అసూస్ నుంచి వీఎం 441 ఏఐఓ ASUS ఆల్-ఇన్-వన్ డెస్క్‌టాప్ ను విడుదల

దేశీయ మార్కెట్లో అసూస్ వీఎం 441 ఏఐఓ ASUS ఆల్-ఇన్-వన్ డెస్క్‌టాప్ ను విడుదల చేసింది. బయటకు చూస్తే సాధారణ మానిటర్‌లా కనిపించే ఇది  లోపల పూర్తిస్థాయి AI PC సామర్థ్యాలను కలిగి ఉంది. క్వాల్‌కామ్ స్నాప్‌డ్రాగన్ X ప్రాసెసర్‌తో వచ్చిన పరిశ్రమలోని తొలి ఆల్-ఇన్-వన్ డెస్క్‌టాప్ ఇదేనని ఆసుస్ ప్రకటించింది. ఈ కొత్త డివైస్ కోపైలట్+ PC కేటగిరీకి చెందినది. ముఖ్యంగా ఆన్-డివైస్ AI ఫీచర్లను దృష్టిలో పెట్టుకుని దీనిని రూపొందించారు. ఇందులో 24 అంగుళాల ఫుల్ HD టచ్‌స్క్రీన్ డిస్‌ప్లే, 45 TOPS వరకు AI పనితీరును అందించే న్యూరల్ ప్రాసెసింగ్ యూనిట్, అలాగే డాల్బీ అట్మోస్ సపోర్ట్ ఉన్నాయి. ఇది రెండు స్టోరేజ్ వేరియంట్లలో అందుబాటులోకి వచ్చింది. 512GB PCIe 4.0 SSD వేరియంట్ ధర రూ.1,01,990, 1TB SSD వేరియంట్ ధర రూ.1,11,990. ఇది ఆసుస్ ఎక్స్‌క్లూజివ్ స్టోర్లు, క్రోమా, ROG స్టోర్లు, ఇతర అధీకృత రిటైల్ భాగస్వాముల వద్ద లభిస్తుంది. అలాగే ఆసుస్ ఈ-షాప్, అమెజాన్, ఫ్లిప్‌కార్ట్ వంటి ఈ-కామర్స్ ప్లాట్‌ఫారమ్‌లలో కూడా కొనుగోలు చేయవచ్చు.ఈ AiO PCలో 24 అంగుళాల ఫుల్ HD టచ్‌స్క్రీన్ డిస్‌ప్లేను అందించారు. ఇది 100 శాతం sRGB కలర్ గామట్ కవరేజ్‌తో పాటు 300 నిట్స్ బ్రైట్‌నెస్‌కు మద్దతు ఇస్తుంది. 178 డిగ్రీల వైడ్ వ్యూయింగ్ యాంగిల్స్‌తో మెరుగైన వీక్షణ అనుభూతిని అందిస్తుంది. అల్ట్రా-స్లిమ్ డిజైన్‌తో వచ్చిన ఈ పరికరానికి 22mm మెటాలిక్ స్టాండ్‌ను జత చేశారు. దీర్ఘకాలం ఉపయోగించేందుకు సౌకర్యంగా ఉండేలా అడ్జస్టబుల్ టిల్ట్ మెకానిజం కూడా అందించారు.ఈ డివైస్‌కు శక్తినిచ్చేది క్వాల్‌కామ్ స్నాప్‌డ్రాగన్ X ప్లాట్‌ఫామ్. ఇందులోని NPU 45 TOPS వరకు AI పనితీరును అందిస్తుంది. దీంతో లోకల్ AI టాస్కులు, మల్టీటాస్కింగ్, AI ఆధారిత వర్క్‌ఫ్లోలను మరింత వేగంగా నిర్వహించవచ్చని కంపెనీ చెబుతోంది. ఇది కోపైలట్+ PC ఫీచర్లకు కూడా మద్దతు ఇస్తుంది. AI ఆధారిత కెమెరా మెరుగుదలలు, టూ-వే AI నాయిస్ క్యాన్సిలేషన్ వంటి ఫీచర్లు వీడియో కాల్స్, ఆన్‌లైన్ మీటింగ్స్ సమయంలో బ్యాక్‌గ్రౌండ్ శబ్దాన్ని తగ్గించడంలో సహాయపడతాయి. ఆడియో కోసం డాల్బీ అట్మోస్ ట్యూనింగ్‌తో కూడిన డ్యూయల్ 3W స్టీరియో స్పీకర్లను అందించారు. వీడియో కాలింగ్ కోసం 5MP IR కెమెరా ఉంది. ఇది విండోస్ హలో ఫేస్ రికగ్నిషన్‌కు మద్దతు ఇస్తుంది. అదనంగా ప్రైవసీ కోసం ఫిజికల్ కెమెరా షట్టర్ కూడా ఇచ్చారు. ఆసుస్ VM441 AiOతో పాటు వైర్‌లెస్ కీబోర్డ్, మౌస్ కూడా లభిస్తాయి. సాఫ్ట్‌వేర్ ప్యాకేజీలో మైక్రోసాఫ్ట్ ఆఫీస్ హోమ్ 2024కు జీవితకాల యాక్సెస్, అలాగే మైక్రోసాఫ్ట్ 365 బేసిక్‌కు ఒక సంవత్సరం సబ్‌స్క్రిప్షన్ అందిస్తున్నారు. అదనంగా 100GB వన్‌డ్రైవ్ క్లౌడ్ స్టోరేజ్ కూడా లభిస్తుంది.