3

తెలంగాణ అగ్రిగోల్డ్ బాధితులకు చెల్లింపులు : బాండ్ల వెరిఫికేషన్ కోసం 10 ప్రత్యేక కేంద్రాలను ఏర్పాటు చేసిన సీఐడీ

తెలంగాణలో రూ.447 కోట్ల అగ్రిగోల్డ్ కుంభకోణానికి సంబంధించి బాధితుల డిపాజిట్ల వివరాలను నిర్ధారించేందుకు జిల్లాల వారీగా, మండలాల వారీగా బాండ్ల వెరిఫికేషన్ షెడ్యూల్‌ను సీఐడీ అధికారికంగా విడుదల చేసింది. ఈ నెల 25వ తేదీ నుంచి రాష్ట్రవ్యాప్తంగా ఏర్పాటు చేసిన 10 ప్రత్యేక కేంద్రాల్లో అసలు బాండ్లు, రశీదుల ధృవీకరణ ప్రక్రియ ప్రారంభం కానుండటంతో బాధితుల్లో మళ్లీ ఆశలు చిగురించాయి. ఈ వెరిఫికేషన్ ప్రక్రియలో డిపాజిటర్లతో పాటు, ఒకవేళ డిపాజిటర్ మరణించి ఉంటే వారి నామినీలు లేదా చట్టపరమైన వారసులు కూడా పాల్గొనవచ్చని సీఐడీ స్పష్టం చేసింది. బాధితుల సౌకర్యార్థం హైదరాబాద్ , వరంగల్, కరీంనగర్, ఖమ్మం, కొత్తగూడెం, మహబూబ్‌నగర్, నల్గొండ, మంచిర్యాల, నిజామాబాద్, మెదక్ జిల్లా కేంద్రాల్లో ఈ 10 వెరిఫికేషన్ సెంటర్లను ఏర్పాటు చేశారు. ముఖ్యంగా, ఒరిజినల్ బాండ్లను కేవలం అధికారుల పరిశీలన కోసం మాత్రమే తీసుకురావాలని, వాటిని అక్కడే అప్పగించాల్సిన అవసరం లేదని సీఐడీ భరోసా ఇచ్చింది. బాధితులందరూ తమకు కేటాయించిన తేదీలు, కేంద్రాలను చూసుకుని తగిన ధృవపత్రాలతో హాజరుకావాలని సూచించారు. మరోవైపు పొరుగు రాష్ట్రమైన ఆంధ్రప్రదేశ్‌లోనూ అగ్రిగోల్డ్ బాధితులకు పూర్తి న్యాయం చేసేందుకు కూటమి ప్రభుత్వం వేగంగా అడుగులు వేస్తోంది. ఈడీ జప్తు చేసి అప్పగించిన వేల కోట్ల రూపాయల విలువైన అగ్రిగోల్డ్ ఆస్తులతో పాటు, సంస్థకు చెందిన సుమారు 6,330 ఎకరాల భూములను వేలం వేసి ఆ నిధులతో బాధితులందరికీ డబ్బులు చెల్లించాలని ఏపీ మంత్రివర్గ ఉపసంఘం కీలక నిర్ణయం తీసుకుంది. దీనికోసం ఏపీలోనూ ఇప్పటికే బాండ్ల వెరిఫికేషన్ ప్రక్రియను ముమ్మరం చేయడంతో పాటు, ప్రత్యేక కోర్టుల ద్వారా న్యాయపరమైన అడ్డంకులను తొలగించి సాధ్యమైనంత త్వరగా పరిహారం అందించేందుకు కార్యాచరణ సిద్ధం చేసింది. అటు ఆంధ్రప్రదేశ్‌లో ఆస్తుల వేలం ద్వారా నిధుల సమీకరణకు సన్నాహాలు జరుగుతుండటం, ఇటు తెలంగాణలో నవంబర్ 25 నుంచి సీఐడీ ఆధ్వర్యంలో బాండ్ల వెరిఫికేషన్ షెడ్యూల్ ప్రారంభం కావడం రెండు తెలుగు రాష్ట్రాల్లోని లక్షలాది మంది అగ్రిగోల్డ్ బాధితులకు పెద్ద ఊరటనిస్తోంది. దళారుల మాటలు నమ్మి మోసపోకుండా, బాధితులు నేరుగా సీఐడీ ఏర్పాటు చేసిన అధికారిక కేంద్రాలకు వెళ్లి తమ బాండ్లను ధృవీకరించుకోవాలని అధికారులు విజ్ఞప్తి చేస్తున్నారు.

Related Post

Previous
Next Post »