హైదరాబాద్‌లో భారీ ఆఫీస్ స్పేస్‌ను ఐదేళ్ల కాలపరిమితికి లీజుకు తీసుకున్నఫెడెక్స్

హైదరాబాద్, గచ్చిబౌలి-ఫైనాన్షియల్ డిస్ట్రిక్ట్ కారిడార్‌లోని ప్రఖ్యాత ఫీనిక్స్ సెంటారస్ ఐటీ పార్క్‌లో భారీ లీజు డీల్ నమోదైంది. ప్రపంచ ప్రముఖ లాజిస్టిక్స్, సప్లై చైన్ దిగ్గజ సంస్థ ఫెడ్‌ఎక్స్ ఈ ప్రాజెక్ట్‌లో ఏకంగా 1.19 లక్షల చదరపు అడుగుల విస్తీర్ణంలో భారీ ఆఫీస్ స్పేస్‌ను ఐదేళ్ల కాలపరిమితికి లీజుకు తీసుకుంది. నెలకు సుమారు రూ. 93.2 లక్షల అద్దె ప్రాతిపదికన కుదిరిన ఈ ఒప్పందం ప్రకారం, ఐదేళ్ల లీజు కాలంలో ఫెడ్‌ఎక్స్ సంస్థ చెల్లించే మొత్తం అద్దె విలువ దాదాపు రూ. 55.6 కోట్లకు పైగానే ఉంటుందని నివేదికలు స్పష్టం చేస్తున్నాయి. తాజా విస్తరణతో ఫీనిక్స్ సెంటారస్‌ సముదాయంలో ఫెడ్‌ఎక్స్ నిర్వహించే ఆఫీస్ విస్తీర్ణం ఏకంగా 3.7 లక్షల చదరపు అడుగులకు చేరుకుంటుంది. ఇప్పటికే ఈ వాణిజ్య సముదాయంలో మైక్రోసాఫ్ట్ వంటి అంతర్జాతీయ ఐటీ దిగ్గజాలు భారీ లీజు ఒప్పందాలతో ఆఫీసులు ఏర్పాటు చేశాయి. ఫెడ్‌ఎక్స్ తన రెండో విడత సెంటర్‌ను విస్తరించడం ద్వారా నగరంలో నాణ్యమైన గ్రేడ్-ఏ ఆఫీస్ స్థలాలకు ఎంతటి డిమాండ్ ఉందో తేటతెల్లమవుతోంది. హైదరాబాద్ కేంద్రంగా నడుస్తున్న గ్లోబల్ ఇన్నోవేషన్, సపోర్ట్ నెట్‌వర్క్‌లను మరింత బలోపేతం చేసేందుకే ఈ నూతన కార్యాలయాన్ని కేటాయించినట్లు పరిశ్రమ వర్గాలు చెబుతున్నాయి. దేశంలోని ఇతర మెట్రో నగరాలతో పోలిస్తే సమర్థవంతమైన మౌలిక వసతులు, నిరంతర విద్యుత్, విశాలమైన భవనాలు , రాష్ట్ర ప్రభుత్వ అనుకూల పారిశ్రామిక విధానాలు హైదరాబాద్ వైపే అంతర్జాతీయ కంపెనీలను ఆకర్షిస్తున్నాయి. నానక్‌రామ్‌గూడా, రాయదుర్గం, గచ్చిబౌలి కారిడార్లలో కేవలం లాజిస్టిక్స్, ఐటీ కంపెనీలే కాకుండా ఫైనాన్షియల్ సర్వీసెస్ దిగ్గజాలు కూడా వరుసగా మల్టీ-ఇయర్ ఒప్పందాలు కుదుర్చుకోవడంతో రాబోయే రోజుల్లో కమర్షియల్ ప్రాపర్టీల అద్దెలు , ప్రాపర్టీ విలువలు మరింత పెరిగే అవకాశం ఉందని రియల్ ఎస్టేట్ విశ్లేషకులు అంచనా వేస్తున్నారు.