కరోనాకు టీకాలు తప్ప అడ్డుకట్ట వేసే డ్రగ్ ఇంత వరకూ లేదు. అయితే, ఆస్తమాకు ఉపయోగించే మాంటెలుకాస్ట్‌తో కరోనాకు చెక్ చెప్పవచ్చని ఇండియన్ ఇన్‌స్టిట్యూట్ ఆఫ్ సైన్స్, బెంగళూరు (ఐఐఎస్‌సీ, బెంగళూరు) పరిశోధకుల అధ్యయనంలో తేలింది. ఈ డ్రగ్ మన శరీరంలో కరోనా వైరస్‌ను ప్రభావవంతంగా అడ్డుకుంటుందని గుర్తించారు. మాంటెలుకాస్ట్ డ్రగ్‌ను సాధారణంగా ఉబ్బసం, గవత జ్వరం (అలర్జిక్ రినైటిస్), దద్దుర్లు లాంటి పరిస్థితుల వల్ల కలిగే మంటను తగ్గించడానికి వాడతారు. ఈ ఔషధం మానవ కణంలో మొదటగా చొచ్చుకుపోయే సార్స్ సీఓవీ-2 ప్రొటీన్ ఎన్ఎస్‌పీ 1 చివరను బలంగా బంధిస్తుందని గుర్తించారు. మాంటెలుకాస్ట్ ఎన్ఎస్‌పీ 1ను బలంగా, స్థిరంగా బంధిస్తుంది. తద్వారా హోస్ట్ కణాలు సాధారణ ప్రోటీన్ సంశ్లేషణను పునఃప్రారంభించడానికి అనుమతిస్తుంది. దీంతో మన శరీరంపై కరోనా ప్రభావం కనిపించదని అధ్యయనంలో తేలింది. ఈ అధ్యయన ఫలితాలు ‘ఈ లైఫ్’ అనే జర్నల్‌లో ప్రచురితమయ్యాయి.
0 Comments