3

పంజాబ్ అసెంబ్లీ ఎన్నికల సమరానికి సిద్ధమవుతున్న ఆమ్ ఆద్మీ పార్టీ ప్రభుత్వం : అన్ని వర్గాల ఓటర్లను ఆకట్టుకునేలా పథకాల ప్రకటన

పంజాబ్ అసెంబ్లీ ఎన్నికలకు ఏడాది కంటే తక్కువ సమయం ఉన్న నేపథ్యంలో, ముఖ్యమంత్రి భగవంత్ మాన్ నేతృత్వంలోని ఆమ్ ఆద్మీ పార్టీ ప్రభుత్వం అన్ని వర్గాల ఓటర్లను ఆకట్టుకునేలా భారీ సంక్షేమ, అభివృద్ధి పథకాల పరంపరను వేగవంతం చేసింది. మహిళలు, యువత, రైతులు, విద్యుత్ వినియోగదారులు, వృద్ధులను లక్ష్యంగా చేసుకుని 2027 ఎన్నికల సమరానికి ప్రభుత్వం సిద్ధమవుతోంది. రూ. కోటి క్విజ్ పోటీ: పంజాబ్ చరిత్ర, సంస్కృతి, భౌగోళిక అంశాలు, పాలనపై యువతకు అవగాహన కల్పించడంతో పాటు ప్రభుత్వ ఉద్యోగాల సన్నద్ధతను ప్రోత్సహించేందుకు సీఎం మాన్ నిన్న  'పంజాబ్ దా కరోడ్‌పతి' పేరుతో రాష్ట్రవ్యాప్త క్విజ్ పోటీని ప్రారంభించిన సంగతి తెలిసిందే. దీని విజేతకు రూ. కోటి నగదు బహుమతి అందించనున్నారు. క్రీడా మైదానాలు: యువతను డ్రగ్స్ బారి నుంచి కాపాడి క్రీడల వైపు మళ్లించేందుకు రూ. 1,500 కోట్ల ప్రతిపాదిత పెట్టుబడితో 'పెండూ ఖేడ్ మైదాన్' కింద గ్రామీణ క్రీడా మైదానాలను నిర్మిస్తోంది. మొత్తం 3,100 మైదానాల లక్ష్యానికి గాను, తాజాగా మరో 1,000 గ్రౌండ్లను ప్రారంభించడంతో అందుబాటులోకి వచ్చిన మైదానాల సంఖ్య 1,764కు చేరింది. వీటితో పాటు క్రీడా కిట్లు, కోచింగ్ సదుపాయాలను కూడా కల్పిస్తోంది. 2022 ఎన్నికల ముందు ఇచ్చిన ప్రధాన హామీని నిలబెట్టుకుంటూ, జూలై 2026లో 'ముఖ్యమంత్రి మావాన్ ధీయాన్ సత్కార్ యోజన' పథకాన్ని ప్రభుత్వం ప్రారంభించింది. దీని కింద అర్హులైన మహిళలకు నెలకు రూ. 1,000, ఎస్సీ సామాజిక వర్గానికి చెందిన మహిళలకు నెలకు రూ. 1,500 చొప్పున నేరుగా బ్యాంక్ ఖాతాల్లో జమ చేస్తోంది. ఆగస్టు నాటికి 76 లక్షల మందికి పైగా మహిళలు నమోదు చేసుకోగా, 68 లక్షల మందికి పైగా లబ్ధిదారులకు ఆర్థిక సాయం అందింది. 'ముఖ్యమంత్రి తీర్థయాత్ర పథకం' కింద 50 ఏళ్లు, ఆపై వయసున్న అర్హులైన వృద్ధులకు రవాణా, వసతి, భోజన సదుపాయాలతో కూడిన ఉచిత తీర్థయాత్రలను ప్రభుత్వం నిర్వహిస్తోంది. ఖాటూ శ్యామ్, సాలాసర్ బాలాజీ, హరిద్వార్-రిషికేశ్, మధుర-బృందావన్ వంటి పుణ్యక్షేత్రాలకు వారిని తీసుకెళ్తోంది. నెలకు 300 యూనిట్ల ఉచిత విద్యుత్ పథకం ద్వారా రాష్ట్రంలోని దాదాపు 90 శాతం గృహాలకు 'జీరో' విద్యుత్ బిల్లులు వస్తున్నాయని ప్రభుత్వం పేర్కొంటోంది. తాజాగా గృహ విద్యుత్ వినియోగదారుల కోసం వన్ టైమ్ సెటిల్‌మెంట్ పథకాన్ని ప్రకటించింది. మార్చి 31, 2026 వరకు ఉన్న పాత బకాయిలపై జరిమానాలు, వడ్డీలను 100 శాతం మాఫీ చేస్తోంది. దీనివల్ల సుమారు 24.86 లక్షల కుటుంబాలకు రూ. 518 కోట్ల మేర ఊరట లభించనుంది. వినియోగదారులు కేవలం అసలు మొత్తాన్ని వాయిదాల పద్ధతిలో చెల్లించే వెసులుబాటు కల్పించారు. ప్రతి ఓటరు వర్గాన్ని సంక్షేమ గొడుగు కిందకు తీసుకురావడం ద్వారా రాజకీయంగా బలపడాలని ఆప్ ప్రభుత్వం భావిస్తోంది. అయితే నిరుద్యోగం, డ్రగ్స్ సమస్య, యువత విదేశాలకు వలస వెళ్లడం, శాంతిభద్రతలు, రాష్ట్ర ఆర్థిక పరిస్థితి వంటి కీలక అంశాలపై ప్రతిపక్షాలు ప్రభుత్వాన్ని నిలదీస్తున్నాయి. 

Related Post

Previous
Next Post »