ఒక్కరోజులో ఆల్ఫాబెట్ మార్కెట్ విలువ నుంచి 280 బిలియన్ డాలర్లు ఆవిరయ్యాయి. భారత కరెన్సీలో ఇది దాదాపు రూ.26 లక్షల కోట్లకు సమానం. కంపెనీ త్రైమాసిక ఫలితాలు వాల్‌స్ట్రీట్ అంచనాలను అందుకోకపోవడమే ఈ పరిణామానికి ప్రధాన కారణంగా కనిపిస్తోంది. ఆల్ఫాబెట్ ఆదాయం పెరిగినప్పటికీ, లాభాలు మాత్రం మార్కెట్ విశ్లేషకుల అంచనాలను అందుకోలేకపోయాయి. దీంతో ఇన్వెస్టర్లు షేర్ల విక్రయాలకు మొగ్గుచూపారు. ఫలితంగా కంపెనీ షేర్లపై అమ్మకాల ఒత్తిడి పెరిగి భారీ పతనం నమోదైంది. ప్రస్తుతం ఆర్టిఫిషియల్ ఇంటెలిజెన్స్ (ఏఐ) సేవలకు డిమాండ్ పెరుగుతోంది. గూగుల్ కూడా ఈ రంగంలో తన ఉనికిని బలోపేతం చేసుకునేందుకు భారీగా పెట్టుబడులు పెడుతోంది. క్లౌడ్ సేవల విస్తరణతో పాటు ఏఐ మౌలిక సదుపాయాల అభివృద్ధికి ఖర్చులు పెరుగుతున్నాయి. అయితే ఈ పెట్టుబడులు ఆశించిన స్థాయిలో లాభాలను అందిస్తాయా? అనే సందేహాలు మదుపర్లలో వ్యక్తమవుతున్నాయి. ఏఐ రంగంలో అవకాశాలు విస్తరిస్తున్నప్పటికీ, భారీ పెట్టుబడులను ఆదాయంగా, లాభాలుగా మార్చుకోవడం కంపెనీలకు కీలకంగా మారింది. ఈ నేపథ్యంలో ఆల్ఫాబెట్ షేర్ల పతనం టెక్ రంగంలో ఏఐ పెట్టుబడులు, వాటి రాబడులపై మరోసారి చర్చకు తెరలేపింది. రానున్న త్రైమాసికాల్లో కంపెనీ ఆర్థిక పనితీరు, ఏఐ పెట్టుబడుల నుంచి వచ్చే ఫలితాలు షేర్ల దిశను నిర్ణయించనున్నాయి.
