లక్ష ఎల్ఐజీ, ఎంఐజీ ఇళ్ల నిర్మాణానికి తెలంగాణ ప్రభుత్వం ఆమోదం : 12,000 యూనిట్లతో పైలట్ ప్రాజెక్ట్

కోర్ అర్బన్ రీజియన్ ఎకానమీ ప్రాంతాలు, మున్సిపల్ కార్పొరేషన్ల పరిధిలో తక్కువ ఆదాయ వర్గాలు, మధ్య ఆదాయ వర్గాల కోసం లక్ష సరసమైన ఇళ్ల నిర్మాణానికి తెలంగాణ రాష్ట్ర ప్రభుత్వం సూత్రప్రాయ ఆమోదం తెలిపింది. రవాణా, రోడ్లు, భవనాల (గృహ నిర్మాణ) శాఖ జారీ చేసిన జీవో ఎంఎస్ నెం. 23 ప్రకారం, ప్రధానమంత్రి ఆవాస్ యోజన నిబంధనలకు అనుగుణంగా 70,000 ఎల్ఐజీ ఫ్లాట్లు, 30,000 ఎంఐజీ ఫ్లాట్లను నిర్మించనున్నారు. అంతేకాకుండా, ఈ ప్రాంతాల్లో ముందుగా 12,000 ఫ్లాట్లతో ఒక పైలట్ ప్రాజెక్టును చేపట్టేందుకు తెలంగాణ హౌసింగ్ బోర్డుకు ప్రభుత్వం అనుమతి ఇచ్చింది. ఈ పథకం కింద ఎల్ఐజీ  లబ్ధిదారులకు ఒక్కో యూనిట్‌పై రూ. 5 లక్షల సబ్సిడీ అందుతుంది. లబ్ధిదారుల నుంచి స్థలం లేదా భూమి ఖర్చు వసూలు చేయరు. దానిని ప్రభుత్వం లేదా హౌసింగ్ బోర్డు వాటాగా పరిగణిస్తారు. అర్హులైన లబ్ధిదారుల పేరిట ఫ్లాట్లతో పాటు భూమిలో అవిభాజ్య వాటాను కూడా కలిపి రిజిస్ట్రేషన్ చేస్తారు. ఎలాంటి యాజమాన్య వివాదాలు లేని ప్రభుత్వ భూములను గుర్తించి, అక్కడ మౌలిక సదుపాయాలు ఉండేలా చూడాలని అధికారులను ఆదేశించారు. ఈ ప్రాజెక్టుకు ప్రభుత్వం నుంచి నేరుగా బడ్జెట్ నిధులు కేటాయించరు. తెలంగాణ హౌసింగ్ బోర్డు తన సొంత వనరులతోనే దీనిని అమలు చేస్తుంది. గతంలో డబుల్ బెడ్‌రూమ్ ఇళ్ల పథకానికి అమలు చేసిన ప్రత్యేక టెండర్ నిబంధనలనే ఈ ప్రాజెక్టుకు కూడా అనుసరిస్తారు. పథకం అమలుకు అవసరమైన డిమాండ్ సర్వేలు, నోటిఫికేషన్లు, ఇతర మార్గదర్శకాలను జారీ చేసే పూర్తి అధికారాన్ని ప్రభుత్వం హౌసింగ్ బోర్డుకు అప్పగించింది.