బీహార్ మాజీ ముఖ్యమంత్రి నితీశ్ కుమార్‌పై అవినీతిపరుడంటూ తీవ్ర స్థాయిలో విమర్శలు గుప్పించిన ప్రముఖ వ్యూహకర్త, జన్ సురాజ్ అధినేత ప్రశాంత్ కిశోర్, ఇప్పుడు అనూహ్యంగా యూటర్న్ తీసుకున్నారు. నితీశ్ కుమార్ రాష్ట్రంలోని ‘మోస్ట్ సెన్సిబుల్’ (అత్యంత సమర్థవంతమైన, వివేకవంతమైన) నాయకులలో ఒకరని, బీహార్ రాజకీయాల్లో టాప్-10 ఉత్తమ నాయకుల జాబితా తీస్తే అందులో ఆయన ఖచ్చితంగా ఉంటారని కొనియాడారు. నితీశ్ ప్రభుత్వంలో మరియు జేడీయు పార్టీలో 2016 నుండి 2018 మధ్య కాలంలో పలు కీలక పదవుల్లో పనిచేసిన అనుభవం ఉన్న పి కే, ఇప్పుడు మళ్లీ నితీశ్ వైఖరిని సమర్థించడం పట్ల రాజకీయ వర్గాల్లో ఆసక్తికర చర్చ మొదలైంది. ఇటీవల ఒక జేడీయు ఎమ్మెల్యే “నితీశ్ కుమార్ కోసం 9 మందిని చంపాను” అంటూ చేసిన వ్యాఖ్యలు బీహార్ వ్యాప్తంగా తీవ్ర వివాదాస్పదమైన సంగతి తెలిసిందే. అయితే ఈ వ్యవహారంలోనూ ప్రశాంత్ కిశోర్ నితీశ్ కుమార్‌కు మద్దతుగా నిలిచారు. ఆ ఎమ్మెల్యే చేసిన వ్యాఖ్యలను మీడియా మరియు ప్రతిపక్షాలు తప్పుగా అర్థం చేసుకున్నాయని, సందర్భోచితంగా చూడకుండా అనవసర రచ్చ చేశారని వెనకేసుకొచ్చారు. ఒకప్పుడు నితీశ్ పాలనపై విరుచుకుపడిన పీకే, ఇప్పుడు ఉన్నట్టుండి ఆయనను సమర్థిస్తూ మాట్లాడటం వెనుక రాబోయే ఎన్నికలకు సంబంధించి ఏవైనా కొత్త రాజకీయ సమీకరణాలు దాగి ఉన్నాయా అనే అనుమానాలు వ్యక్తమవుతున్నాయి.
