అమెరికా ఉపాధ్యక్షుడు జేడీ వాన్స్ హెచ్‌-1బీ వీసాదారులను ఉద్దేశించి చేసిన వ్యాఖ్యలపై వివరణ ఇచ్చారు. 'ఇండెంచర్డ్ సర్వెంట్స్‌' అనే పదప్రయోగం సరైనది కాదని అంగీకరిస్తూనే, తన విమర్శలు వీసాదారులపై కాకుండా అమెరికా కంపెనీలు, వీసా వ్యవస్థలోని లోపాలపై ఉద్దేశించినవని అన్నారు. హెచ్‌-1బీ వీసాలపై జరిగిన చర్చలో వాన్స్ మాట్లాడుతూ కొందరు ఉద్యోగులు తమ యజమానితో విభేదించినా లేదా ఫిర్యాదు చేసినా ఉద్యోగం కోల్పోయే ప్రమాదం ఉందని, అలా జరిగితే దేశం విడిచి వెళ్లాల్సిన పరిస్థితి ఏర్పడవచ్చని పేర్కొన్నారు. ఈ పరిస్థితి ఉద్యోగులపై యజమానులకు అధికారం పెంచుతోందని అభిప్రాయపడ్డారు. తక్కువ వేతనాలతో విదేశీ ఉద్యోగులను నియమించుకుని అమెరికా కార్మికులను తొలగించే కంపెనీల విధానాన్ని తాను ప్రశ్నిస్తున్నానని వాన్స్ వివరించారు. తన వ్యాఖ్యల తీరు సరిగ్గా లేదని అంగీకరిస్తూ, సమస్య వ్యక్తుల్లో కాకుండా వారిని ఇలాంటి పరిస్థితుల్లోకి నెట్టే కంపెనీలు, వీసా వ్యవస్థలో ఉందని తెలిపారు. ఈ నెల ప్రారంభంలో వీసా మోసాలకు సంబంధించిన విలేకరుల సమావేశంలో వాన్స్ హెచ్‌-1బీ వీసాలపై తీవ్ర వ్యాఖ్యలు చేశారు. అమెరికా ఉద్యోగులను తొలగించి, వారి స్థానాల్లో విదేశీ ఉద్యోగులను నియమించుకోవడం ద్వారా కొన్ని సంస్థలు వేతనాలను తగ్గిస్తున్నాయని ఆరోపించారు. హెచ్‌-1బీ వీసాపై పనిచేసే ఉద్యోగులకు అదే హోదాలో పనిచేసే అమెరికా పౌరుల కంటే తక్కువ వేతనాలు లభిస్తున్నాయని వాన్స్ వాదించారు. సాధారణంగా హెచ్‌-1బీ ఉద్యోగులు అమెరికా ఉద్యోగుల కంటే 20 వేల డాలర్లు తక్కువ సంపాదిస్తున్నారని, విదేశీ అవుట్‌సోర్సింగ్ సంస్థల ద్వారా వచ్చినవారి విషయంలో ఈ వ్యత్యాసం 48 వేల డాలర్ల వరకు ఉంటుందని ఆయన పేర్కొన్నారు. వాన్స్ తాజా వివరణతో ఈ వివాదంలో ఆయన ఉద్దేశం, వ్యాఖ్యల ప్రభావంపై చర్చ కొనసాగుతోంది. ఒకవైపు అమెరికా ఉద్యోగుల ప్రయోజనాలను కాపాడాలని ఆయన వాదిస్తుండగా, మరోవైపు హెచ్‌-1బీ వీసాదారుల సేవలు, నైపుణ్యాలను అవమానకరమైన పదాలతో వర్ణించడం సరికాదని భారత్ స్పష్టం చేసింది. హెచ్‌-1బీ వీసా విధానం, విదేశీ నిపుణుల నియామకం, అమెరికా ఉద్యోగుల ప్రయోజనాల మధ్య సమతుల్యత ఎలా సాధించాలనే అంశం ఇరు దేశాల మధ్య చర్చనీయాంశంగా మారింది.
