప్రియుడు కీనో బట్లర్‌పైకి ఒక్కసారిగా దూకి, అతనిపై కూర్చుండిపోయింది. దీనివల్ల కీనో బట్లర్ ఛాతీ మరియు మెడ భాగంలో విపరీతమైన ఒత్తిడి ఏర్పడినట్లు విచారణలో తేలింది. భారీ బరువు వల్ల శ్వాస తీసుకోలేక తీవ్ర ఇబ్బంది పడిన కీనో బట్లర్‌ను వెంటనే ఆసుపత్రికి తరలించారు. కానీ అతను అప్పటికే మరణించినట్లు వైద్యులు ధృవీకరించారు. అనంతరం నిర్వహించిన పోస్ట్‌మార్టం పరీక్షల్లో.. ఛాతీ, మెడపై పడిన విపరీతమైన బరువు కారణంగానే శ్వాస నిలిచిపోయి అతను మరణించాడని మెడికల్ రిపోర్ట్ స్పష్టం చేసింది. ఈ మరణానికి సంబంధించి విండీ థామస్‌పై హత్య కేసు నమోదు చేసి పోలీసులు దర్యాప్తు చేపట్టారు. సుదీర్ఘ కాలం పాటు సాగిన కోర్టు విచారణలో ఆమె తన నేరాన్ని అంగీకరించింది. దీనిపై తుది తీర్పునిస్తూ న్యాయస్థానం విండీ థామస్‌కు కనీసం 18 సంవత్సరాల నుండి గరిష్టంగా 36 సంవత్సరాల వరకు జైలు శిక్ష విధిస్తూ తీర్పునిచ్చింది. ఈ పాత కేసు వివరాలు ప్రస్తుతం సోషల్ మీడియాలో మళ్లీ వైరల్ కావడంతో భాగస్వాముల మధ్య జరిగే గృహహింస ఎంతటి ఘోరమైన పరిణామాలకు దారితీస్తుందోనంటూ నెటిజన్లు రకరకాలుగా కామెంట్లు పెడుతున్నారు.