దేశీయ మార్కెట్లో శాంసంగ్ గెలాక్సీ ఎఫ్‌70 సిరీస్‌లో భాగంగా 'శాంసంగ్ గెలాక్సీ ఎఫ్‌70 5జీ'ని విడుదల చేసింది. ఇప్పటికే మార్కెట్లో అందుబాటులో ఉన్న గెలాక్సీ ఎఫ్‌70 ప్రో 5జీ, ఎఫ్‌70ఈ 5జీ మోడళ్ల సరసన ఇది చేరింది. ఈ ఫోన్ ప్రముఖ ఈ-కామర్స్ ప్లాట్‌ఫామ్ ఫ్లిప్‌కార్ట్ లో విక్రయానికి రానుంది. 5,000mAh బ్యాటరీ, 50 మెగాపిక్సెల్ ప్రధాన కెమెరా, సూపర్ అమోలెడ్ డిస్‌ప్లే ఈ స్మార్ట్‌ఫోన్‌లో ప్రధాన ఆకర్షణలుగా నిలవనున్నాయి. లాంచ్ ఆఫర్లలో భాగంగా బ్యాంక్ డిస్కౌంట్లు, కంపెనీ ప్రయోజనాలతో కలిపి బేస్ మోడల్‌ను రూ. 17,999 కే కొనుగోలు చేయవచ్చని శాంసంగ్ ప్రతినిధులు వెల్లడించారు. ఈ ఫోన్ బోల్డ్ బ్లాక్ వివిడ్ వయోలెట్ రంగుల్లో లభించనుంది. ఈ స్మార్ట్‌ఫోన్‌లో 6.7 అంగుళాల ఫుల్ హెచ్‌డీ ప్లస్ ఇన్ఫినిటీ-యూ సూపర్ అమోలెడ్ డిస్‌ప్లేను అందించారు. ఇది 90Hz రిఫ్రెష్ రేట్‌కు మద్దతు ఇస్తుంది. డిస్‌ప్లే రక్షణ కోసం స్క్రీన్‌పై కార్నింగ్ గొరిల్లా గ్లాస్ విక్టస్ ప్రొటెక్షన్ ఇచ్చారు. ఇది ఆక్టా-కోర్ ఎగ్జినోస్ 1330 ప్రాసెసర్‌తో వేగవంతంగా పనిచేస్తుంది. అంతేకాకుండా, దుమ్ము, నీటి తుంపర్ల నుండి ఫోన్‌ను కాపాడేందుకు IP54 రేటింగ్‌ను కూడా ఇచ్చారు. ఫోటోగ్రఫీ, వీడియోల కోసం వెనుకవైపు త్రిపుల్ కెమెరా సెటప్‌ను కేటాయించారు. 50 మెగాపిక్సెల్ ప్రధాన కెమెరా, 5 మెగాపిక్సెల్ అల్ట్రావైడ్ కెమెరా, 2 మెగాపిక్సెల్ మ్యాక్రో కెమెరా అమర్చారు. సెల్ఫీలు, వీడియో కాల్స్ మాట్లాడేందుకు వీలుగా ముందు భాగంలో 13 మెగాపిక్సెల్ ఫ్రంట్ కెమెరాను అమర్చారు. ఈ ఫోన్‌లో 5,000mAh సామర్థ్యం గల శక్తివంతమైన బ్యాటరీ ఉంది. దీనికి 25W వైర్డ్ ఫాస్ట్ ఛార్జింగ్ సపోర్ట్ అందుబాటులో ఉంటుంది. యూజర్లు మైక్రోఎస్‌డీ కార్డ్‌ని ఉపయోగించి స్టోరేజ్‌ను గరిష్టంగా 2TB వరకు పెంచుకోవచ్చు. కనెక్టివిటీ కోసం 5G, 4G LTE, వైఫై , బ్లూటూత్, టైప్-సీ యూఎస్‌బీ, జీపీఎస్ సదుపాయాలు ఉన్నాయి. కేవలం 7.5 మిల్లీమీటర్ల మందంతో ఈ ఫోన్ చాలా స్లిమ్‌గా, స్టైలిష్‌గా కనిపిస్తుంది.
