ఐదు రోజుల్లో పాస్ పోర్ట్ జారీ !
దరఖాస్తు చేసుకున్న ఐదు రోజుల్లోనే పాస్ పోర్ట్ జారీ చేస్తామని సికింద్రాబాద్ రీజినల్ పాస్ పోర్ట్ సెంటర్ డైరెక్టర్స్నేహజ తెలిపారు. తత్కాల్ పాస్ పోర్ట్ ఒక్క రోజులోనే అందిస్తామని స్పష్టం చేశారు. శుక్రవారం రీజినల్పాస్పోర్ట్ ఆఫీసులో 2024 యాన్యువల్ రిపోర్టును ఆమె విడుదల చేశారు. ఈ సందర్భంగా ఆమె మాట్లాడుతూ పాస్పోర్టు జారీలో రీజినల్ పాస్పోర్టు సెంటర్ విశేష పురోభివృద్ధిని సాధించిందన్నారు. గతేడాది 9 లక్షల మంది దరఖాస్తు చేసుకోగా అందులో 7.85లక్షల మందికి పాస్పోర్టులు జారీ చేశామన్నారు. ప్రస్తుతం రీజినల్ పాస్పోర్టు ఆఫీసు పరిధిలో ఐదు పాస్పోర్ట్ సేవా కేంద్రాలు,14 పోస్ట్ఆఫీస్ పాస్పోర్టు సేవా కేంద్రాలు పని చేస్తున్నాయని తెలిపారు. గతేడాది తెలంగాణ రాష్ట్రవ్యాప్తంగా ఉన్న 19 కేంద్రాల్లో ప్రతిరోజూ సరాసరిగా 4,200 దరఖాస్తులు వచ్చాయన్నారు. మొత్తం 7.85 లక్షల మందికి పాస్పోర్టులు జారీ చేశామని, మిగతా వాటిని సరైన డాక్యుమెంట్లు లేకపోవడంతో పెండింగ్ పెట్టామన్నారు. వినియోగదారుల నుంచి పెరుగుతున్న డిమాండ్ కు అనుగుణంగా వరంగల్, ఖమ్మం, వికారాబాద్, మేడ్చల్, మహబూబాబాద్, నల్గొండ, నిజామాబాద్, కరీంనగర్ పీఎస్కేలలో అపాయింట్మెంట్ల సంఖ్యను పెంచామని ఆమె వెల్లడించారు. ప్రస్తుతం పాస్పోర్టుకు పోలీసు ఎంక్వైరీకూడా ఆన్లైన్లో కొనసాగుతుందని తెలిపారు. వినియోగదారులకు పాస్పోర్టు సేవలు మరింత చేరువ చేసేందుకు కొత్తగా మొబైల్ పాస్పోర్టు సేవలు అందుబాటులోకి తెచ్చామన్నారు. అలాగే, దరఖాస్తు దారులు ఎదుర్కొంటున్న సమస్యల సత్వర పరిష్కారం కోసం ప్రత్యేకంగా 8121401532 నంబరుతో వాట్సాప్ ఏర్పాటు చేశామన్నారు. ఎలాంటి సమస్యలు ఉన్నా ఈ నంబరుకు వాట్సాప్తో తమకు ఫిర్యాదు చేస్తే వాటి పరిష్కారానికి చర్యలు తీసుకుంటామని చెప్పారు.
