ప్రపంచంలోని రెండు అతిపెద్ద ఆర్థిక వ్యవస్థలైన అమెరికా, చైనాల మధ్య సుదీర్ఘకాలంగా కొనసాగుతున్న వాణిజ్య ఉద్రిక్తతలను తగ్గించే దిశగా ఒక కీలకమైన ముందడుగు పడింది. తమ మధ్య ద్వైపాక్షికంగా జరిగే సుమారు 60 బిలియన్ డాలర్ల విలువైన వస్తువులపై మరింత అనుకూలమైన సుంకాల విధానాన్ని అమలు చేయడానికి ఇరు దేశాలు అంగీకరించాయి. ఎనిమిదవ రౌండ్ ఆర్థిక, వాణిజ్య సంప్రదింపుల అనంతరం చైనా వాణిజ్య మంత్రిత్వ శాఖ ఈ వివరాలను వెల్లడించగా యూఎస్ ట్రెజరీ సెక్రటరీ స్కాట్ బెస్సెంట్ సైతం నూతనంగా ఏర్పాటైన ‘యూఎస్-చైనా బోర్డ్ ఆఫ్ ట్రేడ్’ చట్రంలో భాగంగా ఈ ఒప్పందాన్ని ధృవీకరించారు. ఈ నూతన ఏర్పాటు ప్రకారం ఆయా వస్తువులపై ఉన్న అన్ని దిగుమతి సుంకాలు పూర్తిగా రద్దు కాకపోయినా.. గత వాణిజ్య వివాదాల సమయంలో విధించిన అదనపు ప్రతీకార సుంకాల నుండి 90 శాతానికి పైగా ఉత్పత్తులకు ఊరట లభిస్తుంది. వాటికి సాధారణ ‘అత్యంత ప్రాధాన్య దేశం’ సుంకాల రేట్లు వర్తిస్తాయి. అమెరికా రాయితీలు ఇవ్వనున్న చైనా ఉత్పత్తుల జాబితాలో బొమ్మలు అగ్రస్థానంలో ఉన్నాయి. వీటితో పాటు పిల్లల సైకిళ్లు, వంటగది సామాగ్రి, గృహోపకరణాలు, దుప్పట్లు, పిల్లల కార్ సీట్లు, పండుగ అలంకరణ వస్తువులకు అమెరికా సుంకాల ఉపశమనం కల్పిస్తుంది.