నిమిష ప్రియను కాపాడేందుకు అన్ని అవకాశాలను అన్వేషిస్తున్నాం !

యెమెన్ జాతీయుడిని హత్య చేసినట్టు ఆరోపణలు ఎదుర్కొంటున్న కేరళకు చెందిన నర్సు నిమిష ప్రియ ఆ దేశంలో జైలులో ఉన్న సంగతి తెలిసిందే. 2017 నుంచి జైలులో ఉన్న నిమిష ప్రియకు మరణశిక్షను సోమవారం యెమెన్ అధ్యక్షుడు రషద్ అల్-అలిమి ఆమోదించారు. ఈ క్రమంలోనే భారత ప్రభుత్వం స్పందించింది. కేరళ నర్సు కుటుంబానికి సాధ్యమైన అన్నిరకాల సహాయం అందజేస్తున్నట్లుగా విదేశీ వ్యవహారాల మంత్రిత్వ శాఖ తెలిపింది. ''యెమెన్‌లో నిమిష ప్రియకు శిక్ష విధించిన విషయం మాకు తెలుసు. ప్రియ కుటుంబం ఆమెను కాపాడేందుకు అన్ని అవకాశాలను అన్వేషిస్తున్నట్లు మేము అర్థం చేసుకున్నాము. ఈ విషయంలో ప్రభుత్వం అన్ని విధాలా సహాయాన్ని అందజేస్తోంది'' అని విదేశీ వ్యవహారాల మంత్రిత్వ శాఖ (ఏంఈఏ) అధికారిక ప్రతినిధి రణధీర్ జైస్వాల్ తెలిపారు. 2017 జూలైలో యెమెన్ జాతీయుడైన తలాల్ అబ్దో మెహదీని హత్య చేసిన ఆరోపణలపై నిమిష ప్రియను అరెస్టు చేశారు. ఆ కేసులో నిమిష ప్రియ దోషిగా నిర్ధారించబడ్డారు. తలాల్ అబ్దో మెహదీ స్వాధీనం నుంచి తన పాస్‌పోర్ట్‌ను తిరిగి పొందేందుకు ప్రియ అతడికి మత్తుమందు ఇంజెక్ట్ చేయడంతో 2017 జూలైలో అతడు మరణించినట్లు ఆరోపణలు వచ్చాయి. ఈ కేసులోనే ఆమెకు ఉరిశిక్ష విధించబడింది. అయితే నిమిష ప్రియకు యెమెన్‌లోని సుప్రీం కోర్టు ఒక ఎంపికను అందుబాటులో ఉంచింది. బాధిత కుటుంబానికి కొంత పరిహారం చెల్లించి, వారి నుంచి క్షమాపణ పొందడం ద్వారా ఉరి శిక్ష నుంచి తప్పించుకునే అవకాశం ఉంటుంది. బాధిత కుటుంబీకులు క్షమాపణ పొందకపోతే ఆమెకు ఉరి శిక్ష అమలు చేయనున్నారు. నిమిష ప్రియ కుటుంబసభ్యులు చెబుతున్న వివరాలు, మీడియా నివేదికల ప్రకారం..కేరళలోని పాలక్కాడ్ జిల్లాకు చెందిన నిమిష ప్రియ.. 2008లో యెమెన్‌కి వెళ్లి అక్కడ కొన్ని ఆసుపత్రుల్లో పనిచేశారు. ప్రియకు ఆమె కుటుంబం పెళ్లి సంబంధం సెట్ చేయడంతో ఆమె 2011లో ఇండియాకు వచ్చి టామీ థామస్‌ను వివాహం చేసుకున్నారు. ఆ తర్వాత థామస్ - ప్రియ దంపతులు యెమెన్‌కు వెళ్లిపోయారు. అక్కడ థామస్‌కు ఎలక్ట్రీషియన్‌కి సహాయకుడిగా పని దొరికింది, కానీ జీతం చాలా తక్కువగా ఉండేది. 2012లో వారికి కుమార్తె జన్మించింది. అయితే చాలా తక్కువ మొత్తంలో సంపాదన ఉండటంతో కుటుంబం గడవడం కష్టంగా మారింది. ఈ క్రమంలోనే 2014లో థామస్ తన బిడ్డతో పాటు కొచ్చికి తిరిగి వచ్చారు. అదే సంవత్సరం యెమెన్ అంతర్యుద్ధంలో చిక్కుకుంది. దేశం కొత్త వీసాల జారీని నిలిపివేయడంతో నిమిష ప్రియ తిరిగి ఇండియాకు చేరుకోలేకపోయింది. అయితే నిమిష ప్రియ యెమెన్ రాజధాని నగరం సనాలో ఓ క్లినిక్‌ను స్థాపించేందుకు నిర్ణయించింది. యెమెన్ చట్టం ప్రకారం కేవలం ఆ దేశ జాతీయులు మాత్రమే క్లినిక్‌లు,వ్యాపార సంస్థలను స్థాపించడానికి అనుమతించబడతారు. ఈ నేపథ్యంలోనే తలాల్ అబ్దో మెహదీతో చేతులు కలిపి నిమిష తన క్లినిక్‌ను ఏర్పాటు చేసుకున్నారు. ఇందుకోసం ఇండియాలోని బంధువులు, స్నేహితుల నుంచి డబ్బులు అప్పుగా తీసుకున్నారు. క్లినిక్ ప్రారంభించిన వెంటనే తన భర్త, కూతురిని యెమెన్‌కు వచ్చేలా నిమిష ప్రియ ప్లాన్ చేసుకున్నారు. యెమెన్‌లో అంతర్యుద్దం కారణంగా వారు అక్కడకు వెళ్లలేకపోయారు. అయితే క్లినిక్‌ను ఏర్పాటు చేసేందుకు భారీ మొత్తంలో పెట్టుబడి పెట్టడంతో దానిని వదులుకుని ఇండియాకు తిరిగివచ్చేందుకు ప్రియ ఇష్టపడలేదు. అయితే మెహదీ క్లినిక్ యాజమాన్య పత్రాలను తారుమారు చేశాడు. నిమిష తన భార్య అని అందరికీ చెప్పి, ఆమె నెలవారీ సంపాదనలోంచి డబ్బులు కూడా తీసుకోవడం మొదలుపెట్టాడు. మెహదీ తనను, తన కుటుంబాన్ని కొన్నాళ్లుగా వేధిస్తున్నాడని నిమిష ఆరోపించింది. మెహదీ ఆమె పాస్‌పోర్టును కూడా స్వాధీనం చేసుకున్నారు. నిమిష యెమెన్‌ను విడిచి వెళ్లకుండా చేశాడు. డ్రగ్స్ మత్తులో ఆమెను చిత్రహింసలకు గురిచేశాడు. పలుమార్లు తుపాకీతో ఆమెను బెదిరించాడు. అయితే నిమిష సనాలోని పోలీసులను ఆశ్రయించిందని, అయితే మెహదీ చర్య తీసుకోకుండా, పోలీసులు ఆమెను అరెస్టు చేసి ఆరు రోజుల పాటు జైలులో ఉంచారని ఆమె కుటుంబ సభ్యులు తెలిపారు. 2017లో నిమిష తన క్లినిక్‌కి సమీపంలో ఉన్న జైలు వార్డెన్‌ని సంప్రదించింది. జైలు వార్డెన్ మెహదీని మత్తులో పెట్టమని సలహా ఇచ్చారు. దీంతో పాస్‌పోర్ట్‌ను తిరిగి పొందడానికి మెహదీని నిమిష ప్రియ మత్తు ఇచ్చింది. అయితే మాదకద్రవ్యాలకు అలవాటు పడిన మెహదీని అది ప్రభావితం చేయలేదు. అయితే మరింత డోస్ ఇచ్చేందుకు ప్రయత్నించిన సమయంలో మెహదీ ప్రాణాలు కోల్పోయాడనే ఆరోపణలు ఉన్నాయి. ఆ తర్వాత యెమెన్ నుంచి పారిపోయేందుకు ప్రయత్నిస్తుండగా ఆమెను అదుపులోకి తీసుకున్నారు.