ఐఫోన్ 18, ఐఫోన్ 18 ప్రో సిరీస్‌లో డిస్‌ప్లే, కెమెరా, బ్యాటరీలో భారీ అప్‌గ్రేడ్‌ ?

ప్రతి ఏడాది మాదిరిగానే ఈ ఏడాది కూడా సెప్టెంబర్‌లో ఆపిల్ కొత్త ఫ్లాగ్‌షిప్ స్మార్ట్‌ఫోన్‌లను ఆవిష్కరించేందుకు సిద్ధమవుతోంది. రాబోయే ఐఫోన్ 18, ఐఫోన్ 18 ప్రో సిరీస్‌లపై ఇప్పటికే అనేక లీకులు వెలుగులోకి వచ్చాయి. ఈ కొత్త సిరీస్‌లో మెరుగైన పనితీరు, అప్‌గ్రేడ్ చేసిన కెమెరా, ఎక్కువ బ్యాటరీ సామర్థ్యం, కొత్త డిస్‌ప్లే టెక్నాలజీ వంటి ఫీచర్లు ఉండే అవకాశం ఉందని సమాచారం. అంతేకాకుండా, ఈ ఏడాది కంపెనీ తన తొలి ఫోల్డబుల్ ఐఫోన్‌ను కూడా పరిచయం చేసే అవకాశముందని టెక్ వర్గాలు అంచనా వేస్తున్నాయి. అయితే దీనిపై ఆపిల్ నుంచి ఇప్పటివరకు అధికారిక ప్రకటన వెలువడలేదు. రాబోయే ఐఫోన్ 18 ప్రో సిరీస్‌లో అతిపెద్ద మార్పు డిస్‌ప్లే విభాగంలో కనిపించనుంది. ప్రస్తుతం ఉన్న మోడళ్లలో కనిపించే డైనమిక్ ఐలాండ్ పరిమాణాన్ని కంపెనీ గణనీయంగా తగ్గించే అవకాశముంది. లీకుల ప్రకారం, ఐఫోన్ 18 ప్రోలో డైనమిక్ ఐలాండ్ ప్రస్తుత మోడళ్లతో పోలిస్తే దాదాపు 35 శాతం వరకు చిన్నదిగా ఉండవచ్చు. దీంతో వినియోగదారులకు మరింత బిగ్ స్క్రీన్ అనుభవం లభించే అవకాశం ఉంది. గతంలో ఫేస్ ఐడీకి సంబంధించిన కొన్ని సెన్సార్లను డిస్‌ప్లే కింద అమర్చే టెక్నాలజీపై కూడా వార్తలు వచ్చాయి. అయితే ఆ సాంకేతికత ఇంకా పూర్తిస్థాయిలో సిద్ధం కాలేదని తెలుస్తోంది. ఐఫోన్ 18 ప్రో మ్యాక్స్‌లో గత తరం మోడళ్లతో పోలిస్తే మరింత పెద్ద బ్యాటరీ అందించే అవకాశం ఉంది. లీకుల ప్రకారం, ఇందులో 5,100mAh నుంచి 5,200mAh సామర్థ్యం గల బ్యాటరీ ఉండవచ్చు. ఈ అప్‌గ్రేడ్ వల్ల వీడియో స్ట్రీమింగ్, గేమింగ్, ఇతర అధిక వినియోగ పనుల్లో ఎక్కువ బ్యాటరీ బ్యాకప్ లభించే అవకాశం ఉంది. ఫోటోగ్రఫీ విభాగంలో కూడా ఆపిల్ పలు కీలక మార్పులు చేయనున్నట్లు సమాచారం. ప్రధాన కెమెరాలో వేరియబుల్ అపర్చర్ సిస్టమ్‌ను అందించే అవకాశం ఉంది. ఇది వివిధ లైటింగ్ పరిస్థితుల్లో మెరుగైన ఫోటోలు తీయడంలో సహాయపడుతుంది. అదనంగా, శాంసంగ్ అభివృద్ధి చేసిన కొత్త తరం మూడు-పొరల స్టాక్డ్ ఇమేజ్ సెన్సార్‌ను ఉపయోగించే అవకాశముంది. దీంతో తక్కువ వెలుతురులో కూడా మెరుగైన ఫోటో నాణ్యత లభించవచ్చు. అలాగే జూమ్ సామర్థ్యాన్ని కూడా కంపెనీ మరింత మెరుగుపరచనున్నట్లు తెలుస్తోంది.