దేశంలో నవంబర్ 1 నుంచి ప్రతీ మొబైల్ స్క్రీన్‌పై ఫోన్ కాల్ చేసేవారి పేరు ప్రత్యక్షం కానుంది. సపోర్ట్ చేసే నెట్‌వర్క్‌లలో నంబర్‌తో పాటు కాలర్ పేరు కూడా కనిపిస్తుంది. 4జీ, ఆపై నెట్‌వర్క్‌లలో కాలర్ నేమ్ ప్రజెంటేషన్ ఫీచర్‌ను అన్ని సర్వీస్ ఏరియాల్లో తప్పనిసరిగా అందుబాటులోకి తేవాలని టెలికాం శాఖ జియో, ఎయిర్‌టెల్, విఐ, బీఎస్‌ఎన్‌ఎల్‌లను ఆదేశించింది. దీనికి సంబంధించిన ట్రయల్స్ ఇప్పటికే పూర్తయ్యాయి. యూజర్లు ఎలాంటి ప్రత్యేక యాప్‌లు డౌన్‌లోడ్ చేసుకోవాల్సిన పనిలేదు, సైన్-అప్ చేయాల్సిన అవసరమూ లేదు. మీరు ఆ నంబర్‌ను మీ కాంటాక్ట్స్‌లో సేవ్ చేసుకుంటే, మీరు ఇచ్చిన పేరే కనిపిస్తుంది. ఒకవేళ సేవ్ చేయకపోతే.. ఆ నంబర్ టెలికాం కంపెనీ కేవైసీ రికార్డుల్లో ఎవరి పేరుపై ఉందో ఆ పేరు స్క్రీన్‌పై పడుతుంది. ఇంటర్నేషనల్ కాల్స్ వస్తే మాత్రం కేవలం "ఇంటర్నేషనల్ కాల్" అని మాత్రమే కనిపిస్తుంది. ప్రైవసీ భద్రతకు కూడా కేంద్రం పెద్దపీట వేసింది. కాల్ పూర్తయిన తర్వాత ఆ పేరు సిస్టమ్‌లో సేవ్ కాకుండా చూడాలని టెలికాం శాఖ స్పష్టం చేసింది. ఇక నంబర్ దాచేసే సదుపాయం వాడుతున్న వారి పేర్లు గోప్యంగానే ఉంటాయి. కాల్ వస్తున్నప్పుడు స్క్రీన్‌పై కనిపించే పేరు.. మీరు కనెక్షన్ తీసుకున్నప్పుడు ఇచ్చిన కస్టమర్ అప్లికేషన్ ఫారమ్ (CAF) లేదా కేవైసీ రికార్డుల ఆధారంగా వస్తుంది. ఒకవేళ అందులో మీ పేరు తప్పుగా ఉంటే, దాన్ని సరిచేసుకోవచ్చు. మీ టెలికాం ఆపరేటర్ యాప్ ద్వారా గానీ, దగ్గర్లోని స్టోర్‌కి వెళ్లి గానీ సరైన ఐడీ ప్రూఫ్ సమర్పించి కేవైసీ వివరాలు అప్‌డేట్ చేయాలి. ఎయిర్‌టెల్, జియో యూజర్లు యాప్‌లోనే ప్రొఫైల్ వివరాలను ఎడిట్ చేసుకోవచ్చు. అయితే లీగల్ నేమ్ చేంజ్ (చట్టబద్ధమైన పేరు మార్పు) కోసం మాత్రం నేరుగా స్టోర్‌కి వెళ్లాల్సి ఉంటుంది. విఐ కొన్ని నిబంధనలతో కనెక్షన్ ఓనర్ షిప్ ట్రాన్స్‌ఫర్‌కు అనుమతి ఇస్తుంది. అంతేకాకుండా, దీనికి సంబంధించి ఫిర్యాదులు స్వీకరించడానికి కంపెనీలు ప్రత్యేక కస్టమర్ కేర్ ఛానెళ్లను ఏర్పాటు చేయాల్సి ఉంటుంది. డ్యూయల్ సిమ్ ఫోన్ల లో ఏ సిమ్‌కి అయితే కాల్ వస్తుందో, ఆ నెట్‌వర్క్ ద్వారానే కాలర్ పేరు మొబైల్ స్క్రీన్‌పై కనిపిస్తుంది. CNAP ఫీచర్ మొదటగా IP వాయిస్ నెట్‌వర్క్‌లపై పనిచేస్తుంది. పాత 2G/3G నెట్‌వర్క్‌లలో ఇది తర్వాత అందుబాటులోకి వస్తుంది. గూగుల్ ఫోన్ డయలర్ ఈ పేరును స్పష్టంగా చూపుతుంది, కానీ కొన్ని కంపెనీల ఓన్ డయలర్లలో స్వల్ప ఆలస్యం కావచ్చు. ఇక కాలర్ పేరు తెలుగులో కనిపిస్తుందా లేదా అనేది మీ మొబైల్‌లోని ఫోంట్‌లు, టెలికాం రికార్డుల్లోని లాంగ్వేజ్ స్క్రిప్ట్‌పై ఆధారపడి ఉంటుంది. ఈ కొత్త సీఎన్‌ఏపీ వ్యవస్థ అందుబాటులోకి వచ్చినా 'ట్రూకాలర్' యాప్ కూడా పనిచేస్తుంది. కాకపోతే, టెలికాం ఆపరేటర్లు నేరుగా ఆధార్/కేవైసీలో ఉన్న అసలైన పేర్లను చూపుతారు. ట్రూకాలర్ మాత్రం స్పామ్ అలర్ట్‌లు, ఇతర వివరాలను అందిస్తుంది. ఈ విధానం వల్ల ఫేక్ కాల్స్, విషింగ్ సైబర్ మోసాలు తగ్గే అవకాశముంది. విదేశాల నుంచి వచ్చే కాల్స్‌ను సులభంగా గుర్తించవచ్చు. అయితే, ఇతరుల పేర్లపై ఉన్న సిమ్‌లు వాడటం, కంపెనీల ఎంటర్‌ప్రైజ్ నంబర్లు, పీబీఎక్స్ లైన్ల వల్ల కొన్నిసార్లు పేర్లలో అయోమయం ఉండవచ్చు. డేటాబేస్ అప్‌డేట్ అయ్యే కొద్దీ ఇవి సరిపోతాయి. ఒకవేళ మీ ఫోన్‌లో పేర్లు సరిగ్గా కనిపించకపోతే.. VoLTE ఆన్ ఉందో లేదో చూసుకోండి, డయలర్ యాప్‌ను అప్‌డేట్ చేయండి లేదా రెండవ సిమ్‌ను ప్రయత్నించండి.
