భారత టెలికాం నియంత్రణ సంస్థ ఫేక్ కాల్స్, స్పామ్ మెసేజ్‌లకు చెక్ పెట్టేందుకు సెప్టెంబర్ 18న నిబంధనలను మరింత కఠినతరం చేసింది. అనుమానాస్పద స్పామ్ కాల్స్, మెసేజ్‌లను ముందే గుర్తించేందుకు టెలికాం ఆపరేటర్లు ఆర్టిఫిషియల్ ఇంటెలిజెన్స్, మెషిన్ లెర్నింగ్ సాంకేతికతలను తప్పనిసరిగా వాడాలని స్పష్టం చేసింది. అంతేకాకుండా, ఆటోమేటెడ్ అప్లికేషన్-టు-పర్సన్ రోబోకాల్స్‌పై కొత్తగా 'టెర్మినేషన్ ఛార్జ్'ను అమలులోకి తెచ్చింది. ఇకపై 140, 1600 సిరీస్ నంబర్లను కాల్ మేనేజ్‌మెంట్ యాప్‌లు నేరుగా బ్లాక్ చేయడం కానీ, స్పామ్‌గా మార్క్ చేయడం కానీ చేయడానికి వీల్లేదు. ఈ అదనపు భారం సాధారణ మొబైల్ వినియోగదారులపై పడదు; కేవలం స్పామ్ కాల్స్ పంపే సంస్థలు, ఆ కాలింగ్ ఆపరేటర్లపైనే పడుతుంది. సాఫ్ట్‌వేర్, ఆటో-డయలర్లు లేదా ప్రీ-రికార్డెడ్ వాయిస్‌ల ద్వారా వచ్చే డిక్లేర్ చేయని అప్లికేషన్-టు-పర్సన్ కాల్స్‌కు ఇది వర్తిస్తుంది. ఇటువంటి రోబోకాల్స్‌పై ఆపరేటర్లు నిమిషానికి 5 పైసల వరకు టెర్మినేషన్ రుసుము విధించవచ్చు. వినియోగదారుల అనుమతి లేకుండా, డిఎన్‌డి నిబంధనలను ఉల్లంఘిస్తూ చేసే మాస్ రోబోకాల్స్‌ను అరికట్టడమే ఈ నిర్ణయం ప్రధాన లక్ష్యం. వినియోగదారులను ముందే హెచ్చరించేందుకు ప్రముఖ ఆపరేటర్లు ఇప్పటికే ఏఐ, మెషిన్ లెర్నింగ్ వ్యవస్థలను అందుబాటులోకి తెచ్చారు. కాలర్-ఐడీ, కాల్ మేనేజ్‌మెంట్ యాప్‌లు తమ వద్ద ఉన్న స్పామ్ నివేదికలను ఆపరేటర్ ప్లాట్‌ఫారమ్‌లతో తప్పనిసరిగా పంచుకోవాలి. అలాగే 140, 1600, 1601 సిరీస్ నంబర్లను ఆటోమేటిక్‌గా బ్లాక్ చేయడం లేదా స్పామ్‌గా మార్క్ చేయడం నిషిద్ధం. ఇందులో 140 సిరీస్ ప్రచార (ప్రోమోషనల్) కాల్స్ కోసం కాగా.. 1600 సిరీస్ OTPలు, బ్యాంక్ బ్యాలెన్స్ అలర్ట్‌లు, ఫండ్ స్టేట్‌మెంట్ల వంటి అత్యవసర సేవా లావాదేవీల కోసం కేటాయించారు. ఈ నిర్ణయంతో వినియోగదారుల మొబైల్ బిల్లులపై ఎలాంటి అదనపు భారం పడదు. అనుమతి లేని ఆటోమేటెడ్ కాల్స్ చేసే టెలిమార్కెటర్లు లేదా ఆ నెట్‌వర్క్ ఆపరేటర్లే ఈ టెర్మినేషన్ ఫీజును చెల్లించాల్సి ఉంటుంది. దీనివల్ల బల్క్ స్పామ్ కాల్స్ చేయడం అత్యంత ఖరీదైన వ్యవహారంగా మారుతుందని, తద్వారా విసిగించే రోబోకాల్స్, ఫేక్ ప్రచారాలు గణనీయంగా తగ్గుతాయని ఆపరేటర్లు భావిస్తున్నారు. నిరంతరం విసిగించే స్పామ్ కాల్స్‌కు అడ్డుకట్ట వేయడానికి మీ 'డు నాట్ డిస్టర్బ్' ప్రాధాన్యతలను సెట్ చేసుకోండి. సులభంగా రిజిస్టర్ చేసుకోవడంతో పాటు ఫిర్యాదులను ట్రాక్ చేసేందుకు 'TRAI DND' యాప్‌ను ఉపయోగించవచ్చు. లేదా అనవసరమైన కమర్షియల్ కాల్ వచ్చిన మూడు రోజుల్లోగా 1909 నంబర్‌కు కాల్ లేదా ఎస్‌ఎమ్‌ఎస్ చేసి ఫిర్యాదు చేయవచ్చు.