రాష్ట్రీయ స్వయంసేవక్ సంఘ్ శతాబ్ది ఉత్సవాల సందర్భంగా నాగ్‌పూర్‌లో నిర్వహించిన విజయదశమి వేడుకలు, ఆయుధ పూజ కార్యక్రమంలో పాల్గొన్న ఆర్ఎస్ఎస్ చీఫ్ మోహన్ భగవత్ మాట్లాడుతూ ప్రజలకు తమ సంస్కృతి, గుర్తింపుపై అవగాహన కల్పించేందుకు హిందూ మేళాను ప్రారంభించారని పేర్కొన్నారు. అనంతరం సంత్ రవిదాస్ సేవలను గుర్తుచేస్తూ విదేశీ దండయాత్రలు, అణచివేతలతో సమాజంలో భయాందోళనలు నెలకొన్న సమయంలో ఆయన మత విశ్వాసం, సామాజిక సామరస్యం, భక్తి సందేశాలను అందించారని తెలిపారు. తన బోధనలు, జీవితంతో ప్రజల్లో ధైర్యాన్ని నింపారని వివరించారు. గత వందేళ్లుగా భారతదేశాన్ని దాని స్వీయ గుర్తింపు, సంస్కృతి, సంప్రదాయాల ఆధారంగా ఏకీకృతం చేసి బలోపేతం చేసేందుకు ఆర్ఎస్ఎస్ కృషి చేస్తోందని మోహన్ భగవత్ అన్నారు. స్వదేశీ ఉత్పత్తులను ప్రోత్సహించడం, భారతీయ సంస్కృతిపై గౌరవాన్ని పెంపొందించడం వంటి అంశాలకు సంఘ్ శతాబ్ది సంవత్సరంలో ప్రాధాన్యం ఇస్తున్నట్లు తెలిపారు. భారతదేశం అనేక భాషలు, ప్రాంతాలు, కులాలు, ఆహారపు అలవాట్లు, ఆచారాలు కలిగిన వైవిధ్యభరితమైన దేశమని, భిన్నత్వం ఉన్నప్పటికీ దేశ ప్రజలంతా ఐక్యంగా ముందుకు సాగాలని పిలుపునిచ్చారు. గతంలో భారతదేశం ఐక్యతతో పురోగమించిందని, భవిష్యత్తులోనూ అదే మార్గంలో అభివృద్ధి చెందుతుందని ఆశాభావం వ్యక్తం చేశారు. సృష్టిలో వైవిధ్యం సహజమని, సమస్త అస్తిత్వంలోని ఏకత్వం శాశ్వతమైన సత్యమని ఆయన వివరించారు. పశ్చిమ దేశాల్లో చోటుచేసుకుంటున్న పరిణామాలను ప్రస్తావిస్తూ ఫ్రాన్స్, అల్బేనియా, నేపాల్, బంగ్లాదేశ్‌లలో జరుగుతున్న పరిణామాలను పరిశీలించాలని అన్నారు. ప్రభుత్వాలను మార్చడం ద్వారా పరిస్థితులు మారిపోతాయని భావించడం సరైనది కాదని, గతంలోనూ ప్రభుత్వాల మార్పుతో అన్ని సమస్యలు పరిష్కారం కాలేదని వ్యాఖ్యానించారు. సమాజంలోని మర్యాద, క్రమశిక్షణ, సంస్కృతిని వ్యతిరేకించే ధోరణుల పట్ల అప్రమత్తంగా ఉండాలని సూచించారు. సమాజాన్ని, దేశాన్ని సక్రమంగా ముందుకు నడిపించే బాధ్యత ప్రతి ఒక్కరిపై ఉందని అన్నారు. ఐక్యత లక్ష్యంగా జరిగే ఉద్యమాలు సమాజానికి మేలు చేస్తాయని, అయితే ఇతరులపై వ్యతిరేకతను పెంచేందుకు ఉద్యమాలను ఉపయోగిస్తే అవి రాజకీయ సాధనాలుగా మారే ప్రమాదం ఉందని పేర్కొన్నారు. అలాంటి పరిస్థితులను దేశాన్ని బలహీనపరచాలనుకునే శక్తులు తమకు అనుకూలంగా మలుచుకునే అవకాశం ఉందని హెచ్చరించారు. నేటి యువతలో మాదకద్రవ్యాల వినియోగం ఆందోళన కలిగిస్తోందన్న ఆయన మాదకద్రవ్యాల వ్యసనాన్ని తీవ్రమైన సమస్యగా అభివర్ణిస్తూ, చిన్న వయసు నుంచే పిల్లలకు దాని దుష్ప్రభావాలపై అవగాహన కల్పించాలని తల్లిదండ్రులకు సూచించారు. యువత మంచి, చెడుల మధ్య తేడాను గుర్తించే సామర్థ్యాన్ని పెంపొందించుకోవాలని చెప్పారు. కొత్త తరానికి కొత్త విషయాలు నేర్చుకోవాలనే ఆసక్తి ఉందని, వివిధ అంశాల పట్ల ఆకర్షితులవుతున్నారని పేర్కొన్నారు. అయితే, ఏది సమాజానికి మేలు చేస్తుంది, ఏది హాని కలిగిస్తుంది అనే విషయాన్ని అర్థం చేసుకోవడం అవసరమని తెలిపారు. ఈ విషయంలో కుటుంబాలు, సమాజం కీలక పాత్ర పోషించాలని సూచించారు. ఓటీటీ వేదికలు, ఇతర మీడియా కంటెంట్‌కు సంబంధించి నియంత్రణలు, క్రమశిక్షణ అంశాలపై ప్రభుత్వం చర్చలు జరపాలని మోహన్ భగవత్ సూచించారు. మీడియా ప్రభావంతో వ్యక్తిగత జీవితం, కుటుంబ సంబంధాలు, సామాజిక వాతావరణంపై ప్రతికూల ప్రభావాలు పడకుండా తగిన అవగాహన అవసరమని అభిప్రాయపడ్డారు.
