పురుషులపై చట్టాలు ఏకపక్షంగా ఉన్నాయి : వీడియోలో భార్య గురించి చెబుతూ లోయలోకి దూకి ఆత్మహత్య చేసుకున్న బాధితుడు

గుజరాత్‌లోని భావ్‌నగర్‌కు చెందిన 24 ఏళ్ల విశ్వరాజ్‌సింగ్ మయూర్‌సింగ్ గోహిల్ అనే యువకుడు మహారాష్ట్రలోని ప్రసిద్ధ అహ్మద్‌నగర్ (అహిల్యానగర్) జిల్లాలోని హరిశ్చంద్రగఢ్ పరిధిలో ఉన్న సుమారు 1,700 అడుగుల ఎత్తైన కొంకణకడ కొండ నుంచి దూకి ఆత్మహత్య చేసుకున్నాడు. ఆత్మహత్యకు ముందు అతను రికార్డు చేసిన 13 నిమిషాల వీడియో పోలీసుల విచారణలో వెలుగులోకి వచ్చింది. విశ్వరాజ్‌సింగ్‌కు ఈ ఏడాది ఫిబ్రవరి 8న వివాహం జరిగింది. కేవలం ఎనిమిది నెలల వ్యవధిలోనే వారి మధ్య మనస్పర్థలు వచ్చి విడాకుల వరకు వెళ్లాయి. సెప్టెంబర్ 12న అతని భార్య గృహహింస కింద ఫిర్యాదు చేయగా, అక్టోబర్ 9న ఆయన కోర్టుకు హాజరయ్యారు. మరణించే ముందు రికార్డు చేసిన 13 నిమిషాల వీడియోలో తన మాజీ భార్య, ఆమె కుటుంబ సభ్యుల వల్ల తాను తీవ్రమైన మానసిక, ఆర్థిక, సామాజిక ఒత్తిడిని ఎదుర్కొన్నానని ఆరోపించాడు. తనపై, తన తల్లిపై, అలాగే 16 ఏళ్ల తమ్ముడిపై పెట్టిన గృహహింస కేసులు పూర్తిగా అవాస్తవమని, తాము ఎప్పుడూ వేధించలేదని ఆ వీడియోలో కన్నీటిపర్యంతమయ్యాడు. పురుషులపై చట్టాలు ఏకపక్షంగా ఉంటున్నాయని, దీనివల్ల ఎంతోమంది తీవ్ర ఒత్తిడికి గురవుతున్నారని ఆవేదన వ్యక్తం చేస్తూ చట్టాలలో మార్పులు తీసుకురావాలని కోరాడు. లోయ కావడంతో డ్రోన్ కెమెరాలు, పర్వతారోహకుల సహాయంతో దాదాపు 24 గంటలకు పైగా శ్రమించి పోలీసులు మృతదేహాన్ని వెలికితీశారు. థానే రూరల్ పరిధిలోని టోకావాడే పోలీస్ స్టేషన్‌లో 'అసాధారణ మృతి' కింద కేసు నమోదు చేసి, ఆ వీడియో ఆధారంగా సమగ్ర విచారణ జరుపుతున్నారు. మృతదేహాన్ని పోస్టుమార్టం నిమిత్తం భావ్‌నగర్‌కు తరలించారు.