తెలంగాణ రాష్ట్రంలో అమలు చేస్తున్న హ్యామ్ రోడ్ల నిర్మాణానికి సంబంధించి భారీ కుంభకోణం జరుగుతోందని తాము చేసిన ఆరోపణలు ఇప్పుడు నిజమవుతున్నాయని మాజీ మంత్రి హరీశ్ రావు అన్నారు. గతంలో అసెంబ్లీ సమావేశాల వేదికగా ఈ టెండర్లలో జరుగుతున్న అవకతవకలను తాము ఎత్తిచూపినప్పుడు, ప్రభుత్వం తమ విమర్శలను కొట్టిపారేసిందని ఆయన గుర్తు చేశారు. "అప్పట్లో టెండర్లు ఇంకా తెరవకముందే మీరు జోస్యం చెబుతున్నారా?" అంటూ హేళన చేసిన వారు, ఇప్పుడు వెలువడిన వాస్తవాలను చూసి ఏం సమాధానం చెబుతారని ఆయన నిలదీశారు. ప్రస్తుతం హ్యామ్ రోడ్ల టెండర్లు అధికారికంగా తెరిచిన తర్వాత అందులోని లోపాలు స్పష్టంగా కనిపిస్తున్నాయని హరీశ్ రావు వివరించారు. ఈ టెండర్లలో సగటున 25 శాతం మేర అదనపు నిధులను కోట్ చేశారని, ఇది ఖజానా లూటీకి నిదర్శనమని ఆయన ఆరోపించారు. సాధారణంగా ప్రభుత్వ పనుల కోసం పిలిచే టెండర్లలో పోటీ ఉంటే ధరలు తగ్గుతాయని (Less), కానీ ఇక్కడ మాత్రం ప్రభుత్వం నిర్ణయించిన అంచనా వ్యయం కంటే భారీగా పెంచి చూపడం వెనుక పెద్ద కుట్ర దాగి ఉందని ఆయన మండిపడ్డారు. శాఖల వారీగా గణాంకాలను పరిశీలిస్తే, పంచాయతీరాజ్ శాఖలో 17 టెండర్లు, రోడ్లు మరియు భవనాల శాఖలో 34 టెండర్లు అంచనా వ్యయం కంటే ఎక్కువగా దాఖలయ్యాయని ఆయన తెలిపారు. ఆర్ అండ్ బీ శాఖ కంటే పంచాయతీరాజ్ శాఖలో ఈ ఎక్సెస్ శాతం రెండు శాతం ఎక్కువగా ఉండటం గమనార్హమని చెప్పారు. అత్యంత విస్మయకరమైన విషయం ఏమిటంటే, ఒక టెండర్ ఏకంగా అంచనా వ్యయం కంటే 75 శాతం ఎక్కువకు వేశారని, ఇది అవినీతికి పరాకాష్ట అని ఆయన ఆక్షేపించారు. ఈ అదనపు ధరల వల్ల రాష్ట్ర ప్రభుత్వ ఖజానాపై పడే భారం గురించి హరీశ్ రావు విశ్లేషించారు. ఆర్ అండ్ బీ శాఖలో రూ.11 వేల కోట్లతో టెండర్లు పిలిస్తే, ఇప్పుడు అవి దాదాపు రూ.15 వేల కోట్లకు చేరుతున్నాయని వివరించారు. అదేవిధంగా పంచాయతీరాజ్ శాఖలో రూ.6 వేల కోట్లతో పిలిచిన టెండర్లు సుమారు రూ.8 వేల కోట్లకు పెరిగాయని చెప్పారు. ఈ రెండు శాఖలను కలిపి చూస్తే, ప్రభుత్వం ప్రాథమికంగా అనుకున్న దానికంటే దాదాపు రూ.5,000 కోట్ల అదనపు భారం రాష్ట్ర ఖజానాపై పడబోతోందని ఆయన ఆవేదన వ్యక్తం చేశారు. జాతీయ రహదారుల టెండర్ల విధానంతో పోల్చుతూ హరీశ్ రావు ప్రభుత్వ వైఫల్యాన్ని ఎండగట్టారు. సాధారణంగా కేంద్ర ప్రభుత్వం జాతీయ రహదారుల కోసం టెండర్లు పిలిచినప్పుడు, కాంట్రాక్టర్ల మధ్య పోటీ వల్ల అంచనా వ్యయం కంటే 25 శాతం తక్కువ ధరలకే టెండర్లు ఖరారు అవుతుంటాయని గుర్తు చేశారు. కానీ రాష్ట్రంలోని హ్యామ్ రోడ్ల విషయంలో అందుకు పూర్తి భిన్నంగా 25 శాతం ఎక్సెస్ వెళ్లడం వెనుక పాలకులు తమకు కావాల్సిన వారికి దోచిపెట్టే ప్రయత్నం చేస్తున్నారని హరీశ్ రావు ఘాటుగా విమర్శించారు. దీనిపై సమగ్ర విచారణ జరిపించాలని ఆయన డిమాండ్ చేశారు.
