ఫిబ్రవరి 28వ తేదీన అమెరికా-ఇజ్రాయెల్ జరిపిన భీకర వైమానిక దాడుల్లో తన తండ్రి అలీ ఖమేనీ మరణించగా, అదే దాడిలో తీవ్రంగా గాయపడిన 56 ఏళ్ల మోజ్తబా ప్రస్తుతం అపస్మారక స్థితిలో ఉన్నట్లు అంతర్జాతీయ మీడియా కథనాలు వస్తున్నాయి. ప్రస్తుతం ఆయన ఇరాన్ మతపరమైన రాజధానిగా పిలవబడే పవిత్ర నగరం కోమ్‌లో అత్యంత రహస్యంగా చికిత్స పొందుతున్నట్లు సమాచారం. అలాగే ఆయన ఎలాంటి నిర్ణయాలు కూడా తీసుకోలేని స్థితిలో ఉన్నట్లు తెలుస్తోంది. అంతర్జాతీయ మీడియా కథనాల ప్రకారం.. మొజ్తబా ఖమేనీ పరిస్థితి అత్యంత దారుణంగా ఉంది. అమెరికా, ఇజ్రాయెల్ గూఢచారి సంస్థలు సేకరించిన సమాచారం మేరకు.. ఆయన ప్రస్తుతం ఎలాంటి ప్రభుత్వ నిర్ణయాలు తీసుకోలేని స్థితిలో ఉన్నారు. ఆయన కోమాలో ఉన్నారా లేదా తీవ్రమైన శారీరక గాయాలతో బాధ పడుతున్నారా అనే దానిపై భిన్న కథనాలు వినిపిస్తున్నాయి. కాళ్లు విరగాయని అలాగే ముఖానికి తీవ్ర గాయాలు అయ్యాయని కొందరు చెబుతుంటే.. ఆయన ప్రాణాపాయ స్థితిలో ఉన్నారని మరికొన్ని నివేదికలు పేర్కొంటున్నాయి. మార్చి మొదట్లో తన తండ్రి వారసుడిగా బాధ్యతలు చేపట్టినప్పటి నుంచి మోజ్తబా ఖమేనీ ప్రజల ముందుకు రాలేదు. కనీసం ఆయన గొంతుతో కూడిన ఆడియో రికార్డింగ్ కూడా విడుదల కాలేదు. దీనికి బదులుగా ఇరాన్ ప్రభుత్వ టెలివిజన్ ఆయన పేరిట కొన్ని ప్రకటనలను విడుదల చేస్తోంది. సోమవారం రోజు కూడా ఆయన వార్ రూమ్‌లోకి నడుచుకుంటూ వచ్చి ఇజ్రాయెల్ మ్యాప్‌ను విశ్లేషిస్తున్నట్లు ఒక వీడియోను విడుదల చేశారు. అయితే అది పూర్తిగా ఏఐతో సృష్టించిన వీడియో అని నిపుణులు తేల్చేశారు. ఇది మోజ్తబా పరిస్థితిపై వస్తున్న అనుమానాలకు మరింత బలం చేకూరుస్తోంది. పవిత్ర నగరం కోమ్‌లో అలీ ఖమేనీ అంత్యక్రియల కోసం భారీ సమాధి నిర్మాణ పనులు జరుగుతున్నట్లు శాటిలైట్ సమాచారం ద్వారా తెలుస్తోంది. ఇక్కడ విశేషం ఏమిటంటే.. కేవలం ఒక్కరి కోసమే కాకుండా ఒకటి కంటే ఎక్కువ సమాధుల కోసం స్థలాన్ని సిద్ధం చేస్తున్నారట. అదే దాడిలో మోజ్తబా తల్లి, భార్య, ఒక కుమారుడు కూడా మరణించారు. ఇప్పుడు మోజ్తబా పరిస్థితి కూడా విషమంగా ఉండటంతో.. ఆయనను కూడా అక్కడే ఖననం చేసేందుకు ఏర్పాట్లు జరుగుతున్నాయా? అన్న సందేహాలు వ్యక్తం అవుతున్నాయి. ఇరాన్ అధికారులు మాత్రం తమ సుప్రీం లీడర్ క్షేమంగా ఉన్నారని, దేశ బాధ్యతలను ఆయనే పర్యవేక్షిస్తున్నారని నొక్కి చెబుతున్నారు. అయితే వాస్తవ పరిస్థితులు దానికి భిన్నంగా ఉండటంతో ఇరాన్ నాయకత్వంలో గందరగోళం నెలకొంది.
