అమెరికాకు పొంచి ఉన్న మంచు తుపాను ?

అమెరికా లోని అనేక రాష్ట్రాల్లో భారీ మంచు, వర్షం, అతి కనిష్ఠ ఉష్ణోగ్రతలు నమోదు కావొచ్చని వాతావరణశాఖ హెచ్చరిస్తోంది. ఈ దశాబ్దంలోనే అత్యంత తీవ్రమైన శీతల తుపాను అని అంచనా వేస్తున్నారు. సుమారు పదిహేనువరకు రాష్ట్రాలు ఈ ప్రభావాన్ని ఎదుర్కొంటాయని, దాదాపు 6 కోట్ల మంది ప్రజలు దీని ప్రభావితమయ్యే అవకాశం ఉందని సమాచారం అందింది. మధ్య అమెరికాలో ప్రారంభమైన ఈ శీతల తుపాను తూర్పు దిశగా కదలుతుందని నేషనల్ వెదర్ సర్వీస్ తెలిపింది. పోలార్ వర్టెక్స్ కారణంగా ప్రతికూల వాతావరణం ఏర్పడే అవకాశం ఉందని, మిస్సౌరీ నుండి మధ్య అట్లాంటిక్ వరకు ఈ తుపాను విస్తరించి, గడిచిన దశాబ్దంలోనే అత్యంత తీవ్రమైన శీతల తుపానుగా మారనున్నట్లు వెల్లడించింది. ఈ ప్రాంతాలలో ప్రయాణం అత్యంత ప్రమాదకరంగా ఉండవచ్చని కూడా తెలిపింది. అమెరికాలో 2011 తరువాత అత్యంత శీతల జనవరిగా నిలవనున్న ఈ తుపాను, వారం రోజులపాటు కొనసాగుతుందని ప్రైవేట్ వాతావరణ సంస్థ 'అక్యూవెదర్' అంచనా వేసింది. ఈ తుపాను ప్రభావంతో అనేక రాష్ట్రాలు అప్రమత్తమయ్యాయి. కెంటకీ, వర్జీనియా, కాన్సాస్, ఆర్కాన్సాస్ రాష్ట్రాలు ఇప్పటికే ఎమర్జెన్సీ విధించాయి. ఇతర దక్షిణాదిన రాష్ట్రాలు, మిస్సిసిపీ, ఫ్లోరిడా వంటి ప్రాంతాలు కూడా ప్రమాదకరమైన చలి వాతావరణాన్ని ఎదుర్కొంటాయని హెచ్చరించాయి. ఇల్లినోయి రాష్ట్రంలో భారీ మంచు వర్షాలు కురిసే అవకాశం ఉందని వాతావరణశాఖ తెలిపింది. కన్సాస్, ఇండియానా, వర్జీనియా ప్రాంతాల్లో 10 నుంచి 25 సెం.మీ వరకు మంచు కురిసే అవకాశం ఉందని అంచనా వేయబడింది. ఈ శీతల తుపాను ప్రభావాన్ని ఎదుర్కొనేందుకు వాషింగ్టన్ డీసీ, బాల్టిమోర్, ఫిలడెల్ఫియా నగరాలు సిద్ధంగా ఉన్నాయి. ఈ ప్రభావం వలన అనేక ప్రాంతాల్లో రవాణాకు తీవ్ర అంతరాయం ఏర్పడవచ్చు, వాహనదారులు మంచులో చిక్కుకుపోవచ్చని వాతావరణశాఖ హెచ్చరించింది. మొత్తంగా, ఈ తుపాను అమెరికా దేశంలోని పలు రాష్ట్రాల్లో కోటి మందికి పైగా ప్రజలను ప్రభావితం చేయనుంది. ప్రజలు వాతావరణ శాఖ సూచనలను గమనించి అప్రమత్తంగా ఉండాలని హెచ్చరించింది.