స్టార్‌లింక్ శాటిలైట్ ఆధారిత కమ్యూనికేషన్ సేవలను అందించేందుకు రిలయన్స్ జియో సిద్ధమవుతున్నాయి. ఎయిర్‌టెల్ మద్దతు ఉన్న వన్‌వెబ్‌కు కూడా ఈ సేవల కోసం లైసెన్స్ లభించింది. అయితే సేవలు ప్రారంభం కావడానికి ఇంకా కొన్ని అనుమతులు పెండింగ్‌లో ఉన్నాయి. అన్ని అనుమతులు పూర్తయిన తర్వాతే భారత్‌లో శాటిలైట్ కమ్యూనికేషన్ సేవలు అధికారికంగా అందుబాటులోకి వస్తాయి. శాటిలైట్ ఇంటర్నెట్‌కు ప్రధాన ప్రయోజనం టవర్లు, ఫైబర్ కేబుళ్లు చేరుకోవడం కష్టమైన ప్రాంతాల్లో కనెక్టివిటీ అందించడం. ముఖ్యంగా కొండ ప్రాంతాలు, ఎడారులు, అడవులు, గిరిజన ప్రాంతాలు, దీవులు, తీర ప్రాంతాల్లో ఇది ఉపయోగపడే అవకాశం ఉంది. సముద్రంలో ప్రయాణించే నౌకలకు కూడా ఇలాంటి సేవలు ఉపయోగపడతాయి. ప్రకృతి విపత్తులు సంభవించిన ప్రాంతాల్లో సాధారణ కమ్యూనికేషన్ వ్యవస్థలు దెబ్బతిన్నప్పుడు శాటిలైట్ కనెక్టివిటీ కీలకంగా మారొచ్చు. మారుమూల ప్రాంతాల్లోని ప్రభుత్వ కార్యాలయాలకు కూడా ఇది ఉపయోగపడే అవకాశం ఉంది. స్టార్‌లింక్ ఇప్పటికే పలు దేశాల్లో శాటిలైట్ ఆధారిత ఇంటర్నెట్ సేవలను అందిస్తోంది. ఆ సంస్థకు లో ఎర్త్ ఆర్బిట్ లో పెద్ద సంఖ్యలో ఉపగ్రహాలు ఉన్నాయి. ఇవి భూమికి సుమారు 330 కిలోమీటర్ల నుంచి 550 కిలోమీటర్ల ఎత్తులో పరిభ్రమిస్తున్నాయి. సాధారణ మొబైల్ ఇంటర్నెట్‌లో టవర్ల ద్వారా సిగ్నల్ అందుతుంది. బ్రాడ్‌బ్యాండ్‌లో ఫైబర్ కేబుల్ ద్వారా కనెక్షన్ వస్తుంది. శాటిలైట్ ఇంటర్నెట్‌లో మాత్రం ఉపగ్రహాల ద్వారా డేటా ప్రసారం జరుగుతుంది. శాటిలైట్ ఇంటర్నెట్ ఉపయోగించేందుకు వినియోగదారుల ఇంటి వద్ద ప్రత్యేక టెర్మినల్ లేదా డిష్ అవసరం. ఈ పరికరం ఉపగ్రహానికి సిగ్నల్స్ పంపడంతో పాటు అక్కడి నుంచి డేటాను స్వీకరిస్తుంది. తద్వారా భూమిపై టవర్ లేదా ఫైబర్ కనెక్షన్ అందుబాటులో లేని ప్రాంతాల్లోనూ ఇంటర్నెట్‌ను ఉపయోగించే అవకాశం ఏర్పడుతుంది. భారత్‌లో జియోకు ఇప్పటికే భారీ టెలికాం, బ్రాడ్‌బ్యాండ్ వ్యవస్థ ఉంది. ఎలాన్ మస్క్ చేసిన పోస్టుకు స్పందిస్తూ పోటీకి సిద్ధంగా ఉన్నామని జియో ఇప్పటికే సంకేతం ఇచ్చింది. తక్కువ ధరలో శాటిలైట్ ఇంటర్నెట్ సేవలను అందించడంపై కంపెనీ దృష్టి పెట్టినట్లు అందుబాటులో ఉన్న సమాచారం సూచిస్తోంది. భారత్‌లో శాటిలైట్ ఇంటర్నెట్ ప్రారంభమైన తర్వాత ధర కీలక అంశంగా మారనుంది. నెలవారీ రీచార్జ్ ఎంత ఉంటుంది? టెర్మినల్, రౌటర్ కోసం అదనపు ఖర్చు ఉంటుందా? వర్షాకాలంలో ఇంటర్నెట్ వేగంపై ప్రభావం పడుతుందా? వంటి ప్రశ్నలకు సమాధానం రావాల్సి ఉంది.