తమిళనాడులోని ధారాపురం అసెంబ్లీ నియోజకవర్గ ఉప ఎన్నిక ప్రచారంలో తమిళగ వెట్రి కళగం అభ్యర్థి పి. సత్యభామ తనపై వస్తున్న విమర్శలు, అసభ్యకర వ్యాఖ్యల గురించి మాట్లాడుతూ వేదికపైనే భావోద్వేగానికి గురై కన్నీళ్లు పెట్టుకున్నారు. పక్కనే ఉన్న టీవీకే అధినేత, తమిళనాడు ముఖ్యమంత్రి విజయ్ ఆమెను ఓదార్చారు. ధారాపురం ఉప ఎన్నిక ప్రచారంలో భాగంగా విజయ్ పాల్గొన్న సభలో సత్యభామ మాట్లాడారు. తనపై సోషల్ మీడియాలో వస్తున్న విమర్శలు, అసభ్యకర వ్యాఖ్యలు తనను తీవ్రంగా బాధిస్తున్నాయని ఆమె చెప్పారు. తనపై అన్యాయంగా ఆరోపణలు చేస్తున్నారని, తాను ఎలాంటి తప్పూ చేయలేదని చెబుతూ కన్నీళ్లు పెట్టుకున్నారు. 'నేను ఎదైనా తప్పు చేసి ఉంటే మీ ముందుకు వచ్చి ఇంత ధైర్యంగా మాట్లాడగలనా?' అని ప్రశ్నించారు. తనపై వస్తున్న నిందలు, అసభ్యకర వ్యాఖ్యలు తనను గాయపరుస్తున్నాయని చెప్పారు. సత్యభామ కన్నీళ్లు పెట్టుకోవడంతో పక్కనే ఉన్న విజయ్ వెంటనే స్పందించారు. ఆమె భుజంపై చేయి వేసి ఓదార్చారు. సత్యభామ గత అసెంబ్లీ ఎన్నికల్లో ఏఐఏడీఎంకే అభ్యర్థిగా ధారాపురం నుంచి గెలిచారు. అనంతరం ఎమ్మెల్యే పదవికి రాజీనామా చేసి టీవీకేలో చేరడంతో ధారాపురం స్థానానికి ఉప ఎన్నిక అనివార్యమైంది. అక్టోబర్ 6న ఈ ఉప ఎన్నిక జరగనుంది. సత్యభామ డబ్బు తీసుకుని పార్టీ మారారంటూ ఆరోపణలు వస్తున్నాయి. అయితే సత్యభామ ఆ ఆరోపణలను ఖండించారు. తాను ఎవరి దగ్గరా డబ్బు తీసుకోలేదని చెబుతున్నారు.
No comments:
Post a Comment